[1] དེ་ནས་ཡེས་ར་ཨེལ་གྱི་རྒན་པོ་འགའ་ང་དང་ཐུག་ཏུ་འོངས་ནས། ངའི་མདུན་དུ་བསྡད་པ་དང་།
[2] གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[3] ཀྱེ་མིའི་བུ། མི་འདི་ཚོས་རང་གི་སྐུ་འདྲ་རྣམས་སེམས་སུ་དང་ལེན་བྱས་ཏེ། ཁོ་ཚོ་སྡིག་ལ་སྦྱར་བའི་བཀག་རྡོ་དེ་རང་གི་མདུན་དུ་བཞག་པས། ངས་ཅི་ལྟར་དེ་དག་ལ་ང་ཞུ་བར་འཇུག་གམ།
[4] དེ་བས། ཁྱོད་ཀྱིས་དེ་ཚོར་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ་གསུངས་ཏེ། ཡེས་ར་ཨེལ་ཁྱིམ་རྒྱུད་ཀྱི་ནང་དུ། རང་གི་སྐུ་འདྲ་སེམས་སུ་དང་ལེན་བྱས་པ་དང་། རང་ཉིད་སྡིག་ལ་སྦྱར་བའི་བཀག་རྡོ་དེ་མདུན་དུ་འཇོག་མཁན་དང་། ཡང་ལུང་སྟོན་པའི་དྲུང་དུ་འོངས་མཁན་དེ་ལ། ཡ་ཝཱེ་ངས་དེ་ཡིས་སྐུ་འདྲ་མང་པོར་དད་པའི་སྡིག་པ་བཞིན་དུ་ལན་འཇལ་ཏེ། ཡེས་ར་ཨེལ་ཁྱིམ་རྒྱུད་ཀྱི་སེམས་འགུག་པར་བྱའོ།།
[5] དེ་དག་ནི་རང་གི་སྐུ་འདྲའི་ཕྱིར་དུ་ང་དང་རྒྱང་རིང་དུ་སོང་།
[6] དེ་བས། ཁྱོད་ཀྱིས་ཡེས་ར་ཨེལ་གྱི་ཁྱིམ་རྒྱུད་དག་ལ་འདི་ལྟར་སྨྲོས་ཤིག གཙོ་བོ་ཡ་ཝཱེས་འདི་སྐད་དུ་གསུངས་ཏེ། རང་གི་སྐུ་འདྲ་རྣམས་སྤོངས་ཤིག རང་གི་ཞེན་ལོག་གི་ལས་ཐམས་ཅད་ལས་གདོང་སྒྱུར་ནས་བློ་འཁོར་ཞིག་ཅེས་སྨྲོས་ཤིག
[7] དེ་ཅིའི་ཕྱིར་ཞེ་ན། ཡེས་ར་ཨེལ་གྱི་ཁྱིམ་རྒྱུད་དང་། ཡེས་ར་ཨེལ་གྱི་ནང་ན་གཞིས་ཆགས་པའི་ཕྱི་རོལ་པའི་མི་རིགས་ནང་དུ་ང་དང་རྒྱང་རིང་པོར་སོང་སྟེ། སེམས་སུ་རང་གི་སྐུ་འདྲ་དང་ལེན་བྱས་ཏེ། རང་ཉིད་སྡིག་ལ་སྦྱར་བའི་བཀག་རྡོ་དེ་མདུན་དུ་འཇོག་མཁན་དང་། ཡང་ལུང་སྟོན་པའི་དྲུང་དུ་འོངས་ཏེ་རང་གི་ཕྱིར་དུ་ང་ལ་ཞུ་མཁན་དག་ལ། ཡ་ཝཱེ་ངས་ལན་འཇལ་ངེས་ཡིན།
[8] ངས་མི་དེའི་ཕྱོགས་སུ་གདོང་བསྒྱུར་ནས། དེ་ནི་མི་གཞན་པས་དཔེ་དང་ཟུར་ཟ་བྱེད་ཡུལ་དུ་འགྱུར་བར་མཛད་ཅིང་། ཡང་ངས་ཉིད་ཀྱི་མི་སྡེ་ལས་དེ་ཚར་དུ་བཅད་ན། ཁྱོད་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར།
