[1] ཀྱེ་མིའི་བུ། ཁྱོད་ཀྱིས་ཡེས་ར་ཨེལ་གྱི་རི་རྣམས་ལ་འདི་ལྟར་དུ། ཀྱེ་ཡེས་ར་ཨེལ་གྱི་རི་རྣམས། གཙོ་བོ་ཡ་ཝཱེའི་བཀའ་ལ་ཉོན་ཞིག་ཅེས་ལུང་སྟོན་ཞིག
[2] གཙོ་བོ་ཡ་ཝཱེས་འདི་སྐད་དུ། ཅིའི་ཕྱིར་ཞེ་ན། ཕ་རོལ་པས་ཁྱོད་ལ་རྒོལ་ཞིང་འཕྱས་ཏེ་ན་རེ། དུས་ཡུན་རིང་པོའི་རི་ཕྲན་དེ་དག་ནི་ངེད་ཅག་ལ་ནོར་སྐལ་དུ་ཐོབ་ཅེས་ཟེར་བས།
[3] ཁྱོད་ཀྱིས། གཙོ་བོ་ཡ་ཝཱེས་འདི་སྐད་དུ། མི་རྒྱུད་ཀུན་ནང་ལྷག་པའི་མི་རྣམས་ལ་ནོར་སྐལ་དུ་གནང་བའི་ཕྱིར་དུ། ཕ་རོལ་པས་ཁྱོད་རྣམས་སྟོངས་སུ་བཅུག་སྟེ། ཕྱོགས་བཞི་ནས་ཁྱོད་རྣམས་བརྫིས་བར་གྱུར་ནས། མི་རྣམས་ཀྱིས་བརྗོད་ཡུལ་དང་འཕྱ་དམོད་བྱེད་ཡུལ་དུ་གྱུར།
[4] དེ་བས། ཡེས་ར་ཨེལ་གྱི་རི་རྣམས། ཁྱོད་རྣམས་ཀྱིས་གཙོ་བོ་ཡ་ཝཱེའི་བཀའ་ལ་ཉོན་ཞིག་དང་། གཙོ་བོ་ཡ་ཝཱེས་རི་ཆེན་པོ་རྣམས་དང་། རི་ཕྲན་དག་དང་། གཙང་པོ་རྣམས་དང་། ལུང་པ་རྣམས་དང་། སྟོངས་སུ་གྱུར་བའི་གྱང་རོ་རྣམས་དང་། སྤངས་བའི་གྲོང་ཁྱེར་མཐའ་འཁོར་གྱི་མི་རྒྱུད་ཀུན་ནང་ལུས་པའི་མི་རྣམས་ཀྱིས་བཅོམ་ནོར་དང་། འཕྱས་བར་གྱུར་བ་དག་ལ་གསུངས་སོ་ཞེས་ལུང་སྟོན་ཞིག
[5] གཙོ་བོ་ཡ་ཝཱེས་འདི་སྐད་དུ། ངས་ཕྲག་དོག་གི་མེ་ལྕེ་ནང་ནས་སྨྲས་ཏེ་མི་རྒྱུད་ཀུན་ནང་ལུས་པའི་མི་རྣམས་དང་ཨེ་དོམ་པ་ལ་རྒོལ་ཏེ། གང་ལ་ཞེ་ན། དེ་དག་གི་སེམས་སུ་ངན་པས་ཁེངས་ཀྱང་། སེམས་ཡོངས་སུ་དགའ་ཞིང་། བཅོམ་ནོར་དུ་དབང་བའི་ཕྱིར་དུ། ངའི་ས་གཞི་ནི་རང་ཉིད་ལ་ནོར་སྐལ་དུ་གནང་།
[6] དེ་བས། ཁྱོད་ཀྱིས་ཡེས་ར་ཨེལ་ལ་ལུང་སྟོན་ཞིང་། རི་ཆེན་པོ་རྣམས་དང་། རི་ཕྲན་དག་དང་། གཙང་པོ་རྣམས་དང་། ལུང་པ་རྣམས་ལ་འདི་ལྟར་དུ་སྨྲོས་ཤིག གཙོ་བོ་ཡ་ཝཱེས་འདི་སྐད་དུ་གསུངས་ཏེ། ངས་ཕྲག་དོག་དང་ཐུགས་ཁྲོ་ཆེན་པོའི་ངང་ནས་སྨྲས་ཏེ། གང་ལ་ཞེ་ན། ཁྱོད་ཚོས་མི་རྒྱུད་ཀུན་གྱི་ངོ་ཚ་ཁུར་བའི་ཕྱིར།
