[1] དེའང་སྡེ་ཁག་སོ་སོར་དབང་བའི་ནོར་སྐལ་ནི་འདི་ལྟ་སྟེ། བྱང་གི་མུ་མཐའི་མཚམས་ནས་ཧེད་ལོན་གྱི་ལམ་བརྒྱུད་དེ། ཧ་མཱད་ཁར་ནས་དཱ་མེ་སེག་གི་ས་མཚམས་ཀྱི་ཧ་ཚར་ཨེ་ནན་ལ་བསླེབས་པ་དང་། བྱང་དུ་ཧ་མཱད་ལ་འབྱར་ནས། ཤར་ནས་ནུབ་བར་གྱི་ས་དེ་ནི་དཱན་གྱི་སྐལ་གཅིག་ཡིན།
[2] དཱན་གྱི་ས་མཚམས་བརྒྱུད་དེ། ཤར་ནས་ནུབ་བར་དུ་ཨ་ཤེར་ལ་ས་སྐལ་གཅིག་ཡོད་དེ།
[3] ཨ་ཤེར་གྱི་ས་མཚམས་བརྒྱུད་དེ་ཤར་ནས་ནུབ་བར་དུ་ནཱབ་ཐ་ལིའི་ས་སྐལ་གཅིག་ཡོད།
[4] ནཱབ་ཐ་ལིའི་ས་མཚམས་བརྒྱུད་དེ་ཤར་ནས་ནུབ་བར་དུ་མཱ་ན་ཤེ་ལ་ས་སྐལ་གཅིག་ཡོད།
[5] མཱ་ན་ཤེའི་ས་མཚམས་བརྒྱུད་དེ་ཤར་ནས་ནུབ་བར་དུ་ཨེ་ཕཱར་ཡིམ་ལ་ས་སྐལ་གཅིག་ཡོད།
[6] ཨེ་ཕཱར་ཡིམ་གྱི་ས་མཚམས་བརྒྱུད་དེ་ཤར་ནས་ནུབ་བར་དུ་རུ་བེན་ལ་ས་སྐལ་གཅིག་ཡོད།
[7] རུ་བེན་གྱི་ས་མཚམས་བརྒྱུད་དེ་ཤར་ནས་ནུབ་བར་དུ་ཡ་ཧུ་དཱའི་ས་སྐལ་གཅིག་ཡོད་དོ།།
[8] ཡ་ཧུ་དཱའི་ས་མཚམས་ཀྱི་ཤར་ནས་ནུབ་ཀྱི་བར་ནི། ཁྱོད་རྣམས་ཀྱིས་ཕུལ་དགོས་བའི་དམ་པའི་གནས་ཏེ། རིང་ཚད་ལ་སྤྱི་ལེ་བཅུ་གཉིས་དང་ཕྱེད་ཀ། ཤར་ནས་ནུབ་བར་གྱི་རིང་ཚད་ནི་གཞན་ས་སྐལ་རྣམས་དང་གཅིག་ཡིན་ཞིང་། གནས་མཆོག་དེའི་དབུས་སུ་ཡོད་པར་འགྱུར།
[9] ཁྱོད་རྣམས་ཀྱིས་ཡ་ཝཱེར་ཕུལ་དགོས་བའི་ས་ཁུལ་དེ་ནི་རིང་ཚད་ལ་སྤྱི་ལེ་བཅུ་གཉིས་དང་ཕྱེད་ཀ། ཞེང་ལ་སྤྱི་ལེ་བཅུ་དགོས།
[10] མཆོད་དཔོན་རྣམས་ལ་ཕུལ་བའི་དམ་པའི་གནས་ནི། བྱང་ཕྱོགས་སུ་སྤྱི་ལེ་བཅུ་གཉིས་དང་ཕྱེད་ཀ། ཞེང་ལ་སྤྱི་ལེ་ལྔ་དང་། ཤར་ཕྱོགས་ཀྱི་ཞེང་ལ་སྤྱི་ལེ་ལྔ་དང་། ལྷོ་ཕྱོགས་ཀྱི་རིང་ཚད་ལ་སྤྱི་ལེ་བཅུ་གཉིས་དང་ཕྱེད་ཀ་ཡིན་དགོས།
[11] ས་འདི་ནི་ཟཱ་ཏོག་གི་བུ་རྒྱུད་རྣམས་ཀྱི་ནང་ནས་དམ་པར་གྱུར་བ་རྣམས་ཏེ། མཆོད་དཔོན་རྣམས་ལ་ཕུལ་དགོས་པ་དང་། དེ་དག་གིས་ངས་བསྒོས་བའི་བཀའ་རྣམས་བསྲུངས་ཏེ། ཡེས་ར་ཨེལ་པ་རྣམས་ཀྱིས་ལམ་བོར་བའི་དུས་སུ། དེ་དག་ནི་ལེ་ཝི་པ་རྣམས་དང་འདྲ་བར་ལམ་མ་བོར་ཏོ།།