[9] ཡང་ལུང་སྟོན་པ་གང་ཞིག་བསླུ་ནས་གཏམ་བཤད་པར་གྱུར་ན། ཡ་ཝཱེ་ངས་ལུང་སྟོན་པ་དེ་བསླུས་བར་བཅུག་པ་ཡིན་ཏེ། ངས་ཉིད་ཀྱི་ཕྱག་བརྐྱངས་ནས་དེ་ལ་རྒོལ་ཞིང་། ངའི་མི་སྡེ་ཡེས་ར་ཨེལ་གྱི་ནང་ནས་མི་དེ་མེད་པར་བྱ་འོ།།
[10] དེ་ནས་དེ་དག་གིས་རང་གི་སྡིག་པ་འཁུར་ཞིང་། ཞུ་མཁན་གྱི་སྡིག་པ་ཅི་ལྟར་ཡིན་པ། ལུང་སྟོན་པ་དག་གི་སྡིག་པའང་དེ་ལྟར་ཡིན།
[11] དེ་བཞིན་དུ་ཡེས་ར་ཨེལ་གྱི་ཁྱིམ་རྒྱུད་ཀྱིས་ལམ་བོར་ནས་ང་དང་མི་བྲལ་ཞིང་། རང་གི་སྐྱོན་ཐམས་ཅད་ཀྱི་ཕྱིར་དུ་རང་ཉིད་ཀྱང་བཙོག་པར་མི་བཟོ་ཤིང་། དེ་དག་ངའི་མི་སྡེ་རུ་འགྱུར་ཞིང་། ང་ནི་དེ་དག་གི་དཀོན་མཆོག་ཏུ་འགྱུར་རོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[12] གཙོ་བོ་ཡ་ཝཱེའི་བཀའ་ནི་ཡང་ང་ལ་བྱུང་སྟེ་འདི་སྐད་དུ།
[13] ཀྱེ་མིའི་བུ། གལ་ཏེ་ཡུལ་གང་གིས་དྲང་བདེན་མིན་པའི་ལས་སྤྱད་དེ་ང་ལ་འགལ་བའི་སྡིག་པ་བྱས་ན། ངས་ཉིད་ཀྱི་ཕྱག་བརྐྱངས་ཏེ་ཡུལ་དེ་ལ་རྒོལ་ཞིང་། ཡུལ་དེའི་ཁ་ཟས་བཅད་དེ། མུ་གེ་ཡུལ་དེར་ཐེབས་པར་འཇུག་ཅིང་། མི་དང་དུད་འགྲོ་ཐམས་ཅད་ཡུལ་དེ་ནས་ཚར་དུ་གཅད་པར་འགྱུར།
[14] ཇི་སྟེ་ནོ་ཨ་དང་། དཱ་ནེ་ཨེལ་དང་། ཨེས་ཡོབ་བཅས་སྐྱེས་བུ་གསུམ་པོ་དེར་ཡོད་རུང་། དེ་དག་གིས་རང་གིས་དྲང་བདེན་གྱིས་རང་སྲོག་མ་གཏོགས་བསྐྱབ་མི་འགྱུར་ཞེས་གཙོ་བོ་ཡ་ཝཱེས་འདི་སྐད་དུ་གསུངས།
[15] གལ་ཏེ་ངས་ཡུལ་དེར་གཅན་གཟན་རྒྱུ་རུ་བཅུག་སྟེ། ཡུལ་དེར་བརྫི་ཞིང་། ཡུལ་དེ་སྟོང་པར་གྱུར་ནས། ཐ་ན་གཅན་གཟན་དེ་དག་གི་ཕྱིར་དུ་མི་རྒྱུ་མཁན་ཡང་མེད་ན།
[16] སྐྱེས་བུ་དེ་གསུམ་པོ་ཡུལ་དེར་ཡོད་རུང་། དེ་དག་གིས་རང་ཉིད་ཙམ་བསྐྱབ་པ་ལས། རང་གི་བུ་དང་བུ་མོའང་བསྐྱབ་མི་ནུས་ལ། ཡུལ་དེ་ད་དུང་སྟོང་བར་འགྱུར་ཞེས་ངས་ཉིད་ཀྱི་གཏན་གནས་ཀྱི་ལུས་དཔང་དུ་བཙུགས་ཏེ་མནའ་སྐྱེལ་ཏོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[17] གལ་ཏེ་ངས་ཡུལ་དེར་རལ་གྲི་འདྲེན་ཞིང་འདི་སྐད་དུ། ངས་མི་དང་དུད་འགྲོ་དག་ཡུལ་དེ་ནས་ཚར་གཅད་པའི་ཕྱིར་དུ། རལ་གྲི་ནི་ཡུལ་དེར་རྒྱུ་བར་མཛོད་ཅེས་གསུངས་ན།
