[1] ངས་བལྟས་པ་དང་། ཀེ་རུབ་ཀྱི་མགོའི་མཁའ་དབྱིངས་སུ། རིན་ཆེན་སྔོན་པོའི་བཞུགས་ཁྲི་ཡི་གཟུགས་དབྱིབས་དང་འདྲ་བ་ཞིག་མངོན་པར་གྱུར་ཏེ།
[2] གཙོ་བོས་ལུས་སུ་སོ་རས་གྱོན་པའི་མི་དེ་ལ་འདི་སྐད་དུ། ཁྱོད་ནི་ཀེ་རུབ་ཀྱི་འོག་གི་འཁོར་ལོའི་བར་དུ་སོང་སྟེ། ཀེ་རུབ་ཀྱི་བར་དུ་ལག་པ་གཉིས་ཀྱིས་སོལ་བ་ཡར་བཀྱགས་ནས། དེ་དག་གྲོང་ཁྱེར་ཐོག་ཏུ་གཏོར་ཞིག་ཅེས་གསུངས་པ་ན། མི་དེ་ངའི་མིག་མདུན་དུ་ནང་ལ་སོང་།
[3] མི་དེ་ནང་དུ་འགྲོ་དུས། ཀེ་རུབ་རྣམས་ཕོ་བྲང་གི་གཡས་སུ་ལངས་བསྡད་དེ། ནང་ཁྱམས་སུ་འཇའ་ཚོན་གྱིས་ཁྱབ་བོ།།
[4] གཙོ་བོ་ཡ་ཝཱེའི་གཟི་བརྗིད་ནི་ཀེ་རུབ་ཀྱི་སྟེང་ནས་ཡར་བཞེངས་ཏེ་ཕོ་བྲང་གི་སྒོ་ཐེམ་དུ་ཕེབས་ནས། ཕོ་བྲང་ནང་དུ་འཇའ་ཚོན་གྱིས་ཁེངས་ཏེ། ཁྱམས་སུའང་གཙོ་བོ་ཡ་ཝཱེའི་གཟི་བརྗིད་ཀྱི་འོད་ཟེར་གྱིས་ཁྱབ་བྱུང་།
[5] ཀེ་རུབ་རྣམས་ཀྱི་གཤོག་སྒྲ་ནི་ཕྱི་ཁྱམས་སུའང་ཐོས་ཤིང་། དེ་ནི་ཀུན་དབང་གི་གསུངས་སྐད་དང་འདྲའོ།།
[6] དེ་ནས་ཁོང་གིས་ལུས་སུ་སོ་རས་གྱོན་པའི་མི་དེ་ལ་བཀའ་བསྒོས་ཏེ་འདི་སྐད་དུ། ཁྱོད་ཀྱིས་འཁོར་ལོའི་བར་ཏེ། ཀེ་རུབ་ཀྱི་བར་དུ་མེ་ལོངས་ཤིག་ཅེས་གསུངས་པ་དང་། མི་དེ་ནང་དུ་སོང་ནས་འཁོར་ལོ་ཞིག་གི་མདུན་དུ་ལངས་ཏེ།
[7] ཀེ་རུབ་རྣམས་ཀྱི་ནང་ནས་ཀེ་རུབ་གཅིག་གིས། དེ་ཚོའི་ནང་ན་ཡོད་པའི་མེའི་ཕྱོགས་སུ་ལག་པ་བརྐྱངས་ནས་མེ་བླངས་ཏེ། སོ་རས་གྱོན་པའི་མི་དེའི་ལག་ཏུ་བཞག་པས། མི་དེས་མེ་བླངས་ནས་ཕྱིར་སོང་ངོ་།
[8] ཡང་ཀེ་རུབ་རྣམས་ཀྱི་གཤོག་པའི་འོག་ན། མིའི་ལག་པའི་དབྱིབས་ཤིག་མཐོང་བྱུང་།
[9] ངས་བལྟས་པ་དང་། ཀེ་རུབ་རྣམས་ཀྱི་འགྲམ་དུ་འཁོར་ལོ་བཞི་ཡོད་དེ། ཀེ་རུབ་རེ་ལ་འཁོར་ལོ་རེ་དང་། འཁོར་ལོ་དེའི་དབྱིབས་ནི་འོད་ཟེར་ལྡན་པའི་ལྗང་སེར་ཅན་གྱི་གཡུ་སྐོར་བཞིན།
[10] འཁོར་ལོ་བཞིའི་དབྱིབས་དང་གྲུབ་ཚུལ་ནི་རྣམ་པ་གཅིག་ཡིན་ཞིང་། འཁོར་ལོ་གཅིག་གིས་གཅིག་ལ་སྦྲེལ་པ་འདྲ།
[11] འཁོར་ལོ་དེ་དག་ཕྱོགས་བཞིར་འགྲུལ་ཐུབ་པ་དང་། འགྲུལ་དུས་ཁ་ཕྱོགས་འཁོར་མི་དགོས་ལ། ཀེ་རུབ་ཕྱོགས་གང་དུ་ཁ་སྒྱུར་ན། དེ་རྗེས་སུ་འབྲངས་ཏེ་འགྲུལ་ཞིང་། འགྲུལ་དུས་ཁ་ཕྱོགས་འཁོར་མི་དགོས་སོ།།