[12] དེ་བས། དམ་པའི་དམ་གནས་བྱ་རུ། ཕུལ་བའི་དམ་གནས་ལས་ས་ཁུལ་ཞིག་ནི་མཆོད་དཔོན་རྣམས་ལ་ཕུལ་དགོས་ཏེ། ས་འདི་ནི་ལེ་ཝི་པའི་ས་མཚམས་དང་འབྲེལ་ཡོད་དོ།།
[13] ཡང་མཆོད་དཔོན་རྣམས་ཀྱི་ས་མཚམས་བརྒྱུད་དེ་ས་ཁུལ་ཞིག་ནི་ལེ་ཝི་པ་ལ་སྦྱིན་པ་དང་། རིང་ཚད་ལ་སྤྱི་ལེ་བཅུ་གཉིས་དང་ཕྱེད་ཀ། ཞེང་ལ་སྤྱི་ལེ་ལྔ་ཡོད་དགོས་ཤིང་། མཆོད་དཔོན་རྣམས་ཀྱི་སའི་རིང་ཚད་ཀྱང་སྤྱི་ལེ་བཅུ་གཉིས་དང་ཕྱེད་ཀ། ཞེང་ལ་སྤྱི་ལེ་ལྔ་ཡིན།
[14] ས་འདིའི་ཆ་གང་ཞིག་ཡང་འཚོང་མི་རུང་སྟེ། བརྗེ་ཡང་མི་རུང་ལ། མི་གཞན་ལའང་སྤྲོད་མི་རུང་ངོ་། ཅིའི་ཕྱིར་ཞེ་ན། དེ་ནི་ས་ཡི་ནང་ནས་ཆེས་ལེགས་ཤིང་། ཡ་ཝཱེའི་གནས་དམ་པ་ལགས་སོ།།
[15] ཡང་ས་ལྷག་མ་སྟེ་ཞེང་ལ་སྤྱི་ལེ་གཉིས་དང་ཕྱེད་ཀ། རིང་ཚད་ལ་སྤྱི་ལེ་བཅུ་གཉིས་དང་ཕྱེད་ཀ་ཡོད་པ་སྤྱི་གནས་བྱ་སྟེ། གྲོང་ཁྱེར་དང་སྡོད་གནས་དང་། མཐའ་འཁོར་དུ་བྱ་ཞིང་། གྲོང་ཁྱེར་དེའི་དབུས་སུ་ཡོད་དགོས།
[16] གྲོང་ཁྱེར་གྱི་ཆེ་ཆུང་ནི་འདི་ལྟ་སྟེ། བྱང་ཕྱོགས་སུ་ཁྲུ་སྟོང་གཉིས་དང་ཉེར་བརྒྱ་ལྔ་བཅུ་དང་། ལྷོ་ཕྱོགས་སུ་ཁྲུ་སྟོང་གཉིས་དང་ཉེར་བརྒྱ་ར་ལྔ་བཅུ་དང་། ཤར་ཕྱོགས་སུ་ཁྲུ་སྟོང་གཉིས་དང་ཉེར་བརྒྱ་ལྔ་བཅུ་དང་། ཤར་ཕྱོགས་སུ་ཁྲུ་སྟོང་གཉིས་དང་ཉེར་བརྒྱ་ལྔ་བཅུ་ཡོད།
[17] གྲོང་ཁྱེར་ལ་མཐའ་འཁོར་ཡོད་དགོས་ཏེ། བྱང་ཕྱོགས་སུ་ཁྲུ་བརྒྱ་དང་ཉེར་ལྔ་དང་། ལྷོ་ཕྱོགས་སུ་ཁྲུ་བརྒྱ་དང་ཉེར་ལྔ་དང་། ཤར་ཕྱོགས་སུ་ཁྲུ་བརྒྱ་དང་ཉེར་ལྔ་དང་། ནུབ་ཕྱོགས་སུ་ཁྲུ་བརྒྱ་དང་ཉེར་ལྔ་ཡོད།
