[1] ལོ་བཅུ་གཉིས་ཀྱི་ཟླ་བཅུ་གཉིས་པའི་ཚེས་གཅིག་ཉིན་ལ། གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། ཁྱོད་ཀྱིས་ཨེ་ཅིབ་ཀྱི་རྒྱལ་པོ་ཕཱར་ཨོལ་གྱི་ཕྱིར་དུ་སྐྱོ་གླུ་ཞིག་རྩོམས་ཤིག་དང་། དེ་ལ་འདི་ལྟར་དུ། ཁྱོད་ནི་མི་རྒྱུད་ཀུན་གྱི་ནང་གི་སེང་གེ་དར་མ་དང་འདྲ་ཞིང་། རྒྱ་མཚོ་ནང་གི་ཆུ་སྲིན་དང་འདྲ་སྟེ། ཁྱོད་ནི་གཙང་པོ་ནང་དུ་ཕར་ཚུར་རྒྱུ་ཞིང་། རང་གི་སྡེར་མོས་ཆུ་དཀྲུགས་ནས། གཙང་པོ་བརྙོགས་པར་གྱུར་ཞེས་སྨྲོས་ཤིག
[3] གཙོ་བོ་ཡ་ཝཱེས་འདི་སྐད་དུ། ངས་ཡུལ་ཁམས་ཀུན་གྱི་མི་སྡེ་རྣམས་བསྡུས་ནས། ཁྱོད་ཀྱི་སྟེང་དུ་ངའི་དྲ་རྒྱ་གཏོར་ཞིང་། དེ་དག་གིས་ངའི་དྲ་རྒྱས་ཁྱོད་ནི་ཡར་འཐེན་པར་འགྱུར།
[4] ངས་ཁྱོད་སྐམ་སར་དབྱུག་སྟེ། རི་ཐང་དུ་འཕངས་ནས། གནམ་གྱི་འདབ་ཆགས་ཐམས་ཅད་ཁྱོད་ཐོག་ཏུ་སྡོད་དུ་གཞུག་ཅིང་། ས་གཞིའི་གཅན་གཟན་ཐམས་ཅད་ཀྱིས་ཁྱོད་ཟོས་ནས་འགྲང་བར་འཇུག་གོ །
[5] ཡང་ངས་ཁྱོད་ཀྱི་ཤ་ནི་རི་མགོར་འཕངས་ནས། ཁྱོད་ཀྱི་མཐོ་ཞིང་ཆེ་བའི་རོ་ལུང་པ་རུ་དགང་བར་བྱ་སྟེ།
[6] ངས་ཁྱོད་ནས་བཞུར་བའི་ཁྲག་ནི་ས་གཞིར་བླུགས་ཏེ། རི་མགོར་ཐོན་འཇུག་པ་དང་། ཆུ་རྐ་རྣམས་སུའང་ཁྱོད་ཀྱི་ཁྲག་གིས་དགང་བར་འགྱུར།
[7] ངས་ཁྱོད་མེད་པར་མཛད་དུས། ནམ་མཁའ་བསྒྲིབ་ཅིང་། གནམ་མཁའི་སྐར་མ་རྣམས་ཀྱང་མུན་པར་བྱ་སྟེ། ཉི་མ་སྤྲིན་གྱིས་བསྒྲིབ་བཅུག་ནས། ཟླ་བས་ཀྱང་འོད་མི་སྣང་ངོ་།
[8] ངས་གནམ་མཁའི་འོད་ལྡན་པ་རྣམས་ཁྱོད་ཐོག་མུན་པར་མཛད་ནས། ཁྱོད་ཀྱི་ཡུལ་ཁམས་ནི་མུན་པས་བསྒྲིབ་པར་འགྱུར་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[9] ངས་ཁྱོད་མི་རྒྱུད་ཀུན་གྱི་ནང་དུ་ནུབ་པར་གྱུར་བའི་གནས་ཚུལ་དེ། ཁྱོད་ལ་ཆ་མེད་པའི་ཡུལ་རྣམས་སུ་སྐྱེལ་དུས། ངས་མི་རིགས་ཀུན་གྱི་སེམས་ནི་དཀྲུག་པར་འགྱུར།
[10] དེ་དག་གི་མདུན་དུ་ངས་ཉིད་ཀྱི་རལ་གྲི་ཁྱོད་ལ་གཡུག་དུས་སུ། ཁྱོད་ཀྱི་ཕྱིར་དུ་དེ་དག་སྐྲག་ཅིང་། དེ་དག་གི་རྒྱལ་པོ་རྣམས་ཀྱང་ཁྱོད་ཀྱི་ཕྱིར་དུ་རབ་ཏུ་དངངས་སྐྲག་སྐྱེ་ཞིང་། ཁྱོད་ཕམ་པའི་ཉིན་མོར་མི་རེ་རེ་རང་སྲོག་གི་ཆེད་དུ་རྟག་ཏུ་འདར་བར་འགྱུར་རོ།།
