[1] དེའང་ལོ་བཅུ་གཅིག་པའི་ཟླ་ག་གེ་མོའི་ཚེས་གཅིག་ལ།་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། ཐཱར་གྱིས་ཡེ་རུ་སཱ་ལེམ་ལ་འཕྱ་དགོད་བྱས་ནས་ན་རེ། མི་རིགས་ཀུན་གྱི་སྒོ་དེ་ཆག་སྟེ། ངའི་ཕྱོགས་སུ་འབྱེད་པས། དེ་ནི་སྟོངས་ཤིང་། ང་ནི་དགང་བར་འགྱུར་ཞེས་སྨྲས་པས།
[3] གཙོ་བོ་ཡ་ཝཱེས་འདི་སྐད་དུ། ཀྱེ་ཐཱར། ངས་ཁྱོད་ནི་དགྲ་རུ་འཛིན་ཞིང་། རྒྱ་མཚོས་རྦ་རླབས་ཡར་འཕྱུར་བཅུག་པ་བཞིན་དུ། ངས་ཡུལ་ཁམས་ཀུན་འོང་དུ་བཅུག་སྟེ་ཁྱོད་ལ་རྒོལ་བར་གཞུག་སྟེ།
[4] དེ་དག་གིས་ཐཱར་གྱི་མཁར་རྣམས་བཤིག་སྟེ། རྫོང་རྣམས་བཤིག་ཅིང་། ངས་དེའི་ས་རྡུལ་རྣམས་གཙང་མར་བྲད་ནས། དེ་ནི་བྲག་རྡོ་འཇམ་པོ་རུ་འགྱུར་བར་འགྱུར།
[5] དེ་ནི་རྒྱ་མཚོའི་དབུས་སུ་ཉ་རྒྱ་གདིང་བའི་གནས་སུ་འགྱུར་ཞིང་། གང་ལ་ཞེ་ན། འདི་ནི་གཙོ་བོ་ཡ་ཝཱེས་གསུངས་པ་ཡིན་ཞེས་ངས་གསུངས་ཏེ། དེ་ནི་མི་རྒྱུད་ཀུན་གྱི་བཅོམ་ནོར་དུ་འགྱུར་ཞིང་།
[6] སྐམ་སར་སྡོད་པའི་ཐཱར་པ་རྣམས་ནི་རལ་གྲིས་གསོད་པར་གྱུར་ན། དེ་ནས་ཁོ་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་རོ།།
[7] ཅིའི་ཕྱིར་ཞེ་ན། གཙོ་བོ་ཡ་ཝཱེས་འདི་སྐད་དུ་གསུངས་ཏེ། ལྟོས་ཤིག ངས་རྒྱལ་པོ་རྣམས་ཀྱི་རྒྱལ་པོ་ཡིན་པའི་པཱ་པིས་ལུན་གྱི་རྒྱལ་པོ་ནེ་བོ་ཀད་ནེ་ཙར་ལ། རྟ་དང་། ཤིང་རྟ་དང་། རྟ་དམག་དང་དམག་དཔུང་ཆེན་པོ་ཞིག་ཁྲིད་བཅུག་སྟེ། བྱང་ནས་ཐཱར་ལ་རྒོལ་དུ་འོང་བར་གཞུག་ཅིང་།
[8] དེས་ཁྱོད་ཀྱི་སྐམ་སར་སྡོད་པའི་མི་རྣམས་གསད་པར་འགྱུར་ཞིང་། གྲོང་ཁྱེར་སྐོར་བའི་མཁར་རྣམས་བརྩིག་ཅིང་། སྲུང་འགོག་བྱེད་པའི་ས་རགས་བརྩིགས་ནས་ཕུབ་རྣམས་བཟུང་སྟེ་ཁྱོད་ལ་རྒོལ་བར་འགྱུར།