[12] ཡང་ཀེ་རུབ་ཀྱི་ལུས་ཡོངས་དང་། རྒྱབ་དང་། ལག་པ་དང་། གཤོག་པ་དང་། ད་དུང་འཁོར་ལོ་དག་ལ་མིག་གིས་བཀང་ཡོད་དེ། ཀེ་རུབ་བཞི་པོའི་འཁོར་ལོ་ཚང་མ་དེ་བཞིན་ནོ།།
[13] འཁོར་ལོ་དེ་དག་ནི། ངས་ཐོས་པ་བཞིན་དུ་སྐོར་བའི་འཁོར་ལོ་ཞེས་བཏགས་ཡོད་པ་དང་།
[14] ཀེ་རུབ་རེ་ལ་གདོང་བཞི་ཡོད་དེ། དང་པོ་ཀེ་རུབ་ཀྱི་གདོང་དང་། གཉིས་པ་མིའི་གདོང་དང་། གསུམ་པ་སེང་གེའི་གདོང་དང་། བཞི་པ་གླག་གི་གདོང་ཡིན་ཞིང་།
[15] རྗེས་སུ་ཀེ་རུབ་རྣམས་ཀྱང་ཡར་འཕགས་ཤིང་། འདི་དག་ནི་ངས་ཀེ་བར་གཙང་འགྲམ་དུ་མཐོང་བའི་སེམས་ཅན་དེ་རྣམས་སོ།།
[16] ཀེ་རུབ་སྐྱོད་དུས་སུ་འཁོར་ལོ་རྣམས་ཀྱང་དེ་ཚོའི་འགྲམ་དུ་འགྲུལ་ཞིང་། ཀེ་རུབ་ཀྱིས་གཤོག་པ་བརྐྱངས་ཏེ་ས་ངོས་དང་བྲལ་ཏེ་འཕུར་སྐབས། འཁོར་ལོ་རྣམས་ཀྱང་དེ་དག་དང་མ་བྲལ་ཏོ།།
[17] དེ་དག་ལངས་སྡོད་དུས། འཁོར་ལོ་རྣམས་ཀྱང་མ་འགྲུལ་པ་དང་། དེ་དག་ཡར་འཕག་དུས། འཁོར་ལོ་རྣམས་ཀྱང་དེ་དག་དང་མཉམ་དུ་འཕགས་སོ།། གང་ལ་ཞེ་ན། སེམས་ཅན་གྱི་ཐུགས་ཉིད་ནི་འཁོར་ལོ་ནང་དུ་ཡོད་པའི་ཕྱིར།
[18] དེ་ནས་གཙོ་བོ་ཡ་ཝཱེའི་གཟི་བརྗིད་དེ་ཕོ་བྲང་གི་སྒོ་ཐེམ་ལས་བཞུད་དེ། ཀེ་རུབ་རྣམས་ཀྱི་སྟེང་དུ་བཞུགས་པ་དང་།
[19] ཀེ་རུབ་རྣམས་བྲལ་དུས། དེ་དག་གིས་ངའི་མདུན་དུ་གཤོག་པ་བརྐྱངས་ཏེ་ས་ངོས་ལས་བྲལ་ཏེ་འཕུར་ཞིང་། འཁོར་ལོ་རྣམས་ཀྱང་དེ་དང་མཉམ་དུ་ཡོད་པ་དང་། དེ་རྣམས་གཙོ་བོ་ཡ་ཝཱེའི་ཕོ་བྲང་གི་ཤར་སྒོ་ཁར་བསྡད་དེ། ཡེས་ར་ཨེལ་གྱི་དཀོན་མཆོག་གི་གཟི་བརྗིད་དེ་དག་གི་གོང་ན་ཡོད་དོ།།
[20] དེ་དག་ནི་ཀེ་བར་གཙང་འགྲམ་དུ་ངས་མཐོང་བའི་ཡེས་ར་ཨེལ་གྱི་དཀོན་མཆོག་གི་གཟི་བརྗིད་འོག་ཏུ་གནས་པའི་སེམས་ཅན་ཡིན་པས། དེ་དག་ཀེ་རུབ་ཡིན་པ་ངས་རྟོགས་སོང་།
[21] ཀེ་རུབ་བཞོ་པོ་རེ་རེ་ལ་གདོང་བཞི་དང་། གཤོག་པ་བཞི་ཡོད་དེ། གཤོག་པའི་འོག་ན་མིའི་ལག་པ་དང་འདྲ་བ་ཞིག་ཡོད།
[22] ཁོ་ཚོའི་གདོང་གི་གཟུགས་དབྱིབས་ནི། སྔོན་ན་ངས་ཀེ་བར་གཙང་འགྲམ་དུ་མཐོང་པ་དང་མཚུངས་ཤིང་། ཁོ་ཚོ་རེ་རེ་མདུན་ཕྱོགས་སུ་སྐྱོད་ཀྱི་ཡོད།