[1] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། རོས་དང་། མེ་ཤེག་དང་། ཐུ་བཱལ་གྱི་མགོ་དཔོན་ཡིན་པའི་མ་གཱོག་ཡུལ་གྱི་གཱོག་གི་ཕྱོགས་སུ་གདོང་སྒྱུར་ནས། དེར་རྒོལ་བའི་ལུང་སྟོན་ཞིག
[3] འདི་ལྟར་དུ། གཙོ་བོ་ཡ་ཝཱེས་འདི་སྐད་དུ་གསུངས་ཏེ། ཀྱེ་རོས་དང་མེ་ཤེག་དང་ཐུ་བཱལ་གྱི་མགོ་དཔོན་གཱོག་ལགས། ངས་ཁྱོད་ནི་དགྲར་འཛིན་ཏེ།
[4] ངས་ཁྱོད་བཟློགས་ཏེ། ལྕགས་ཀྱུས་ཁྱོད་ཀྱི་འགྲམ་པར་བརྒྱབ་ནས། ཁྱོད་དང་ཁྱོད་ཀྱི་དམག་དཔུང་རྣམས་དང་། རྟ་དང་རྟ་དམག་རྣམས་ཕྱིར་ཁྲིད་འོངས་ཤིང་། ཁོ་ཚོ་ཐམས་ཅད་ཀྱིས་དམག་ཆས་ཆ་ཚང་གྱོན་པས་དཔུང་ཚོགས་ཆེན་པོ་ཞིག་ཏུ་གྱུར་ཏེ། ཕུབ་ཆེ་ཆུང་གཉིས་བཟུང་སྟེ། མི་རེ་རེའི་ལག་ཏུ་རལ་གྲི་དམ་པོར་བཟུང་ཡོད་པ་ཡིན།
[5] དེ་དག་དང་མཉམ་དུ་ད་དུང་ཏ་ཟིག་པ་དང་། གུ་ཤ་པ་དང་། ཕུ༌ཏཱ་པ་བཅས་ཡོད་དེ། མི་རེ་རེ་ལ་ཕུབ་དང་རྨོག་ཞྭ་ཡོད་པ་ཡིན།
[6] ཡང་གོ་མེར་པ་དང་། དེའི་དམག་དཔུང་ཐམས་ཅད་དང་། བྱང་ཕྱོགས་ཀྱི་རྒྱང་རིང་པའི་པེད་ཐོ་གར་མཱའི་མི་རིགས་དང་། དེའི་དམག་དཔུང་ཡོངས་བཅས་མི་རིགས་མང་པོ་ཁྱོད་དང་མཉམ་དུ་ཡོད་པས།
[7] ཁྱོད་ཀྱིས་སྟ་གོན་ལེགས་པོ་བྱོས་ཤིག་དང་། ཁྱོད་དང་ཁྱོད་ཀྱི་དྲུང་དུ་འདུས་པའི་དམག་དཔུང་ཚང་མས་སྟ་གོན་ལེགས་པོ་བྱས་ནས། ཁྱོད་ནི་དེ་དག་གི་མགོ་དཔོན་བྱ་དགོས།
[8] ཉིན་མང་པོ་འགོར་ཚེ། ཁྱོད་ནི་གཡུལ་སར་འགྲོ་བར་འཇུག་སྟེ། མ་འོངས་པའི་དུས་ནང་དུ། ཁྱོད་ཀྱིས་རལ་གྲི་ལས་བྲལ་བའི་གནས་ཏེ། ཡུལ་ཁམས་སོ་སོ་ལས་བསྡུས་ཏེ་ཕྱིར་ལོག་པའི་མི་སྡེ་སྡོད་པའི་གནས་དེར་རྒོལ་བར་འགྱུར་ཞིང་། ཡང་ཁྱོད་ནི་དབེན་སྟོང་དུ་གྱུར་ཟིན་པའི་ཡེས་ར་ཨེལ་གྱི་རི་བོ་ཀུན་ལའང་རྒོལ་བར་འོངས་ཤིང་། ཅིའི་ཕྱིར་ཞེ་ན། ཁོ་ཚོ་ནི་མི་སྡེ་ཀུན་ལས་ཕྱིར་ཁྲིད་འོངས་པའི་མི་ཡིན་པ་དང་། ཐམས་ཅད་གནས་དེར་བློ་བདེ་ངང་བསྡད་པའི་ཕྱིར།
