[1] Matigi y'a fɔ Nuhun ye ko: «I ni i ka so mɔgɔw bɛɛ ka don kurunba kɔnɔ katuguni ne ye e de tilennen ye ne ɲɛ kɔrɔ nin waati mɔgɔw cɛma.
[2] I ka wolonwula-wolonwula bɔ o sen naanima fɛn jɛlen sifaw bɛɛ la, u cɛmaw ni u musomaw, ka fila-fila bɔ sen naanima fɛn nɔgɔlen sifaw bɛɛ la, u cɛmaw ni u musomaw.
[3] I ka wolonwula-wolonwula bɔ sanfɛ kɔnɔ sifaw bɛɛ la fana, u cɛmaw ni u musomaw, walisa u si ka mara dugukolo yɔrɔ bɛɛ la.
[4] Ni tile wolonwula tɛmɛnna, ne na sanji lana dugukolo kan tile binaani kɔnɔ. Ne na ne ka fɛnɲɛnama dalenw bɛɛ halaki ka u ban dugukolo kan.»
[5] Matigi ye min fɔ Nuhun ye, a ye o bɛɛ kɛ.
[6] Nuhun san kɛmɛ wɔɔrɔnan la, jiba nana dugukolo kan.
[7] Nuhun ni a denkɛw ni a muso ni a denkɛw musow donna kurunba kɔnɔ ɲɔgɔn fɛ jiba ɲɛ.
[8] Sen naanima fɛn jɛlenw ni sen naanima fɛn nɔgɔlenw ani kɔnɔw ni dugukolo kan fɛn fofotaw,
[9] u bɛɛ la fila-fila, u cɛmaw ni u musomaw donna kurun kɔnɔ Nuhun fɛ, i ko Ala y'a fɔ Nuhun ye cogo min na.
[10] Ayiwa tile wolonwula tɛmɛnnen kɔ, jiba nana dugukolo kan.
[11] Nuhun san kɛmɛ wɔɔrɔnan kalo filanan tile tan ni wolonwulanan don, o don yɛrɛ la ji boyi dunbaw bɛɛ karila, sankolola ji mara yɔrɔw dayɛlɛla.
[12] Sanji nana dugukolo kan tile binaani ni su binaani kɔnɔ.
[13] O don yɛrɛ la Nuhun ni Nuhun denkɛw Sɛm ni Kam ani Jafɛt, ani Nuhun muso ni a denkɛw musow saba donna kurunba kɔnɔ.
[14] O mɔgɔw donna ani kungo sogow sifaw bɛɛ ani fɛn minw bɛ fofo dugukolo kan, olu sifaw bɛɛ, ani kɔnɔw sifaw bɛɛ, kamanma fɛnw bɛɛ.
[15] Ninakili bɛ farisogo fɛn o fɛn na, u bɛɛ fila-fila donna kurun kɔnɔ Nuhun fɛ.
[16] Olu cɛmaw ni u musomaw donna ka bɔ farisogo bɛɛ la, i ko Ala tun y'a fɔ a ye cogo min na. Matigi ye kurun da tugu u da la.
[17] Jiba nana dugukolo kan tile binaani kɔnɔ. Ji bonyara ka kurunba kɔrɔta ka a fogon dugukolo san fɛ.
[18] Ji nana ka bonya dugukolo kan, kurunba fogonna ji kun na.
[19] Ji bonyara dugukolo kan ka taa ɲɛ kosɛbɛ, fo ka sankolo jukɔrɔ kulu jamanjanw bɛɛ tunun.
[20] Ji bonyara kuluw san fɛ fo ka nɔnkɔn ɲɛ tan ni duuru bɔ, kuluw tununna.
[21] Farisogoma fɛn minw bɛ lamaga dugukolo kan, olu bɛɛ sara, kɔnɔw ni baganw ni kungo sogow ani fɛn fofotaw minw bɛ fofo dugukolo kan, ani mɔgɔw bɛɛ.
[22] Gwele kan fɛn, fɛn o fɛn bɛ ninakili, olu bɛɛ sara.
[23] Ala ye dugukolo kan fɛnɲɛnamaw bɛɛ halaki ka u ban dugukolo kan, mɔgɔw ni baganw ni fɛn fofotaw ani sanfɛ kɔnɔw, u bɛɛ halakira ka u ban dugukolo kan. Nuhun ani minw tun bɛ kurunba kɔnɔ a fɛ, olu dama kisira.
[24] Ayiwa ji tun ka bon dugukolo kan tile kɛmɛ ni biduuru kɔnɔ.