[1] ཡང་དེས་ང་གནས་མཆོག་གི་ཤར་ཕྱོགས་ཀྱི་ཕྱི་སྒོ་རུ་ཁྲིད་པ་ན་སྒོ་དེ་བརྒྱབ་ཡོད་པ་དང་།
[2] གཙོ་བོ་ཡ་ཝཱེས་ང་ལ་འདི་སྐད་དུ། སྒོ་འདི་ངེས་པར་དུ་རྒྱག་དགོས་པ་ལས་ཕྱེས་མི་རུང་སྟེ། མི་སུ་ཞིག་ཡིན་ཡང་དེ་ལས་ནང་དུ་སོང་མི་ཆོག་ལ། ཅིའི་ཕྱིར་ཞེ་ན། ཡེས་ར་ཨེལ་གྱི་དཀོན་མཆོག་ཡ་ཝཱེ་དེ་ལས་ནང་ལ་ཕེབས་པས། སྒོ་འདི་ངེས་པར་དུ་རྒྱག་དགོས་པ་དང་།
[3] རྒྱལ་པོ་ཁོ་ན་ནང་དུ་བཞུགས་ཏེ། ཡ་ཝཱེའི་དྲུང་དུ་བེག་ལེབ་ཟ་ཆོག་པ་དང་། ཡིན་ཡང་དེ་ངེས་པར་དུ་སྒོ་ཁྱམས་ལས་ནང་དུ་འཛུལ་ཞིང་། ཡང་ལམ་དེ་བརྒྱུད་ནས་ཕྱིར་ཡོང་དགོས་པ་ཡིན་ཞེས་གསུངས་སོ།།
[4] བྱང་སྒོ་བརྒྱུད་ནས་དེས་ང་ཕོ་བྲང་གི་མདུན་ཕྱོགས་སུ་ཁྲིད་ནས། ངས་བལྟས་པ་ན། གཙོ་བོ་ཡ་ཝཱེའི་ཕོ་བྲང་ནང་དུ་ཁོང་གི་གཟི་བརྗིད་ཀྱིས་ཁེངས་པ་མཐོང་སྟེ། ང་ཁ་བུབ་ཏུ་བསྡད་དོ།།
[5] གཙོ་བོ་ཡ་ཝཱེས་ང་ལ་འདི་སྐད་དུ། ཀྱེ་མིའི་བུ། ངས་ཁྱོད་ལ་བརྗོད་པའི་ཡ་ཝཱེའི་ཕོ་བྲང་གི་ལམ་སྲོལ་དང་བཀའ་ཁྲིམས་དག་ལ་ཁྱོད་ཀྱིས་གཟབ་གཟབ་བྱས་ནས། མིག་གིས་ལྟོས་དང་། རྣ་བས་ཉོན་ཞིག ད་དུང་ཕོ་བྲང་དམ་པའི་འཇུག་སྒོ་དང་གནས་མཆོག་གི་ཐོན་སྒོ་ཐམས་ཅད་ལ་ཡིད་འཇོག་བྱ་དགོས།
[6] ཁྱོད་ཀྱིས་ངོ་ལོག་ཅན་གྱི་ཡེས་ར་ཨེལ་གྱི་ཁྱིམ་རྒྱུད་ལ་འདི་ལྟར་སྨོས་ཤིག གཙོ་བོ་ཡ་ཝཱེས་འདི་སྐད་དུ། ཀྱེ་ཡེས་ར་ཨེལ་གྱི་ཁྱིམ་རྒྱུད། ཁྱོད་ཀྱིས་སྤྱད་པའི་ཞེན་ལོག་གི་དོན་ཀུན་ད་དུང་མ་ལོངས་སམ།
[7] ཁྱོད་རྣམས་ཀྱིས་ཞེན་ལོག་གི་དོན་ཀུན་སྤྱད་པ་ལས། ད་དུང་ཁྱོད་རྣམས་ཀྱིས་ཚིལ་དང་ཁྲག་ང་ལ་ཟས་སུ་འབུལ་སྐབས། ལུས་སེམས་གཉིས་ཀྱི་མདུན་ལྤགས་བཅད་མེད་པའི་ཕྱི་ཕྱོགས་པ་ངའི་གནས་མཆོག་དུ་ཁྲིད་འོངས་ཏེ། ངའི་གཙབ་ཁང་བཙོག་པར་བཟོས་པ་མ་ཟད། ངའི་ཞལ་ཆད་ལས་ཀྱང་འགལ་ཏོ།།