[9] ཁྱོད་དང་ཁྱོད་ཀྱི་དམག་དཔུང་དང་། ད་དུང་ཁྱོད་དང་མཉམ་དུ་ཡོད་པའི་མི་རིགས་མང་པོ་བཅས་ནི་རླུང་ནག་འཚུབ་པ་དང་། སྤྲིན་ནག་འཐིབས་པ་བཞིན་དུ་ཡར་འོངས་ཤིང་གནས་དེ་དགབ་པར་འགྱུར་ཞེས་གསུངས་སོ།།
[10] གཙོ་བོ་ཡ་ཝཱེས་འདི་སྐད་དུ་གསུངས་པ་དང་། དུས་དེར་ཁྱོད་ཀྱི་སེམས་སུ་ལྐོག་ཇུས་འདིང་བར་བསམ་ཞིང་ན་རེ།
[11] ང་ཡར་ལྕགས་རི་མེད་པའི་གྲོང་སྡེ་ལ་རྒོལ་འགྲོ་ཞིང་། ལྷིང་འཇགས་ངང་འཚོ་བའི་མི་ལ་ང་རྒོལ་འོངས་ཤིང་། གང་ལ་ཞེ་ན། དེ་དག་ཐམས་ཅད་བློ་བདེ་ངང་བསྡད་ཅིང་། ལྕགས་རིའང་མེད་ལ། སྒོ་གཏན་ཡང་མེད་དོ་ཅེས་སྨྲ་བར་འགྱུར།
[12] དེ་ནས་ཁྱོད་ཀྱིས་རྒྱུ་ནོར་འཕྲོག་ཅིང་། དངོས་པོ་རྣམས་བཅོམ་ཏེ། སྔོན་ན་ཡུལ་སྟོང་དུ་གྱུར་པ་དང་། ད་ལྟ་འདུག་མཁན་ཡོད་པའི་གནས་དེ་ལ་ལག་པ་བརྐྱངས་ནས་རྒོལ་བར་འགྱུར་ཞིང་། ཡུལ་ཁམས་སོ་སོ་ནས་ནས་བསྡུས་པ་དང་། དུད་འགྲོ་དང་རྒྱུ་ནོར་ཐོབ་ཡོད་པ་དང་། ཡུལ་ཁམས་ཀུན་གྱི་ལྟེ་བར་གནས་པའི་མི་སྡེ་དག་ལ་རྒོལ་བར་འགྱུར།
[13] ཤེ་བཱ་དང་དི་དན་པ་དང་། ཐཱར་ཞིས་གྲོང་རྡལ་གྱི་ཚོང་པ་རྣམས་ཀྱིས་ཁྱོད་ལ། ཁྱོད་འོངས་པ་ནི་རྒྱུ་ནོར་འཕྲོག་ཏུ་དང་། ཁྱོད་ཀྱིས་དམག་དཔུང་བསྡུས་པ་ནི་དངོས་པོ་རྣམས་བཅོམ་པ་དང་། གསེར་དངུལ་འཁྱེར་བ་དང་། དུད་འགྲོ་དང་ནོར་རྫས་འཕྲོག་ཅིང་། འཕྲོག་བཅོམ་ཆེན་པོ་ཞིག་བྱ་པ་ཡིན་ནམ་ཞེས་འདྲི་བར་འགྱུར་རོ།།
[14] དེ་བས། ཀྱེ་མིའི་བུ། ཁྱོད་ཀྱིས་གཱོག་ལ་འདི་ལྟར་དུ། གཙོ་བོ་ཡ་ཝཱེས་འདི་སྐད་དུ། ངའི་མི་སྡེ་ཡེས་ར་ཨེལ་བློ་བདེ་ངང་སྡོད་པའི་ཉིན་དེ་བསླེབ་ཚེ། ཁྱོད་ཀྱིས་གཟབ་གཟབ་མི་བྱ་འམ།
[15] ཁྱོད་ནི་རང་གི་ཡུལ་ཏེ་བྱང་ཕྱོགས་ཀྱི་རྒྱང་རིང་པོ་ནས་མི་རིགས་མང་པོ་དང་མཉམ་དུ་འོངས་ཤིང་། ཐམས་ཅད་རྟ་ལ་ཞོན་ཏེ་སྟོབས་ཤུགས་ལྡན་པའི་དམག་དཔུང་ཆེན་པོ་ཞིག་ཏུ་འགྱུར་ཞིང་།