[11] གཙོ་བོ་ཡ་ཝཱེས་འདི་སྐད་དུ། པཱ་པིས་ལུན་གྱི་རྒྱལ་པོའི་རལ་གྲི་ཁྱོད་ཐོག་འབབ་ཅིང་།
[12] ངས་མི་རྒྱུད་ཀུན་ནང་གི་མི་དྲག་ཤུལ་ཅན་ཏེ། དཔའ་བོ་རྣམས་ཀྱི་རལ་གྲི་བརྒྱུད་དེ་ཁྱོད་ཀྱི་མི་སྡེ་རྣམས་ལོག་པར་འགྱུར་ཞིང་། དེ་ཚོས་ཨེ་ཅིབ་ཀྱིས་ངོམ་ཟིལ་སྟོན་པ་དེ་མེད་པར་མཛད་ཅིང་། ཨེ་ཅིབ་ཀྱི་མི་སྡེ་ཀུན་ཡང་མེད་པར་བྱའོ།།
[13] ཡང་ངས་ཆུ་རྣམས་ཀྱི་འགྲམ་དུ་ཨེ་ཅིབ་ཀྱི་དུད་འགྲོ་དག་ཚར་དུ་གཅོད་ཅིང་། ད་ཕྱིན་ཆད་མིའི་རྐང་པས་ཆུ་འདི་དག་རྙོག་པར་མི་འགྱུར་ཞིང་། དུད་འགྲོའི་རྨིག་པས་ཀྱང་དེ་ལྟར་མི་བྱའོ།།
[14] དུས་དེར་ངས་ཆུ་རྣམས་དྭངས་བར་འཇུག་ཅིང་། གཙང་པོའི་ཆུ་རྣམས་ནི་སྣུམ་བཞིན་དུ་དལ་བར་བཞུར་འཇུག་གོ་ཅེས་གཙོ་བོ་ཡ་ཝཱེས་གསུངས་སོ།།
[15] ངས་ཨེ་ཅིབ་ཀྱི་ཡུལ་སྟོངས་སུ་བཅུག་སྟེ། ཡུལ་ཁམས་དེ་ནང་ཡོད་པ་ཐམས་ཅད་བརླགས་ནས། དེའི་ནང་ཡོད་པའི་མི་སྡེ་ཐམས་ཅད་ཚར་དུ་གཅད་ན། དུས་དེར། ཁོ་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་རོ།།
[16] འདི་ནི་མི་ཡིས་ཨེ་ཅིབ་ཀྱི་ཕྱིར་དུ་བླངས་པའི་སྐྱོ་གླུ་སྟེ། མི་རྒྱུད་སོ་སོའི་བུད་མེད་དག་གིས་སྐྱོ་གླུ་འདི་ལེན་ཞིང་། དེ་རྣམས་ཀྱིས་ཨེ་ཅིབ་དང་དེའི་མི་སྡེ་ཡི་ཕྱིར་དུ་སྐྱོ་གླུ་འདི་ལེན་ནོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[17] དེའང་ལོ་བཅུ་གཉིས་པའི་ཟླ་བཅུ་གཉིས་ཀྱི་ཚེས་བཅོ་ལྔར། གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[18] ཀྱེ་མིའི་བུ། ཁྱོད་ཀྱིས་ཨེ་ཅིབ་ཀྱི་མི་སྡེ་རྣམས་ཀྱི་ཕྱིར་དུ་ངུ་འབོད་བྱོས་ཤིག ཨེ་ཅིབ་དང་རྒྱལ་ཁབ་སྟོབས་ལྡན་པའི་བུ་མོ་རྣམས་ནི། ས་དོང་དུ་འབབ་པའི་མི་རྣམས་དང་བཅས་དམྱལ་ཡུལ་དུ་སྐྱོལ་ཞིག
[19] ཁྱོད་ཀྱིས་ཨེ་ཅིབ་ལ་འདི་ལྟར་དུ། ཁྱོད་ནི་སུ་ལས་ལྷག་ཏུ་ཁྱད་འཕགས་ཡིན་ནམ། ཁྱོད་མར་སོང་སྟེ་མདུན་ལྤགས་མ་བཅད་པའི་མི་དེ་དག་དང་མཉམ་དུ་ཉལ་སྡོད་ཅིག་ཅེས་སྨྲས་ན།
