[1] Fɔlɔfɔlɔ Ala ye sankolo ni dugukolo da.
[2] Dugukolo labɛnbali lankolon tun don. Dibi tun bɛ ji dunba kun na. Ala Ni birilen tun bɛ ji kun na.
[3] Ala ko: «Kɛnɛ ka bɔ.» Kɛnɛ bɔra.
[4] Ala y'a ye ko kɛnɛ ka ɲi. A ye kɛnɛ ni dibi fara ka bɔɲɔgɔn na.
[5] Ala ye kɛnɛ wele ko tile, ka dibi wele ko su. Wula kɛra, sɔgɔma fana kɛra. O ye don fɔlɔ ye.
[6] Ala ko: «Furancɛ ka kɛ jiw ni ɲɔgɔn cɛ, a ka jiw fara ka bɔ ɲɔgɔn na.»
[7] Ala ye o furancɛ dila ka o furancɛ jukɔrɔ ji fara ka bɔ o furancɛ sanfɛ ji la. A kɛra ten.
[8] Ala ye o furancɛ sanfɛla wele ko sankolo. Wula kɛra, sɔgɔma fana kɛra. O ye don filanan ye.
[9] Ala ko: «Sankolow jukɔrɔ ji ka lajɛ yɔrɔ kelen na, gwele ka bɔ.» O kɛra ten.
[10] Ala ye gwele wele ko dugukolo, ka ji lajɛlenw wele ko kɔgɔji. Ala y'a ye ko o ka ɲi.
[11] Ala ko: «Dugukolo ka bin ni suman bɔ ka kɛɲɛ ni u sifaw ye. U kolo ka kɛ u mɔ la dugukolo kan.» A kɛra ten.
[12] Dugukolo ye bin ni suman bɔ ka kɛɲɛ ni u sifaw ye, ani jiri dentaw bɛɛ ka kɛɲɛ ni u sifaw ye. U kolo bɛ u mɔ la ka kɛɲɛ ni u sifaw ye. Ala y'a ye ko o ka ɲi.
[13] Wula kɛra, sɔgɔma fana kɛra. O ye don sabanan ye.
[14] Ala ko: «Kɛnɛbɔlanw ka kɛ sankolo furancɛ la ka tile ni su fara ka bɔ ɲɔgɔn na. U ka kɛ taamashyɛnw ye ka waatiw ni tilew ni sanw faranfasi.
[15] U ka kɛ kɛnɛbɔlanw ye sankolo furancɛ la ka kɛnɛ bɔ dugukolo kan.» A kɛra ten.
[16] Ala ye kɛnɛbɔlanba fila dila. U la belebeleba ka sigi tile kun na, u la dɔgɔmanni ka sigi su kun na. A ye dolow fana dila.
[17] Ala ye u bila sankolo furancɛ la, u ka kɛnɛ bɔ dugukolo kan.
[18] U ka sigi tile kun na ani su kun na ka kɛnɛ ni dibi fara ka bɔ ɲɔgɔn na. Ala y'a ye ko o ka ɲi.
[19] Wula kɛra, sɔgɔma fana kɛra. O ye don naaninan ye.
[20] Ala ko: «Fɛnɲɛnama caman ka sɔrɔ ji la ka caya, kɔnɔw ka u pan dugukolo san fɛ sankolo furancɛ la.»
[21] Ala ye kɔgɔji la dafɛn belebelebaw da, ani fɛnɲɛnama lamagata sifaw bɛɛ. U cayara ji la kosɛbɛ ka kɛɲɛ ni u sifaw ye. A ye kɔnɔw fana da ka kɛɲɛ ni u sifaw ye. Ala y'a ye ko o ka ɲi.
[22] Ala dubara u ye k'a fɔ u ye ko u ka denw sɔrɔ ka caya ka kɔgɔji fa, kɔnɔw fana ka caya dugukolo kan.
[23] Wula kɛra, sɔgɔma fana kɛra. O ye don duurunan ye.
[24] Ala ko: «Dugukolo ka fɛnɲɛnama sifaw bɛɛ bɔ, baganw ni fɛn fofotaw ani dugukolo kan sogo sifaw bɛɛ.» A kɛra ten.
[25] Ala ye dugukolo kan sogow bɛɛ dila ka kɛɲɛ ni u sifaw ye ani baganw ka kɛɲɛ ni u sifaw ye ani dugukolo kan fɛn fofotaw ka kɛɲɛ ni u sifaw ye. Ala y'a ye ko o ka ɲi.
[26] Ala ko: «An ka mɔgɔ dila an yɛrɛw ja la ka kɛɲɛ ni an yɛrɛw bisigi ye. U na kɛ ji la jɛgɛw ni sanfɛ kɔnɔw ni baganw ni dugukolo bɛɛ ani dugukolo kan fɛn fofotaw bɛɛ tigiw ye.»
[27] Ala ye mɔgɔ da a yɛrɛ ja la, a ye a da Ala ja la. A ye u da cɛ ni muso.
[28] Ala dubara u ye. Ala y'a fɔ u ye ko: «Aw ka bange ka caya ka dugukolo fa ka a kolo ka kɛ ji la jɛgɛw ni sanfɛ kɔnɔw ni dugukolo kan fɛnɲɛnama lamagataw bɛɛ tigiw ye.»
[29] Ala ko: «A filɛ, ne ye dugukolo kan suman bɛɛ ani jiri denta kolomaw bɛɛ di aw ma ka kɛ aw ka dumuni fɛn ye.
[30] Dugukolo kan sen naanima fɛnw bɛɛ ni sanfɛ kɔnɔw bɛɛ ani dugukolo kan fɛn fofotaw bɛɛ, ninakili bɛ fɛn o fɛn na, ne ye bin nugu bɛɛ di olu ma dumuni fɛn ye.» A kɛra ten.
[31] Ala ye a ka fɛn dilalenw bɛɛ ye, a filɛ, o bɛɛ ɲɛna kosɛbɛ. Wula kɛra, sɔgɔma fana kɛra. O ye don wɔɔrɔnan ye.