[1] Lea denmuso Dina, a ye o min bange Yakuba ye, o taara bɔ o jamana denmusow ye.
[2] Hev bɔnsɔn Hamɔr tun ye jamana kuntigi ye. O denkɛ Sisɛm ye Dina ye, a y'a diyagoya ka da a fɛ k'a tiɲɛn.
[3] Yakuba denmuso Dina ko diyara Sisɛm ye haali. A y'a kanu ka kuma duman fɔ a ye.
[4] Sisɛm y'a fɔ a fa Hamɔr ye ko: «I ka nin npogotigi ɲini ne ye, ne k'a furu.»
[5] Yakuba y'a mɛn ko Sisɛm y'a denmuso Dina tiɲɛn. A denkɛw tun bɛ a ka baganw gɛn kungo la, Yakuba y'i makun sani u ka na.
[6] Sisɛm fa Hamɔr taara Yakuba sɛgɛrɛ ka kuma a fɛ.
[7] Yakuba denkɛw kɔseginna ka bɔ kungo la ka o ko mɛn minkɛ, u dusu kasira, u diminna kosɛbɛ, k'a masɔrɔ Sisɛm ye maloya ko kɛ Israɛl la ka da Yakuba denmuso fɛ, o tɛ ko kɛta ye fewu.
[8] Hamɔr kumana u fɛ, a ko: «Aw denmuso ko diyara ne denkɛ Sisɛm ye kosɛbɛ. Ne bɛ aw deli, aw ka o di a ma, a k'a furu.
[9] Aw ka furu siri an fɛ. Aw ka aw denmusow di an ma furu la, ka an denmusow furu.
[10] Aw ka sigi an cɛma, jamana na labila aw ye. Aw na sigi ka sannifeere kɛ ka nafolo sɔrɔ yan.»
[11] Sisɛm y'a fɔ o denmuso fa ni a kɔrɔkɛw ye ko: «Ne ko ka diya aw ye. Aw mana fɛn o fɛn fɔ ne ye, ne na o di.
[12] Furu nafolo ni nili fɛn bonya o bonya, aw mana min fɔ, ne na o di ka kɛɲɛ ni aw ka kuma fɔlen ye. Nka aw ka o npogotigi di ne ma, ne k'a furu.»
[13] Yakuba denkɛw ye Sisɛm ni a fa Hamɔr jaabi ni keguya ye, sabu Sisɛm tun ye u dɔgɔmuso Dina tiɲɛn.
[14] U y'a fɔ olu ye ko: «An tɛ se ka an dɔgɔmuso di cɛ bolokobali ma, sabu o ye maloya ko ye an fɛ.
[15] An bɛ sɔn aw ka fɔlen ma nin cogo kelen na. Ni aw cɛw bɛɛ kelen-kelen bolokora ka kɛ an bɔɲɔgɔnko ye,
[16] o tuma la an na an denmusow di aw ma, an na aw denmusow furu. An na sigi aw fɛ, an na kɛ siya kelen ye.
[17] Nka ni aw ma sɔn ka an lamɛn ka boloko, ayiwa, an na taa ni an denmuso ye.»
[18] U ka kuma diyara Hamɔr ni a denkɛ Sisɛm ye.
[19] O kamalen ma mɛn, a ye o ko kɛ, sabu Yakuba denmuso ko diyara a ye haali. Mɔgɔw tun b'a bonya fana ka tɛmɛn a fa ka so mɔgɔw bɛɛ kan.
[20] Hamɔr ni a denkɛ Sisɛm taara u ka dugu donda la ka kuma u ka dugu cɛw fɛ ko:
[21] «Nin mɔgɔw bɛ hɛrɛ dama don an ni u cɛ. O de y'a to an ka sɔn u ka sigi an ka jamana la ka sannifeere kɛ yan. Nin jamana ka bon, u bɛ kun a la. An ka u denmusow furu, ka an denmusow di u ma.
[22] Nka nin mɔgɔw tɛna sɔn ka sigi an fɛ walisa an ka kɛ siya kelen ye, fɔ ni an cɛw bɛɛ bɛ boloko, i ko olu bolokora cogo min na.
[23] U ka misiw ni u ka nafolo ni u ka baganw bɛɛ tɛna kɛ an ta ye wa? An ka u sago kɛ dɔrɔn, u na sigi an fɛ.»
[24] Mɔgɔ minw bɔra dugu donda fɛ, olu bɛɛ ye Hamɔr ni a denkɛ Sisɛm ka kuma lamɛn. Cɛ minw bɔra u ka donda fɛ, olu bɛɛ bolokora.
[25] O tile sabanan don, ka u dimitɔ to, Yakuba denkɛw la fila, Simeɔn ni Levi, Dina kɔrɔkɛw, olu fila bɛɛ ye u ka npanw ta ka taa dugu kɔnɔ ni ja gɛlɛya ye ka o cɛw bɛɛ faga.
[26] U ye Hamɔr ni a denkɛ Sisɛm faga ni npan ye, ka Dina minɛ ka bɔ Sisɛm ka so kɔnɔ ka taa.
[27] Yakuba denkɛw taara mɔgɔ fagalenw yɔrɔ la ka o dugu nafolo bɛɛ cɛ, sabu u ye u dɔgɔmuso tiɲɛn.
[28] U ye olu ka bagan misɛnw ni u ka misiw ani u ka faliw cɛ, ani dugu kɔnɔ fɛnw bɛɛ ni foro la fɛnw.
[29] U ye u ka nafolo bɛɛ ani u ka denmisɛnw ni u musow bɛɛ cɛ ka so kɔnɔ fɛnw bɛɛ cɛ ka taa ni olu ye.
[30] Yakuba y'a fɔ Simeɔn ni Levi ye ko: «Aw ye ne tɔɔrɔ ka ne mangoya nin jamana mɔgɔw Kanankaw ni Ferɛz siya ye. Ne man ca. Olu na u lajɛ ne kama ka ne kɛlɛ ka ne ka so halaki.»
[31] U y'a jaabi ko: «A ma an dɔgɔmuso kɛ i n'a fɔ jatɔmuso wa?»