[1] གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། ཁྱོད་ནི་ངོ་ལོག་ཅན་གྱི་མི་སྡེ་ཁྲོད་དུ་བསྡད་ཅིང་། དེ་དག་ལ་མཐོང་བའི་མིག་ཡོད་ཀྱང་མི་མཐོང་། ཐོས་པའི་རྣ་ཡོད་ཀྱང་མི་ཐོས་ཤིང་། ཅིའི་ཕྱིར་ཞེ་ན། དེ་དག་ནི་ངོ་ལོག་ཅན་གྱི་མི་སྡེ་ཡིན་པའི་ཕྱིར།
[3] དེ་བས། ཀྱེ་མིའི་བུ། ཁྱོད་ཀྱིས་རང་གི་ཕྱིར་དུ་བཙོན་ལ་ཁྲིད་སྐབས་མཁོ་བའི་དངོས་པོ་རྣམས་གྲ་སྒྲིག་བྱོས་ཤིག ཉིན་མོར་དེ་ཚོའི་མིག་མདུན་དུ་བྲལ་ཞིག་དང་། ཡང་རང་གནས་ལས་གཞན་གནས་སུ་སྤོར་ཞིག་སྟེ། དེ་དག་ངོ་ལོག་ཅན་གྱི་མི་སྡེ་ཡིན་ཡང་། བལྟས་རྗེས་ཁོ་ཚོས་རྟོགས་ཀྱང་སྲིད།
[4] ཁྱོད་ཀྱིས་ཉིན་མོའི་དུས་སུ། ཁོ་ཚོའི་མིག་མདུན་དུ་རང་གི་དངོས་པོ་སྟེ། བཙོན་ལ་ཁྲིད་སྐབས་མཁོ་འདྲ་བའི་དངོས་པོ་དག་སྒོར་བཞག་ནས། མཚན་མོའི་དུས་སུ་ཁྱོད་ནི་བཙོན་དུ་ཁྲིད་པའི་མི་བཞིན་དུ། དེ་དག་གི་མདུན་དུ་ཕྱིར་སོང་ཞིག
[5] ཁྱོད་ཀྱིས་ཁོ་ཚོའི་མིག་མདུན་དུ་རྩིག་པ་རྐོས་ཏེ། ཁྱོད་ཀྱི་དངོས་པོ་དག་དེ་ལས་ཕྱིར་ཁྱེར་ཞིག
[6] ས་རུབ་དུས་སུ། ཁྱོད་ཀྱིས་ཁོ་ཚོའི་མིག་མདུན་ནས་དངོས་པོ་དེ་དག་ཕྲག་པར་ཁུར་ཏེ་ཕྱིར་ཁྱེར་ཞིག་དང་། ངས་ཁྱོད་ནི་ཡེས་ར་ཨེལ་ཁྱིམ་རྒྱུད་ཀྱི་སྔ་ལྟས་སུ་མཛད་པས། ཁྱོད་ཀྱིས་ས་འདི་མི་མཐོང་བའི་ཕྱིར། རང་གི་གདོང་ཐུམས་ཤིག་ཅེས་གསུངས་སོ།།
[7] དེ་ནས་ངས་ཁོང་གིས་བཀའ་བསྒོས་པ་བཞིན་བྱས་ཏེ། ཉིན་མོའི་དུས་སུ་ངའི་དངོས་པོ་སྟེ། བཙོན་ལ་ཁྲིད་སྐབས་མཁོ་བ་དང་འདྲ་བ་རྣམས་སྒོར་བཞག་སྟེ། མཚན་མོའི་དུས་སུ། ངས་ལག་པས་རྩིག་པ་བརྐོས་ཏེ། ས་རུབ་དུས་སུ་ངས་ཁོ་ཚོའི་མིག་མདུན་དུ་དངོས་པོ་དེ་དག་ཕྲག་པར་ཁུར་ནས་ཕྱིར་ཁྱེར་སོང་།
[8] ཞོགས་པ་བསླེབས་ཏེ། གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[9] ཀྱེ་མིའི་བུ། ངོ་ལོག་ཅན་ཡིན་པའི་ཡེས་ར་ཨེལ་གྱི་ཁྱིམ་རྒྱུད་ཀྱིས་ཁྱོད་ལ། ཁྱོད་ཀྱིས་ཅི་བྱེད་དམ་ཞེས་དྲིས་པ་མ་ཡིན་ནམ།