[9] དེས་གྲོང་ཁྱེར་ལ་རྒོལ་བའི་ཐོ་བ་ཆེན་པོས་ཁྱོད་ཀྱི་མཁར་རྣམས་ལ་རྒོལ་ཞིང་། མཚོན་ཆས་ཁྱོད་ཀྱི་མཁར་རྫོང་རྣམས་བཤིག་པར་འགྱུར།
[10] གང་ལ་ཞེ་ན། དེ་ལ་རྟ་ཤིན་ཏུ་མང་བའི་ཕྱིར། དེ་དག་གིས་ས་རྡུལ་ལངས་བཅུག་པས་ཁྱོད་ནི་དགབ་པར་འགྱུར་ཞིང་། མི་ནི་བུ་ག་ཡོད་པའི་གྲོང་ཁྱེར་ནང་དུ་འཛུལ་བ་བཞིན་དུ། དེ་ནི་ཁྱོད་ཀྱི་མཁར་སྒོ་ནང་དུ་འཛུལ་བར་འགྱུར་ཞིང་། དུས་དེར། ཁྱོད་ཀྱི་མཁར་རྣམས་ནི་རྟ་དམག་དང་། ཤིང་རྟའི་འཁོར་ལོ་དང་ཤིང་རྟའི་སྒྲ་ཡི་ཕྱིར་དུ་འདར་བར་འགྱུར།
[11] དེའི་རྟ་ཡི་རྨིག་པས་ཁྱོད་ཀྱི་སྲང་ལམ་ཐམས་ཅད་བརྫི་བར་འགྱུར་ཞིང་། དེས་རལ་གྲི་ཡིས་ཁྱོད་ཀྱི་མི་རྣམས་གསད་ཅིང་། ཁྱོད་ཀྱི་ཀ་བ་བརྟན་པོ་རྣམས་ཀྱང་ས་ལ་འགྱེལ་བར་འགྱུར།
[12] དེ་དག་གིས་ཁྱོད་ཀྱི་རྒྱུ་ནོར་འཕྲོག་སྟེ། ཁྱོད་ཀྱི་ཚོང་ཟོག་ནི་བཅོམ་ནོར་དུ་གྱུར་ནས། དེ་དག་གིས་ཁྱོད་ཀྱི་མཁར་རྣམས་བཤིག་ཅིང་། ཁྱོད་ཀྱི་མཛེས་པའི་གཟིམས་ཁང་རྣམས་བཤིག་སྟེ། ཁྱོད་ཀྱི་རྡོ་དང་ཤིང་དང་། རྫ་མ་བཅས་ཆུ་རུ་དོར་བར་བྱའོ།།
[13] ཡང་ངས་ཁྱོད་ཀྱི་གླུ་སྐད་དེའི་མཚམས་གཅད་ཅིང་། མི་ཡིས་ཁྱོད་ཀྱི་པི་ཝང་གི་སྒྲ་ཡང་བསྐྱར་ཐོས་བར་མི་འགྱུར་ཏེ།
[14] ངས་ཁྱོད་བྲག་རྡོ་འཇམ་པོ་ཞིག་ཏུ་འགྱུར་བར་བྱ་སྟེ། ཁྱོད་ནི་ཉ་རྒྱ་འདིང་བའི་གནས་སུ་འགྱུར་ཞིང་། སླར་ཁྱོད་བརྩིག་པར་མི་འགྱུར་རོ།། ཅིའི་ཕྱིར་ཞེ་ན། ང་ཡ་ཝཱེས་གསུངས་པ་ཡིན། ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[15] ཡང་གཙོ་བོ་ཡ་ཝཱེས་ཐཱར་ལ་འདི་སྐད་དུ། ཁྱོད་ཀྱི་ནང་ན་སྲོག་གཅོད་པའི་དོན་བྱུང་སྟེ། བསྣད་བའི་མི་རྣམས་ངུ་དུས་སུ། གླིང་ཕྲན་རྣམས་ནི་ཁྱོད་ལོག་པའི་སྒྲ་ཡིས་འདར་བར་མི་འགྱུར་རམ།
