[1] Kɔngɔ donna jamana la. Kɔngɔ min kɛra Ibrahima tile la, nin kɛra o kɔ. Isaka taara Filisitikaw ka masakɛ Abimelɛk yɔrɔ Gerar.
[2] Matigi y'i jira a la k'a fɔ a ye ko: «I kana taa Misira jamana la. Ne na jamana min ko fɔ i ye, i ka sigi o la.
[3] I ka sigi nin jamana la, ne na to i fɛ ka duba i ye. Ne na nin jamanaw bɛɛ di i ni i bɔnsɔn ma. Ne ye kalili min kɛ i fa Ibrahima ye, ne na o dafa.
[4] Ne na i bɔnsɔn caya i ko sankolola dolow, ka nin jamanaw bɛɛ di i bɔnsɔn ma. Dugukolo kan siyaw bɛɛ na duba sɔrɔ i bɔnsɔn na,
[5] katuguni Ibrahima ye ne kan minɛ, ka ne ka kalili ni ne ka ci fɔlenw ni ne ka sariyaw mara.»
[6] Isaka sigira Gerar.
[7] Yen cɛw y'a ɲininka a muso ko la tuma min na, a y'a fɔ ko: «Ne balimamuso don.» A tun bɛ siran k'a fɔ ko a muso don, ko o yɔrɔ mɔgɔw kana na a faga Rebɛka kosɔn, sabu a cɛ tun ka ɲi haali.
[8] Isaka mɛnna yen. Don dɔ la, ka Filisitikaw ka masakɛ to a ka so kɔnɔ, a ye filɛli kɛ finɛtiri fɛ ka Isaka ye, a ni a muso Rebɛka tun bɛ tulon kɛ ɲɔgɔn fɛ.
[9] Abimelɛk ye Isaka wele k'a fɔ a ye ko: «Siga t'a la, i muso don. I y'a fɔ cogo di ko i balimamuso don?» Isaka y'a jaabi ko: «Ne y'a fɔ ten, sabu ne tun bɛ siran ko ne kana na sa a kosɔn.»
[10] Abimelɛk ko: «I dun ye mun kɛ an na? Dɔɔnin an ka mɔgɔ dɔ tun na da i muso fɛ, i tun na jalaki bi an kan.»
[11] O tuma la Abimelɛk ye ci fɔ k'a gɛlɛya a ka mɔgɔw bɛɛ ma ko: «Ni mɔgɔ o mɔgɔ magara nin cɛ wala a muso la, o na faga.»
[12] Isaka ye sɛnɛ kɛ o jamana la, a ye suman si min dan, a ye o ɲɔgɔn kɛmɛ-kɛmɛ sɔrɔ o san na, k'a masɔrɔ Matigi dubara a ye.
[13] Isaka fɛntigiyara ka jiidi ka ta'a fɛ. A kɛra nafolotigiba ye.
[14] Bagan misɛn kuluw ni bagan kunba kuluw ni jɔn caman tun b'a fɛ. Filisitikaw y'a keleya.
[15] A fa ka jɔnw tun ye kɔlɔn minw sen a fa Ibrahima tile la, Filisitikaw tun ye olu bɛɛ lafa ka u da geren ni bɔgɔ ye.
[16] Abimelɛk y'a fɔ Isaka ye ko: «I ka taa k'i mabɔ an na, sabu i fanga ka bon an ta ye kosɛbɛ.»
[17] Isaka bɔra o yɔrɔ la ka taa bugu jɔ Gerar jɛkɛnɛ la, ka i sigi yen.
[18] Kɔlɔn minw tun senna a fa Ibrahima tile la ni Filisitikaw tun ye olu da geren Ibrahima salen kɔ, Isaka ye olu kɔnɔ labɔ ko kura. A fa tun ye tɔgɔ minw da u la, a ye u wele o tɔgɔw la.
[19] Isaka ka jɔnw ye kɔlɔn sen jɛkɛnɛ la, o kɛra ji boyi ye.
[20] Gerar bagan gɛnnaw ye Isaka ka bagan gɛnnaw kɛlɛ. Gerar bagan gɛnnaw y'a fɔ ko: «Ji ye an ta ye.» Isaka ye o kɔlɔn tɔgɔ da Esɛk, sabu u ye kɛlɛ tigɛ a la yen.
[21] A ka jɔnw ye kɔlɔn wɛrɛ sen. U kɛlɛla o fana nɔ fɛ. A ye o tɔgɔ da Sitina.
[22] Isaka bɔra o yɔrɔ la ka kɔlɔn wɛrɛ sen. Kɛlɛ ma kɛ o nɔ fɛ. A y'o tɔgɔ da Rehɔbɔt, k'a masɔrɔ a ko: «Matigi ye an fɛrɛ sisan, an na jiidi jamana la.»
[23] Isaka bɔra o yɔrɔ la ka taa Beɛr-Seba.
[24] Matigi y'i jira a la o su fɛ k'a fɔ a ye ko: «Ne ye i fa Ibrahima ka Ala ye. I kana siran, katuguni ne bɛ i fɛ. Ne na duba i ye ka i bɔnsɔn caya ne ka jɔnkɛ Ibrahima kosɔn.»
[25] Isaka ye saraka bɔlan jɔ o yɔrɔ la ka Matigi bato, ka a ka finiso jɔ yen. Isaka ka jɔnw ye kɔlɔn sen o yɔrɔ la.
[26] Abimelɛk ani a terikɛ Ahuzat ni a ka kɛlɛbolo kuntigi Pikɔl bɔra Gerar ka taa Isaka sɛgɛrɛ.
[27] Isaka y'a fɔ u ye ko: «Mun y'a to aw nana ne sɛgɛrɛ, k'a sɔrɔ aw ye ne koniya ka ne gɛn ka bɔ aw cɛma?»
[28] U y'a jaabi ko: «An ɲɛ b'a la ko Matigi bɛ i fɛ, o de y'a to an ko, an k'an kali ɲɔgɔn ye ka layidu ta ɲɔgɔn ye
[29] ko i tɛna ko jugu kɛ an na, i ko an fana ma maga i la cogo min na. An ye ko ɲuman kɛ i ye tuma bɛɛ ka i bila ka taa hɛrɛ la. Matigi dubara i ye sisan.»
[30] Isaka ye dumuniba dila u ye, u ye dumuni kɛ ka minni kɛ.
[31] U solila ka wuli ka u kali ɲɔgɔn ye. Isaka ye u labila, u taara hɛrɛ la.
[32] O don yɛrɛ la, Isaka ka jɔnw nana u ka kɔlɔn sennen kibaru fɔ a ye. U ko: «An ye ji sɔrɔ.»
[33] A y'o tɔgɔ da ko Siba. O de kosɔn o dugu tɔgɔ ko Beɛr-Seba halibi.
[34] Esau si san binaaninan la, a ye Hɛti bɔnsɔn Beyeri denmuso Judit ni Hɛti bɔnsɔn Elɔn denmuso Basimat furu.
[35] Olu ye Isaka ni Rebɛka dusu kasi kosɛbɛ.