[1] Ayiwa Abrama muso Sarayi tun ma den si bange a cɛ ye. Jɔnmuso dɔ tun bɛ Sarayi fɛ, Misiraka don, a tɔgɔ ko Agar.
[2] Sarayi y'a fɔ Abrama ye ko: «A filɛ, Matigi ye ne bali bange la. Ne b'i deli, i ka don ne ka jɔnmuso fɛ, a dɔrɔ ne na den dɔw sɔrɔ ale fɛ.» Abrama y'a muso kan minɛ.
[3] O tuma la Abrama muso Sarayi y'a ka jɔnmuso Misiraka Agar di a cɛ Abrama ma ka kɛ a muso ye. O y'a sɔrɔ Abrama sigili tun bɛ san tan bɔ Kanan jamana la.
[4] Abrama donna Agar fɛ, o ye kɔnɔ ta. Agar y'a ye ko a ye kɔnɔ ta tuma min na, a mamuso dɔgɔyara a ɲɛ na.
[5] Sarayi y'a fɔ Abrama ye ko: «Ne tɔɲɔli ka bi i kan. Ne ye ne ka jɔnmuso di i ma, a y'a ye ko a kɔnɔma don minkɛ, ne dɔgɔyara a ɲɛ na. Matigi ka kiri tigɛ ne ni i cɛ.»
[6] Abrama ye Sarayi jaabi ko: «A filɛ, i ka jɔnmuso bɛ i bolo. Min ka di i ye, i ka o kɛ a la.» O tuma la Sarayi ye Agar minɛ ko juguya, fo o bolila ka bɔ a kɔrɔ.
[7] Matigi ka mɛlɛkɛ nana Agar sɔrɔ ji boyi dɔ da la kungokolon kɔnɔ, o ji boyi bɛ Sur sira la.
[8] A y'a fɔ a ye ko: «Sarayi ka jɔnmuso Agar, i bɔra min? I bɛ taa min?» Agar y'a jaabi ko: «Ne bolitɔ don ne mamuso Sarayi ɲɛ.»
[9] Matigi ka mɛlɛkɛ y'a fɔ a ye ko: «Segin ka taa i mamuso yɔrɔ, ka kolo a ye.»
[10] Matigi ka mɛlɛkɛ y'a fɔ a ye ko: «Ne na i bɔnsɔn caya kosɛbɛ, o na kɛ dama dɔnbali ye.»
[11] Matigi ka mɛlɛkɛ y'a fɔ a ye fana ko: «A filɛ, i kɔnɔma don. I na denkɛ bange, i na a tɔgɔ da ko Isumaɛl, k'a masɔrɔ Matigi ye i kan mɛn k'i to i ka tɔɔrɔ la.
[12] A na kɛ i ko kungo fali. A na mɔgɔw bɛɛ kɛlɛ, mɔgɔw bɛɛ na a kɛlɛ. A na sigi a balimaw bɛɛ kuntilenna la.»
[13] Matigi min kumana Agar fɛ, a ye o tɔgɔ da Ne Yebaa Ala. A ko: «Ne y'a ye ka ne ɲɛnama to wa?»
[14] O de kosɔn o kɔlɔn tɔgɔ dara Lakayi-roi. A bɛ Kadɛs ni Berɛd cɛ.
[15] Agar ye denkɛ bange Abrama ye. A ye denkɛ min bange Abrama ye, Abrama ye o tɔgɔ da ko Isumaɛl.
[16] Agar ye Isumaɛl bange Abrama ye tuma min na, o y'a sɔrɔ Abrama si tun bɛ san bisegin ni wɔɔrɔ bɔ.