[1] ཀྱེ་མིའི་བུ། སྐྲ་བཞར་མཁན་གྱི་སྤུ་གྲི་བྱེད་དུ། ཁྱོད་ཀྱིས་གྲི་རྣོན་པོ་ཞིག་བཟུང་སྟེ། རང་གི་སྐྲ་དང་སྨ་ར་བཞར་ནས། སྐྲ་དང་སྨ་ར་རྒྱ་སྲང་སྟེང་དུ་བཞག་སྟེ་ཚོབས་ཤིག་དང་། དེ་ནས་ཆ་ཤས་སུ་བགོས་ཤིག
[2] གྲོང་ཁྱེར་སྐོར་བའི་དུས་ལོངས་ཚེ། ཁྱོད་ཀྱིས་སྐྲ་དང་སྨ་ར་དེ་ལས་སུམ་ཆའི་གཅིག་བླང་སྟེ་གྲོང་ཁྱེར་གྱི་དབུས་སུ་མེར་སྲེགས་ཤིག ཡང་སུམ་ཆའི་གཅིག་བླང་སྟེ། གྲོང་ཁྱེར་གྱི་མཐའ་འཁོར་ནས་རལ་གྲིས་གཙོབས་ཤིག་དང་། ཡང་སུམ་ཆའི་གཅིག་རླུང་ལ་གཏོར་ཞིག་དང་། ངས་དེ་དག་གི་རྗེས་སུ་ད་དུང་རལ་གྲིས་བདའ་བར་བྱའོ།།
[3] ཁྱོད་ཀྱིས་སྐྲ་དང་སྨ་ར་དེ་ལས་འགའ་བླང་སྟེ། ཁྱོད་ཀྱི་ལྭའི་ཐུ་བ་ནང་དུ་ཆུགས་ཤིག
[4] ཡང་སྐྲ་དང་སྨ་ར་དེ་ལས་འགའ་བླང་སྟེ། མེའི་ནང་དུ་དབྱུགས་ནས་སྲེགས་ཤིག་དང་། མེ་ལྕེ་ནི་དེ་ནས་ཡེས་ར་ཨེལ་གྱི་ཁྱིམ་རྒྱུད་ཀུན་ཏུ་ཁྱབ་པར་འགྱུར་ཞེས་གསུངས་སོ།།
[5] ཡང་གཙོ་བོ་ཡ་ཝཱེས་འདི་སྐད་དུ། དེ་ནི་ངས་སྔོན་ལ་མི་རྒྱུད་རྣམས་ཀྱི་ནང་དུ་བཞག་ཅིང་། རྒྱལ་ཁབ་ཀུན་གྱིས་མཐའ་རུ་སྐོར་བའི་ཡེ་རུ་སཱ་ལེམ་ཡིན་ཡང་།
[6] དེས་ངའི་ཁྲིམས་ལུགས་རྣམས་དང་འགལ་ནས། སྤྱོད་ངན་སྤྱད་པ་ནི་མི་རྒྱུད་ཀུན་ལས་ཀྱང་ལྷག་སྟེ། ངའི་བཀའ་ཁྲིམས་ལས་འགལ་བ་ནི། དེའི་མཐའ་སྐོར་གྱི་རྒྱལ་ཁབ་ཀུན་ལས་ཀྱང་ལྷག་གོ ། དེས་ངའི་ཁྲིམས་ལུགས་དོར་བ་དང་། ངའི་བཀའ་ཁྲིམས་མ་སྲུང་ངོ་ཞེས་གསུངས་སོ།།
[7] དེ་བས་གཙོ་བོ་ཡ་ཝཱེས་འདི་སྐད་དུ་གསུངས་ཏེ། ཁྱོད་རྣམས་ཀྱིས་རང་གི་ཉེ་འཁོར་གྱི་མི་རྒྱུད་ཀུན་ལས་ཀྱང་ངོ་ལོག་བྱས་ཏེ། ངའི་བཀའ་ཁྲིམས་མ་བརྩིས་པ་དང་། ངའི་ཁྲིམས་ལུགས་མི་སྲུང་བར་མ་ཟད། རང་གི་ཉེ་འཁོར་གྱི་མི་རྒྱུད་ཀུན་གྱི་ཚུལ་ཁྲིམས་ཀྱང་ཁྱོད་ཅག་གིས་མ་བསྲུངས་པས།
[8] གཙོ་བོ་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་ནི་དགྲ་རུ་འཛིན་ཏེ། ངས་ཁྱོད་ཀྱི་ནང་དུ་མི་རྒྱུད་ཀུན་གྱི་མིག་མདུན་དུ་ཉེས་ཆད་གཅད་དེ།
[9] ཁྱོད་ཀྱི་ཞེན་ལོག་གི་སྤྱོད་པ་རྣམས་ཀྱི་ཕྱིར་དུ་། ངས་སྔར་ནམ་ཡང་མ་བྱས་པ་དང་། ཕྱིས་སུ་ཡང་མི་བྱ་བའི་ཉེས་ཆད་དེ་ཁྱོད་ཀྱི་ནང་དུ་གཅད་པར་འགྱུར་རོ།།
[10] དེའི་ཕྱིར་ཁྱོད་ཀྱི་ཁྲོད་དུ་ཕ་རྣམས་ཀྱིས་བུ་རྣམས་ཟ་བར་འགྱུར་ལ། བུ་རྣམས་ཀྱིས་ཕ་རྣམས་ཟ་བར་འགྱུར་རོ།། ཡང་ངས་ཁྱོད་ཅག་ལ་ཉེས་ཆད་གཅད་དེ། ཁྱོད་ལས་ལྷག་པའི་མི་རྣམས་ཕྱོགས་བཞིར་གཏོར་བར་འགྱུར་ཞེས་གསུངས་སོ།།
