[1] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། ཁྱོད་ཀྱིས་ཐཱར་གྱི་ཆེད་དུ་སྐྱོ་གླུ་རྩོམས་ཤིག་དང་།
[3] མཚོ་ཁར་སྡོད་པ་དང་། མཚོ་རྒྱུད་ཀྱི་ཡུལ་ཁམས་དག་དང་ཚོང་འགྲུལ་པའི་ཐཱར་ལ་འདི་ལྟར་དུ་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ཀྱེ་ཚོར། ཁྱོད་ཀྱིས་སྔོན་ན་ང་ནི་གཏན་ནས་མཛེས་སོ་ཞེས་ཟེར་ཞིང་།
[4] ཁྱོད་ཀྱི་ས་མཚམས་ནི་རྒྱ་མཚོ་རྣམས་ཀྱི་དབུས་སུ་ཆགས་ཏེ། ཁྱོད་འཛུགས་མཁན་གྱིས་ཁྱོད་ནི་གཏན་ནས་མཛེས་པར་མཛད་ཅིང་།
[5] དེ་དག་གིས་སེ་ནིར་གྱི་གསོམ་ཤིང་གིས་ཁྱོད་ཀྱི་ཤིང་ལེབ་ཡོངས་དང་། ལེ་བ་ནོན་གྱི་ཐང་ཤིང་གིས་ཁྱོད་ཀྱི་གྲུ་གཟིངས་ཀྱི་དར་ཤིང་བཟོས་ཏེ།
[6] པཱ་ཤན་གྱི་བེ་ཤིང་གིས་ཁྱོད་ཀྱི་གྲུ་སྐྱ་བཟོས་ཤིང་། བ་སོས་ཕྲ་རྒྱན་ཡོད་པའི་ཀི་ཐིམ་གྱི་མཚོ་འགྲམ་གྱི་ཤུག་ཤིང་གིས་ཁྱོད་ཀྱི་གྲུ་གཟིངས་ནང་གི་ཤིང་ལེབ་བྱས་ཏེ།
[7] ཁྱོད་ཀྱི་རླུང་གཡོར་ནི་ཨེ་ཅིབ་ཡུལ་གྱི་ཚེམ་དྲུབ་བྱས་པའི་སོ་རས་འཇམ་པོས་བཟོས་ཤིང་། དེ་ནི་ཁྱོད་ཀྱི་དར་ཆ་རུ་བྱས་ཆོག་སྟེ། ཁྱོད་ཀྱི་གྲུ་ཕྱར་ནི་ཨི་ལི་ཤཱའི་མཚོ་འགྲམ་གྱི་མཐིང་མདོག་དང་སྨུག་མདོག་གི་རས་ཀྱིས་བཟོས་པ་ཡིན།
[8] ཚི་ཏུན་པ་དང་ཨར་བད་པའི་མི་ཡིས་ཁྱོད་ཀྱི་གྲུ་སྐྱ་གཏོང་ཞིང་། ཀྱེ་ཐཱར། ཁྱོད་ཀྱི་ནང་གི་ལག་རྩལ་པ་རྣམས་ཁྱོད་ཀྱི་གྲུ་དཔོན་བྱས་ཤིང་།
[9] གེ་བལ་གྱི་ལག་རྩལ་པ་དང་ལག་ཤེས་ལ་བྱང་ཆུབ་པ་རྣམས་ཀྱིས་ཁྱོད་ཀྱི་དྲུང་དུ་སེར་ཁ་ཉམས་གསོ་བྱེད་ཅིང་། རྒྱ་མཚོའི་གྲུ་དང་གྲུ་པ་ཐམས་ཅད་ཀྱིས་ཁྱོད་ཀྱི་དྲུང་དུ། ཁྱོད་དང་མཉམ་དུ་ཚོང་དོན་གཉེར་བཞིན་ཡོད།
[10] ཏ་ཟིག་པ་དང་། ལུ༌ཏི་པ་དང་། ཕུ༌ཏཱ་པ་རྣམས་ཁྱོད་ཀྱི་དམག་དཔུང་ནང་དུ་དམག་མིར་བྱེད་ཅིང་། དེ་དག་གིས་ཁྱོད་ཀྱི་དྲུང་དུ་ཕུབ་དང་རྨོག་རྣམས་བཀལ་ཏེ། ཁྱོད་ཀྱི་གཟི་བརྗིད་མངོན་པའོ།།