[7] དེ་བས་གཙོ་བོ་ཡ་ཝཱེས་འདི་སྐད་དུ། ངས་ཉིད་ཀྱི་ཕྱག་ཡར་བརྐྱང་སྟེ་མནའ་སྐྱེལ་ཞིང་། ཁྱོད་ཚོའི་མཐའ་འཁོར་གྱི་མི་རྒྱུད་ཀུན་གྱིས་དངོས་སུ་རང་གི་ངོ་ཚ་འཁུར་བར་འགྱུར་ཞེས་གསུངས་སོ།།
[8] ཀྱེ་ཡེས་ར་ཨེལ་གྱི་རི་བོ་རྣམས། ཁྱོད་ཅག་ལ་ཡལ་ག་རྒྱས་ཤིང་། ངའི་མི་སྡེ་ཡེས་ར་ཨེལ་གྱི་ཕྱིར་དུ་འབྲས་བུ་ཐོགས་པར་འགྱུར་རོ།། ཅིའི་ཕྱིར་ཞེ་ན། དེ་དག་བསླེབ་ཉེ་བའི་ཕྱིར།
[9] ལྟོས་ཤིག ང་ནི་ཁྱོད་ཅག་ལ་རོགས་རམ་བྱེད་མཁན་ཡིན་པས། ངས་ཁྱོད་ཀྱི་ཕྱོགས་སུ་གདོང་བསྒྱུར་ཏེ། མི་ཡིས་ཁྱོད་ཀྱི་སྟེང་དུ་རྨོ་ཞིང་ས་བོན་འདེབས་པར་འགྱུར།
[10] ངས་ཡེས་ར་ཨེལ་ཁྱིམ་རྒྱུད་ཡོངས་ཀྱི་མི་གྲངས་ཁྱོད་ཀྱི་ཐོག་ཏུ་འཕེལ་འགྱུར་ཏེ། གྲོང་ཁྱེར་དུ་འདུག་མཁན་ཡོད་པ་དང་། གྱང་རོ་རྣམས་ཡང་བསྐྱར་བརྩིགས་པར་འགྱུར།
[11] ངས་མི་དང་དུད་འགྲོ་རྣམས་ཁྱོད་ཀྱི་ཐོག་ཏུ་འཕེལ་གྱུར་ནས། དེ་དག་གི་རྒྱུད་འཕེལ་ཞིང་དར་བར་འགྱུར་ལ། ངས་ཁྱོད་ཅག་སྔར་གཞིས་ཆགས་པ་ཁོ་ན་བཞིན་དུ་མི་སྡོད་མཁན་ཡོད་པར་འཇུག་ཅིང་། སྔར་ལས་ཀྱང་ཁྱོད་ཅག་ལ་བྱིན་རླབས་ཐོབ་པར་འགྱུར། དེ་ནས་ཁྱོད་ཅག་གིས་ང་ནེ་ཡ་ཝཱེ་ལགས་ཡིན་པ་རྟོགས་པར་འགྱུར་རོ།།
[12] ངས་མི་སྟེ། ངའི་མི་སྡེ་ཡེས་ར་ཨེལ་པ་རྣམས་ཁྱོད་ཀྱི་སྟེང་དུ་རྒྱུ་བར་གཞུག་ཅིང་། ཁྱོད་ནི་དེ་དག་ལ་ནོར་སྐལ་དུ་ཐོབ་ཅིང་། ཁྱོད་དེ་དག་གི་ནོར་སྐལ་དུ་འགྱུར་ཏེ། ད་ཕྱིན་ཆད་དེ་དག་ལ་བུ་ཕྲུག་ཤོར་མི་འགྱུར་རོ་ཞེས་གསུངས་སོ།།
[13] ཡང་གཙོ་བོ་ཡ་ཝཱེས་འདི་སྐད་དུ། ཇི་སྟེ་མི་ཡིས་ཁྱོད་ལ་ན་རེ། ཁྱོད་ནི་མི་མིད་མཁན་དང་། ཁྱོད་ཀྱི་མི་སྡེ་ལ་བུ་ཕྲུག་ཤོར་དུ་འཇུག་མཁན་ཡིན་ཞེས་ཟེར་བས།
[14] ཁྱོད་ཀྱིས་ཡང་བསྐྱར་མི་མིད་པར་མི་འགྱུར་ལ། རང་གི་མི་སྡེ་ལ་བུ་ཕྲུག་ཡང་ཤོར་རུ་མི་འཇུག་གོ་ཅེས་གཙོ་བོ་ཡ་ཝཱེས་གསུངས།