[16] ཡུལ་དེར་སྤྲིན་ནག་འཐིབས་པ་བཞིན་དུ། ཁྱོད་ཡར་འོངས་ཏེ་ངའི་མི་སྡེ་ཡེས་ར་ཨེལ་ལ་རྒོལ་བར་འགྱུར། ཀྱེ་གཱོག མི་རྒྱུད་ཀུན་གྱིས་ངས་ཁྱོད་བརྒྱུད་དེ་ཁོ་ཚོར་དམ་པར་མངོན་པའི་དུས་སུ། དེ་དག་གིས་ང་ངོ་ཤེས་པའི་ཕྱིར་དུ། མ་འོངས་པའི་དུས་ནང་དུ་ངས་ཁྱོད་ཁྲིད་དེ་ངའི་ཡུལ་ལ་རྒོལ་བར་གཞུག་ཅེས་གསུངས་སོ་ཞེས་ལུང་སྟོན་ཞིག
[17] གཙོ་བོ་ཡ་ཝཱེས་འདི་སྐད་དུ། ངས་སྔོན་ན་ཉིད་ཀྱི་བྲན་པོ་སྟེ་ཡེས་ར་ཨེལ་གྱི་ལུང་སྟོན་པ་རྣམས་བརྒྱུད་ནས་གསུངས་པའི་མི་དེ་ཁྱོད་རང་མ་ཡིན་ནམ། ལོ་དེ་དག་གི་ནང་དུ། ངས་ཁྱོད་འཁྲིད་དེ་ཡེས་ར་ཨེལ་ལ་རྒོལ་བར་འོང་ཞེས་ཁོ་ཚོས་ལུང་བསྟན་པ་དང་།
[18] གཱོག་ཡེས་ར་ཨེལ་ལ་རྒོལ་དུ་འོང་བའི་དུས་སུ། ངའི་ཁོང་ཁྲོ་ནི་ཉིད་ཀྱི་སྣ་ཁུང་ལས་ཕྱིར་འཐོན་པར་འགྱུར་ཞེས་གཙོ་བོ་ཡ་ཝཱེས་གསུངས།
[19] ངས་ཞེ་སྡང་དང་ཐུགས་ཁྲོ་ངང་འདི་སྐད་དུ། ཉིན་དེར་བསླེབ་ཚེ་ཡེས་ར་ཨེལ་ལ་ས་འགུལ་ཆེན་པོ་ཞིག་འབྱུང་ཞིང་།
[20] རྒྱ་མཚོ་ནང་གི་ཉ་དང་། གནམ་མཁའི་བྱ་དང་། ཐང་གི་རི་དྭགས་དང་། སར་ལྟོ་འགྲོ་ཡི་སྲིན་འབུ་ཐམས་ཅད་དང་། ད་དུང་ས་གཞིར་ཡོད་པའི་མི་ཐམས་ཅད་ངའི་སྤྱན་སྔར་འདར་ཞིང་། རི་རྣམས་གས་པར་འགྱུར་ཞིང་། བྲག་གཟར་རྣམས་རྡིབ་ཅིང་། རྩིག་པ་ཐམས་ཅད་སར་ལོག་པར་འགྱུར།
[21] ངས་རལ་གྲིར་བསྐུལ་ནས་ངའི་རི་རྣམས་ཀྱི་ཐོག་ཏུ་གཱོག་ལ་རྒོལ་བར་འགྱུར་ཞིང་། མི་རེ་རེའི་རལ་གྲིས་རང་གི་སྤུན་ཟླར་རྒོལ་བར་འགྱུར་ཞེས་གཙོ་བོ་ཡ་ཝཱེས་གསུངས་སོ།།
[22] ཡང་ངས་རིམས་ནད་དང་ཁྲག་གི་སྒོ་ནས་དེ་ལ་ཉེས་ཆད་གཅད་ཅིང་། ངས་དྲག་ཆར་དང་སེར་བ་ཆེན་པོ་དང་། མེ་དང་མུ་ཟི་དེ་དང་དེའི་དམག་དཔུང་ཐོག་ཏུ་དང་། ད་དུང་དེ་དང་མཉམ་དུ་ཡོད་པའི་མི་རིགས་ཐོག་ཏུ་འབབ་བར་བྱ་སྟེ།
[23] ངས་རང་ཉིད་ཆེ་བ་དང་དམ་པར་མངོན་ཞིང་། མི་རྒྱུད་ཀུན་གྱི་མདུན་དུ་རང་ཉིད་མངོན་པར་འགྱུར་ལ། དེ་ནས་ཁོ་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་ཞེས་གསུངས་སོ།།