[18] སྤྱི་གནས་འགྲམ་གཉིས་ཀྱི་ལུས་པར་གྱུར་བའི་ས་ནི། དམ་གནས་སུ་ཕུལ་བའི་ས་དེའི་རིང་ཚད་ལྟར་བརྩིས་ན། ཤར་ཕྱོགས་སུ་སྤྱི་ལེ་ལྔ་ཡོད་པ་དང་། དམ་གནས་སུ་ཕུལ་བའི་ས་དེ་བརྒྱུད་ན་ནུབ་ཕྱོགས་སུའང་སྤྱི་ལེ་ལྔ་ཡོད་དོ།། ས་འདི་དག་ལས་ཐོན་པ་རྣམས་གྲོང་ཁྱེར་ནང་གི་ལས་བཟོ་པའི་ཁ་ཟས་སུ་སྤྱོད་དགོས།
[19] གྲོང་ཁྱེར་ནང་གི་ལས་བཟོ་པ་དག་ནི་ཡེས་ར་ཨེལ་གྱི་སྡེ་སོ་སོ་ནས་འོངས་ཏེ། ས་འདི་རྨོ་བཞིན་ཡོད།
[20] ཕུལ་བར་གྱུར་བའི་ས་ཁུལ་ཡོངས་ནི། རིང་ཚད་ལ་སྤྱི་ལེ་བཅུ་གཉིས་དང་ཕྱེད་ཀ། ཞེང་ལ་སྤྱི་ལེ་བཅུ་གཉིས་དང་ཕྱེད་ཀ་སྟེ་དབྱིབས་གྲུ་བཞི་ཅན་ཡིན་ཏེ། ཁྱོད་རྣམས་ཀྱིས་ཕུལ་བར་གྱུར་བའི་དམ་གནས་དང་མཉམ་དུ་གྲོང་ཁྱེར་གྱི་ས་སྐལ་དང་བཅས་ཕུལ་དགོས།
[21] ཡང་ཕུལ་བར་གྱུར་བའི་དམ་གནས་དང་གྲོང་ཁྱེར་གྱི་ས་སྐལ་གཡས་གཡོན་གཉིས་སུ་ལུས་པ་ཐམས་ཅད་རྒྱལ་པོར་དབང་སྟེ། ཞེང་ལ་སྤྱི་ལེ་བཅུ་གཉིས་དང་ཕྱེད་ཀ་ཡོད་པའི་ཕུལ་བར་གྱུར་བའི་ས་དེའི་ཤར་ནས་ཤར་གྱི་ས་མཚམས་བར་དང་། ད་དུང་ཞེང་ལ་སྤྱི་ལེ་བཅུ་གཉིས་དང་ཕྱེད་ཀ་ཡོད་པའི་ཕུལ་བར་གྱུར་བའི་ས་དེའི་ནུབ་ནས་ནུབ་ཀྱི་ས་མཚམས་བརྒྱུད་དེ་བགོས་བའི་ས་སྐལ་གཞན་དག་ཐམས་ཅད་རྒྱལ་པོར་དབང་ངོ་། དེ་བཞིན་དུ་ཕུལ་བར་གྱུར་བའི་དམ་གནས་དང་ཕོ་བྲང་གི་གནས་མཆོག་བཅས་ནི་ས་དེའི་གཉིས་ཀྱི་དབུས་སུ་ཡོད་པ་ཡིན།
[22] ལེ་ཝི་པའི་ས་སྐལ་དང་གྲོང་ཁྱེར་གྱི་ས་སྐལ་ནི་རྒྱལ་པོའི་ས་སྐལ་གྱི་དབུས་སུ་ཡོད་པ་དང་། ཡང་རྒྱལ་པོའི་ས་སྐལ་ནི་ཡ་ཧུ་དཱ་ས་མཚམས་དང་པེན་ཡཱ་མེན་གྱི་ས་མཚམས་ཀྱི་བར་ན་ཡོད།
[23] ཡང་ལྷག་མའི་སྡེ་ཁག་ནི། ཤར་ནས་ནུབ་བར་དུ་པེན་ཡཱ་མེན་ལ་ས་སྐལ་གཅིག་ཡོད།
[24] པེན་ཡཱ་མེན་གྱི་ས་མཚམས་བརྒྱུད་དེ་ཤར་ནས་ནུབ་བར་དུ་སི་མུ་ཨོན་ལ་ས་སྐལ་གཅིག་ཡོད།
[25] སི་མུ་ཨོན་གྱི་ས་མཚམས་བརྒྱུད་དེ་ཤར་ནས་ནུབ་བར་དུ་ཡེས་སི་ཀཱར་ལ་ས་སྐལ་གཅིག་ཡོད།
[26] ཡེས་སི་ཀཱར་གྱི་ས་མཚམས་བརྒྱུད་དེ་ཤར་ནས་ནུབ་བར་དུ་ཟེ་བུ་ལུན་ལ་ས་སྐལ་གཅིག་ཡོད།
