[1] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ་ཁྱོད་ཀྱིས་ཉེས་ཆད་གཅོད་དམ། ཁྱོད་ཀྱིས་མིའི་ཁྲག་བཞུར་དུ་བཅུག་པའི་གྲོང་ཁྱེར་འདི་ལ་ཉེས་ཆད་གཅོད་དམ། ཁྱོད་ཀྱིས་གྲོང་ཁྱེར་འདི་ལ་རང་ཉིད་ཀྱི་ཞེན་ལོག་གི་དོན་རྣམས་རྟོགས་པར་གྱུར་ཞིག
[3] ཁྱོད་ཀྱིས་འདི་ལྟར་དུ་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། གྲོང་ཁྱེར་འདི་ནང་དུ་མི་ལ་ཁྲག་བཞུར་དུ་བཅུག་པའི་དོན་ཡོད་པ་དང་། དེས་སྐུ་འདྲ་བཟོས་ནས་རང་ཉིད་བཙོག་པར་བྱས་པས། དེ་ལ་ཉེས་ཆད་གཅོད་པའི་དུས་བསླེབས་སོ།།
[4] ཁྱོད་ཀྱིས་མི་ལ་ཁྲག་བཞུར་དུ་གྱུར་བས། ཁྱོད་ཀྱིས་སྡིག་པ་བྱས་ཤིང་། ཁྱོད་ཀྱིས་སྐུ་འདྲ་བཟོས་པས། རང་ཉིད་བཙོག་པར་བཅུག་གོ ། དེ་དཞིན་ཁྱོད་ཀྱིས་རང་ཉིད་ལ་ཉེས་ཆད་གཅོད་པའི་དུས་བསླེབས་ཉེ་བར་བཅུག་སྟེ། ལན་འཇལ་བའི་དུས་ཐོན་ཏེ། ངས་ཁྱོད་ནི་མི་རྒྱུད་ཀུན་གྱིས་ངན་སྨྲས་དང་། མི་སྡེ་ཀུན་གྱིས་ཟུར་ཟའི་ཡུལ་དུ་འགྱུར་ངེས་ཡིན།
[5] ཟང་ཟིང་ཅན་དང་ཀུ་ཅོ་སྒྲོག་ཅིང་། མཚན་ནི་བཙོག་པར་བཟོས་པའི་གྲོང་ཁྱེར་ཁྱོད། ཁྱོད་དང་ཐག་ཉེ་རིང་གང་རུང་གིས་ཁྱོད་ལ་འཕྱ་བར་འགྱུར་ཞིང་།
[6] ལྟོས་ཤིག ཡེས་ར་ཨེལ་གྱི་མགོ་དཔོན་རྣམས་ཀྱིས་རང་གི་ནུས་པས་ཁྱོད་ཀྱི་ནང་དུ་མི་ལ་ཁྲག་བཞུར་དུ་བཅུག་སྟེ།
[7] ཁྱོད་ཀྱི་ནང་དུ་ཕ་མར་མཐོང་ཆུང་བྱེད་མཁན་དང་། བྱེས་སུ་སྡོད་པའི་མི་ལ་གཉའ་གནོན་བྱེད་མཁན་དང་དྭ་ཕྲུག་དང་ཡུགས་མོར་བརྙས་བཅོས་བྱེད་མཁན་ཡོད་དེ།
[8] ཁྱོད་ཀྱིས་ངའི་དམ་པའི་རྫས་ལ་མཐོང་ཆུང་བྱས་ཤིང་། ངའི་ངལ་གསོ་བའི་ཉིན་ཡང་བརླགས་སོ།།
[9] ཁྱོད་ཀྱི་ནང་དུ་ཕྲ་མ་བྱེད་མཁན་དང་གཞན་ལ་སྙོན་འཛུགས་མཁན་གྱི་མི་ཡོད་དེ། དེ་དག་གིས་མི་ལ་ཁྲག་བཞུར་དུ་བཅུག་སྟེ། ཁྱོད་ཀྱི་རི་རྣམས་སུ་མཆོད་རྫས་སྤྱད་ཅིང་། ཁྱོད་ཀྱི་ནང་དུ་ལོག་གཡེམ་སྤྱད་དོ།།
