[1] Ayiwa Matigi Ala tun ye kungokɔnɔ fɛnɲɛnama minw da, sa tun ka kegun ni u tɔw bɛɛ ye. Sa de y'a fɔ muso ye ko: «Tiɲɛ la, Ala y'a fɔ ko aw kana nakɔtu la jiridenw bɛɛ dun wa?»
[2] Muso y'a jaabi ko: «An bɛ se ka nakɔtu la jiridenw bɛɛ dun.
[3] Nka jiri min bɛ nakɔtu cɛmancɛ la, Ala ko an kana o den dun, an kana maga o la. N'o kɛra, an na sa.»
[4] Ayiwa sa y'a fɔ muso ye ko: «Aw tɛna sa dɛ.
[5] Ala y'a dɔn ko ni aw ye o jiriden dun don min na, aw ɲɛw na yɛlɛ, aw na kɛ i ko Ala, ka ko ɲuman ni ko jugu dɔn.»
[6] Muso y'a ye ko o jiriden na kɛ dumuni fɛn duman ye, ko a filɛ ka di mɔgɔ ɲɛ na, ko mɔgɔ ɲɛ bɛ bɔ a fɛ, katuguni hakilitigiya b'a la. A ye o den dɔ ta k'a dun k'a dɔ di a cɛ ma a kɛrɛ fɛ, ale fana y'a dun.
[7] U fila bɛɛ ɲɛw yɛlɛla, u y'a dɔn ko u farilankolon don. U ye toro sun furaw kala ɲɔgɔn na ka npogow dila u yɛrɛw ye.
[8] U ye Matigi Ala yaalayaalatɔkan mɛn nakɔtu la wula fɛ. Ayiwa cɛ ni a muso ye u dogo Matigi Ala ɲɛ nakɔtu la jiriw cɛma.
[9] Matigi Ala ye cɛ wele k'a fɔ a ye ko: «I bɛ min?»
[10] Cɛ y'a jaabi ko: «Ne ye i kan mɛn nakɔtu la, ne siranna, ne ye ne dogo, katuguni ne farilankolon don.»
[11] Matigi Ala ko: «Jɔn y'a fɔ i ye ko i farilankolon don? Ne y'a fɔ i ye ko i kana jiriden min dun, i ye o dun wa?»
[12] Cɛ y'a jaabi ko: «I ye muso min di ne ma ka kɛ ne fɛ, o ye jiriden dɔ di ne ma, ne y'a dun.»
[13] Matigi Ala y'a fɔ muso ye ko: «Mun y'a to i ye o kɛ?» Muso y'a jaabi ko: «Sa ye ne nɛgɛn, ne y'a dun.»
[14] Matigi Ala y'a fɔ sa ye ko: «I ye nin kɛ, o de kosɔn i dangalen bɛ ka tɛmɛn baganw ni kungo sogow bɛɛ kan. I na fofo i kɔnɔbara kan, i na buguri dun i si tilew bɛɛ la.
[15] Ne na juguya bila i ni muso cɛ, ka a bila i bɔnsɔn ni ale bɔnsɔn cɛ. Muso bɔnsɔn na i kunkolo ɲɔɲɔ, i na a cin a sen tontoli la.»
[16] Ala y'a fɔ muso ye ko: «Ne na bange sɛgɛn gɛlɛya i ma haali. I na tɔɔrɔ tin fɛ. I na kɛ i cɛ fɛ, ale na kɛ i kuntigi ye.»
[17] Ala y'a fɔ cɛ ye ko: «Ne y'a fɔ i ye, ko i kana jiriden min dun, nka i ye i muso kan minɛ ka o dun, o de y'a to dugukolo dangalen bɛ i kosɔn. I na dumuni fɛn sɔrɔ a la ni tɔɔrɔba ye i si tilew bɛɛ la.
[18] A na ŋɔni ni bin jugu bɔ i ye fana, sɛnɛ fɛnw na kɛ i balo ye.
[19] I na dumuni fɛn sɔrɔ i ɲɛda wɔsi la, fo i ka kɔsegin dugukolo la tuma min na, katuguni i bɔra o la. I ye buguri ye, i na kɔsegin buguri la.»
[20] Hadama ye a muso tɔgɔ da ko Hawa, katuguni mɔgɔ ɲɛnamaw bɛɛ ba don.
[21] Matigi Ala ye wolo dulɔkiw dila Hadama ni a muso ye ka u fɛɛrɛ bɔ ni olu ye.
[22] Matigi Ala ko: «A filɛ, mɔgɔ kɛra i ko anw la kelen, ka ko ɲuman ni ko jugu dɔn. Sisan an k'a bali, walisa a kana a bolo mɔɔnɔbɔ ka ɲɛnamaya jiriden ta ka o dun ka a ɲɛnama to badaa.»
[23] O de y'a to Matigi Ala ye mɔgɔ labɔ Edɛn nakɔtu la, a bɔra dugukolo min na, a ka taa ka o sɛnɛ.
[24] Ayiwa a ye mɔgɔ gɛn ka bɔ yen. A ye serubɛnw sigi Edɛn kɔrɔn yanfan fɛ ka npan tasumama bila yen, a bɛ munumunu fan bɛɛ la ka ɲɛnamaya jiri sira kɔlɔsi.