[1] དེའང་ཁོང་གིས་ང་ལ་འདི་སྐད་དུ། ཀྱེ་མིའི་བུ་ཁྱོད་ལ་ཐོབ་པ་དེ་ཟོ་ཞིག་དང་། ཤོག་སྒྲིལ་དེ་ཟོས་རྗེས། ཡེས་ར་ཨེལ་གྱི་ཁྱིམ་རྒྱུད་ལ་གཏམ་བཤད་དུ་ཕྱིན་ཞིག་ཅེས་གསུངས་པས།
[2] དེ་ནས་ངའི་རང་གི་ཁ་གདང་པ་ན། ཁོང་གིས་ང་ལ་ཤོག་སྒྲིལ་དེ་ཟ་རུ་བཅུག་གོ །
[3] ཡང་ཁོང་གིས་ང་ལ་འདི་སྐད་དུ། ཀྱེ་མིའི་བུ། ངས་ཁྱོད་ལ་གནང་བའི་ཤོག་སྒྲིལ་དེ་ཟོས་ཏེ། ཁྱོད་ཀྱི་ལྟོ་བ་ལ་ཁེངས་བར་གྱིས་ཤིག་ཅེས་གསུངས་པ་དང་། དེ་ནས་ངས་ཤོག་སྒྲིལ་ཟོས་ནས། དེ་ནི་ངའི་ཁ་ནང་དུ་སྦྲང་རྩི་བཞིན་དུ་མངར་རོ།།
[4] ཁོང་གིས་ང་ལ་འདི་སྐད་དུ། ཀྱེ་མིའི་བུ་ཁྱོད་སོང་ཞིག ཡེས་ར་ཨེལ་ཁྱིམ་རྒྱུད་ཀྱི་དྲུང་དུ་སོང་ནས། ངའི་བཀའ་དེ་དག་ལ་སྒྲོགས་ཤིག
[5] དེ་ཅིའི་ཕྱིར་ཞེ་ན། ཁྱོད་ནི་སྐད་མི་གཅིག་པའམ། སྨྲ་བརྗོད་རྟོགས་དཀའ་བའི་མི་སྡེ་ཡི་མདུན་དུ་མངགས་པ་མ་ཡིན་པར། ཡེས་ར་ཨེལ་གྱི་ཁྱིམ་རྒྱུད་ཀྱི་དྲུང་དུ་མངགས་པ་ཡིན།
[6] དེ་མ་ཟད། ཁྱོད་ནི་སྐད་མི་གཅིག་པའམ། སྨྲ་བརྗོད་རྟོགས་དཀའ་བའི་མི་སྡེ་མང་པོའི་དྲུང་དུ་མངགས་པ་ཡང་མ་ཡིན་ཏེ། ཁོ་ཚོའི་སྐད་ཆ་ཁྱོད་ཀྱིས་མི་གོའོ།། ཡིན་ཡང་ངས་དེ་དག་གི་དྲུང་དུ་ཁྱོད་མངག་ན། དེ་དག་གིས་ཁྱོད་ལ་མཉན་ངེས་ཡིན།
[7] ཡེས་ར་ཨེལ་གྱི་ཁྱིམ་རྒྱུད་ཐམས་ཅད་ནི་གཉའ་རེངས་ཤིང་སེམས་གྱོང་པོ་ཡིན་པས། དེ་དག་གིས་ང་ལ་མཉན་བར་མི་འགྱུར་ཏེ། ཡེས་ར་ཨེལ་གྱི་ཁྱིམ་རྒྱུད་ཀྱིས་ཁྱོད་ལ་ཡང་མཉན་བར་མི་འགྱུར་རོ།།
[8] ལྟོས་ཤིག ངས་ཁྱོད་ཀྱི་གདོང་ནི་དེ་དག་གི་གདོང་བཞིན་སྲ་བར་འགྱུར་ཏེ། ཁྱོད་ཀྱི་དཔྲལ་བ་ནི་དེ་དག་གི་དཔྲལ་བ་བཞིན་དུ་མཁྲེགས་པོར་འགྱུར།
[9] ངས་ཁྱོད་ཀྱི་དཔྲལ་བ་ནི་ཤིན་ཏུ་སྲ་བའི་རྡོ་ཕ་ལམ་དང་། མེ་རྡོ་ལས་ཀྱང་སྲ་བར་བྱ་སྟེ། དེ་དག་ནི་ངོ་ལོག་ཅན་གྱི་མི་རྒྱུད་ཡིན་ཡང་། དེ་དག་ལ་ཁྱོད་མ་འཇིགས་ཤིག དེ་དག་གི་མདུན་དུའང་དངངས་སྐྲག་མ་སྐྱེས་ཤིག་ཅེས་གསུངས་སོ།།
[10] ཡང་ཁོང་གིས་ང་ལ་འདི་སྐད་དུ། ཀྱེ་མིའི་བུ། ངས་ཁྱོད་ལ་གསུངས་པ་ཐམས་ཅད་ཁྱོད་ཀྱིས་རྣ་བས་ཉོན་དང་། སེམས་སུ་ཆུགས་ཤིག
