[1] ཀྱེ་མིའི་བུ། ཁྱོད་ཀྱིས་སོ་ཕག་ཅིག་བླངས་ཏེ། རང་གི་མདུན་དུ་ཞོག་དང་། དེའི་སྟེང་དུ་ཡེ་རུ་སཱ་ལེམ་མཚོན་བྱེད་ཀྱི་གྲོང་ཁྱེར་ཞིག་རྐོས་ཤིག
[2] དེ་ནས་མཁར་གྱི་མཐའ་སྐོར་བའི་སྒྲིག་བཀོད་རྣམས་ཞོག་དང་། གྲོང་ཁྱེར་སྐོར་བའི་མཁར་མཐོན་པོ་དང་། གྲོང་ཁྱེར་ལ་རྒོལ་བའི་ས་རགས་རྩིགས་ཏེ། དམག་སྒར་སྒྲིགས་ནས། ཕྱོགས་བཞི་རུ་གྲོང་ཁྱེར་ལ་རྒོལ་པའི་ཐོ་བ་ཆེན་པོ་ཚིགས་ཤིག
[3] ཡང་ཁྱོད་ཀྱིས་ལྕགས་ཀྱི་སླ་ང་ཞིག་བླངས་ནས། ལྕགས་ཀྱི་མཁར་བྱེད་དུ། ཁྱོད་དང་གྲོང་ཁྱེར་གྱི་བར་དུ་ཞོག་དང་། གྲོང་ཁྱེར་སྐོར་བའི་མཚོན་བྱེད་དུ། ཁྱོད་ནི་གྲོང་ཁྱེར་གྱི་ཕྱོགས་སུ་ཁ་འཁོར་དང་། ཁྱོད་ནི་གྲོང་ཁྱེར་དེ་ལ་རྒོལ་ནས་སྐོར་མཁན་དང་། དེ་ནི་ཡེས་ར་ཨེལ་ཁྱིམ་རྒྱུད་ཀྱི་སྔ་ལྟས་སུ་འགྱུར་རོ།།
[4] དེ་ནས་ཁྱོད་རང་གཡོན་ཕྱོགས་སུ་འཁོར་ནས་ཉལ་ཏེ། ཡེས་ར་ཨེལ་གྱི་ཁྱིམ་རྒྱུད་ཀྱི་སྡིག་པ་ཁུར་ཞིག་དང་། ཁྱོད་གཡོན་ཕྱོགས་སུ་འཁོར་ནས་ཉིན་ག་ཚོད་ལ་ཉལ་ན། ཁོ་ཚོའི་སྡིག་པ་ཡང་ཁྱོད་ཀྱིས་དེ་བཞིན་དུ་ཁུར་བ་ཡིན་ནོ།།
[5] ངས་ཁྱོད་ཀྱི་ཕྱིར་དུ་ཉིན་ཞག་སུམ་བརྒྱ་དང་དགུ་བཅུ་གཏན་འཁེལ་བྱས་ཤིང་། དེ་ནི་ཁོ་ཚོས་སྡིག་སྤྱོད་ཀྱི་ལོ་གྲངས་དང་འདྲ་ཞིང་། དུས་འདི་དག་གི་ནང་དུ་ཁྱོད་ཀྱིས་ཡེས་ར་ཨེལ་གྱི་སྡིག་པ་ཁུར་དགོས།
[6] དུས་དེ་ལོངས་པའི་ཚེ། ཁྱོད་ནི་གཡས་ཕྱོགས་སུ་འཁོར་ཏེ་ཉོལ་དང་། ཡ་ཧུ་དཱའི་ཁྱིམ་རྒྱུད་ཀྱི་སྡིག་པ་ཁུར་དུ། ངས་ཁྱོད་ལ་ཉིན་ཞག་བཞི་བཅུ་གཏན་འཁེལ་བྱས་ཏེ། ཉིན་གཅིག་ནི་ལོ་གཅིག་ཏུ་བརྩིས་སོ།།
[7] ཁྱོད་ནི་མཐའ་རུ་སྐོར་བའི་ཡེ་རུ་སཱ་ལེམ་གྱི་ཕྱོགས་སུ་ཁ་འཁོར་ཏེ། དཔུང་པ་གཅེར་བུ་ངང་གྲོང་ཁྱེར་དེ་ལ་རྒོལ་བའི་ལུང་སྟོན་ཞིག
[8] ཁྱོད་ཀྱིས་གྲོང་ཁྱེར་སྐོར་བའི་ཉིན་མོ་རྣམས་ལོངས་པའི་བར་དུ། ངས་ཐག་པས་ཁྱོད་བསྡམ་ནས། ཁྱོད་ནི་ཁ་ཕྱིར་འཁོར་མི་ནུས་སོ།།