[8] ཡང་ཁྱོད་ཚོ་རང་གིས་ངའི་རྫས་དམ་པ་རྣམས་མ་སྲུང་བའི་ཁར། ཁྱོད་ཀྱི་ཚབ་ཏུ་ངའི་གནས་མཆོག་ལ་མི་གཞན་མངགས་ནས་སྲུང་བར་བཅུག་གོ་ཅེས་གསུངས་སོ།།
[9] གཙོ་བོ་ཡ་ཝཱེས་འདི་སྐད་དུ། ཡེས་ར་ཨེལ་པ་རྣམས་ཀྱི་ཁྲོད་དུ་ལུས་སེམས་གཉིས་ཀྱི་མདུན་ལྤགས་བཅད་མེད་པའི་ཕྱི་ཕྱོགས་པ་ངའི་གནས་མཆོག་དུ་འོང་མི་རུང་སྟེ།
[10] ཡེས་ར་ཨེལ་པ་རྣམས་ཀྱིས་ལམ་བོར་དུས་སུ། ལེ་ཝི་པ་ཡང་ང་དང་ཁ་བྲལ་ཏེ་ལམ་བོར་བ་དང་། དེ་དག་ང་ལས་བྲལ་ཏེ་རང་གི་སྐུ་འདྲའི་རྗེས་སུ་འབྲངས་བས། ཁོ་ཚོས་རང་གི་སྡིག་པ་འཁུར་འགྱུར་ངེས་ཡིན།
[11] དེ་དག་གིས་ངའི་གནས་མཆོག་ནང་དུ་ཞབས་ཕྱི་བསྒྲུབ་ཅིང་། ངའི་གཙང་ཁང་གི་སྒོ་དག་ལ་ལྟ་ཞིང་། གནས་མཆོག་དམ་པ་ནང་དུ་ལས་འགན་འཁུར་ཞིང་། དེ་དག་གིས་མི་སྡེའི་ཕྱིར་དུ་སྦྱིན་སྲེག་གི་མཆོད་པ་དང་། མཆོད་པའི་མཛད་སྒོ་གཞན་སྤེལ་བྱེད་ཀྱི་ཟོག་རྣམས་བཤའ་ཞིང་། ཡང་མི་སྡེ་མདུན་དུ་ལངས་ནས་དེ་དག་ལ་ཞབས་ཏོག་བསྒྲུབ་པར་འགྱུར།
[12] ཅིའི་ཕྱིར་ཞེ་ན། སྔར་ལེ་ཝི་པ་དེ་དག་གིས་སྐུ་འདྲའི་མདུན་དུ་མི་སྡེ་དག་ལ་ཞབས་ཏོག་བསྒྲུབས་པས། ཡེས་ར་ཨེལ་གྱི་ཁྱིམ་རྒྱུད་སྡིག་ནང་དུ་ལྷུང་བཅུག་པའི་བཀག་རྡོ་རུ་གྱུར་ལ། དེ་བས་ངས་ཁོ་ཚོའི་ཕྱོགས་སུ་ཕྱག་བརྐྱངས་ཏེ་མནའ་སྐྱེལ་བ་དང་། དེ་དག་གིས་རང་གི་སྡིག་པ་འཁུར་བར་འགྱུར་ངེས་ཡིན་ཞེས་གཙོ་བོ་ཡ་ཝཱེས་འདི་སྐད་དུ་གསུངས་པ་དང་།
[13] དེ་དག་ང་ལ་བློ་ཉེ་སྟེ་ངའི་མཆོད་དཔོན་དུ་མི་འགྱུར་ཞིང་། ངའི་རྫས་དམ་པ་རྣམས་དང་རྫས་དམ་པའི་དམ་པ་རྣམས་དང་ཡང་ཉེ་བར་མི་འགྱུར་རོ།། དེ་དག་གིས་ངེས་པར་དུ་རང་གི་ངོ་ཚ་དང་། རང་གིས་བྱས་པའི་ཞེན་ལོག་གི་དོན་ཀུན་གྱི་ལན་འཁུར་བར་འགྱུར།
[14] ཡིན་ཡང་ངས་ཁོ་ཚོ་མངགས་ཏེ་གཙང་ཁང་བསྲུང་བར་འཇུག་སྟེ། གཙང་ཁང་དམ་པའི་དོན་རྣམས་བསྒྲུབ་པར་གྱུར་ནས་བྱེད་འོས་པའི་ལས་ཀུན་བྱ་བར་བསྐོའོ་ཞེས་གསུངས་སོ།།