[18] སྐྱེས་བུ་དེ་གསུམ་པོ་ཡུལ་དེར་ཡོད་རུང་། གཙོ་བོ་ཡ་ཝཱེས་འདི་སྐད་དུ། དེ་དག་གིས་རང་ཉིད་ཙམ་བསྐྱབ་པ་ལས། རང་གི་བུ་དང་བུ་མོའང་བསྐྱབ་མི་ནུས་སོ།། ཞེས་ངས་ཉིད་ཀྱི་གཏན་གནས་ཀྱི་ལུས་དཔང་དུ་བཙུགས་ཏེ་མནའ་སྐྱེལ་བ་ཡིན།
[19] གལ་ཏེ་ངས་ཡུལ་དེར་རིམས་ནད་མངག་སྟེ། མི་དང་དུད་འགྲོ་རྣམས་ཡུལ་དེ་ནས་ཚར་གཅད་པའི་ཕྱིར་དུ། ཁྲག་བཞུར་པའི་དོན་ལ་བརྟེན་ནས་ངའི་ཐུགས་ཁྲོ་ཡུལ་དེར་བླུགས་ན།
[20] ནོ་ཨ་དང་། དཱ་ནེ་ཨེལ་དང་། ཨེས་ཡོབ་གསུམ་པོ་དེར་ཡོད་པའི་དབང་དུ་བཏང་ནའང་། དེ་དག་གིས་ཉིད་ཀྱི་དྲང་བདེན་གྱི་ཕྱིར་དུ་རང་ཉིད་ཙམ་བསྐྱབ་པ་ལས། རང་གི་བུ་དང་བུ་མོའང་བསྐྱབ་མི་ནུས་སོ།། ཞེས་ངས་ཉིད་ཀྱི་གཏན་གནས་ཀྱི་ལུས་དཔང་དུ་བཙུགས་ཏེ་མནའ་སྐྱེལ་ཏོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[21] ཡང་གཙོ་བོ་ཡ་ཝཱེས་འདི་སྐད་དུ། ངས་རལ་གྲི་དང་། མུ་གེ་དང་། གཅན་གཟན་དང་། རིམས་ནད་བཅས་འཇིགས་སུ་རུང་བའི་བར་ཆད་བཞི་པོ་ཡེ་རུ་སཱ་ལེམ་གྱི་ཐོག་ཏུ་འབྱུང་བར་མཛད་དེ། མི་དང་དུད་འགྲོ་དག་ཡུལ་དེ་ནས་ཚར་གཅོད་དུས། གནས་ཚུལ་ནི་དེ་ལས་ཀྱང་ཚབས་ཆེན་མ་ཡིན་ནམ།
[22] དེའི་ནང་དུ་བྲོས་པའི་ལྷག་མ་རྣམས་ཡོད་པ་དང་། དེ་དག་གིས་བུ་དང་བུ་མོ་རྣམས་ཁྲིད་ནས་ཕྱིར་ཐོན་ཏེ། ཁྱོད་ཀྱི་དྲུང་དུ་འོངས་པས། ཁྱོད་ཚོས་དེ་ཚོའི་ལམ་དང་སྤྱོད་པ་རྣམས་མཐོང་ན། ངས་ཡེ་རུ་སཱ་ལེམ་གྱི་ཐོག་ཏུ་བྱུང་གྱུར་བའི་བར་ཆད་ཀྱི་ཕྱིར་དུ། སེམས་གསོ་ཐོབ་པར་འགྱུར་ལ།
[23] ཁྱོད་ཚོས་དེ་ཚོའི་ལམ་དང་སྤྱོད་པ་རྣམས་མཐོང་ན། སེམས་གསོ་ཐོབ་པར་འགྱུར་ཏེ། གང་ལ་ཞེ་ན། ངས་ཡེ་རུ་སཱ་ལེམ་དུ་མཛད་པ་ཐམས་ཅད་རྒྱུ་མཚན་མེད་པ་མིན་ནོ་ཞེས་གཙོ་བོ་ཡ་ཝཱེས་གསུངས་སོ།།