[16] དུས་དེར་མཚོ་འགྲམ་ན་ཡོད་པའི་རྒྱལ་པོ་ཐམས་ཅད་རྒྱལ་ཁྲི་ལས་མར་འབབ་ཅིང་། གཟབ་གོས་ཕུད་ཅིང་། ཚེམ་དྲུབ་ལྡན་པའི་གོས་ཕུད་དེ། སྐྲག་འདར་གོས་སུ་གྱོན་ཏེ་སར་སྡོད་ཅིང་། འདར་བཞིན་འདར་བཞིན་བྱེད་པ་དང་། ཁྱོད་ཀྱི་ཕྱིར་དུ་འཇིགས་པར་འགྱུར།
[17] དེ་ཚོས་ཁྱོད་ལ་སྐྱོ་གླུ་ལེན་ཞིང་ན་རེ། མིང་དུ་གྲགས་པའི་གྲོང་ཁྱེར་ཁྱོད། གྲུ་དཔོན་རྣམས་སྡོད་པའི་གནས། རྒྱ་མཚོའི་སྟེང་དུ་བརྟན་ཞིང་སྟོབས་ལྡན་པ་ཁྱོད་ལགས། ཁྱོད་དང་ཁྱོད་ཀྱི་མི་སྡེ་ཡིས་སྔར་ནས་དངངས་སྐྲག་གནས་དེར་བསྡད་པའི་མི་ཐམས་ཅད་ཀྱི་ཐོག་ཏུ་བབས་བཅུག་པས། ཁྱོད་ནི་ཅི་ལྟར་ཤུལ་ཆད་དམ།
[18] ཁྱོད་ལོག་པའི་དུས་ལ། ད་ལྟ་གླིང་ཕྲན་ན་སྡོད་པའི་མི་སྡེ་རྣམས་འདར་ཞིང་། གླིང་ཕྲན་དག་ནི་ཁྱོད་བཤིག་པའི་ཕྱིར་དུ་དངངས་སྐྲག་སྐྱེས་སོ།།
[19] ཅིའི་ཕྱིར་ཞེ་ན། གཙོ་བོ་ཡ་ཝཱེས་འདི་སྐད་དུ་གསུངས་ཏེ། ངས་ཁྱོད་ནི་མི་མེད་པའི་གྲོང་ཁྱེར་བཞིན་དུ། ཁྱོད་ནི་སྟོངས་སུ་འཇུག་ཅིང་། ཡང་ངས་གཏིང་གི་ཆུ་རྣམས་ཡར་འཕྱུར་གཞུག་སྟེ་ཁྱོད་ལས་རྒྱས་པར་གྱུར་ནས། ཆུ་ཆེན་གྱིས་ཁྱོད་ནི་སྣུབ་པར་འགྱུར།
[20] དུས་དེར། ངས་ཁྱོད་ནི་དམྱལ་བར་ལྷུང་བའི་མི་དང་བཅས་སུ་གནའ་བའི་མིའི་རྩར་འབབ་འཇུག་ཅིང་། ངས་ཁྱོད་ནི་ཡུན་རིང་ལ་སྟོངས་སུ་གྱུར་བའི་སའི་འོག་སྟེ། དམྱལ་བར་ལྷུང་བའི་མི་དེ་དག་དང་མཉམ་དུ་སྡོད་པར་འཇུག་ཅིང་། ཐ་ན་ཁྱོད་ནི་སླར་གསོན་པའི་གནས་སུ་མངོན་པར་མི་འགྱུར་རོ།།
[21] ཡང་ངས་ཁྱོད་ལ་འཇིགས་སུ་རུང་པའི་གནོད་འཚེ་ཐེབས་པར་བཅུག་སྟེ། ཁྱོད་ནི་ཡང་བསྐྱར་གནས་བར་མི་འགྱུར་ལ། མི་ཡིས་ཁྱོད་བཙལ་ཡང་། ནམ་ཡང་བཙལ་ནས་རྙེད་མི་འགྱུར་རོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།