[11] ཁྱོད་སོང་དང་། བཙོན་དུ་ཁྲིད་པའི་མི་རྒྱུད་ཀྱི་མདུན་དུ་སོང་ནས། དེ་ཚོས་མཉན་མི་མཉན་རུང་། དེ་དག་ལ་བཀའ་སྒྲོགས་ཤིག ཁྱོད་ཀྱིས་དེ་དག་ལ། གཙོ་བོ་ཡ་ཝཱེས་འདི་སྐད་དུ་གསུངས་ཅེས་སྨྲོས་ཤིག་གསུངས་པ་དང་།
[12] དུས་དེར། ཐུགས་ཉིད་ཀྱིས་ང་ཡར་དྲངས་ཏེ། གཙོ་བོ་ཡ་ཝཱེའི་བཞུགས་གནས་ཀྱིས་མངོན་པའི་གཟི་བརྗིད་ལ་བསྟོད་འོས་སོ།། ཞེས་ངའི་རྗེས་སུ་འུར་སྒྲ་ཆེན་པོ་ཞིག་གྲག་པ་ངས་ཐོས་སོ།།
[13] ཡང་ཕན་ཚུན་ཐུག་པའི་སེམས་ཅན་གྱི་གཤོག་སྒྲ་དང་། དེ་ཚོའི་མདུན་དུ་ཡོད་པའི་འཁོར་ལོ་རྣམས་ཀྱི་སྒྲ་དང་། འུར་སྒྲ་ཆེན་མོ་ཞིག་ངས་ཐོས་སོང་།
[14] དེ་ནས་ཐུགས་ཉིད་ཀྱིས་ང་འཕགས་ཏེ། ང་རང་ཡར་དྲངས་པ་དང་། དུས་དེར་ངའི་སེམས་ནི་རབ་ཏུ་འཁྲུག་པ་དང་སྐྱོ་བར་གྱུར་ཡང་། གཙོ་བོ་ཡ་ཝཱེའི་སྟོབས་ཤུགས་ལྡན་པའི་ཕྱག་ངའི་སྟེང་དུ་བཞག
[15] དེ་ནས་ང་ཐེལ་ཨ་བིབ་ཀྱི་བཙོན་པ་དག་གི་དྲུང་དུ་བསླེབས་པ་དང་། དེ་དག་ནི་ཀེ་བར་གཙང་འགྲམ་དུ་གནས་ཤིང་། ང་རང་དེ་དག་གནས་པའི་ས་རུ་ཉིན་བདུན་ལ་བསྡད་དེ། ཁོ་ཚོའི་ཁྲོད་དུ་ཧ་ལས་ཤིང་ག་བྱེད་འདི་བྱེད་མ་ཤེས་སོ།།
[16] ཡང་ཉིན་བདུན་འགོར་རྗེས། གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[17] ཀྱེ་མིའི་བུ། ངས་ཁྱོད་ནི་ཡེས་ར་ཨེལ་ཁྱིམ་རྒྱུད་ཀྱི་བྱ་ར་པར་བསྐོས་པས། ཁྱོད་ཀྱིས་ངའི་གསུངས་ལ་ཉན་ནས། ངའི་ཚབ་ཏུ་དེ་དག་ལ་ཐ་ཚིག་སྒྲོགས་ཤིག
[18] གལ་ཏེ་ངས་མི་ངན་དེ་ལ་འདི་སྐད་དུ། ཁྱོད་ནི་འཆི་ངེས་ཡིན་ཞེས་གསུངས་ཤིང་། ཁྱོད་ཀྱིས་དེ་ལ་ཐ་ཚིག་མ་བསྒྲགས་པར། ཡང་སྲོག་སྐྱོབ་ཏུ་དེ་ནི་སྤྱོད་ངན་ལས་ལོག་པར་མ་བསྐུལ་ན། མི་ངན་དེ་རང་གི་སྡིག་པའི་ཕྱིར་དུ་འཆི་བར་འགྱུར་ཡང་། དེ་འཆི་བའི་ཕྱིར་དུ་ངས་ཁྱོད་ལ་རྩད་གཅོད་ངེས་ཡིན།
[19] གལ་ཏེ་ཁྱོད་ཀྱིས་མི་ངན་དེ་ལ་ཐ་ཚིག་བསྒྲགས་ཤིང་། མི་དེ་ད་དུང་རང་གི་སྡིག་པ་དང་སྤྱོད་ངན་ལས་མ་ལོག་ན། དེ་ནི་རང་གི་སྡིག་པའི་ཕྱིར་ད་འཆི་ངེས་ཏེ། ཡིན་ཡང་ཁྱོད་ཀྱིས་རང་གི་ཚེ་སྲོག་བསྐྱབས་པ་ཡིན།