[10] ཁྱོད་ཀྱི་ནང་དུ་ཕ་ཡི་ཁོག་སྨད་མངོན་པར་འཇུག་མཁན་དང་། ཟླ་མཚན་དང་ལྡན་པའི་མི་གཙང་བའི་བུད་མེད་དག་ལ་ངོ་ཚ་གཏོད་མཁན་ཡང་ཡོད་དོ།།
[11] ཁྱོད་ཀྱི་ནང་དུ་མི་འདི་ཡིས་ཁྱིམ་མཚེས་ཀྱི་ཆུང་མ་དང་ཞེན་ལོག་གི་དོན་སྤྱོད་པ་དང་། མི་དེ་ཡིས་ལོག་གཡེམ་སྤྱད་དེ། རང་གི་མནའ་མར་བརླགས་པ་དང་། ད་དུང་རང་གི་ཕ་རྒྱུད་གཅིག་པའི་ལྕམ་སྲིང་ལ་བརྙས་བཅོས་བྱེད་མཁན་ཡང་ཡོད་དོ།།
[12] ཁྱོད་ཀྱི་ནང་དུ་མི་ཡི་སྐོག་རྔན་བླངས་ཏེ་མི་ལ་ཁྲག་བཞུར་དུ་འཇུག་མཁན་དང་། ཁྱོད་ཀྱིས་མི་ལ་དངུལ་བསྐྱིས་ན་བུན་དངུལ་ལེན་པ་མ་ཟད་མང་པོ་བླངས་སོ།། ཁྱོད་ཀྱིས་བརྙས་བཅོས་དང་གཉའ་གནོན་གྱིས་རང་གི་ཁྱིམ་མཚེས་ལས་དྲང་བདེན་མིན་པའི་རྒྱུ་ནོར་བླངས་ཏེ། ཁྱོད་ཀྱིས་ང་ནི་བརྗེད་པར་གྱུར་ཏོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[13] ལྟོས་ཤིག ཁྱོད་ལ་ཐོབ་པའི་དྲང་བདེན་མིན་པའི་རྒྱུ་ནོར་དང་། ཡང་ཁྱོད་ཀྱི་ནང་དུ་བཞུར་བའི་ཁྲག་གི་ཕྱིར་དུ། ངས་ཕྱག་རྡུང་སྟེ།
[14] ངས་ཁྱོད་ལ་ཉེས་ཆད་གཅོད་པའི་དུས་ཐོན་ན། ཁྱོད་ཀྱི་སེམས་ཀྱིས་བཟོད་ཐུབ་བམ། ཁྱོད་ཀྱི་ལག་པར་ད་དུང་ཤེད་ཡོད་དམ། ཡ་ཝཱེ་ངས་གསུངས་པ་བཞིན་དུ་ངེས་པར་དུ་འགྲུབ་བོ།།
[15] ངས་ཁྱོད་ནི་ཡུལ་ཁམས་ཀུན་ཏུ་གཏོར་ཞིང་། མི་སྡེ་སོ་སོའི་ནང་དུ་ཁ་ཐོར་དུ་སོང་བཅུག་སྟེ། ངས་ཁྱོད་ལས་མི་གཙང་པ་རྣམས་མེད་པར་མཛད་དེ།
[16] ཁྱོད་ནི་མི་རྒྱུད་ཀུན་གྱི་ནང་དུ་བཙོག་པར་མཛད་པའི་ཚེ། ཁྱོད་ཀྱིས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར།
