[1] Yakuba y'a ɲɛ kɔrɔta ka filɛli kɛ. A ye Esau natɔ ye ni cɛ kɛmɛ naani ye. Yakuba ye a denw tila ka u di Lea ni Rasɛl ani jɔnmuso fila ma.
[2] A ye jɔnmusow ni u denw bila ɲɛ fɛ ka Lea ni a denw bila olu kɔ ka Rasɛl ni Yusufu bila olu bɛɛ kɔ.
[3] A yɛrɛ taara u ɲɛ ka i biri duguma siɲɛ wolonwula, fo ka gɛrɛ a kɔrɔkɛ la.
[4] Esau bolila ka taa a kunbɛn, ka i meleke a la kelekelekele, ka a da susu. U kasira.
[5] Esau y'a ɲɛ kɔrɔta ka musow ni denw ye, a ko: «Ninw ye jɔnw ye i fɛ?» Yakuba y'a jaabi ko: «Ala ye den minw di i ka jɔnkɛ, ne ma, olu don.»
[6] O tuma la jɔnmusow ni u denw nana ka u ɲɔngiri.
[7] O kɔ, Lea ni a denw gɛrɛla a la ka u ɲɔngiri. O kɔ, Yusufu ni Rasɛl gɛrɛla a la ka u ɲɔngiri.
[8] Esau ko: «Ne ni jama min bɛnna, o kun ye mun ye?» Yakuba y'a jaabi ko: «Walisa ne ko ka diya i ye, ne matigi.»
[9] Esau ko: «Fɛn min bɛ ne bolo, o bɛ ne bɔ, ne dɔgɔkɛ. I ka to ni i ka fɛnw ye.»
[10] Yakuba ko: «Ayi, nka ne b'i deli, ni ne ko ka di i ye, i ka nin sama fɛnw minɛ ne bolo, k'a masɔrɔ ne ye i ɲɛda ye i ko mɔgɔ bɛ Ala ɲɛda ye cogo min na, i ye ne minɛ ko ɲuman.
[11] Ne ka sama min sera i ma, i ka o minɛ, sabu Ala makarila ne la, fɛn bɛɛ bɛ ne fɛ.» A y'a gɛlɛya a ma, Esau y'u minɛ.
[12] Esau ko: «An ka taa. A' ye na, an ka sira minɛ. Ne na taa i ɲɛ.»
[13] Yakuba y'a fɔ a ye ko: «Ne matigi, i y'a dɔn ko denw barika ka dɔgɔ, ko denw bɛ bagan misɛnw ni misiw fɛ. Ni taama gɛlɛyara u ma tile kelen, bagankulu bɛɛ na sa.
[14] Ne b'i deli, ne matigi, i ka tɛmɛn ne ɲɛ. Ne bɛ na taama dɔɔnin dɔɔnin ka kɛɲɛ ni bagankulu ni denmisɛnw taama cogo ye fo ka taa se i ka so Seir.»
[15] Esau ko: «Ne na ne fɛ mɔgɔ dɔw to i fɛ.» Yakuba ko: «Mun na? Nka ne ko ka diya ne matigi ye.»
[16] O don na Esau ye sira minɛ ka kɔsegin ka taa Seir.
[17] Yakuba taara ɲɛ fo ka se Sukɔt, ka so jɔ yen ka suluw dila a ka bagankuluw ye. O de kosɔn o yɔrɔ tɔgɔ dara ko Sukɔt.
[18] Yakuba kɔseginnen ka bɔ Padan-Aram, a sera Sisɛm dugu la hɛrɛ la, o bɛ Kanan jamana la. A ye a ka bugu jɔ o dugu kuntilenna la.
[19] A y'a ka finiso jɔ yɔrɔ min na, a ye o dugukolo san Sisɛm fa Hamɔr denkɛw fɛ warijɛ kɛmɛ la.
[20] Yakuba ye saraka bɔlan jɔ yen, ka a tɔgɔ da ko El-Elohe-Israɛl.