[20] དེ་དག་ནི་རལ་གྲིས་བཀུམ་པའི་མི་རྣམས་ཀྱི་ནང་དུ་ལོག་པར་འགྱུར་ཞིང་། གྲི་བཏོན་དུས་ཨེ་ཅིབ་དང་དེའི་མི་སྡེ་རྣམས་ནི་མཉམ་དུ་མར་འཐེན་པར་འགྱུར།
[21] དཔའ་བོ་ནང་གི་ཆེས་སྟོབས་ཅན་དེ་ཡིས་དམྱལ་ཡུད་དུ་ཨེ་ཅིབ་དང་ཨེ་ཅིབ་ལ་རོགས་བྱེད་མཁན་གླེང་སྟེ་ན་རེ། དེ་དག་མར་འོངས་ཤིང་། དེ་དག་ནི་མདུན་ལྤགས་མ་བཅད་པའི་མི་སྟེ་རལ་གྲིས་བཀུམ་པའི་མི་རྣམས་དང་མཉམ་དུ་ཉལ་ཏོ་ཞེས་ཟེར་རོ།།
[22] ཨ་སུར་དང་། དེའི་དམག་དཔུང་ཐམས་ཅད་དེར་ཡོད་པ་དང་། དེའི་མཐའ་སྐོར་དུ་ཁོ་ཚོའི་དུར་ཁུང་རྣམས་འདུག་སྟེ། དེ་ཐམས་ཅད་ནི་སྲོག་ཤོར་བ་དང་། རལ་གྲི་འོག་ཏུ་འགྱེལ་བའི་མི་ཡིན་ནོ།།
[23] དེ་དག་གི་དུར་ཁུང་ནི་ཆེས་ཟབ་པའི་དོང་ནང་དུ་བཞག་ཡོད་པ་དང་། ཨ་སུར་གྱི་དམག་དཔུང་རྣམས་ནི་དེའི་དུར་ཁུང་གི་མཐའ་སྐོར་དུ་ཡོད་དེ། ཐམས་ཅད་ནི་སྲོག་ཤོར་བ་དང་། རལ་གྲི་འོག་ཏུ་འགྱེལ་བའི་མི་ཡིན་ཏེ། ཁོ་ཚོས་སྔོན་ན་དངངས་སྐྲག་ནི་གསོན་པའི་གནས་སུ་ཁྱབ་པར་གྱུར་རོ།།
[24] ཨེ་ལཱམ་པའང་དེར་ཡོད་པ་དང་། དེའི་མི་སྡེ་རྣམས་ཀྱང་དུར་ཁུང་གི་མཐའ་འཁོར་དུ་ཡོད་དེ། ཁོ་ཚོ་ཐམས་ཅད་སྲོག་ཤོར་བ་དང་། རལ་གྲི་འོག་ཏུ་འགྱེལ་བའི་མི་ཡིན་ནོ།། ཁོ་ཚོ་ནི་མདུན་ལྤགས་མ་བཅད་པར་དམྱལ་ཡུལ་དུ་ལྷུང་བ་ཡིན་ལ། ཁོ་ཚོས་སྔོན་ན་དངངས་སྐྲག་ནི་གསོན་པའི་གནས་སུ་ཁྱབ་པར་གྱུར་ཏེ། ད་ལྟ་ཁོ་ཚོ་ནི་དོང་ནང་བབས་པའི་མི་རྣམས་དང་ལྷན་ཅིག་ཏུ་རང་གི་ངོ་ཚ་ཁུར་བ་ཡིན།
[25] བསད་པའི་མི་ནང་དུ་དེ་དང་དེའི་མི་སྡེའི་ཕྱིར་དུ་མལ་ཁྲི་བཙུགས་ཡོད་དེ། ཁོ་ཚོའི་དུར་ཁུང་ནི་དེའི་མཐའ་འཁོར་དུ་ཡོད་པ་དང་། ཁོ་ཚོ་ཚང་མ་མདུན་ལྤགས་མ་བཅད་པ་དང་། རལ་གྲིས་བཀུམ་པའི་མི་སྟེ། ཁོ་ཚོས་སྔོན་ན་དངངས་སྐྲག་ནི་གསོན་པའི་གནས་སུ་ཁྱབ་པར་གྱུར་ཏེ། ད་ལྟ་ཁོ་ཚོ་ནི་དོང་ནང་བབས་པའི་མི་རྣམས་དང་ལྷན་ཅིག་ཏུ་རང་གི་ངོ་ཚ་ཁུར་བ་དང་། ཨེ་ལམ་པ་ནི་བསད་པའི་མི་ནང་དུ་བཀོད་བསྒྲིགས་བྱས་ཡོད་དོ།།