[10] ཁྱོད་ཀྱིས་དེ་དག་ལ་འདི་ལྟར་དུ། གཙོ་བོ་ཡ་ཝཱེས་འདི་སྐད་དུ། འགན་འདི་ནི་ཡེ་རུ་སཱ་ལེམ་གྱི་རྒྱལ་པོ་དང་། ཡེས་ར་ཨེལ་གྱི་ཁྱིམ་རྒྱུད་དང་འབྲེལ་ཏོ་ཞེས་སྨྲོས་ཤིག
[11] ཁྱོད་ཀྱིས་འདི་ལྟར་དུ། ང་ནི་ཁྱོད་ཚོའི་སྔ་ལྟས་ཤིག་ཡིན་པས། ངས་ཅི་ལྟར་སྤྱད་ན། ཁོ་ཚོར་ཡང་དེ་བཞིན་འབྱུང་བར་འགྱུར་ཞིང་། དེ་རྣམས་བཙོན་དུ་འཁྲིད་པར་འགྱུར།
[12] ཁོ་ཚོའི་ཁྲོད་ཀྱི་རྒྱལ་པོ་རྣམས་ཀྱིས་ས་རུབ་ཁར་དངོས་པོ་རྣམས་ཕྲག་པར་འཁུར་ནས། དེ་དག་གིས་བརྐོས་པའི་རྩིག་པ་ལས་ཕྱིར་འཁྱེར་ཞིང་། ཡང་དེ་ཡིས་རང་གི་གདོང་བཏུམ་ནས་ས་འདི་མི་མཐོང་ངོ་།
[13] ངས་རང་གི་དྲ་དེའི་ཐོག་ཏུ་བཏང་ན། ངའི་དྲ་བས་དེ་འཛིན་པར་འགྱུར་བ་དང་། ཡང་ངས་དེ་ཀལ་དི་པའི་ཡུལ་ཏེ་པཱ་པིས་ལུན་དུ་འཁྲིད་ཅིང་། ཁོས་ཡུལ་དེ་མི་མཐོང་ཡང་། དེ་རུ་འཆི་བར་འགྱུར།
[14] ངས་དེའི་མཐའ་འཁོར་གྱི་མི་རྣམས་ཏེ། ཁོ་ལ་རོགས་བྱེད་མཁན་དག་དང་ཁོའི་དམག་དཔུང་ཐམས་ཅད་ཕྱོགས་བཞིར་ཁ་གཏོར་ཏེ། རལ་གྲི་ལངས་ནས་དེ་རྣམས་བདའ་བར་འགྱུར།
[15] ངས་དེ་རྣམས་ཕྱི་རོལ་པའི་མི་སྡེ་སོ་སོའི་ནང་དུ་གཏོར་ཏེ། ཡུལ་སོ་སོར་ཁ་ཐོར་དུ་འགྲོ་བཅུག་དུས་སུ། དེ་ཚོས་ང་ཡ་ཝཱེ་ལགས་ཡིན་པ་རྟོགས་པར་འགྱུར་རོ།།
[16] ཡིན་ཡང་། དེ་དག་གིས་གང་དང་གང་དུ་བསླེབས་པའི་མི་རྒྱུད་ཀུན་གྱི་ནང་དུ། རང་ཉིད་ཀྱི་ཞེན་ལོག་པའི་དོན་རྣམས་བཤད་པའི་ཕྱིར་དུ། ངས་དེ་ལས་མི་གྲངས་ཉུང་ངུ་ཞིག་ལུས་པར་འཇུག་ཅིང་། རལ་གྲི་དང་། མུ་གེ་དང་། རིམས་ནད་ལས་ཐར་བར་བཅུག་ན། དེ་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་རོ་ཞེས་གསུངས་སོ།།
[17] གཙོ་བོ་ཡ་ཝཱེའི་བཀའ་ནི་ཡང་བསྐྱར་ང་ལ་བྱུང་སྟེ་འདི་སྐད་དུ།
[18] ཀྱེ་མིའི་བུ་ཁྱོད་ཀྱིས་སྐྲག་སྐྲག་འདར་འདར་གྱིས་རང་གི་ཁ་ཟས་ལ་རོལ་དང་། སེམས་ཁྲལ་ངང་རང་གི་ཆུ་ཐུངས་ཤིག
[19] ཁྱོད་ཀྱིས་ཡུལ་འདིའི་མི་སྡེ་ལ་འདི་ལྟར་དུ། ཡེ་རུ་སཱ་ལེམ་གྱི་མི་སྡེ་རྣམས་དང་ཡེས་ར་ཨེལ་གྱི་ཡུལ་ཁམས་ཀྱི་སྐོར་ལ། གཙོ་བོ་ཡ་ཝཱེས་འདི་སྐད་དུ་གསུངས་ཏེ། ཁོ་ཚོས་སེམས་ཁྲལ་ངང་ཉིད་ཀྱི་ཁ་ཟས་ལ་རོལ་ཞིང་། སྐྲག་སྐྲག་འདར་འདར་གྱིས་ཉིད་ཀྱི་ཆུ་བཏུང་སྟེ། ཅིའི་ཕྱིར་ཞེ་ན། མི་སྡེ་ཚང་མའི་བཙན་ཤུགས་ཀྱི་ཕྱིར་དུ། ཡུལ་ཁམས་འདི་ནི་སྟོང་བར་འགྱུར་རོ།།