[17] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[18] ཀྱེ་མིའི་བུ་ལགས། ཡེས་ར་ཨེལ་གྱི་ཁྱིམ་རྒྱུད་ནི་ངའི་མིག་ནང་དུ་སྙིགས་རོར་གྱུར་བས། དེ་ཐམས་ཅད་ནི་མེ་ཐབ་ནང་གི་ལི་དང་། གཤའ་དཀར་དང་། ལྕགས་དང་ཞ་ཉེ་མ་ཟད། དངུལ་གྱི་སྙིགས་རོ་ཡིན་ནོ།།
[19] དེ་བས་གཙོ་བོ་ཡ་ཝཱེས་འདི་སྐད་དུ་གསུངས་པ་དང་། ཁྱོད་ཅག་སྙིགས་རོར་གྱུར་ཟིན་པས། ངས་ཁྱོད་ཅག་ཡེ་རུ་སཱ་ལེམ་གྱི་གྲོང་ཁྱེར་ནང་དུ་བསྡུ་བར་བྱ་སྟེ།
[20] མི་ཡིས་དངུལ་དང་ཟངས། ལྕགས་དང་ཞ་ཉེ་དང་། གཤའ་དཀར་ཅི་ལྟར་མེ་ཐབ་ནང་དུ་བསྡུས་ཏེ། མེ་སྦར་ནས་དེ་རྣམས་ཞི་བར་གྱུར་བ་བཞིན་དུ། ངས་ཀྱང་དེ་བཞིན་དུ་ཉིད་ཀྱི་ཐུགས་ཁྲོ་དང་ཁྲོ་གཏུམ་ཆེན་པོ་ནང་དུ་ཁྱོད་རྣམས་བསྡུས་ནས། གྲོང་ཁྱེར་ནང་དུ་བཞག་སྟེ་ཁྱོད་རྣམས་ཞི་བར་མཛད་དོ།།
[21] ངས་ཁྱོད་རྣམས་བསྡུས་ནས། ངའི་ཐུགས་ཁྲོ་ཆེན་པོའི་མེ་ལྕེ་དེ་ཁྱོད་ཅག་གི་ཐོག་ཏུ་བླུགས་ན། ཁྱོད་རྣམས་ནི་གྲོང་ཁྱེར་ནང་དུ་ཞི་བར་འགྱུར་རོ།།
[22] དངུལ་ཅི་ལྟར་མེ་ཐབ་ནང་དུ་ཞི་བ་བཞིན་དུ། ཁྱོད་རྣམས་ཀྱང་གྲོང་ཁྱེར་ནང་དུ་དེ་ལྟར་ཞི་བར་འགྱུར་ཞིང་། དེ་ནས་ཁྱོད་ཚོས་ཡ་ཝཱེ་ངས་ཉིད་ཀྱི་ཐུགས་ཁྲོ་ཆེན་པོ་ཁྱོད་ཅག་གི་ཐོག་ཏུ་བླུགས་བ་རྟོགས་པར་འགྱུར་རོ་ཞེས་གསུངས་སོ།།
[23] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[24] ཀྱེ་མིའི་བུ། ཁྱོད་ཀྱིས་ཡུལ་ཁམས་འདི་ལ་སྨྲོས་ཤིག ཐུགས་ཁྲོའི་དུས་སུ་ཁྱོད་ལ་ཆར་ཆུ་མི་འཛོམས་པ་དང་། སྦྲང་ཆར་མི་འབབ་པའི་ཡུལ་ཁམས་ཡིན་ཞིང་།
[25] ང་རོ་འདོན་པའི་སེང་གེས་བརྔོན་རྫས་ཕྲལ་བ་བཞིན་དུ། དེའི་ནང་ན་ཡོད་པའི་ལུང་སྟོན་པས་ངོ་ལོག་བྱ་ཞིང་། དེ་དག་གིས་མི་རྣམས་མིད་དེ། རྒྱུ་ནོར་དང་རིན་པོ་ཆེ་རྣམས་ཕྲོགས་ནས། དེའི་ནང་གི་ཡུགས་མོའི་གྲངས་ནི་ཇེ་མང་དུ་གཏོང་བར་འགྱུར།
