[1] Egaa Iyoob,“Ani nama qajeelaa dha” waan ofiin jedhuuf, jarreen kun sadan isaaf deebii deebisuu in dhiisan.
[2] Eliihuun ilmi Baaraakel Buzichaa inni qomoo Raam keessaa, sababii Iyoob Waaqayyoon qajeelaa gochuu irra ofii isaa qajeelaa of godheef isatti aaree in boba'e.
[3] Firoonni Iyoob sadanis Iyoobumatti faraduu malee, deebii ga'u waan dhabaniif, isaanittis aaree in boba'e.
[4] Isaan hundinuu angafoota isaa waan turaniif, Eliihuun hamma Iyoob dubbatee raawwatutti in eege.
[5] Afaan jarreen kana sadanii keessa deebiin akka hin jirre yommuu arge aaree in boba'e.
[6] Kanaaf Eliihuun ilmi Baaraakel Buzichaa deebisee, “Ani ijoollee dha, isin garuu baay'ee dulloomtaniittu; kanaafan waanan beeku isinitti mul'isuu sodaadhee of qabe;
[7] ani,“Waggoonni in dubbatu, barri baay'eenis ogummaa nama barsiisu” jedheen ture.
[8] Garuu hafuura isa nama keessa jiru, hafuura isa inni hundumaa danda'u itti baafatetu hubannaa namaaf kenna.
[9] Ogummaan gurgudataniif miti, wanta qajeelaa ta'e hubachuunis dulloomaniif miti.
[10] “Kanaafis,“Ana, dhaggeeffadhaa! Anis waanan beeku nan mul'isa!” nan jedhe.
[11] Kunoo, ani hamma isin dubbattanii raawwattanitti nan eege; yommuu isin itti yaaddanii dubbattanis, sababii isin laattan nan dhaggeeffadhe.
[12] Ani ba'eessa godhee isin dhaggeeffadheera, garuu isin keessaa namni Iyoobin balleessaa isaa amansiise, namni dubbii isaatiif deebii kenneefis hin turre.
[13] Isin,“Nuyi ogummaa arganneerra, isa immoo Waaqayyotu of irraa deebisa malee, nama miti” akka hin jennetti,
[14] Iyoob dubbii isaa tarree galchee anatti hin dubbanne, anis dubbii keessaniinan deebii isaaf kenna miti.
[15] “Isaan na'anii walii wallaalaniiru, si'achis deebii hin deebisan, dubbiin isaan harkaa badeera.
[16] Egaa sababii isaan hin dubbanneef, sababii isaan deebii deebisan dhabanii dhaabataniif, ani isaan eeguu ree”
[17] Anis immoo qooda koo deebii nan deebisa, waanan beekus nan mul'isa.
[18] Ani wantan dubbadhu baay'een qaba, hafuurri na keessa jirus na tuttuqa;
[19] garaan koo akka daadhii waynii maragamee ti, akka qalqala buufaa warra sibiila tumu isa bokokaa ti;
[20] akkan furamuuf nan dubbadha, afaan koo saaqqadhees deebii nan deebisa,
[21] ani nama tokkoof iyyuu hin loogu, nama tokkottis hin kuulu!
[22] Ani namatti kuuluu hin beeku, Silaa'oo uumaan koo dafee na balleessa ture.