[26] མེ་ཤེག་དང་། ཐུ་བཱལ་དང་། དེའི་མི་སྡེ་ཀུན་ཡང་དེར་ཡོད་དེ། ཁོ་ཚོའི་དུར་ཁུང་ནི་མེ་ཤེག་དང་ཐུ་བཱལ་གྱི་མཐའ་འཁོར་དུ་ཡོད་པ་དང་། ཁོ་ཚོ་ཚང་མ་མདུན་ལྤགས་མ་བཅད་པ་དང་། རལ་གྲིས་བཀུམ་པའི་མི་སྟེ། ཁོ་ཚོས་སྔོན་ན་དངངས་སྐྲག་ནི་གསོན་པའི་གནས་སུ་ཁྱབ་པར་གྱུར།
[27] ཁོ་ཚོ་ཐམས་ཅད་ནི་མདུན་ལྤགས་མ་བཅད་པའི་ཕྱིར་དུ་བསད་པའི་དཔའ་བོ་རྣམས་དང་མཉམ་དུ་ཉལ་བ་མ་ཡིན་ནམ། དཔའ་བོ་འདི་དག་གིས་མཚོན་ཆ་བཟུང་སྟེ་དམྱལ་ཡུལ་དུ་ལྷུང་སྟེ། རལ་གྲི་རང་གི་མགོ་འོག་ཏུ་བཞག་ཡོད་དོ།། དེ་དག་གི་སྡུག་པ་ནི་རང་གི་རུས་པའི་སྟེང་དུ་ཡོད་དེ། ཁོ་ཚོས་སྔོན་ན་དངངས་སྐྲག་ནི་གསོན་པའི་གནས་སུ་ཁྱབ་པར་གྱུར་ཏོ།།
[28] ཀྱེ་ཕཱར་ཨོལ། ཁྱོད་ལ་མཚོན་ན། ཁྱོད་ནི་མདུན་ལྤགས་མ་བཅད་པའི་མིའི་ནང་དུ་མེད་པར་འགྱུར་ཞིང་། རལ་གྲིས་བསད་པའི་མི་དང་མཉམ་དུ་ཉལ་བར་འགྱུར།
[29] ཨེ་དོམ་པའང་དེར་ཡོད་དེ། ཨེ་དོམ་གྱི་རྒྱལ་པོ་རྣམས་དང་མགོ་དཔོན་དག་ལ་དཔའ་ངར་ལྡན་ཡང་། ད་དུང་རལ་གྲིས་བཀུམ་པའི་མི་རྣམས་དང་མཉམ་དུ་ཡོད་པ་དང་། དེ་དག་ནི་མདུན་ལྤགས་མ་བཅད་པར་དོང་དུ་ལྷུང་བའི་མི་དང་མཉམ་དུ་ཉལ་བར་འགྱུར།
[30] གནས་དེར་བྱང་ཕྱོགས་ཀྱི་མགོ་དཔོན་ཚང་མ་དང་། ཚི་ཏུན་པ་ཐམས་ཅད་ཀྱང་ཡོད་པ་དང་། དེ་དག་ཐམས་ཅད་ནི་བསད་པའི་མི་དང་མཉམ་དུ་མར་བབས་ཏེ། ཁོ་ཚོར་དཔའ་ངར་ལྡན་ཞིང་། མི་ལ་འཇིགས་སྐུལ་ཡང་། ད་དུང་ངོ་ཚ་ཐེབས་པ་དང་། ཁོ་ཚོ་ནི་མདུན་ལྤགས་མ་བཅད་པ་དང་། རལ་གྲིས་བཀུམ་པའི་མི་རྣམས་དང་མཉམ་དུ་ཉལ་ཞིང་། དོང་ནང་བབས་པའི་མི་དང་མཉམ་དུ་རང་གི་ངོ་ཚ་ཁུར་ཏོ།།
[31] ཕཱར་ཨོལ་གྱིས་དེ་དག་མཐོང་སྟེ། ཕཱར་ཨོལ་རང་ཉིད་དང་ཁོང་གི་དཔུང་ཚོགས། རལ་གྲིས་བཀུམ་པའི་རང་གི་མི་སྡེ་ཀུན་གྱི་ཕྱིར་དུ་སེམས་གསོ་རྙེད་དོ་ཅེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[32] ངས་ཕཱར་ཨོལ་ལ་དངངས་སྐྲག་ནི་གསོན་པའི་གནས་སུ་ཁྱབ་པར་གྱུར་ཡང་། དེ་དང་དེའི་མི་སྡེ་ཀུན་ནི་མདུན་ལྤགས་མ་བཅད་པའི་མིའི་ནང་དུ། རལ་གྲིས་བཀུམ་པའི་མི་དང་མཉམ་དུ་ཉལ་བར་འགྱུར་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།