[1] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། ཁྱོད་ཀྱིས་སེ་ཨིར་རི་བོའི་ཕྱོགས་སུ་རང་གི་གདོང་བསྒྱུར་ནས། དེ་ལ་རྒོལ་བའི་ལུང་བསྟན་ནས།
[3] འདི་ལྟར་དུ། གཙོ་བོ་ཡ་ཝཱེས་འདི་སྐད་དུ། ཀྱེ་སེ་ཨིར་རི་བོ། ངས་ཁྱོད་ནི་དགྲ་རུ་འཛིན་ཏེ། ཕྱག་བརྐྱང་སྟེ་ཁྱོད་ལ་རྒོལ་བར་འགྱུར་ཞིང་། ཁྱོད་ནི་རབ་ཏུ་སྟོང་བར་འཇུག་པ་དང་།
[4] ངས་ཁྱོད་ཀྱི་གྲོང་ཁྱེར་རྣམས་སྟོངས་སུ་བཅུག་ན། ཁྱོད་ནི་ཡུལ་སྟོང་དུ་འགྱུར་ལ། དུས་དེར་ཁྱོད་ཀྱིས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར།
[5] ཅིའི་ཕྱིར་ཞེ་ན། ཁྱོད་ཀྱི་སེམས་སུ་ནམ་ཡང་ཞེ་སྡང་གིས་ཁེངས་ཏེ། ཡེས་ར་ཨེལ་པ་རྣམས་ལ་གནོད་འཚེ་བྱུང་དུས་དང་། ཉེས་ཆད་ཕོག་སྟེ་མཐར་བསླེབས་ཀྱང་། ཁྱོད་ཀྱིས་ད་དུང་དེ་དག་རལ་གྲི་འོག་ཏུ་གཏད་པ་ཡིན།
[6] དེ་བས། ངས་ཉིད་ཀྱི་གསོན་པ་ཉིད་དཔང་དུ་བཙུགས་ནས་གནས་སྐྱེལ་ཏེ། ངས་ཁྱོད་ལ་ཁྲག་བཞུར་བའི་ལན་འཇལ་ཞིང་། ཁྲག་དེས་ཁྱོད་ཀྱི་རྗེས་ནས་འདེད་པར་འགྱུར་ཞིང་། གང་ལ་ཞེ་ན། ཁྱོད་ཀྱིས་མི་ལ་ཁྲག་འཕོ་འཇུག་པར་མ་འཛེམས་པས། ཁྲག་གིས་ཁྱོད་ལ་འདེད་པར་འགྱུར་ཞེས་གཙོ་བོ་ཡ་ཝཱེས་གསུངས་ཤིང་།
[7] ངས་སེ་ཨིར་རི་བོ་ནི་རབ་ཏུ་སྟོང་བར་གྱུར་ཏེ། གནས་དེར་འགྲོ་འོང་བྱེད་མཁན་དག་ཚར་དུ་གཅོད་པར་བྱའོ།།
[8] ཡང་ངས་སེ་ཨིར་རི་བོ་རྣམས་ཀྱི་སྟེང་དུ་བསད་པའི་མི་ཡིས་ཁེངས་འཇུག་ཅིང་། ཁྱོད་ཀྱི་རི་ཕྲན་དང་། ལུང་པ་དང་། གཙང་པོ་ཐམས་ཅད་ནང་དུ་རལ་གྲིས་བསད་པ་རྣམས་ལོག་པར་འགྱུར།
[9] ངས་ནམ་ཡང་ཁྱོད་སྟོངས་སུ་གཞུག་སྟེ། ཁྱོད་ཀྱི་གྲོང་ཁྱེར་རྣམས་ལ་མི་འདུག་མཁན་གཅིག་ཀྱང་མེད་པར་གྱུར་ན། ཁྱོད་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་རོ།།
[10] ཅིའི་ཕྱིར་ཞེ་ན། ཡ་ཝཱེ་ད་དུང་དེར་བཞུགས་བཞིན་དུ་ཁྱོད་ཀྱིས་ན་རེ། མི་རྒྱུད་འདི་གཉིས་པོ་དང་ཡུལ་ཁམས་འདི་གཉིས་པོ་ང་ལ་གཏོགས་ཀྱང་། དེ་དག་ང་ལ་ནོར་སྐལ་དུ་ཐོབ་པར་འགྱུར་ཞེས་སྨྲས་པའི་ཕྱིར།
[11] དེ་བས། ངས་ཉིད་ཀྱི་གསོན་པ་ཉིད་དཔང་དུ་བཙུག་ནས་མནའ་སྐྱེལ་ཏེ། ཁྱོད་ཀྱིས་སྡང་སེམས་ཀྱིས་དེ་དག་གི་ཐོག་ཏུ་ཁོང་ཁྲོ་ཆེན་པོ་ལངས་པ་དང་། ཕྲག་དོག་བྱས་པ་བཞིན་དུ་ངས་ཁྱོད་ལ་ལན་འཇལ་ཞིང་། ངས་ཁྱོད་ལ་ཉེས་ཆད་གཅོད་དུས། དེ་དག་གི་ཁྲོད་ནས་རང་ཉིད་གསལ་པོར་མངོན་ནོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས།
[12] དེ་བཞིན་དུ། ཁྱོད་ཀྱིས་ཡེས་ར་ཨེལ་གྱི་རི་རྣམས་ལ་རྒོལ་བའི་གཏམ་སྨྲས་ཏེ་ན་རེ། རི་འདི་རྣམས་སྟོང་བར་གྱུར་ཏེ། ངེད་ཅག་གིས་མེད་པར་བཟོས་སོ་ཞེས་སྐུར་འདེབས་བྱས་པ་ཐམས་ཅད་ཡ་ཝཱེ་ངས་ཐོས་ཟིན་པ་ཁྱོད་ཀྱིས་རྟོགས་པར་འགྱུར།
[13] ཁྱོད་ཚོས་ཁ་ནས་སྒྲོ་འདོགས་ཀྱི་གཏམ་བརྗོད་དེ་ང་དང་་རྒོལ་ཞིང་། གཏམ་མང་ཙམ་བརྗོད་དེ་ང་ལ་ངོ་རྒོལ་བྱེད་པ་ངས་ཐོས་སོང་།
[14] ཡང་གཙོ་བོ་ཡ་ཝཱེས་འདི་སྐད་དུ། ས་གཞི་ཐམས་ཅད་དགའ་མགུ་བྱེད་དུས། ངས་ཁྱོད་ནི་སྟོངས་སུ་གཞུག་ཅིང་།
[15] ཡེས་ར་ཨེལ་ཁྱིམ་རྒྱུད་ཀྱི་ནོར་སྐལ་སྟོང་བའི་ཕྱིར་དུ་ཁྱོད་དགའ་བ་བཞིན། ངས་ཁྱོད་ལའང་དེ་ལྟར་ལན་འཇལ་ཞིང་། ཀྱེ་སེ་ཨིར་རི་བོ། ཁྱོད་དང་ཨེ་དོམ་གྱི་ས་གཞི་ཐམས་ཅད་སྟོང་བར་གྱུར་ན། ཁོ་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་རོ་ཞེས་གསུངས་སོ།།