[15] དེ་མ་ཟད་རྗེས་སུ་ངས་ཁྱོད་ལ་མི་རྒྱུད་ཀུན་གྱི་ངོ་ཚ་ཐོས་བར་མི་གཞུག་སྟེ། མི་སྡེ་ཀུན་གྱི་ངན་སྨྲས་ཀྱང་ཁྱོད་ལ་མི་ཐེབས་པར། ཁྱོད་ཀྱི་མི་སྡེའང་ཡང་བསྐྱར་འགྱེལ་བར་མི་འགྱུར་རོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[16] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[17] ཀྱེ་མིའི་བུ། ཡེས་ར་ཨེལ་གྱི་ཁྱིམ་རྒྱུད་རང་ཡུལ་དུ་སྡོད་པའི་དུས་སུ། རང་གི་ལས་དང་སྤྱོད་པས་ཡུལ་དེ་བརླགས་པ་དང་། དེ་དག་གི་ལམ་དེ་ངའི་སྤྱན་སྔར་ཟླ་མཚན་ནང་གི་བུད་མེད་དང་འདྲ་བར་མི་གཙང་བ་ཡིན་པས།
[18] དེ་དག་གིས་ཡུལ་ནང་མི་ལ་ཁྲག་བཞུར་བཅུག་པ་དང་། དེ་དག་གིས་རང་གི་ཞེན་ལོག་པའི་འདྲ་སྐུ་ཡིས་ཡུལ་དེར་བཙོག་པར་བཟོས་པས། ངས་རང་གི་ཐུགས་ཁྲོ་ཆེན་པོ་ཁོ་ཚོའི་ཐོག་ཏུ་བླུགས་པ་ཡིན།
[19] ངས་དེ་དག་མི་རྒྱུད་ཀུན་ནང་ཁ་ཐོར་དུ་བཏང་ནས། ཕྱོགས་བཞིའི་ཡུལ་སོ་སོར་གཏོར་ཏེ། དེ་དག་གི་ལམ་དང་སྤྱོད་པ་བཞིན་དུ་ངས་དེ་དག་ལ་ཉེས་ཆད་བཅད་དོ།།
[20] དེ་དག་གང་དང་གང་དུ་ཕྱིན་པའི་མི་རྒྱུད་ཁྲོད་དུ་ཞུགས་དུས། ངའི་མཚན་དམ་པ་བརླགས་པར་བཅུག་གོ ། གང་ལ་ཞེ་ན། མི་ཡིས་ནམ་ཡང་ཁོ་ཚོའི་སྐོར་གླེང་སྟེ་ན་རེ། འདི་དག་ནི་གཙོ་བོ་ཡ་ཝཱེའི་མི་སྡེ་ཡིན་ཡང་། ཁོང་གི་ཡུལ་ནས་ཕྱིར་བུད་དོ་ཅེས་སྨྲས་པའི་ཕྱིར།
[21] ཡིན་ཡང་ཡེས་ར་ཨེལ་གྱི་ཁྱིམ་རྒྱུད་གང་དང་གང་དུ་ཕྱིན་པའི་ཕྱི་ཕྱོགས་པའི་ཁྲོད་དུ་བརླགས་བཅུག་པའི་ངའི་མཚན་དམ་པ་ལ་ངས་གཅེས་འཛིན་བྱེད་དགོས་སོ།།
[22] དེ་བས། ཁྱོད་ཀྱིས་ཡེས་ར་ཨེལ་གྱི་ཁྱིམ་རྒྱུད་ལ་འདི་ལྟར་དུ་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། ཀྱེ་ཡེས་ར་ཨེལ་གྱི་ཁྱིམ་རྒྱུད། ཁྱོད་ཀྱི་ཕྱིར་དུ་ངས་དོན་འདི་མཛད་པ་མ་ཡིན་པར། ཁྱོད་ཅག་གང་དང་གང་དུ་ཕྱིན་པའི་ཕྱི་ཕྱོགས་པའི་ཁྲོད་དུ་བརླགས་པའི་ཉིད་ཀྱི་མཚན་དམ་པའི་ཕྱིར་དུ་མཛད་པ་ཡིན་ནོ།།
