[1] གཙོ་བོ་ཡ་ཝཱེའི་ཕྱག་ནི་ངའི་སྟེང་དུ་བཞག་སྟེ། ཁོང་གིས་ཉིད་ཀྱི་ཐུགས་ཉིད་ཀྱིས་ང་རང་ཕྱིར་ཁྲིད་དེ། ང་རང་རུས་པས་ཁེངས་བའི་ཐང་བདེ་ཞིག་ཏུ་བཞག་གོ །
[2] ཁོང་གིས་ང་ཁྲིད་ནས་དེ་རྣམས་ཀྱི་མཐའ་འཁོར་དུ་རྒྱུ་པ་དང་། ཐང་བདེ་དེར་རུས་པ་ཤིན་ཏུ་མང་པོ་ཞིག་ཡོད་པ་ངས་མཐོང་སྟེ། རུས་པ་དེ་དག་ཤིན་ཏུ་སྐམ་པོ་ཡིན་ནོ།།
[3] དེ་ནས་ཁོང་གིས་ང་ལ་འདི་སྐད་དུ། ཀྱེ་མིའི་བུ། རུས་པ་འདི་དག་གསོན་པོར་འགྱུར་སྲིད་དམ་ཞེས་གསུངས་པའི་ལན་དུ། ངས་གཙོ་བོ་ཡ་ཝཱེ་ལགས། ཁྱེད་ཀྱིས་མཁྱེན་ནོ་ཞེས་ཞུས།
[4] ཡང་ཁོང་གིས་ང་ལ་འདི་སྐད་དུ། ཁྱོད་ཀྱིས་རུས་པ་དག་ལ་འདི་ལྟར་དུ། ཀྱེ་རུས་པ་སྐམ་པོ་རྣམས། ཁྱོད་ཚོས་གཙོ་བོ་ཡ་ཝཱེའི་བཀའ་ལ་ཉོན་ཞིག་ཞེས་ལུང་སྟོན་ཞིག་ཅེས་གསུངས་པ་དང་།
[5] གཙོ་བོ་ཡ་ཝཱེས་རུས་པ་འདི་དག་ལ་འདི་སྐད་དུ། སྟོས་ཤིག ངས་ཁྱོད་ཚོའི་ནང་དུ་ཕུ་བརྒྱབ་ན། ཁྱོད་རྣམས་གསོན་པོར་འགྱུར་ཞིང་།
[6] ངས་ཁྱོད་རྣམས་ལ་ཤ་དང་རྒྱུས་པ་སྐྱེ་རུ་བཅུག་ནས། ཁྱོད་རྣམས་ལ་པགས་པས་བཀབ་ནས། ཁྱོད་ཚོའི་ནང་དུ་ཕུ་བརྒྱབ་ན། ཁྱོད་ཅག་གསོན་པོར་འགྱུར་ལ། དེ་ནས་ཁྱོད་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་ཞེས་གསུངས་སོ།།
[7] དེ་ནས་ངས་བཀའ་བཞིན་དུ་ལུང་བསྟན་ཏེ། ངས་ལུང་སྟོན་པའི་དུས་སུ་སྒྲ་ཞིག་གྲགས་པ་ཐོས་པ་དང་། དེ་ནི་རུས་པ་དང་རུས་པ་ཕན་ཚུན་སྦྲེལ་བའི་སྒྲ་ཡིན།
[8] ངས་བལྟས་པ་ན། རུས་པར་རྒྱུས་པ་སྐྱེས་ནས་ཤ་རྒྱས་པ་དང་། པགས་པས་ཐོག་ཏུ་བཀབ་ཡོད་ཀྱང་། དེ་དག་གི་ནང་དུ་ད་དུང་དབུགས་མེད་དོ།།