[11] ཨར་བད་པ་ནི་ཁྱོད་ཀྱི་དམག་དཔུང་དང་བཅས་ཁྱོད་ཀྱི་ལྕགས་རི་ཐོག་ཏུ་ཡོད་དེ། ཁྱོད་ཀྱི་མཁར་རུ་དཔའ་བོ་རྣམས་ཡོད་པ་དང་། ཁྱོད་ཀྱི་ཕྱོགས་བཞིའི་མཁར་རུ་ཁོ་ཚོས་རང་གི་ཕུབ་རྣམས་བཀལ་ནས། ཁྱོད་ནི་ཡོངས་སུ་མཛེས་པར་གྱུར་ཏོ།།
[12] ཐཱར་ཞིས་པས་ཁྱོད་ཀྱི་རིགས་མི་འདྲ་ཞིང་ཕུན་སུམ་ཚོགས་པའི་ནོར་རྫས་ཀྱི་ཕྱིར་དུ། ཁྱོད་ཀྱི་ཚོང་གྲོགས་བྱས་ཏེ། ཁོ་ཚོས་དངུལ་དང་། ལྕགས་དང་། གཡའ་དཀར་དང་། ཞ་ཉེ་ཡིས་ཁྱོད་དང་ཚོང་རྒྱག་པ་དང་།
[13] ཡཱ་ཝན་པ་དང་། ཐུ་བཱལ་པ་དང་། མེ་ཤེག་པས་ཀྱང་ཁྱོད་དང་ཚོང་འགྲུལ་ཏེ། ཁོ་ཚོས་བྲན་གཡོག་དང་། ལི་ཆས་ཀྱིས་ཁྱོད་དང་ཚོང་རྒྱག་པ་ཡིན།
[14] པེད་ཐོ་གར་མཱའི་མི་རྒྱུད་ཀྱིས་རྟ་དང་དམག་རྟ། དྲེལ་བཅས་ཀྱིས་ཁྱོད་དང་ཚོང་རྒྱག་སྟེ།
[15] དི་དན་པ་ཡང་ཁྱོད་དང་ཚོང་འགྲུལ་ཏེ། མཚོ་འགྲམ་གྱི་ཡུལ་མང་པོ་ཁྱོད་ཀྱི་ཚོང་ར་རུ་བྱེད་དེ། ཁོ་ཚོས་བ་སོ་དང་ཤིང་ནག་གིས་ཁྱོད་ལ་དངུལ་ལན་བཅལ་པ་ཡིན།
[16] ཁྱོད་ཀྱི་ཐོན་རྫས་མང་དྲགས་པས་ཨ་རམ་པ་ནི་ཁྱོད་ཀྱི་ཚོང་གྲོགས་སུ་བྱེད་ཅིང་། ཁོ་ཚོས་མར་གད་དང་། སྨུག་མདོག་གི་རས་དང་། ཚེམ་དྲུབ་དང་། སོ་རས་འཇམ་པོ་དང་། བྱུ་རུ་དང་། པད་མ་རཱ་ག་ཡིས་ཁྱོད་དང་ཚོང་རྒྱག་པ་དང་།
[17] ཡ་ཧུ་དཱ་དང་། ཡེས་ར་ཨེལ་ཡུལ་ཁམས་ཀྱང་ཁྱོད་ཀྱི་ཚོང་གྲོགས་ཡིན་པས། དེ་དག་གིས་མིན་ནིད་ཀྱི་གྲོ་དང་བག་ཟན། སྦྲང་རྩི་དང་། སྣུམ་དང་སྤོས་དཀར་གྱིས་ཁྱོད་དང་ཚོང་རྒྱག་གོ །
[18] ཁྱོད་ཀྱི་ཐོན་རྫས་མང་དྲགས་ཤིང་། རིགས་མི་འདྲ་ཞིང་ཕུན་སུམ་ཚོགས་པའི་ནོར་རྫས་ཀྱི་ཕྱིར་དུ། དཱ་མེ་སེག་པས་ཧེལ་བོན་གྱི་རྒུན་ཆང་དང་། བལ་དཀར་པོས་ཁྱོད་དང་ཚོང་རྒྱག་པ་ཡིན།