[23] མཚན་དེ་ནི་མི་རྒྱུད་ཀུན་ནང་དུ་བརླགས་པ་དང་། ཁྱོད་ཚོས་ཕྱི་ཕྱོགས་པའི་ཁྲོད་དུ་བརླགས་པའི་ངའི་མཚན་ཆེན་པོ་དེ་ངས་དམ་པར་མངོན་ཞིང་། ངས་ཁྱོད་ཚོའི་སྟེང་དུ་དེ་དག་ལ་ངའི་མཚན་དམ་པ་མངོན་པའི་ཚེ། དེ་དག་གིས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་ཞེས་གཙོ་བོ་ཡ་ཝཱེས་གསུངས།
[24] ངས་ཁྱོད་རྣམས་མི་རྒྱུད་ཀུན་ནང་ཕྱིར་ཁྲིད་འོངས་ཞིང་། མི་སྡེ་ཀུན་ལས་ཁྱོད་རྣམས་བསྡུས་ཏེ། ཁྱོད་རྣམས་རང་ཡུལ་དུ་འཁྲིད་པར་བྱའོ།།
[25] དེ་ནས་ངས་ཆུ་གཙང་མ་ཁྱོད་ཀྱི་ཐོག་ཏུ་གཏོར་ན། ཁྱོད་རྣམས་གཙང་བར་འགྱུར་ཞིང་། ངས་ཁྱོད་ཚོའི་མི་གཙང་བ་ཐམས་ཅད་གཙང་བར་མཛད་ཅིང་། ཁྱོད་རྣམས་རང་གི་ཞེན་ལོག་གི་སྐུ་འདྲ་དག་ལས་བྲལ་བར་འགྱུར།
[26] ངས་སེམས་གསར་པ་ཞིག་ཁྱོད་རྣམས་ལ་གནང་སྟེ། ཐུགས་ཉིད་གསར་པ་ཞིག་ཁྱོད་ཀྱི་ནང་དུ་བཞག་སྟེ། ངས་ཁྱོད་ཅག་གི་ལུས་ཀྱི་ནང་ནས་རྡོ་སེམས་དེ་འདོན་འགྱུར་ཞིང་། ཤ་ཡི་སྙིང་ཞིག་ཁྱོད་རྣམས་ལ་གནང་བར་བྱའོ།།
[27] ཡང་ངས་ཉིད་ཀྱི་ཐུགས་ཉིད་ཁྱོད་ཚོའི་ནང་དུ་བཞག་སྟེ། ཁྱོད་ཚོར་ངའི་བཀའ་རྒྱ་བརྩི་འཇུག་ཅིང་། ངའི་ཁྲིམས་སྲོལ་རྣམས་བསྲུང་བར་འཇུག་གོ །
[28] ངས་ཁྱོད་ཚོའི་ཕ་མེས་དག་ལ་གནང་བའི་ཡུལ་དུ་ཁྱོད་རྣམས་གནས་བར་འགྱུར་ཞིང་། ཁྱོད་རྣམས་ནི་ངའི་མི་སྡེ་དང་། ང་ནི་ཁྱོད་ཚོའི་དཀོན་མཆོག་ཏུ་འགྱུར་བར་འགྱུར།
[29] ངས་ཁྱོད་རྣམས་བསྐྱབ་ཏེ་རང་གི་མི་གཙང་བ་ཐམས་ཅད་ལས་བྲལ་བར་འགྱུར་ཞིང་། ངས་འབྲུ་ལྔ་ལོ་ལེགས་བྱུང་བཅུག་སྟེ། ཁྱོད་རྣམས་མུ་གེ་ལ་ཐུག་ཏུ་མི་གཞུག་སྟེ།
[30] ཁྱོད་རྣམས་ལ་མི་རྒྱུད་ཀུན་ནང་དུ་མུ་གེའི་རྐྱེན་གྱིས་ངོ་ཚ་མི་ཐེབས་པའི་ཕྱིར། ངས་ཤིང་སྡོང་གི་ཤིང་ཏོག་དང་ས་ཞིང་གི་ཐོན་རྫས་དག་མང་དུ་འཕེལ་གཞུག་གོ །
[31] དུས་དེར། ཁྱོད་ཚོས་རང་གི་ངན་སྤྱོད་དང་མི་བཟང་བ་དག་དྲན་ཞིང་། རང་གི་སྡིག་པ་དང་ཞེན་ལོག་གི་དོན་གྱི་ཕྱིར་དུ་རང་ཉིད་ལ་ཞེན་ལོག་པར་འགྱུར་རོ།།