[11] ཡང་གཙོ་བོ་ཡ་ཝཱེས་འདི་སྐད་དུ། ངའི་ཉིད་ཀྱི་གསོན་པའི་ཚེ་སྲོག་དཔང་དུ་བཙུགས་ཏེ་གསུངས་ཤིག ཁྱོད་ཀྱིས་རང་གི་སྐྱུག་བྲོ་བའི་སྐུ་འདྲ་དང་ཞེན་ལོག་གི་དོན་ཐམས་ཅད་ཀྱིས་ངའི་གནས་མཆོག་བཙོག་པར་བཟོས་པས། ངས་ཀྱང་ཁྱོད་ལ་དྲིན་གྱིས་མི་སྐྱོང་སྟེ། ངའི་སྤྱན་གྱིས་ཀྱང་ཁྱོད་ལ་གཟིགས་སྐྱོང་མི་མཛད་ཅིང་། ངས་ཁྱོད་ལ་སྙིང་རྗེ་ཡང་བསྒོམ་པར་མི་འགྱུར་རོ།།
[12] ཁྱོད་ཀྱི་མི་སྡེ་ཡི་སུམ་ཆའི་གཅིག་ནི་རིམས་ནད་ཀྱིས་འཆི་བར་འགྱུར་ཞིང་། མུ་གེས་མེད་པར་འགྱུར་ལ། སུམ་ཆའི་གཅིག་ནི། ཁྱོད་ཀྱི་མཐའ་འཁོར་དུ་རལ་གྲིས་བརྒྱབ་ནས་ལོག་པར་འགྱུར་ཞིང་། སུམ་ཆའི་གཅིག་ནི། ངས་དེ་དག་ཕྱོགས་བཞི་རུ་གཏོར་བ་མ་ཟད། ད་དུང་ངས་དེ་རྣམས་རལ་གྲིས་འདེད་དོ།།
[13] དེ་ལྟར་ངའི་ཁོང་ཁྲོ་བླུགས་ཚར་ཞིང་། ངས་དེ་དག་གི་ཐོག་ཏུ་ལངས་པའི་ཁོང་ཁྲོ་ཆེན་པོ་དེའང་ཞུ་བར་འགྱུར་བས། ང་རང་ཉིད་ཀྱང་བག་ཕེབས་སོ།། ངས་དེ་དག་གི་ཐོག་ཏུ་ལངས་པའི་ཁོང་ཁྲོ་ཆེན་པོ་དེ་རྫོགས་ཚེ། ཡ་ཝཱེས་ངས་ཐུགས་ཁྲོའི་ངང་དེ་གསུངས་བ་ཡིན་པ་དེ་དག་གིས་རྟོགས་པར་འགྱུར།
[14] ངས་ཁྱོད་ནི་ས་སྟོང་དུ་བསྒྱུར་ཏེ། ཁྱོད་ནི་རང་གི་མཐའ་འཁོར་གྱི་མི་རྒྱུད་ཀུན་དང་དེར་རྒྱུ་བའི་མི་ཐམས་ཅད་ཀྱི་མདུན་དུ། ངོ་ཚ་རུ་འགྱུར་བར་འགྱུར།
[15] དེ་ལྟར་ངས་ཁོང་ཁྲོ་དང་། ཐུགས་ཁྲོ་ཆེན་པོ་དང་། ཞེ་སྡང་དྲག་པོའི་བཀའ་བཀྱོན་གྱིས་ཁྱོད་ཀྱི་ཕྱོགས་སུ་ཉེས་ཆད་གཅོད་དུས། ཁྱོད་ནི་རང་གི་ཉེ་འཁོར་གྱི་མི་རྒྱུད་ཀུན་གྱི་ནང་དུ་ངོ་ཚ་དང་། ཟུར་ཟ་དང་། མི་འཇིགས་སྣང་སྐྱེས་པའི་ཡུལ་དུ་འགྱུར་བ་དང་། ཡང་དེ་དག་གིས་དོགས་ཟོན་བྱ་ཡུལ་དུ་འགྱུར་རོ་ཞེས་ཡ་ཝཱེ་ངས་གསུངས་སོ།།
[16] ཁྱོད་རྣམས་ཚར་གཅོད་པའི་ཕྱིར་དུ། ངས་མུ་གེ་དང་གཏོར་བའི་དུག་མདའ་འཕངས་ཏེ། ངས་ཁྱོད་ཅག་གི་མུ་གེ་ཆེ་རུ་བཏང་ནས། ཁྱོད་ཅག་གི་ཁ་ཟས་ཀྱི་མཁོ་འདོན་གཅད་པར་གཞུག་གོ །
[17] ཡང་ངས་ཁྱོད་ཀྱི་དྲུང་དུ་མུ་གེ་དང་། གཅན་གཟན་ངན་པ་མངགས་ནས། དེ་དག་གིས་ཁྱོད་ཀྱི་མི་རབས་གཅད་ཅིང་། ཁྱོད་ཀྱི་ནང་དུ་གང་སར་རིམས་ནད་བྱུང་བ་དང་། ཁྲག་བཞུར་ཞིང་། ངས་ཁྱོད་ཀྱི་ཐོག་ཏུ་རལ་གྲི་འབྱུང་བར་འགྱུར་ཞེས་ཡ་ཝཱེ་ངས་གསུངས་པ་ལགས་སོ།།