[9] ཡང་ཁོང་གིས་ང་ལ་འདི་སྐད་དུ། ཁྱོད་ཀྱིས་དབུགས་ལ་ལུང་སྟོན་ཞིག ཀྱེ་མིའི་བུ། ཁྱོད་ཀྱིས་ལུང་སྟོན་ཞིག་དང་། ཁྱོད་ཀྱིས་དབུགས་ལ་འདི་ལྟར་དུ། གཙོ་བོ་ཡ་ཝཱེས་འདི་སྐད་དུ་གསུངས་ཏེ། ཀྱེ་དབུགས་ཁྱོད་ནི་ཕྱོགས་བཞི་ནས་ཚུར་ཤོག་དང་། བཀུམ་ཟིན་པའི་མི་འདི་དག་ལ་ཕུ་བརྒྱབ་ནས། དེ་རྣམས་གསོན་པར་གྱུར་ཞིག་ཅེས་སྨྲོས་ཤིག
[10] དེ་ནས་ངས་བཀའ་བཞིན་དུ་ལུང་བསྟན་པ་ན། དབུགས་རུས་པ་རྣམས་ཀྱི་ནང་དུ་ཞུགས་ནས་དེ་དག་གསོན་པོར་གྱུར་ཏེ། ཡར་ལངས་ནས། དཔུང་ཚོགས་རབ་ཏུ་ཆེན་པོ་ཞིག་ཏུ་གྱུར་ཏོ།།
[11] ཁོང་གིས་ང་ལ་འདི་སྐད་དུ། ཀྱེ་མིའི་བུ། རུས་པ་འདི་དག་ནི་ཡེས་ར་ཨེལ་གྱི་ཁྱིམ་རྒྱུད་རྣམས་ཏེ། ཁོ་ཚོས་རྒྱུན་དུ་ན་རེ། ང་ཚོའི་རུས་པ་རྣམས་སྐམ་ཞིང་། རེ་བ་རྣམས་ཟད་དེ། ངེད་རྣམས་མེད་པར་གྱུར་ཏོ་ཟེར་བས།
[12] ཁྱོད་ཀྱིས་ལུང་སྟོན་ཞིང་། དེ་ཚོར་འདི་ལྟར་དུ། གཙོ་བོ་ཡ་ཝཱེས་འདི་སྐད་དུ། ཀྱེ་ངའི་མི་སྡེ་རྣམས། ངས་ཁྱོད་ཚོའི་དུར་ཁུང་གི་ཁ་ཕྱེས་ནས། ཁྱོད་རྣམས་དུར་ཁུང་ནས་ཕྱིར་བཏོན་ཏེ། ཡེས་ར་ཨེལ་ཡུལ་ནང་འདྲེན་པར་བྱ་སྟེ།
[13] ཀྱེ་ངའི་མི་སྡེ་ལགས། ངས་ཁྱོད་ཚོའི་དུར་ཁུང་གི་ཁ་ཕྱེས་ཏེ། ཁྱོད་རྣམས་དུར་ཁུང་ལས་ཕྱིར་འདོན་པའི་སྐབས་སུ། ཁྱོད་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར།
[14] ངས་ཁྱོད་ཚོའི་ནང་དུ་ཉིད་ཀྱི་ཐུགས་ཉིད་གཞག་ནས། ཁྱོད་རྣམས་གསོན་པར་འགྱུར་ཞིང་། ངས་ཁྱོད་རྣམས་རང་ཡུལ་དུ་གནས་འཇུག་གོ ། དེ་ནས་ཁྱོད་ཚོས་ཡ་ཝཱེ་ངས་གསུངས་པ་དེ་འགྲུབ་པར་མཛད་པ་རྟོགས་སོ་ཞེས་གཙོ་བོ་ཡ་ཝཱེས་གསུངས་སོ་ཞེས་སྨྲོས་ཤིག