[19] བེ་དན་པས་བེ་སཱ་ནས་ཐོན་པའི་རྒུན་ཆང་གིས་ཁྱོད་དང་ཚོང་རྒྱག་ཅིང་། དེ་དག་གིས་ལྕགས་བཙོ་མ་དང་། ཁ་ཚི་ཡཱ་དང་། ཤུ་དག་གིས་ཁྱོད་དང་ཚོང་རྒྱག་གོ །
[20] ཡང་དི་དན་པས་རྟ་སྒ་ལ་དགབ་པའི་ས་གདན་གྱིས་ཁྱོད་དང་ཚོང་རྒྱག་ཅིང་།
[21] ཨ་རབ་པ་དང་ཀེ༌དཱར་གྱི་སྐུ་དྲག་རིགས་ཐམས་ཅད་ནི་ཁྱོད་དང་ཚོང་འགྲུལ་མཁན་གྱི་མགྲོན་བྱེད་ཅིང་། དེ་དག་གིས་ལུ་གུ་དང་། ལུག་ཐུག་དང་ར་ཐུག་བཅས་ཀྱིས་ཁྱོད་དང་ཚོང་རྒྱག་པ་ཡིན།
[22] ཤེ་བཱ་དང་། རཱ་ཨེ་མཱའི་ཚོང་པ་རྣམས་ཀྱིས་ཁྱོད་དང་ཚོང་རྒྱག་ཅིང་། དེ་དག་གིས་ཕུལ་བྱུང་གི་བསུང་རྫས་སྣ་ཚོགས་དང་། རྡོ་རྗེ་ཕ་ལམ་གྱི་རིགས་དང་གསེར་གྱིས་ཁྱོད་དང་ཚོང་རྒྱག་གོ །
[23] ཧཱ་རན་པ་དང་། ཀན་ནེ་པ་དང་། ཨེ་དེན་པ་དང་། ཤེ་བཱའི་ཚོང་པ་དང་། ཨ་སུར་པ་དང་། ཀིལ་མད་པ་བཅས་ཀྱིས་ཁྱོད་དང་ཚོང་རྒྱག་ཅིང་།
[24] དེ་དག་གིས་ཡིད་དུ་འོང་པའི་གྱོན་གོས་དང་། ཚེམ་དྲུབ་ཅན་གྱི་ལྭ་རིང་སྔོན་པོ་དང་། ཚོན་མདངས་བཀྲ་བའི་ས་གདན་བཅས་ནི། ཐག་པས་བརྟན་པོར་བཅུག་སྟེ། ཁྱོད་ཀྱི་ཚོང་ར་རུ་ཁྱོད་དང་ཚོང་རྒྱག་པ་ཡིན།
[25] ཐཱར་ཞིས་ཀྱི་གྲུ་གཟིངས་རྣམས་ཀྱིས་ཁྱོད་ཀྱི་ཚོང་ཟོག་སྐྱེལ་འདྲེན་བྱེད་ཅིང་། ཁྱོད་ནི་རྒྱ་མཚོའི་དབུས་སུ་དངོས་ཟོག་བྱུར་བུར་གང་བས་རབ་ཏུ་ལྕིའོ།།
[26] གྲུ་སྐྱ་པས་ཁྱོད་ནི་རྒྱ་མཚོའི་གཏིང་སར་བཏང་སྟེ། ཤར་རླུང་གིས་རྒྱ་མཚོའི་དབུས་སུ་ཁྱོད་ཁུར་ཞིང་།
[27] ཁྱོད་ཀྱི་རྒྱུ་ནོར་དང་། ཚོང་ཟོག་དང་། ཚོང་རྫས་དང་། གྲུ་པ་དང་། དེད་དཔོན་དང་། སེར་ཁ་ཉམས་གསོ་མཁན་དང་། ཁྱོད་དང་ཚོང་ལས་གཉེར་མཁན་དང་། ཁྱོད་ཀྱི་དྲུང་དུ་ཡོད་པའི་དམག་མི་ཡོངས་དང་། ད་དུང་ཁྱོད་ཀྱི་དྲུང་དུ་འཛོམས་པའི་མི་ཚོགས་ཚང་མ་དང་ལྷན་ཅིག་ཏུ། ཁྱོད་འགྱེལ་པའི་ཉིན་མོར། ཐམས་ཅད་རྒྱ་མཚོའི་དབུས་སུ་ནུབ་བར་འགྱུར་ཞིང་།