[20] མི་སྡོད་པའི་གྲོང་ཁྱེར་རྣམས་སྟོང་བར་འགྱུར་ཞིང་། ཡུལ་ཁམས་འདི་ཡང་སྟོང་བར་འགྱུར་ཞིང་། དེ་ནས་ཁྱོད་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་ཞེས་སྨྲོས་ཤིག
[21] གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[22] ཀྱེ་མིའི་བུ། ཁྱོད་ཅག་ལ་ཡེས་ར་ཨེལ་གྱི་ཡུལ་ནས། ཞག་རྣམས་འདས་ཏེ། ཞལ་གཟིགས་ཐམས་ཅད་སྟོང་བར་གྱུར་ཞེས་གཏམ་དཔེ་ཞིག་ཡོད་པ་དེ་ཅི་ཡིན་ནམ།
[23] དེ་བས་ཁྱོད་ཀྱིས་དེ་དག་ལ་འདི་ལྟར་དུ། གཙོ་བོ་ཡ་ཝཱེས་འདི་སྐད་དུ་གསུངས་ཏེ། ངས་གཏམ་དཔེ་འདི་ཡང་བསྐྱར་དར་མི་གཞུག་སྟེ། ད་ཕྱིན་ཆད་ཡེས་ར་ཨེལ་གྱི་ནང་དུ་མི་ཡིས་གཏམ་དཔེ་འདི་མི་འདྲེན་ཏེ། ཡིན་ཡང་ཁྱོད་ཀྱིས་དེ་དག་ལ། ཞག་རྣམས་ཉེ་སྟེ། ཞལ་གཟིགས་ཀུན་འགྲུབ་པར་འགྱུར་ཞེས་སྨྲོས་ཤིག
[24] དུས་དེ་ནས་བཟུང་ཡེས་ར་ཨེལ་གྱི་ཁྱིམ་རྒྱུད་ནང་དུ་ཞལ་གཟིགས་རྫུས་མ་དང་ངོ་བསྟོད་བྱེད་པའི་མོ་བ་འབྱུང་བར་མི་འགྱུར།
[25] གང་ལ་ཞེ་ན། ཡ་ཝཱེ་ངས་གསུངས་པ་ནི་ངས་གསུང་པའི་བཀའ་ཡིན་ཏེ། ངས་གསུངས་པ་རྣམས་འགྲུབ་པ་ལས་འགྱང་བར་མི་འགྱུར་ཞིང་། ཀྱེ་ངོ་ལོག་ཅན་གྱི་མི་རྒྱུད། ངས་གསུངས་པའི་བཀའ་རྣམས་ཁྱོད་ཚོ་གསོན་དུས་སུ་འགྲུབ་པར་འགྱུར་ཞེས་གཙོ་བོ་ཡ་ཝཱེས་གསུངས་སོ།།
[26] གཙོ་བོ་ཡ་ཝཱེའི་བཀའ་ནི་ཡང་བསྐྱར་ང་ལ་བྱུང་སྟེ་འདི་སྐད་དུ།
[27] ཀྱེ་མིའི་བུ། ཡེས་ར་ཨེལ་གྱི་ཁྱིམ་རྒྱུད་རྣམས་ཀྱིས་ན་རེ། མི་འདིས་མཐོང་བའི་ཞལ་གཟིགས་ནི་དུས་རིང་བའི་རྗེས་ཀྱི་དོན་དང་འབྲེལ་ཏེ། ཁོས་ལུང་དེ་ནི་རྒྱང་རིང་བའི་མ་འོངས་ལ་བསྟན་པ་ཡིན་ཞེས་ཟེར་ཞིང་།
[28] དེ་བས། ཁྱོས་ཀྱིས་དེ་རྣམས་ལ་འདི་ལྟར་དུ། གཙོ་བོ་ཡ་ཝཱེས་འདི་སྐད་དུ། ངའི་གསུངས་ཐམས་ཅད་གཅིག་ཀྱང་དུས་མི་འགྱང་སྟེ། ངས་གསུངས་པ་རྣམས་འགྲུབ་པར་འགྱུར་རོ་ཞེས་ཡ་ཝཱེས་གསུངས་སོ་སྨྲོས་ཤིག