[27] ཟེ་བུ་ལུན་གྱི་ས་མཚམས་བརྒྱུད་དེ་ཤར་ནས་ནུབ་བར་དུ་གཱ་རྡུ་ལ་ས་སྐལ་གཅིག་ཡོད།
[28] གཱ་རྡུའི་ལྷོ་ཕྱོགས་ཀྱི་ས་མཚམས་ནི་ཐལ་མཱར་ནས། ཀཱ་དེའེ་ཤཱའི་མེ་རི་བཱའི་ཆུ་རྣམས་བརྒྱུད་དེ་ཨེ་ཅིབ་ཀྱི་གཙང་པོ་ཆུང་ཆུང་རྣམས་བརྒྱུད་ནས་རྒྱ་མཚོ་ཆེན་པོར་བསླེབས་པ་ཡིན།
[29] འདི་ནི་ཁྱོད་ཚོས་རྒྱན་བླང་སྟེ་ཡེས་ར་ཨེལ་པའི་སྡེ་ཁག་སོ་སོར་བགོ་བའི་ས་སྐལ་ཏེ། ས་སྐལ་འདི་དག་ནི་ཁོ་ཚོར་ཐོབ་པའི་ནོར་སྐལ་ཡིན་ནོ་ཞེས་གཙོ་བོ་ཡ་ཝཱེས་གསུངས་སོ།།
[30] གྲོང་ཁྱེར་བྱང་ཕྱོགས་ཀྱི་རིང་ཚད་ནི་ཁྲུ་སྟོང་གཉིས་དང་ཉེར་བརྒྱ་ལྔ་བཅུ་སྟེ། གྲོང་ཁྱེར་གྱི་ཐོན་སྒོ་ནི་འདི་ལྟ་སྟེ།
[31] གྲོང་ཁྱེར་ལ་ཡེས་ར་ཨེལ་གྱི་སྡེ་རེ་རེ་བཞིན་དུ་མིང་འདོགས་དགོས་པ་དང་། བྱང་ཕྱོགས་སུ་སྒོ་གསུམ་ཡོད་དེ། གཅིག་ནི་རུ་བེན་སྒོ་དང་། གཅིག་ནི་ཡ་ཧུ་དཱ་སྒོ་དང་། གཅིག་ནི་ལེ་ཝི་སྒོ་ཡིན།
[32] ཤར་ཕྱོགས་ཀྱི་རིང་ཚད་ནི་ཁྲུ་སྟོང་གཉིས་དང་ཉེར་བརྒྱ་ལྔ་བཅུ་ཡིན་པ་དང་། སྒོ་གསུམ་ཡོད་དེ། གཅིག་ནི་ཡོ་སེབ་སྒོ་དང་། གཅིག་ནི་པེན་ཡཱ་མེན་སྒོ་དང་། གཅིག་ནི་དཱན་སྒོ་ཡིན།
[33] ལྷོ་ཕྱོགས་ཀྱི་རིང་ཚད་ནི་ཁྲུ་སྟོང་གཉིས་དང་ཉེར་བརྒྱ་ལྔ་བཅུ་ཡིན་པ་དང་། སྒོ་གསུམ་ཡོད་དེ། གཅིག་ནི་སི་མུ་ཨོན་སྒོ་དང་། གཅིག་ནི་ཡེས་སི་ཀཱར་སྒོ་དང་། གཅིག་ནི་ཟེ་བུ་ལུན་སྒོ་ཡིན།
[34] ནུབ་ཕྱོགས་ཀྱི་རིང་ཚད་ནི་ཁྲུ་སྟོང་གཉིས་དང་ཉེར་བརྒྱ་ལྔ་བཅུ་ཡིན་པ་དང་། གཅིག་ནི་གཱ་རྡུ་སྒོ་དང་། གཅིག་ནི་ཨ་ཤེར་སྒོ་དང་། གཅིག་ནི་ནཱབ་ཐ་ལི་སྒོ་ཡིན།
[35] ཡང་གྲོང་ཁྱེར་མཐའ་འཁོར་གྱི་རིང་ཚད་ནི་ཁྲུ་སྟོང་དགུ་ཡིན་ཏེ། དུས་དེ་ནས་བཟུང་སྟེ་གྲོང་ཁྱེར་འདིའི་མིང་ལ་གཙོ་བོ་ཡ་ཝཱེ་གནས་དེར་བཞུགས་པ་ཡིན་ཞེས་གདགས་པར་འགྱུར་རོ།།