[9] ཁྱོད་ཀྱིས་གྲོ་དང་། སོ་བ་དང་། སྲན་མ་དང་། སྲན་དམར་དང་། མ་རྨོས་ལོ་ཏོག་དང་། ཡུག་པོ་བཅས་བླངས་ནས་སྣོད་གཅིག་གི་ནང་དུ་བཞག་སྟེ། རང་གི་ཕྱིར་དུ་བག་ལེབ་བསྲེག་ཅིག་དང་། ཁྱོད་ཟུར་དུ་ཉལ་བའི་ཉིན་ཞག་སུམ་བརྒྱ་དགུ་བཅུའི་ནང་དུ། ཁྱོད་ཀྱིས་བག་ལེབ་དེ་དག་ཟ་དགོས།
[10] ཡང་ཁྱོད་ཀྱིས་ཟ་བའི་ཟས་ལ་ཚོད་འཛིན་དགོས་ཏེ། ཉིན་རེ་ལ་ཁེ་ཉེར་བརྒྱ་སུམ་བཅུ་དང་། དུས་ཚོད་བཞིན་དུ་ཟ་དགོས།
[11] ཁྱོད་ཀྱིས་འཐུང་བའི་ཆུ་ལ་ཡང་ཚོད་འཛིན་དགོས་ཏེ། ཉིན་རེ་ལ་སྤྱི་བྲེ་ཕྱེད་ཀ་སྟེ། དུས་ཚོད་བཞིན་དུ་ཐུངས་ཤིག
[12] ཁྱོད་ཀྱིས་སོ་བའི་བག་ལེབ་བསྲེགས་མ་བཞིན་དུ། བག་ལེབ་དེ་ཟ་དགོས་ཏེ། ཡིན་ཡང་མི་སྡེའི་མདུན་དུ་མིའི་རྟུག་པའི་ནང་བསྲེགས་ནས་ཟ་དགོས་ཤེས་གསུངས་སོ།།
[13] གཙོ་བོ་ཡ་ཝཱེས་འདི་སྐད་དུ། ཡེས་ར་ཨེལ་པ་རྣམས་ཀྱིས་ངས་དེ་དག་བསྐྲད་པར་གྱུར་བའི་ཡུལ་ཁམས་སུའང་། དེ་བཞིན་དུ་མི་གཙང་བའི་ཟས་ཟ་བར་འགྱུར་རོ་ཞེས་གསུངས་པ་དང་།
[14] ངས་འདི་ལྟར་དུ། ཀྱེ་གཙོ་བོ་ཡ་ཝཱེ་ལགས། ངས་ནམ་ཡིན་ཡང་རང་ཉིད་བཙོག་པར་མ་བཟོས་ཏེ། ངས་ཆུང་དུས་ནས་ད་བར་དུ། ཤི་བའམ། གཅན་གཟན་གྱིས་ཕྲལ་བའི་སྲོག་ཆགས་དང་། མི་གཙང་བའི་ཤ་ནི་ནམ་ཡང་ངའི་ཁ་ནང་དུ་སོང་མ་མྱོང་ཞེས་ཞུས་པ་ན།
[15] དེ་ནས་ཁོང་གིས་ང་ལ་འདི་སྐད་དུ། ལྟོས་ཤིག ངས་ཁྱོད་ལ་མིའི་རྟུག་གི་ཚབ་ཏུ་ཨོང་ང་སྦྱིན་པས། ཁྱོད་ཀྱིས་ཨོང་ངའི་ཐོག་ཏུ་རང་གི་བག་ལེབ་སྲེགས་ཤིག་ཅེས་གསུངས།
[16] ཡང་ཁོང་གིས་ང་ལ་འདི་སྐད་དུ། ཀྱེ་མིའི་བུ། ངས་ཡེ་རུ་སཱ་ལེམ་གྱི་ཁ་ཟས་གཅད་པར་འགྱུར་ལ། དེ་ནས་ཁོ་ཚོས་སེམས་ཁྲལ་བྱེད་ཅིང་། བགོས་པའི་ཁ་ཟས་སྤྱོད་པ་དང་། དངངས་སྐྲག་གིས་བགོས་པའི་ཆུ་བཏུང་ཞིང་།
[17] དེ་དག་ལ་བཟའ་བཏུང་དཀོན་པས། མི་རེ་རེ་དངངས་སྐྲག་སྐྱེས་ནས། རང་གི་སྡིག་པའི་ཕྱིར་དུ་ལུས་སྟོབས་ཉམས་ཏེ་འཆི་བར་འགྱུར།