[1] Isaka ye Yakuba wele ka dubaw kɛ a ye, k'a gɛlɛya a ma ko: «I kana Kanan jamana denmusow si furu.
[2] I ka wuli ka taa i ba fa Bɛtuɛl ka so Padan-Aram jamana la, ka i bɛnkɛ Laban denmuso dɔ furu.
[3] Ala Sebaayabɛɛtigi ka duba i ye, ka den caman di i ma ka i jiidi, walisa i ka kɛ siya caman ye.
[4] A ka Ibrahima ka duba di i ni i bɔnsɔn ma i kɔ, walisa Ala ye jamana min di Ibrahima ma ni i kɛra siginfɛ ye o la, o ka kɛ i ta ye.»
[5] Isaka ye Yakuba bila ka taa, a taara Bɛtuɛl denkɛ Siri Laban ka so Padan-Aram jamana la. Laban tun ye Yakuba ni Esau ba Rebɛka kɔrɔkɛ ye.
[6] Esau y'a ye ko Isaka ye dubaw kɛ Yakuba ye, k'a bila ka taa Padan-Aram, ko a ka muso furu yen, ko k'a to duba tali la a ye, a y'a gɛlɛya a ma ko a kana Kanan jamana denmusow si furu.
[7] A y'a ye ko Yakuba ye a fa ni a ba kan minɛ ka taa Padan-Aram.
[8] Esau y'a faamu ko Kananka denmusow ko man di a fa Isaka ye.
[9] O tuma la Esau taara Isumaɛl yɔrɔ la ka Ibrahima denkɛ Isumaɛl denmuso Mahalat furu ka o fara a musow kan. Mahalat tun ye Nebajɔt dɔgɔmuso ye.
[10] Yakuba bɔra Beɛr-Seba ka sira minɛ ko a bɛ taa Karan.
[11] A sera yɔrɔ dɔ la ko a bɛ si yen, sabu tile tun bira. A ye kabakurun dɔ ta k'a da a kun kɔrɔ, ka i da o yɔrɔ la ka sunɔgɔ.
[12] A sugora ka yɛlɛnyɛlɛnnan dɔ ye, o jɔlen tun bɛ dugukolo kan, a kun sera fo sankolo ma. A ye Ala ka mɛlɛkɛw yɛlɛntɔ ni u jigintɔ ye o yɛlɛnyɛlɛnnan fɛ.
[13] A ye Matigi jɔlen ye o san fɛ, a ko: «Ne ye Matigi, i fa Ibrahima ka Ala ani Isaka ka Ala ye. I dalen bɛ dugukolo min kan, ne na o di i ni i bɔnsɔn ma.
[14] I bɔnsɔn na caya i ko dugukolo buguri. I na jiidi ka jɛnsɛn ka taa kɔrɔn ni tilebi ni saheli ni worodugu yanfan fɛ. Dugukolo kan gwaw bɛɛ na duba sɔrɔ i ni i bɔnsɔn na.
[15] A filɛ, ne na to i fɛ. I taara yɔrɔ o yɔrɔ, ne na i mara, ka na n'i ye nin jamana la ko kura. Ne ye min fɔ i ye, ne tɛna i bila, ne na o kɛ.»
[16] Yakuba kununna ka bɔ sunɔgɔ la, a ko: «Matigi bɛ nin yɔrɔ la, siga t'a la, ne tun ma o dɔn.»
[17] A siranna, a ko: «Nin yɔrɔ ye siran yɔrɔ ye haali. Nin tɛ yɔrɔ wɛrɛ ye Ala ka so kɔ, yan ye sankolo donda de ye.»
[18] Yakuba solila ka wuli, ka a kunkɔrɔ kabakurun ta ka o jɔ ka kɛ samasen ye, ka tulu bɔn o kan.
[19] A ye o yɔrɔ tɔgɔ da ko Bɛtɛl, nka o dugu tɔgɔ tun ye Luz ye ka kɔrɔ.
[20] Yakuba y'i dafale, a ko: «Ni Ala tora ne fɛ ka ne mara ne ka taama la, ka ne balo ka ne fɛɛrɛ bɔ,
[21] fo ka ne kɔsegin ne faso la hɛrɛ la, o tuma la Matigi na kɛ ne ka Ala ye.
[22] Ne ye nin kabakurun min jɔ ka kɛ samasen ye, o na kɛ Ala ka so ye. Ni i ye fɛn o fɛn di ne ma, ne na o bɛɛ tila tannan bɔ k'a di i ma.»