[15] ཡེས་ར་ཨེལ་པ་རྣམས་ཀྱིས་ལམ་བོར་ཏེ་ང་དང་ཁ་བྲལ་དུས་སུ། ཟཱ་ཏོག་གི་བུ་རྒྱུད་དེ་ལེ་ཝི་པའི་མཆོད་དཔོན་དག་གིས་ད་དུང་ངའི་གནས་མཆོག་སྲུང་ཞིང་། དེ་དག་ཁོ་ནས་ང་དང་བློ་ཉེ་ཞིང་། ང་ལ་ཞབས་ཕྱི་སྒྲུབ་ཅིང་། ངའི་སྤྱན་སྔར་ལངས་བསྡད་དེ་ཚིལ་དང་ཁྲག་ང་ལ་འབུལ་བར་འགྱུར་རོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས།
[16] དེ་དག་ངའི་གནས་མཆོག་ནང་འཛུལ་ཞིང་། ཞབས་ཕྱི་བྱེད་དུ་ངའི་སྒྲོག་ཙེ་དྲུང་དུ་འོང་ཆོག་ཅིང་། ངས་བསྒོས་བའི་བཀའ་རྣམས་བསྲུང་བར་འགྱུར།
[17] དེ་དག་ནང་ཁྱམས་ཀྱི་སྒོ་རུ་འཇུག་དུས་སུ། ངེས་པར་དུ་སོ་རས་འཇམ་པོ་གྱོན་དགོས་པ་དང་། དེ་དག་གིས་ནང་ཁྱམས་ཀྱི་སྒོ་དང་གཙང་ཁང་དམ་པ་ནང་ནས་ཞབས་ཏོག་སྒྲུབ་དུས་ཁོ་ཚོས་སྣམ་བུ་གྱོན་པར་མི་རུང་སྟེ།
[18] ཁོ་ཚོའི་མགོ་ལ་སོ་རས་འཇམ་པོ་དཀྲི་དགོས་པ་དང་། ཁོག་སྨད་ལ་སོ་རས་འཇམ་པོའི་དོར་མ་གྱོན་དགོས་པ་ལས། ལུས་སུ་རྔུལ་ཆུ་འདོན་སླ་བའི་གོས་གྱོན་མི་རུང་།
[19] དེ་དག་ཕྱི་ཁྱམས་ཀྱི་མི་སྡེའི་རྩར་འགྲོ་དུས། ཞབས་ཏོག་སྒྲུབ་དུས་ཀྱི་གོས་རྣམས་ཕུད་དེ། གཙང་ཁང་དམ་པ་ནང་དུ་འཇོག་དགོས་ཤིང་། རང་གི་དམ་པའི་གོས་ཀྱི་ཕྱིར་མི་སྡེ་དམ་པར་མི་འགྱུར་ཆེད། གོས་གཞན་དག་གྱོན་དགོས་སོ།།
[20] དེ་དག་གིས་སྐྲ་བཞར་མི་རུང་སྟེ། སྐྲ་ཐུང་འཇོག་པ་ལས་སྐྲ་རིང་པོ་འཇོག་མི་རུང་།
[21] མཆོད་དཔོན་ཐམས་ཅད་ནང་ཁྱམས་སུ་འཇུག་དུས་རྒུན་ཆང་འཐུང་མི་རུང་སྟེ།
[22] དེ་དག་གིས་ཡུགས་མོ་དང་སྐྱེས་པས་དོར་བའི་བུད་མེད་ཆུང་མར་ལེན་མི་རུང་བར། ཡེས་ར་ཨེལ་ཁྱིམ་རྒྱུད་ལས་བུ་མོ་གཙང་མ་ཞིག་ཆུང་མར་ལེན་དགོས་པ་དང་། ཡང་ན་མཆོད་དཔོན་ནས་ལུས་པའི་ཡུགས་མོ་ཆུང་མར་ལེན་དགོས།
[23] དེ་དག་གིས་ངའི་མི་སྡེ་ལ་དམ་པའི་རྫས་དང་སྤྱིར་རྫས་བཀར་བའི་བསླབ་བྱ་གནང་སྟེ། མི་ལ་གང་ཞིག་གཙང་བ་དང་གང་ཞིག་མི་གཙང་བ་ཡིན་པའི་དབྱེ་བ་འབྱེད་དུ་འཇུག་གོ །
