[1] Yakuba ye Laban denkɛw ka kuma mɛn ko: «Yakuba ye an fa ka nafolo bɛɛ minɛ. A ye nin bonya bɛɛ sɔrɔ an fa ka nafolo kɔrɔ la.»
[2] Yakuba ye Laban ɲɛda fana kɔlɔsi. A filɛ, o ma to a cogo fɔlɔ la Yakuba ta fan fɛ.
[3] Matigi y'a fɔ Yakuba ye ko: «I ka segin ka taa i faw ka jamana la i balimaw yɔrɔ. Ne na to i fɛ.»
[4] Yakuba ye ci bila ka Rasɛl ni Lea wele ko u ka na a fɛ a ka bagan misɛnw yɔrɔ la kungo la.
[5] Yakuba y'a fɔ u ye ko: «Ne ye aw fa ɲɛda kɔlɔsi ko a ma to a cogo fɔlɔ la ne ta fan fɛ, nka ne fa ka Ala tora ne fɛ.
[6] Aw y'a dɔn ko ne ye baara kɛ aw fa ye ni ne barika bɛɛ ye.
[7] Aw fa ye ne janfa ka ne sara yɛlɛma siɲɛ tan, nka Ala ma sɔn a ka ne tɔɲɔ.
[8] A y'a fɔ kalankalannenw na kɛ ne sara ye tuma min na, bagan misɛnw bɛɛ ye den kalankalannenw wolo. A y'a fɔ ko ɲɛgɛnnenw na kɛ ne sara ye tuma min na, bagan misɛnw bɛɛ ye den ɲɛgɛnnenw wolo.
[9] O cogo la Ala ye aw fa ka baganw bɔ a bolo ka u di ne ma.
[10] «Bagan misɛnw yɛlɛn tuma, ne ye ne ɲɛ kɔrɔta k'a ye sugo la ko bakɔrɔ minw yɛlɛnna, olu bɛɛ tun ye kalankalannenw ni ɲɛgɛnnenw ni kiriketigiw ye.
[11] Ala ka mɛlɛkɛ y'a fɔ ne ye sugo la ko: ‹Yakuba.› Ne ko: ‹Naamu.›
[12] A ko ne ka ne ɲɛ kɔrɔta k'a filɛ, ko bakɔrɔ minw bɛ yɛlɛn, olu bɛɛ ye kalankalannenw ni ɲɛgɛnnenw ni kiriketigiw ye, ko Laban bɛ min kɛ ne la, a ɲɛ bɛ o bɛɛ la.
[13] Ko Ala min ye a yɛrɛ jira ne la Bɛtɛl, ne ye saraka bɔ ka ne dafale ka tulu bɔn kabakurun kan yɔrɔ min na, ale ye o Ala ye. A ko ne ka wuli sisan ka bɔ nin jamana la ka kɔsegin ka taa ne faso la.»
[14] Rasɛl ni Lea y'a jaabi ko: «An bɛ niyɔrɔ wala ciyɛn sɔrɔ an fa ka so kɔnɔ tun wa?
[15] Ale ma an jate jamana wɛrɛ mɔgɔw ye wa? A ye an feere ka an sɔngɔ dun k'a ban pewu.
[16] Ala ye nafolo min bɔ an fa bolo, o bɛɛ ye an ni an denw ta ye. Sisan Ala ye min fɔ i ye, i ka o kɛ.»
[17] O tuma la Yakuba wulila ka a denw ni a musow layɛlɛn ɲaamɛw kan.
[18] A ka baganw bɛɛ ani a bolo fɛn sɔrɔlenw bɛɛ, a ye bagan minw sɔrɔ Padan-Aram, a ye o bɛɛ minɛ ka taa a fa Isaka ka so Kanan jamana la.
[19] O y'a sɔrɔ Laban tun taara a ka sagaw si kan. Rasɛl ye a fa ka bato fɛnw sonya.
[20] Yakuba ye Siri Laban janfa, sabu a bolila, a m'a suda a la.
[21] O cogo la Yakuba ye a bolo fɛnw bɛɛ ta ka boli. A wulila ka Ufrate ba tigɛ k'a ɲɛ sin Galad kulu ma.
[22] O tile sabanan don, a fɔra Laban ye ko Yakuba bolila.
[23] Laban taara ni a balimaw ye ka tugu Yakuba nɔ fɛ ka tile wolonwula taama kɛ, ka kun a la Galad kulu kan.
[24] Nka Ala y'i jira Laban la sugo la su fɛ k'a fɔ a ye ko: «I yɛrɛ kɔlɔsi, i kana kuma ɲuman wala kuma jugu fɔ Yakuba ye.»
[25] Laban kunna Yakuba la. Yakuba tun ye a ka finiso jɔ kulu kan. Laban ni a balimaw ye u taw jɔ Galad kulu kan.
[26] Laban y'a fɔ Yakuba ye ko: «Mun y'a to i bolila? I ma i sara ne la. I ye ne denmusow cɛ i n'a fɔ jɔn sɔrɔlenw npan fɛ.
[27] Mun y'a to i ye ne janfa, ka boli dogo la? I m'a suda ne la, walisa ne ka i bilasira ni ɲagali ni dɔnkiliw ni dɔnkan ani nkɔni ye.
[28] I m'a to ne ka ne denkɛw ni ne denmusow da susu. I ye hakilinta ɲa ko kɛ dɛ.
[29] Barika bɛ ne la ka ko jugu kɛ aw la, nka i fa ka Ala kumana ne fɛ su fɛ ko ne ka ne yɛrɛ kɔlɔsi, ko ne kana kuma ɲuman wala kuma jugu fɔ Yakuba ye.