[28] ཁྱོད་ཀྱི་དེད་དཔོན་རྣམས་གྱི་འབོད་སྐད་ཀྱིས། རི་ཐང་ཡང་འདར་བར་འགྱུར།
[29] དེ་ནས་གྲུ་སྐྱ་མཁན་དང་། གྲུ་པ་དང་། རྒྱ་མཚོའི་དེད་དཔོན་ཚང་མ་རང་གི་གྲུ་ལས་བབས་ནས། སྐམ་སར་བསྡད་དེ།
[30] དེ་དག་གིས་ཁྱོད་ཀྱི་ཕྱིར་དུ་ངུ་སྐད་འདོན་ཞིང་། ས་རྡུལ་རང་གི་མགོ་ལ་གཏོར་ནས། ཐལ་བ་ནང་དུ་འགྲེ་ལྡོག་རྒྱག་པར་འགྱུར།
[31] དེ་དག་གིས་ཁྱོད་ཀྱི་ཕྱིར་དུ་ཉིད་ཀྱི་སྐྲ་གཞར་ཞིང་། རྐེད་པར་སོ་རས་བཅིང་སྟེ། ཁྱོད་ཀྱི་ཕྱིར་དུ་སེམས་སྡུག་སྟེ་ངུ་ཞིང་། སེམས་ཤིན་ཏུ་སྐྱོ་བར་འགྱུར་རོ།།
[32] དེ་དག་གིས་ཁྱོད་ལ་མྱ་ངན་ཞུ་དུས། ཁྱོད་ཀྱི་ཕྱིར་དུ་སྐྱོ་གླུ་ཞིག་ལེན་ཞིང་ན་རེ། གྲོང་ཁྱེར་གང་ཞིག་ནི་རྒྱ་མཚོ་ནང་དུ་ནུབ་པའི་ཐཱར་བཞིན་ཡིན་ནམ།
[33] ཁྱོད་ཀྱི་ཚོང་ཟོག་རྒྱ་མཚོ་ལས་སྐྱེལ་འདྲེན་བྱེད་དུས་སུ། སྔོན་ན་ཡུལ་ཁམས་མང་པོའི་མི་ནི་ཡིད་ཚིམ་པར་བཅུག་སྟེ། ཁྱོད་ཀྱི་ཕུན་སུམ་ཚོགས་པའི་ནོར་རྫས་དང་ཚོང་ཟོག་གི་ཕྱིར་དུ། ཁྱོད་ཀྱིས་ས་གཞིའི་རྒྱལ་པོ་རྣམས་ནི་འབྱོར་ཕྱུག་ལྡན་པར་བཅུག་གོ །
[34] འོན་ཀྱང་ད་ལྟ་ཁྱོད་ནི་རྒྱ་མཚོའི་གཏིང་ཟབ་སར། རྒྱ་མཚོས་ཁྱོད་རང་གཏོར་བ་དང་། ཁྱོད་ཀྱི་ཚོང་ཟོག་དང་། ཁྱོད་ཀྱི་དྲུང་དུ་འཛོམས་པའི་མི་ཐམས་ཅད་ཀྱང་ནུབ་པར་གྱུར་རོ།།
[35] དེ་ནས་མཚོ་རྒྱུད་ས་ཁུལ་གྱི་མི་སྡེ་རྣམས་ནི་ཁྱོད་ཀྱི་ཕྱིར་དུ་འཇིགས་སྐྲག་སྐྱེ་ཞིང་། དེ་དག་གི་རྒྱལ་པོ་རྣམས་ནི་ཤིན་ཏུ་འཇིགས་ཏེ་ངོ་མདོག་ཀྱང་འགྱུར་རོ།།
[36] མི་རིགས་སོ་སོའི་ཚོང་པ་རྣམས་ཀྱིས་ཁྱོད་ལ་འཕྱ་ཞིང་། ཁྱོད་ལ་གནོད་འཚེ་འཇིགས་སུ་རུང་བ་ཐེབས་པར་འགྱུར་པ་དང་། དེ་ནས་ཁྱོད་ནི་ནམ་ཡང་གནས་པར་མི་འགྱུར་རོ།།