[20] གལ་ཏེ་མི་དྲང་བདེན་ཅན་དེ་བདེན་པ་ལས་བཟློགས་ཏེ། ངན་པ་སྤྱད་ན། ངས་དེའི་མདུན་དུ་བཀག་རྡོ་འཇོག་ཅིང་། དེ་ནི་འཆི་བར་འགྱུར་ལ། ཅིའི་ཕྱིར་ཞེ་ན། ཁྱོད་ཀྱིས་དེ་ལ་ཐ་ཚིག་མ་བསྒྲགས་པས། མི་དེ་རང་གི་སྡིག་པའི་ཕྱིར་དུ་འཆི་བར་འགྱུར་བ་དང་། དེས་རྒྱུན་དུ་སྤྱད་པའི་དྲང་བདེན་གྱི་ལས་རྣམས་ཀྱང་དྲན་པར་མི་བྱ་སྟེ། ཡིན་ཡང་དེ་འཆི་བའི་ཕྱིར་དུ་ངས་ཁྱོད་ལ་རྩད་གཅོད་ངེས་ཡིན།
[21] ཇི་སྟེ་ཁྱོད་ཀྱིས་དྲང་བདེན་ཅན་ལ་སྡིག་པ་མི་བྱ་བའི་ཆེད་དུ་ཐ་ཚིག་བསྒྲགས་ནས། དེས་སྡིག་པ་མ་བྱས་ན། མི་དེས་ཐ་ཚིག་དང་ལེན་བྱས་པས་གསོན་བར་འགྱུར་ལ། ཁྱོད་ཀྱིས་ཀྱང་རང་སྲོག་བསྐྱབས་པ་ཡིན་ཞེས་གསུངས་སོ།།
[22] གཙོ་བོ་ཡ་ཝཱེའི་ཕྱག་ནི་གནས་དེར་ངའི་ཐོག་ཏུ་བཞག་སྟེ། ཁོང་གིས་ང་ལ་འདི་སྐད་དུ། ཡར་ལོངས་ལ། ཐང་ཆེན་དུ་སོང་ཞིག་དང་། དེར་ངས་ཁྱོད་ལ་གསུང་བར་བྱའོ་ཞེས་བསྒོས་པས།
[23] དེ་ནས་ང་ཡར་ལངས་ཏེ་ཐང་ཆེན་དུ་སོང་བ་ན། དེ་རུ་བདག་གིས་ཀེ་བར་གཙང་འགྲམ་དུ་མཐོང་བའི་གཟི་བརྗིད་དང་འདྲ་བའི་གཙོ་བོ་ཡ་ཝཱེའི་དཔལ་མཐོང་བས། ང་རང་ཁ་སྦུབ་ཏུ་ལོག་གོ །
[24] དེ་ནས་ཐུགས་ཉིད་ངའི་ནང་དུ་བཞུགས་ནས། ང་རང་ཡར་ལངས་དུ་བཅུག་པ་དང་། ཡ་ཝཱེས་ང་ལ་འདི་སྐད་དུ། ཁྱོད་ནང་ལ་སོང་ནས། རང་ཁྱིམ་དུ་སྒོ་བརྒྱབ་ཏེ་སྡོད་ཅིག
[25] ཀྱེ་མིའི་བུ། མི་ཡིས་ཁྱོད་ནི་ཐག་པས་བསྡམ་ནས། ཁྱོད་ནི་ཁོ་ཚོའི་ནང་དུ་འགྲོ་མི་ཐུབ་རུང་།
[26] དེ་རྣམས་ནི་གཉའ་རེངས་པའི་མི་རྒྱུད་ཡིན་པས། ཁྱོད་དེ་རྣམས་ལ་བཀའ་བཀྱོན་གནང་མཁན་དུ་མི་འགྱུར་བའི་ཕྱིར། ཁྱོད་ནི་ལྐུགས་པར་འགྱུར་དུ། ངས་ཁྱོད་ཀྱི་སྨྲ་བརྗོད་དགག་བར་བྱའོ།།
[27] ཡིན་ཡང་ངས་ཁྱོད་ལ་གསུང་དུས་སུ། ངས་ཁྱོད་ཀྱི་ཁ་གྲག་པར་འཇུག་སྟེ། ཁྱོད་ཀྱིས་དེ་ཚོ་ལ། གཙོ་བོ་ཡ་ཝཱེས་འདི་སྐད་དུ་གསུངས་ཤེས་སྨྲོས་ཤིག ཉན་འདོད་པ་རྣམས་ཀྱིས་ཉོན་དང་། ཉན་མི་འདོད་པ་རྣམས་ཀྱིས་མ་མཉན་ཏོ།། ཅིའི་ཕྱིར་ཞེ་ན། དེ་དག་ནི་གཉའ་རེངས་པའི་མི་རྒྱུད་ཡིན་པའི་ཕྱིར།