[30] Ayiwa sisan i b'a fɛ ka taa, k'a masɔrɔ i faso ɲɛnafin b'i la, nka mun y'a to i ye ne ka bato fɛnw sonya?»
[31] Yakuba ye Laban jaabi ko: «Ne siranna, ne ko i kana na i denmusow bɔsi ne la.
[32] Ni i ye i ka bato fɛnw sɔrɔ min bolo, o tigi kana balo tun. I ka i ta ɲini ne fɛ k'a ta an balimaw ɲɛ na.» Yakuba tun m'a dɔn ko Rasɛl ye u sonya.
[33] Laban donna Yakuba ka finiso kɔnɔ, ka don Lea ka finiso kɔnɔ ani jɔnmuso fila ka finisow kɔnɔ, a ma u ye. A bɔra Lea ka finiso kɔnɔ ka don Rasɛl ka finiso kɔnɔ.
[34] Rasɛl kɔni tun ye o bato fɛnw ta ka u kɛ ɲaamɛ kirike kɔnɔ k'i sigi u kan. Laban ye finiso fan bɛɛ mɔmɔ, a ma u ye.
[35] Rasɛl y'a fɔ a fa ye ko: «Ne matigi kana dimin ne korɔ, ne tɛ se ka wuli i ɲɛ kɔrɔ, laada bɛ ne la.» Laban ye finiso yɔrɔ bɛɛ filɛ, a ma a ka bato fɛnw ye.
[36] O tuma la Yakuba diminna ka Laban kɛlɛ. Yakuba y'a fɔ Laban ye ko: «Ne ka hakɛma ko ye mun ye fo i wulila ka tugu ne nɔ fɛ?
[37] I ye ne bolo fɛnw bɛɛ mɔmɔ, i ye i ta jumɛn sɔrɔ u la? U bila yan ne balimaw ni i balimaw ɲɛ na, walisa u ka kiri tigɛ an cɛ.
[38] Ne san mugan filɛ nin ye i fɛ. I ka sagamusow ni i ka bamusow si kɔnɔ ma wolowolo, ne ma i ka sagajigiw si dun.
[39] Ne ma na ni waradatɔ si ye i fɛ, ne yɛrɛ bɔnɛna o la. Ni fɛn sonyara su fɛ wala tile fɛ, i y'a ɲini ne fɛ.
[40] Ne kɛra ten. Funteni ye ne tɔɔrɔ tile fɛ, nɛnɛ ye ne sɔrɔ su fɛ, sunɔgɔ tigɛra ne ɲɛ na.
[41] Ne san mugan filɛ nin ye i ka so kɔnɔ. Ne ye san tan ni naani baara kɛ i ye i denmuso fila kosɔn, ka san wɔɔrɔ baara kɛ i ka bagan misɛnw kosɔn. I ye ne sara yɛlɛma siɲɛ tan.
[42] Ne fa ka Ala, Ibrahima ka Ala, Isaka bɛ siran Ala min ɲɛ, ni o tun ma to ne fɛ, i tun na ne bolo lankolon bila ka taa sisan, siga t'a la. Ala ye ne tɔɔrɔ ko ni ne bolo baara gɛlɛn ye, ka i kɔrɔfɔ su fɛ.»
[43] Laban ye Yakuba jaabi ko: «Nin denmusow ye ne denmusow ye, nin denw ye ne denw ye. Nin baganw ye ne ka baganw ye. I ɲɛ bɛ fɛn o fɛn na yan, o bɛɛ ye ne ta ye. Ne bɛ se ka mun kɛ ne denmusow ni u denw na bi?
[44] Ayiwa, sisan an ka layidu ta ɲɔgɔn ye, o ka kɛ seere ye ne ni i cɛ.»
[45] Yakuba ye kabakurun ta k'a jɔ ka kɛ samasen ye.
[46] Yakuba y'a fɔ a balimaw ye ko: «Aw ka kabakurunw cɛ.» U ye kabakurunw ta ka u ton ɲɔgɔn kan. U ye dumuni kɛ o kaba tonnenw kɛrɛ fɛ.
[47] Laban ye o tɔgɔ da ko Jegar-Sahaduta, nka Yakuba y'a wele ko Galɛd.
[48] Laban ko: «Nin kaba tonnenw ye seere ye ne ni i cɛ bi.» O de y'a to o tɔgɔ dara ko Galɛd.
[49] U b'a wele Mizpa fana, sabu Laban ko: «Matigi ka kɔlɔsili kɛ ne ni i cɛ, ni an farala ɲɔgɔn na tuma min na.
[50] Ni i ye ne denmusow tɔɔrɔ, ni i ye muso wɛrɛw furu ne denmusow kɔ, a filɛ, Ala ye seere ye ne ni i cɛ.»
[51] Laban y'a fɔ Yakuba ye ko: «Nin kaba tonnenw filɛ, ka nin samasen filɛ, ne y'a jɔ ne ni i cɛ.
[52] Nin kaba tonnenw ka kɛ seere ye, nin samasen fana ka kɛ seere ye ko ne tɛna tɛmɛn nin kaba tonnenw kan ka taa i fɛ ko jugu kama, i tɛna tɛmɛn nin kaba tonnenw ni nin samasen kan ka na ne yɔrɔ ko jugu kama.
[53] Ibrahima ka Ala, Nakɔr ka Ala, u fa ka Ala ka kiri tigɛ an cɛ.» Yakuba fa Isaka siranna min ɲɛ, a y'i kali o la.
[54] O tuma la Yakuba ye saraka faga kulu kan ka a balimaw wele dumuni la. U ye dumuni kɛ ka si kulu kan.
[55] O dugusajɛ, Laban solila ka wuli k'a denkɛw ni a denmusow da susu, ka dubaw kɛ u ye. O kɔ, Laban seginna ka taa so.