[1] ཁྱོད་ཀྱིས་ཡེས་ར་ཨེལ་གྱི་མགོ་དཔོན་རྣམས་ཀྱི་ཕྱིར་དུ་སྐྱོ་གླུ་ཞིག་བརྩམས་ཏེ་འདི་ལྟར་དུ།
[2] ཁྱོད་ཀྱི་མ་ནི་སུ་ཡིན་ཟེར་ན། སེང་ཁྱུ་ནང་གི་མོ་སེང་དེ་ཡིན་ལ། མོ་སེང་གེ་དར་མའི་ཁྱུ་རུ་ཉལ་ནས། རང་གི་སེང་ཕྲུག་རྣམས་བསྐྱངས་ཤིང་།
[3] མོས་དེའི་ནང་གི་སེང་ཕྲུག་ཅིག་བསྐྱངས་ཏེ། སེང་གེ་དར་མ་ཞིག་ཏུ་གྱུར་ནས། བརྔོན་པའི་ཤ་རྣམས་ཕྲལ་བར་བསླབས་པ་དང་། མི་ཡང་ཟོས་སོ།།
[4] མི་རྒྱུད་ཀུན་གྱིས་དེ་ཐོས་ནས། སེང་གེ་དེ་ཁོ་ཚོའི་ས་དོང་ནང་དུ་བཅུག་ཅིང་། ཁོ་ཚོས་ལྩགས་ཀྱུས་དེ་ནི་ཨེ་ཅིབ་ཡུལ་དུ་ཁྲིད།
[5] སེང་མོས་བསྒུགས་བསྒུགས་ཀྱང་། རང་ཉིད་ཀྱི་རེ་བ་ཟད་པ་ཤེས་པས། སེང་ཕྲུག་ནང་ནས་ཡང་གཅིག་བླངས་ཏེ། སེང་གེ་དར་མ་ཞིག་ཏུ་དེ་གྱུར་བཅུག་སྟེ།
[6] དེ་ནི་སེང་ཁྱུ་ཁྲོད་དུ་རྒྱུ་ནས། སེང་གེ་དར་མ་ཞིག་ཏུ་གྱུར་བ་དང་། དེས་ཀྱང་བརྔོན་པའི་ཤ་རྣམས་ཕྲལ་བར་བསླབས་ཏེ། མི་ཡང་ཟོས་སོ།།
[7] དེས་ཁོ་ཚོའི་མཁར་རྫོང་རྣམས་བཤིགས་ཤིང་། ཁོ་ཚོའི་གྲོང་ཁྱེར་དག་སྟོངས་སུ་བཅུག་སྟེ། ཡང་དེས་ང་རོ་བཏོན་པའི་སྒྲའི་ཕྱིར་དུ། ས་གཞི་དང་དེའི་ནང་ཡོད་པ་ཀུན་འཇིགས་པར་གྱུར།
[8] དེ་ནས་ཕྱོགས་བཞིའི་མི་རྒྱུད་ཀུན་གནས་སོ་སོ་ནས་དེ་ལ་རྒོལ་དུ་འོངས་ནས། ཁོ་ཚོའི་དྲ་རྒྱ་དེའི་སྟེང་དུ་གཏོར་ཞིང་། དེ་ནི་ཁོ་ཚོའི་ས་དོང་ནང་དུ་བཅུག
[9] ཁོ་ཚོས་དེ་ནི་དྲ་ནང་བཅུག་ནས། ལྕགས་ཀྱུས་པཱ་པིས་ལུན་གྱི་རྒྱལ་པོའི་དྲུང་དུ་ཁྱེར་ཏེ། བཙོན་ཁང་ནང་དུ་བཅུག་པ་དང་། དེའི་ང་རོ་བཏོན་པའི་སྒྲ་ནི་ཡེས་ར་ཨེལ་གྱི་རི་རྣམས་སུ་ཡང་བསྐྱར་ཐོས་བར་མ་གྱུར་ཏོ།།
[10] ཁྱོད་ཀྱི་མི་ནི་རྒུན་འབྲུམ་ར་བ་ནང་རྒུན་འབྲུམ་གྱི་ཤིང་སྡོང་ཞིག་དང་འདྲ་ཞིང་། ཆུའི་འགྲམ་དུ་བཙུགས་ཡོད་པ་དང་། ཆུ་འཛོམས་པས་འབྲས་བུ་ཡག་པོ་ཐོགས་ཤིང་ཡལ་འདབ་མང་པོ་རྒྱས་ཏེ།
[11] མངའ་བདག་ཚོའི་འཁར་བ་བྱེད་དུ། ཤིང་སྡོང་དེ་ལ་ཡལ་ག་སྦོམ་པོ་ལྡན་ཞིང་། ཤིང་སྡོང་དེ་ཤིན་ཏུ་མཐོ་བས། ཡལ་འདབ་རྒྱས་པའི་སྡོང་པོ་གཞན་རྣམས་ལས་ཀྱང་མཐོ་སྟེ། གང་ལ་ཞེ་ན། དེ་ནི་ཤིན་ཏུ་མཐོ་ཞིང་། ཡལ་འདབ་རྒྱས་པས་ཐག་རིང་ས་ནས་ཀྱང་མཐོང་ཐུབ་པའི་ཕྱིར།
[12] ཡིན་ཡང་དཀོན་མཆོག་གི་ཐུགས་ཁྲོའི་ཕྱིར་དུ་རྒུན་ཤིང་དེ་འབྱིན་པར་གྱུར་ཏེ། ས་རུ་འགྱེལ་བ་དང་། ཤར་རླུང་གིས་དེའི་ཤིང་ཏོག་སྐམ་པར་བཅུག་ནས་ས་རུ་གཏོར་བ་དང་། ཡལ་འདབ་སྦོམ་པོ་དག་ཀྱང་སྐམ་བར་གྱུར་ནས་མེ་ཡིས་ཁྱུར་མིད་དུ་བཏང་།
[13] ད་ལྟ་དེ་ནི་ཆུ་དཀོན་པའི་སྐམ་ས་དང་། དབེན་སྟོང་དུ་བཙུགས་ཡོད་དེ།
[14] ཡལ་འདབ་གཅིག་ལས་མེ་བྱུང་ནས་དེའི་ཤིང་འབྲས་ཟོས་པ་དང་། ཐ་ན་ཤིང་སྡོང་སྟེང་དུ་མངའ་བདག་གི་འཁར་བ་བྱེད་པའི་ཡལ་འདབ་སྦོམ་པོ་ཞིག་ཀྱང་མེད་དོ།། ཞེས་འདི་ནི་སྐྱོ་གླུ་ཞིག་སྟེ། ཤིན་ཏུ་དར་བའི་སྐྱོ་གླུ་ཞིག་གོ །