[26] ཡུལ་འདིའི་མཆོད་དཔོན་རྣམས་ཀྱིས་ངའི་བཀའ་ཁྲིམས་དང་འགལ་ཏེ། ངའི་དམ་པའི་རྫས་དག་བརླགས་ནས། དེ་དག་གིས་དམ་པའི་རྫས་དང་སྤྱིར་རྫས་བཅས་མ་བཀར་ཞིང་། མི་ལ་གང་ཞིག་གཙང་པ་དང་གང་ཞིག་མི་གཙང་པ་ཡིན་པ་བཀར་བའི་བསླབ་བྱའང་མ་གནང་སྟེ། ཡང་རང་གི་མིག་བཀབ་ནས་ངའི་ངལ་གསོ་བའི་ཉིན་མོར་ཁ་ཡ་མ་བྱ་བར། ཐ་ན་ང་ནི་ཁོ་ཚོའི་ནང་དུ་བརླགས་པར་གྱུར་ཏོ།།
[27] དེའི་ནང་གི་མགོ་དཔོན་དག་གིས་དྲང་བདེན་མིན་པའི་ནོར་ཐོབ་ཕྱིར་དུ། བརྔོན་རྫས་ཕྲལ་བའི་འཕར་སྤྱང་བཞིན་དུ། མི་ལ་ཁྲག་བཞུར་དུ་འཇུག་པ་དང་། མིའི་སྲོག་གཅོད་དོ།།
[28] མི་རྣམས་ཀྱིས་ཞལ་གཟིགས་རྫུས་མ་མཐོང་བ་དང་། མགོ་སྐོར་གཏོང་བའི་མོ་འདེབས་པའི་ཕྱིར་དུ། ཡུལ་འདིའི་ལུང་སྟོན་པ་རྣམས་ཀྱིས་ཨར་འདམ་གྱིས་རང་གི་རྩིག་པ་བྱུགས་ཏེ་ན་རེ། གཙོ་བོ་ཡ་ཝཱེས་འདི་སྐད་དུ་གསུངས་ཤེས་ཟེར་ཞིང་། དོན་དངོས་སུ་དུས་དེར་ཡ་ཝཱེས་ཅི་ཡང་མ་གསུངས་སོ།།
[29] ཡུལ་འདིའི་མི་སྡེ་རྣམས་ཀྱིས་རྒྱུན་དུ་མི་ལ་བརྙས་བཅོས་བྱེད་པ་དང་། འཕྲོག་བཅོམ་བྱེད་པར་གོམས་ཏེ། ཉམ་ཐག་ཅན་དང་དབུལ་ཕོངས་ཅན་སྡུག་ལ་གཏད་དེ། གནས་ལུགས་མེད་པར་བྱེས་སུ་སྡོད་པའི་མི་ལ་བརྙས་བཅོས་བྱས་སོ།།
[30] ངའི་དྲུང་དུ་དང་ཡུལ་འདིའི་བཤིགས་པར་གྱུར་བའི་གནས་སུ་ལངས་ཆེད་དུ། ཡང་ཡུལ་འདི་མེད་པར་མི་མཛད་པའི་ཕྱིར་དུ། ངས་ཡང་བསྐྱར་རྩིག་པ་ལས་པར་དེ་དག་གི་ནང་དུ་མི་ཞིག་བཙལ་ཏེ། གཅིག་ཀྱང་མ་རྙེད་དོ།།
[31] དེ་བས་ངས་ཉིད་ཀྱི་ཐུགས་ཁྲོ་ཆེན་པོ་དེ་དག་གི་ཐོག་ཏུ་བླུགས་ཏེ། ངའི་ཐུགས་ཁྲོ་ཆེན་པོའི་མེ་ལྕེ་ཡིས་དེ་རྣམས་མེད་པར་མཛད་པ་དང་། དེ་དག་གིས་སྤྱད་པའི་ལན་དེ་རང་གི་ཐོག་ཏུ་འཇལ་ཏོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།