[32] ངས་འདི་བཞིན་མཛད་པ་ནི་ཁྱོད་ཚོའི་དོན་དུ་མིན་པ་ཁྱོད་རྣམས་ཀྱིས་རྟོགས་པར་གྱིས་ཤིག ཀྱེ་ཡེས་ར་ཨེལ་གྱི་ཁྱིམ་རྒྱུད། ཁྱོད་ཚོས་རང་གི་སྤྱོད་པའི་ཕྱིར་དུ་ངོ་ཚ་བར་གྱུར་ཞིག་ཅེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[33] གཙོ་བོ་ཡ་ཝཱེས་འདི་སྐད་དུ། ངས་ཁྱོད་རྣམས་གཙང་བར་མཛད་དེ། ཁྱོད་རྣམས་རང་གི་སྡིག་པ་ཀུན་ལས་བྲལ་བར་འགྱུར་བའི་ཉིན་མོར། ངས་གྲོང་ཁྱེར་རྣམས་སུ་མི་སྡོད་འཇུག་ཅིང་། གྱང་རོ་དག་ཡང་བསྐྱར་བརྩིག་པར་འགྱུར།
[34] སྔོན་དུས་རྒྱུ་མཁན་ཀུན་གྱིས་དབེན་སྟོང་དུ་བརྩིས་པའི་གནས་སུ། ད་ལྟ་ཡང་བསྐྱར་རྨོ་བར་འགྱུར་ལ།
[35] དེ་ནས་ཁོ་ཚོས་འདི་ལྟར་དུ། སྔོན་ན་དབེན་སྟོང་དུ་ལུས་པའི་གནས་དེ། ད་ལྟ་ཨེ་དེན་ར་བ་དང་འདྲ་ཞིང་། དོར་བ་དང་། དབེན་སྟོང་དུ་ལུས་པ་དང་། བཤིག་པར་གྱུར་བའི་གྲོང་ཁྱེར་དག་ནི་ད་ལྟ་རྫོང་བཙན་པོར་གྱུར་ཏེ། མི་འདུག་མཁན་ཡང་ཡོད་ཅེས་ཟེར་བར་འགྱུར།
[36] དུས་དེར། ཁྱོད་ཀྱི་ཕྱོགས་བཞིར་ལུས་པའི་མི་རྒྱུད་ཀུན་གྱིས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་ཞིང་། ངས་བཤིག་པར་གྱུར་བའི་གནས་དག་ཡང་བསྐྱར་བརྩིགས་པ་དང་། དབེན་སྟོང་དུ་གྱུར་བའི་གནས་དག་ཡང་བསྐྱར་བཙུགས་པའང་རྟོགས་པར་འགྱུར་བ་དང་། ང་ཡ་ཝཱེས་གསུངས་པས་མཛད་པར་འགྱུར་ཞེས་གསུངས་སོ།།
[37] ཡང་གཙོ་བོ་ཡ་ཝཱེས་འདི་སྐད་དུ། ངས་ཡེས་ར་ཨེལ་གྱི་ཁྱིམ་རྒྱུད་དག་ལ་ལུག་ཁྱུ་བཞིན་དུ་ཁོ་ཚོའི་མི་རྒྱུད་འཕེལ་བར་ང་ལ་ཞུ་འཇུག་ཅིང་།
[38] དུས་ཆེན་སྲུང་དུས། ཡེ་རུ་སཱ་ལེམ་དུ་མཆོད་པར་འབུལ་བའི་ལུག་ཁྱུ་གང་འདྲ་མང་པོ་ཡོད་པ་བཞིན་དུ། སྟོངས་སུ་གྱུར་བའི་གྲོང་ཁྱེར་ནང་དུའང་དེ་བཞིན་དུ་མི་ཡིས་དགང་བར་གྱུར་ན། ཁོ་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་ཞེས་གསུངས་སོ།།