[1] ཁོང་གིས་ང་ལ་འདི་སྐད་དུ། ཀྱེ་མིའི་བུ་། ཡར་ལོངས་ཤིག ངས་ཁྱོད་ལ་གསུང་བར་བྱའོ་ཞེས་གསུངས་སོ།།
[2] ཁོང་གིས་ང་ལ་གསུངས་བཤད་གནང་དུས། ཐུགས་ཉིད་ངའི་ནང་དུ་བཞུགས་ཏེ། ང་ཡར་ལངས་དུ་བཅུག་པ་དང་། ངས་ཡང་བསྐྱར་ང་ལ་གསུང་གནང་བའི་སྒྲ་ཐོས་སོ།།
[3] ཁོང་གིས་ང་ལ་འདི་སྐད་དུ། ཀྱེ་མིའི་བུ། བདག་ལ་ངོ་ལོག་བྱས་པའི་མི་རྒྱུད་དེ། ཡེས་ར་ཨེལ་པ་རྣམས་ཀྱི་དྲུང་དུ་ངས་ཁྱོད་རང་མངགས་ཤིང་། དེ་དག་དང་དེ་དག་གི་ཕ་མེས་རྣམས་ཀྱིས་དེ་རིང་གི་བར་དུ་ང་ལ་རྒྱབ་འགལ་བྱས་པ་དང་།
[4] མི་རྒྱུད་འདི་ནི་ཤིན་ཏུ་གཉའ་རེངས་ཤིང་། སེམས་གྱོང་པོ་ཡིན་པས། ངས་ཁྱོད་ནི་དེ་དག་གི་དྲུང་དུ་མངགས་ཤིང་། ཁྱོད་ཀྱིས་དེ་རྣམས་ལ་འདི་ལྟར་དུ། གཙོ་བོ་ཡ་ཝཱེས་འདི་སྐད་དུ་གསུངས་ཤེས་སྨྲོས་ཤིག
[5] དེ་དག་ནི་གཉའ་རེངས་ཅན་གྱི་མི་རྒྱུད་ཡིན་པས། དེ་དག་གིས་མཉན་མི་མཉན་གང་རུང་། ཁོ་ཚོའི་ནང་དུ་ལུང་སྟོན་པ་ཞིག་ཡོད་པ་རྟོགས་ངེས་ཡིན།
[6] ཀྱེ་མིའི་བུ། ཁྱོད་ལ་མཚོན་ན། ཚེར་ཕུང་དང་གཟེ་མ་ཁྱོད་ཀྱི་མཐའ་རུ་ཡོད་པ་དང་། སྡིག་པ་ར་ཙ་ཡི་ཁྲོད་དུ་ཁྱོད་གནས་ཀྱང་། དེ་དག་ལ་ཁྱོད་མ་འཇིགས་ཤིག དེ་དག་གིས་བཤད་པའི་གཏམ་ལའང་ཁྱོད་མ་འཇིགས་ཤིག དེ་རྣམས་ནི་གཉའ་རེངས་ཅན་གྱི་བུ་རྒྱུད་ཡིན་པས། ནམ་ཡིན་ཡང་དེ་ཚོས་བཤད་པའི་གཏམ་ལ་ཁྱོད་ནི་མ་འཇིགས་ལ། དེ་དག་གི་མདུན་དུའང་ཁྱོད་མ་འཇིགས་ཤིག
[7] དེ་དག་ནི་གཉའ་རེངས་ཅན་ཡིན་པས། དེ་དག་གིས་མཉན་མི་མཉན་གང་རུང་། ཁྱོད་ཀྱིས་ངའི་བཀའ་དེ་དག་ལ་ཤོད་ཅིག
[8] ཀྱེ་མིའི་བུ། ཁྱོད་ཀྱིས་ངས་གསུངས་པའི་བཀའ་ལ་ཉན་པ་ལས། གཉའ་རེངས་ཅན་གྱི་མི་རྒྱུད་དེ་བཞིན་དུ་ང་ལ་རྒྱབ་འགལ་མ་བཟོ་ཞིག ཁྱོད་ཀྱི་ཁ་གདང་ནས་ངས་ཁྱོད་ལ་སྤྱིན་པ་དེ་ཟོ་ཞིག
[9] དེ་ནས་ངས་བལྟས་པ་ན། ངའི་ཕྱོགས་སུ་ལག་པ་ཞིག་རྐྱོང་འོང་བ་དང་། ལག་ཏུ་ཤོག་སྒྲིལ་ཞིག་ཡོད་པ་མཐོང་སྟེ།
[10] ཁོང་གིས་ཤོག་སྒྲིལ་དེ་ངའི་མདུན་དུ་ཁ་ཕྱེས་ནས། ཤོག་སྒྲིལ་དེའི་ཕྱི་ནང་གང་དུའང་ཡི་གེ་བཀོད་ཡོད་དེ། སྐྱོ་གླུ་དང་། མྱ་ངན་དང་། གནོད་འཚེ་བཅས་བཀོད་ཡོད་དོ།།