[1] Ala y'a fɔ Yakuba ye ko: «I ka wuli ka taa Bɛtɛl k'i sigi yen, ka saraka bɔlan jɔ Ala ye yen, o min y'a yɛrɛ jira i la i boli tuma la i kɔrɔkɛ Esau ɲɛ.»
[2] O tuma la Yakuba y'a fɔ a so mɔgɔw ni a fɛ mɔgɔw bɛɛ ye ko: «Siya wɛrɛw ka bato fɛn minw bɛ aw cɛma, aw ka olu bɛɛ bɔ yen ka aw saniya ka aw ka finiw yɛlɛma.
[3] An ka wuli ka taa Bɛtɛl. Ne na saraka bɔlan jɔ Ala ye yen, o min ye ne ka delili jaabi ne degun don na, ka to ne fɛ ne taa yɔrɔw bɛɛ la.»
[4] Siya wɛrɛw ka bato fɛn minw tun bɛ u bolo ani tulola fɛnw, u ye olu bɛɛ di Yakuba ma. Yakuba ye u dogo sen sun jukɔrɔ Sisɛm da fɛ.
[5] U ye sira minɛ ka taa. Ala ye siranba bila u lamini duguw la, u ma Yakuba denw nɔgɛn.
[6] Yakuba ni a fɛ mɔgɔw sera Luz, o ye Bɛtɛl ye, Kanan jamana la.
[7] A ye saraka bɔlan jɔ yen, ka o yɔrɔ tɔgɔ da ko El-Bɛtɛl, katuguni a bolitɔ a kɔrɔkɛ ɲɛ, Ala tun ye i jira a la o yɔrɔ la.
[8] Rebɛka lamɔbaa Debɔra sara. U y'a su don Bɛtɛl da fɛ sen sun dɔ jukɔrɔ, ka o tɔgɔ da ko ɲɛji Sen Sun.
[9] Yakuba nalen kɔ ka bɔ Padan-Aram, Ala y'i jira a la ko kura ka duba a ye.
[10] Ala y'a fɔ a ye ko: «I tɔgɔ ko Yakuba. I tɛna wele Yakuba tun, nka i tɔgɔ na da ko Israɛl.» A y'a tɔgɔ da ko Israɛl.
[11] Ala y'a fɔ a ye ko: «Ne ye Ala Sebaayabɛɛtigi ye. I ka den caman sɔrɔ ka jiidi. Siya caman na bɔ i la, masakɛw na bɔ i la.
[12] Ne ye jamana min di Ibrahima ni Isaka ma, ne na o di i ma, ka o di i bɔnsɔn ma i kɔ.»
[13] Ala kumana a fɛ yɔrɔ min na, Ala taara ka a to yen.
[14] Ala kumana Yakuba fɛ yɔrɔ min na, a ye kabakurun samasen jɔ o yɔrɔ la, ka saraka bɔnta ni tulu bɔn a kan.
[15] Ala kumana Yakuba fɛ yɔrɔ min na, a ye o yɔrɔ tɔgɔ da ko Bɛtɛl.
[16] U bɔra Bɛtɛl ka taa se yɔrɔ dɔ la, o yɔrɔ ni Efrata cɛ tun ka jan dɔɔnin. Tin ye Rasɛl minɛ yen. Jiginni gɛlɛyara a ma.
[17] K'a to tin tɔɔrɔ bolo, tin minɛla y'a fɔ a ye ko: «I kana siran, i ye denkɛ sɔrɔ.»
[18] A satɔ, k'a to nimakaran na, a ye den tɔgɔ da ko Bɛn-Oni, nka den fa y'a tɔgɔ da ko Benjamɛn.
[19] Rasɛl sara, a su donna Efrata sira da la, o ye Bɛtilɛhɛm ye.
[20] Yakuba ye samasen jɔ a kaburu kan, o ye Rasɛl kaburu samasen ye, o bɛ yen halibi.
[21] Israɛl taara ɲɛ ka a ka finiso jɔ Migidal-Edɛr kɔ fɛ.
[22] Ka Israɛl sigilen to o jamana la, Rubɛn taara i da a fa ka jɔnmuso Bilha fɛ. Israɛl ye o kibaru mɛn. Yakuba denkɛw tun ye tan ni fila ye.
[23] Lea denkɛw filɛ ninw ye: Yakuba den fɔlɔ Rubɛn, ani Simeɔn ni Levi ni Juda ni Isakar ani Zabulɔn.
[24] Rasɛl denkɛw filɛ ninw ye: Yusufu ni Benjamɛn.
[25] Rasɛl ka jɔnmuso Bilha denkɛw filɛ ninw ye: Dan ni Nefitali.
[26] Lea ka jɔnmuso Zilpa denkɛw filɛ ninw ye: Gad ni Asɛr. Olu tun ye Yakuba denkɛw ye minw bangera a ye k'a to Padan-Aram.
[27] Yakuba sera a fa Isaka yɔrɔ Mamre, Kirjat-Arba, o ye Heborɔn ye, Ibrahima ni Isaka tun sigira o yɔrɔ la.
[28] Isaka si tilew bɛɛ lajɛlen kɛra san kɛmɛ ni san bisegin ye.
[29] A kɔrɔlen wasalen si tile dafalen sara ka kafo a bɛnbaw kan. A denkɛw Esau ni Yakuba y'a su don.