[15] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[16] ཀྱེ་མིའི་བུ། ཁྱོད་ཀྱིས་དབྱུག་པ་ཞིག་བླངས་ནས་དེའི་ཐོག་ཏུ། ཡ་ཧུ་དཱ་དང་དེ་དང་མཉམ་དུ་ཡོད་པའི་ཡེས་ར་ཨེལ་པ་རྣམས་ཀྱི་ཕྱིར་ཞེས་བྲིས་ཤིག ཡང་དབྱུག་པ་གཞན་ཞིག་བླངས་ཏེ་དེའི་ཐོག་ཏུ་ཨེ་ཕཱར་ཡིམ་གྱི་དབྱུག་པ་སྟེ། ཡོ་སེབ་དང་དེ་དང་མཉམ་དུ་ཡོད་པའི་ཡེས་ར་ཨེལ་གྱི་ཁྱིམ་རྒྱུད་ཚང་མའི་ཕྱིར་ཞེས་བྲིས་ཤིག
[17] ཁྱོད་ཀྱིས་དབྱུག་པ་འདི་གཉིས་མཉད་དུ་སྦྲེལ་ནས། དེ་གཉིས་ཁྱོད་ཀྱི་ལག་ཏུ་དབྱུག་པ་གཅིག་ཏུ་གྱུར་ཞིག་དང་།
[18] གལ་ཏེ་ཁྱོད་ཀྱི་མི་སྡེས། ཁྱོད་ཀྱིས་ངེད་རྣམས་ལ་དབྱུག་པ་འདིས་ཅི་མཚོན་པ་མི་བཤད་དམ་ཞེས་དྲིས་ན།
[19] ཁྱོད་ཀྱིས་ལན་དུ་ཁོ་ཚོར་འདི་ལྟར་དུ། གཙོ་བོ་ཡ་ཝཱེས་འདི་སྐད་དུ་གསུངས་ཏེ། ལྟོས་ཤིག ངས་ཨེ་ཕཱར་ཡིམ་གྱི་ལག་ཏུ་ཡོད་པའི། ངས་ཡོ་སེབ་དང་མཉམ་དུ་ཡོད་པའི་ཡེས་ར་ཨེལ་གྱི་མི་སྡེའི་དབྱུག་པ་སྟེ། ཨེ་ཕཱར་ཡིམ་གྱི་ལག་ཏུ་ཡོད་པ་དེ་ཡ་ཧུ་དཱའི་དབྱུག་པ་དང་མཉམ་དུ་སྦྲེལ་ནས། ངའི་ལག་ཏུ་དེ་གཉིས་གཅིག་ཏུ་འགྱུར་ཞེས་སྨྲོས་ཤིག་དང་།
[20] ཁྱོད་ཀྱིས་ཡི་གེ་བྲིས་ཡོད་པའི་དབྱུག་པ་དེ་གཉིས། ཁོ་ཚོའི་མིག་མདུན་དུ་ལག་ཏུ་ཐོགས་ཏེ།
[21] ཁྱོད་ཀྱིས་ཁོ་ཚོར་འདི་ལྟར་དུ་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ལྟོས་ཤིག ངས་ཡེས་ར་ཨེལ་པ་རྣམས་དེ་དག་གང་དང་གང་དུ་ཕྱིན་པའི་མི་རྒྱུད་ཀུན་ལས་ཕྱིར་གདོན་ཏེ། ཡང་ཕྱོགས་ཀུན་ལས་དེ་རྣམས་བསྡུས་ཏེ། ཁོ་ཚོ་རང་གི་ཕ་ཡུལ་དུ་འདྲེན་པར་བྱའོ།།
[22] ངས་ཁོ་ཚོ་ཡུལ་དེ་ནང་དང་། ཡེས་ར་ཨེལ་གྱི་རི་རྣམས་སུ་རྒྱལ་ཁབ་གཅིག་ཏུ་བྱས་ཏེ། རྒྱལ་པོ་གཅིག་གིས་ཁོ་ཚོར་དབང་བསྒྱུར་བར་འགྱུར་བས། དེ་དག་རྒྱལ་ཁབ་གཉིས་སུ་མི་འགྱུར་ཞིང་། ཡུལ་ཁམས་གཉིས་སུའང་ནམ་ཡང་མི་འགྱུར་རོ།།