[24] ཡང་དེ་དག་གིས་གཏུག་བཤེར་གྱི་དོན་ཐོག་ཏུ་ཚོད་དཔག་བྱ་དགོས་ཏེ། ངའི་ཁྲིམས་སྲོལ་བཞིན་དུ་ཁ་ཚོན་གཅོད་དགོས། ཁོ་ཚོས་དུས་ཐམས་ཅད་ཀྱི་ནང་དུ་གཟབ་གཟབ་ངང་ངའི་ཁྲིམས་སྲོལ་དང་སྲོལ་ཡིག་ཐམས་ཅད་སྲུང་ཞིང་། ངའི་ངལ་གསོ་བའི་ཉིན་ནི་དམ་པར་སྲུང་ངོ་།
[25] དེ་དག་གཤིན་པོའི་མདུན་དུ་སོང་སྟེ་རང་ཉིད་མི་གཙང་བར་བྱ་མི་རུང་སྟེ། ཡིན་ཡང་གཤིན་པོ་དེ་ནི་རང་གི་ཕའམ། མའམ། བུའམ། བུ་མོའམ། སྤུན་ཟླའམ། ཡང་ན་མནའ་མར་ཕྱིན་མེད་པའི་ལྕམ་སྲིང་ཡིན་ན། དེ་དག་གིས་རང་ཉིད་བཙོག་པར་བཟོས་ཆོག་གོ །
[26] མཆོད་དཔོན་རྣམས་ཀྱིས་རང་ཉིད་གཙང་བར་མཛད་རྗེས་ད་དུང་ཉིན་བདུན་ལ་བསྒུག་དགོས་ཏེ།
[27] དེ་ནང་ཁྱམས་སུ་གཙང་ཁང་ནང་ཕྱིན་ཏེ་ཞབས་ཏོག་བྱ་དུས། དེས་སྡིག་བཤགས་ཀྱི་མཆོད་པ་ཕུལ་དགོས་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[28] མཆོད་དཔོན་རྣམས་ལ་ནོར་སྐལ་ཡོད་དེ། ང་ནི་དེ་དག་གི་ནོར་སྐལ་ཡིན། ཁྱོད་རྣམས་ཀྱིས་ཡེས་ར་ཨེལ་གྱི་ནང་དུ་དེ་དག་ལ་ནོར་སྐལ་གང་ཡང་སྟེར་མི་རུང་སྟེ། ང་ནི་དེ་དག་གི་ནོར་སྐལ་ཡིན་ནོ།།
[29] དཀར་མཆོད་དང་། སྡིག་བཤགས་ཀྱི་མཆོད་པ་དང་། སྡིག་སེལ་གྱི་མཆོད་པའི་མཆོད་རྫས་རྣམས་ཁོ་ཚོས་ཟ་རུང་སྟེ། ཡེས་ར་ཨེལ་གྱི་ནང་དུ་ཡ་ཝཱེ་ལ་ཕུལ་བ་ཐམས་ཅད་མཆོད་དཔོན་རྣམས་ལ་གཏོགས་པར་འགྱུར་རོ།།
[30] ཆེས་ལེགས་ཤིང་ཐོག་མར་སྨིན་པའི་རྫས་དང་ཁྱོད་ཚོས་ཕུལ་བའི་མཆོད་རྫས་ཐམས་ཅད་མཆོད་དཔོན་དག་ལ་གཏོགས་ཤིང་། ཁྱོད་ཀྱི་ཁྱིམ་ནང་བྱིན་རླབས་འབབ་ཕྱིར། ཁྱོད་ཚོས་ཀྱང་ཐོག་མར་འཐག་པའི་ཕྱེ་མཆོད་དཔོན་ལ་ཕུལ་དགོས།
[31] བྱའམ་ཡང་ན་རི་དྭགས། རང་བཞིན་གྱིས་ཤི་བའམ་ཡང་ན་ཐང་དུ་ཕྲལ་བའི་ཤ་གང་ཞིག་ཡིན་ཡང་མཆོད་དཔོན་རྣམས་ཀྱིས་ཟ་མི་རུང་ངོ་།