[1] Ayiwa Sinear masakɛ Anrafɛl ni Elasar masakɛ Arjɔk ni Elam masakɛ Kedorlaomɛr ani Gojim masakɛ Tideal tilew la,
[2] o masakɛw ni Sodɔmɛ masakɛ Bera ni Gomɔrɛ masakɛ Birsa ni Adima masakɛ Sineab ni Zeboim masakɛ Semeɛber ani Bela masakɛ kɛlɛla. Bela tɔgɔ ko Zoar fana.
[3] O masakɛw bɛɛ ye ɲɔgɔn lajɛ Sidim jɛkɛnɛ la, o ye Kɔgɔji Misɛn ye.
[4] U kolola masakɛ Kedorlaomɛr ye san tan ni fila kɔnɔ. A san tan ni sabanan la, u murutira.
[5] Nka a san tan ni naaninan la, masakɛ Kedorlaomɛr ani a fɛ masakɛw ye sira minɛ ka taa se sɔrɔ Refaim siya kan Asiterɔt-Karnaim, ani Zuzim siya kan Ham, ani Emim siya kan Save-Kirjataim.
[6] U ye se sɔrɔ Hɔr siya kan u ka Seir kulu kan, fo ka taa se El-Paran, o bɛ kungokolon kɛrɛ fɛ.
[7] O kɔ, u kɔseginna ka na Misipat, o ye Kadɛs ye, ka se sɔrɔ Amalɛk siya kan u ka jamana yɔrɔ bɛɛ la, ani Amɔr siya minw sigilen tun bɛ Hazazɔn-Tamar.
[8] O tuma la Sodɔmɛ ni Gomɔrɛ ni Adima ni Zeboim ani Bela masakɛw wulila u kama. Bela tɔgɔ ko Zoar fana. U ye kɛlɛ labɛn Sidim jɛkɛnɛ la
[9] Elam masakɛ Kedorlaomɛr ni Gojim masakɛ Tideal ni Sinear masakɛ Anrafɛl ani Elasar masakɛ Arjɔk kama. O masakɛ naani ni masakɛ duuru ye ɲɔgɔn kɛlɛ.
[10] Sidim jɛkɛnɛ falen tun bɛ manafin dingɛw la. Sodɔmɛ masakɛ ni Gomɔrɛ masakɛ bolitɔ bira olu kɔnɔ. U tɔw bolila ka taa kulu kan.
[11] Se sɔrɔbaaw ye Sodɔmɛ ni Gomɔrɛ nafolo bɛɛ cɛ, ani u balow bɛɛ, ka taa ni u ye.
[12] U ye Abrama balima denkɛ Lɔti ni a bolo fɛnw cɛ ka taa, o sigilen tun bɛ Sodɔmɛ dugu kɔnɔ.
[13] Cɛ dɔ kisira ka taa o fɔ Heburu Abrama ye, o sigilen tun bɛ Amɔr siya Mamre ka sensun jiriw cɛma. Mamre ni a balimakɛw Esikɔl ni Anɛr tun ye Abrama jɛɲɔgɔnw ye.
[14] Kabini Abrama y'a mɛn ko a balimakɛ cɛra, a ka jɔn ja gɛlɛn kɛmɛ saba ni tan ni segin minw bangera a ka so kɔnɔ ni a ye u kalan kosɛbɛ, a ni olu ye kɛlɛkɛ minanw ta ka wuli ka o masakɛw nɔgɛn fo ka se Dan.
[15] A ye a ka kɛlɛdenw tilatila ka o masakɛw kɛlɛ su fɛ ka se sɔrɔ u kan ka u nɔgɛn fo ka se Koba, o bɛ Damasi numan yanfan fɛ.
[16] A kɔseginna ka na ni nafolo cɛlen bɛɛ ye. A kɔseginna ni a balimakɛ Lɔti fana ye, ani o bolo fɛnw ni musow ani mɔgɔw bɛɛ.
[17] Abrama ye se sɔrɔ Kedorlaomɛr ni a fɛ masakɛw kan tuma min na, a kɔsegintɔ, Sodɔmɛ masakɛ bɔra ka taa a kunbɛn Save jɛkɛnɛ la, o ye masakɛ ka jɛkɛnɛ ye.
[18] Salɛm masakɛ Mɛlkisedɛk taara ni dumuni fɛnw ni diwɛn ye. Ala Kɔrɔtalenba ka sarakalasebaa tun don.
[19] A ye dubaw kɛ Abrama ye ko: «Sankolo ni dugukolo tigi Ala Kɔrɔtalenba ka duba Abrama ye.
[20] Ala Kɔrɔtalenba ka tanu, o min ye i juguw don i bolo.» Abrama ye o fɛnw bɛɛ tila tannan bɔ ka di a ma.
[21] Sodɔmɛ masakɛ y'a fɔ Abrama ye ko: «O mɔgɔw di ne ma, i ka to ni nafolo ye.»
[22] Abrama ye Sodɔmɛ masakɛ jaabi ko: «Ne ye ne kali sankolo ni dugukolo tigi Matigi, Ala Kɔrɔtalenba la,
[23] ko ne tɛna i ka fɛn si minɛ, hali gaarikisɛ kelen wala sabarajuru, walisa i kana a fɔ ko i ye Abrama fɛntigiya.
[24] Ne yɛrɛ tɛna foyi minɛ. Ne ka kamalenw ye min dun, o na ne bɔ. Ne fɛ mɔgɔw Anɛr ni Esikɔl ni Mamre, olu kɔni ka u niyɔrɔw minɛ.»