[23] ཡང་དེ་དག་རང་གི་སྐུ་འདྲ་རྣམས་དང་། ཞེན་ལོག་གི་འདྲ་པར་དང་། སྐྱོན་ཆ་གང་གིས་ཀྱང་རང་བརླག་པར་མི་བྱ་སྟེ། སྡིག་པ་སྤྱད་པའི་གནས་ཀུན་ལས་ངས་དེ་དག་བསྐྱབ་ཅིང་། ངས་དེ་དག་གཙང་བར་བཅུག་ནས། དེ་དག་ངའི་མི་སྡེ་དང་། ང་དེ་དག་གི་དཀོན་མཆོག་ཏུ་འགྱུར་བར་འགྱུར།
[24] ངའི་ཞབས་ཕྱི་དཱ་བིད་ཁོ་ཚོའི་རྒྱལ་པོར་འགྱུར་ཞིང་། དེ་ཐམས་ཅད་ལ་ལུག་རྫི་གཅིག་ཁོ་ན་ཡོད་པ་དང་། ཡང་དེ་དག་གིས་ངའི་བཀའ་ཁྲིམས་བརྩི་ཞིང་། ངའི་ཁྲིམས་སྲོལ་རྣམས་བསྲུང་བར་འགྱུར།
[25] ངས་ཉིད་ཀྱི་ཞབས་ཕྱི་ཡ་ཀོབ་ལ་གནང་བའི། ཁྱོད་ཅག་གི་ཕ་མེས་རྣམས་བསྡད་པའི་ཡུལ་ནང་དུ་ཁོ་རྣམས་སྡོད་པར་འགྱུར་ཞིང་། དེ་དག་རང་དང་དེ་དག་གི་བུ་རྒྱུད་རྣམས་དང་། ད་དུང་བུ་རྒྱུད་ཀྱི་བུ་རྒྱུད་རྣམས་དུས་གཏན་དུ་དེར་གནས་བར་འགྱུར་ཞིང་། ངའི་ཞབས་ཕྱི་དཱ་བིད་དུས་གཏན་དུ་དེ་དག་གི་རྒྱལ་པོ་རུ་འགྱུར་བར་འགྱུར།
[26] ངས་དེ་དག་དང་ཞི་བདེའི་ཞལ་ཆད་ཅིག་གཞག་སྟེ། དེ་ནི་དུས་གཏན་གྱི་ཞལ་ཆད་ཅིག་ཡིན་པ་དང་། ངས་དེ་དག་འཛུགས་ཤིང་། ཁོ་ཚོའི་མི་གྲངས་འཕེལ་འཇུག་ཅིང་། ཡང་དེ་དག་གི་ནང་དུ་དུས་གཏན་གྱི་ངའི་དམ་པའི་གནས་འཛུགས་བར་བྱའོ།།
[27] ངའི་བཞུགས་གནས་ཀྱང་དེ་དག་གི་ནང་དུ་ཡོད་པར་འགྱུར་ཞིང་། ང་དེ་དག་གི་དཀོན་མཆོག་དང་། དེ་དག་ངའི་མི་སྡེ་རུ་འགྱུར་བར་འགྱུར།
[28] ངའི་དམ་པའི་གནས་དེ་ནམ་རྒྱུན་དུ་ཁོ་ཚོའི་དཀྱིལ་དུ་ལུས་པའི་ཚེ། མི་རྒྱུད་ཀུན་གྱིས་ང་ནི་ཡ་ཝཱེ་ལགས་ཡིན་པ་དང་། ཡེས་ར་ཨེལ་དམ་པར་མཛད་མཁན་ང་ཡིན་པ་རྟོགས་པར་འགྱུར་ཞེས་གསུངས་སོ།།