[1] གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། ཁྱོད་ཀྱིས་ཡེས་ར་ཨེལ་གྱི་རི་རྣམས་ཀྱི་ཕྱོགས་སུ་ལུང་སྟོན་ཞིག
[3] དེ་དག་ལ་འདི་ལྟར་དུ། ཀྱེ་ཡེས་ར་ཨེལ་གྱི་རི་བོ་རྣམས། གཙོ་བོ་ཡ་ཝཱེའི་བཀའ་ལ་ཉོན་ཞིག གཙོ་བོ་ཡ་ཝཱེས་རི་ཆེན་པོ་དང་རི་ཕྲན། གྲོག་མོ་དང་ལུང་པ་རྣམས་ལ་འདི་སྐད་དུ། ལྟོས་ཤིག ངས་རལ་གྲི་ནི་ཁྱོད་ཀྱི་ཐོག་ཏུ་འབབ་བར་གྱུར་ནས། ཁྱོད་ཀྱི་མཐོ་གླིང་རྣམས་མེད་པར་བྱ་སྟེ།
[4] ཁྱོད་ཀྱི་མཆོད་ཁྲི་རྣམས་སྟོང་བར་འགྱུར་ལ། ཁྱོད་ཀྱི་སྤོས་ཁྲི་རྣམས་བཅག་སྟེ། ངས་ཁྱོད་ཀྱི་ནང་ནས་སྲོག་དང་བྲལ་བའི་མི་རྣམས་ཁྱོད་ཀྱི་སྐུ་འདྲའི་མདུན་དུ་ལོག་པར་བྱའོ།།
[5] ཡང་ངས་ཡེས་ར་ཨེལ་པའི་རོ་རྣམས་དེ་དག་གི་སྐུ་འདྲའི་མདུན་དུ་གཞག་ཅིང་། ཁྱོད་ཅག་གི་རུས་པ་རྣམས་ཁྱོད་ཀྱི་མཆོད་ཁྲིའི་མཐའ་འཁོར་དུ་གཏོར་བར་བྱའོ།།
[6] ཁྱོད་ཅག་སྡོད་པའི་གནས་ཐམས་ཅད་ཀྱི་གྲོང་ཁྱེར་རྣམས་སྟོང་བར་འགྱུར་ཞིང་། མཐོ་གླིང་རྣམས་སྟོང་ཞིང་དོར་བར་འགྱུར་ཞིང་། ཐ་ན་ཁྱོད་ཀྱི་མཆོད་ཁྲི་རྣམས་ཀྱང་སྟོང་ཞིང་དོར་བར་འགྱུར་པ་དང་། ཁྱོད་ཀྱི་སྐུ་འདྲ་རྣམས་བཅག་ནས་མེད་པར་བྱ་སྟེ། ཁྱོད་ཀྱི་སྤོས་ཁྲི་རྣམས་གཅད་ཅིང་། ཁྱོད་ཀྱིས་བཟོས་པ་རྣམས་མེད་པར་བྱ་སྟེ།
[7] སྲོག་དང་བྲལ་བའི་མི་རྣམས་ཁྱོད་ཀྱི་ནང་དུ་འགྱེལ་བར་འགྱུར་ལ། དེ་ནས་ཁྱོད་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར།
[8] ཡིན་ཡང་མི་ལྷག་མ་རྣམས་ངས་འཇོག་སྟེ། ཅིའི་ཕྱིར་ཞེ་ན། ཁྱོད་ཅག་ཡུལ་སོ་སོར་ཁ་འཐོར་དུ་འགྲོ་དུས། ཁྱོད་ཀྱི་ནང་ནས་མི་ཁ་ཤས་མི་རྒྱུད་ཀུན་གྱི་རལ་གྲི་ལས་ཐར་བར་འགྱུར་རོ།།
[9] དུས་དེར། ཐར་བའི་མི་རྣམས་ཀྱིས་བཙོན་དུ་ཁྲིད་པའི་མི་རྒྱུད་ནང་དུ་ངས་ཁོ་ཚོའི་ཕྱིར་དུ་ཐུགས་ཅི་ལྟར་སྐྱོ་བ་དྲན་པར་འགྱུར་ཏེ། གང་ལ་ཞེ་ན། དེ་དག་གིས་གཡེམ་སྦྱོར་གྱི་སེམས་བསྐྱེད་དེ་ང་རང་དོར་བ་དང་། དེ་དག་གི་ལོག་གཡེམ་གྱི་མིག་ནི་སྐུ་འདྲར་དུངས་ཏེ། དུས་དེར་ཁོ་ཚོ་ནི་རང་གི་སྤྱད་པའི་སྤྱོད་ངན་དང་། ཁོ་ཚོའི་ཞེན་ལོག་གི་དོན་ཐམས་ཅད་ཀྱི་ཕྱིར་དུ་རང་ཉིད་ལ་སྡང་བར་འགྱུར།
[10] དེ་ནས་དེ་དག་གིས་ང་ནི་ཡ་ཝཱེ་ལགས་དང་། ངས་ཁོ་ཚོའི་ཐོག་ཏུ་གནོད་འཚེ་འབྱུང་བར་འགྱུར་ཞེས་གསུངས་པ་སྟོང་བཤད་མིན་པ་རྟོགས་པར་འགྱུར་རོ།།
[11] གཙོ་བོ་ཡ་ཝཱེས་འདི་སྐད་དུ། ཁྱོད་ཀྱིས་རྐང་རྡབ་ལག་རྡེབ་བྱས་ནས་འདི་ལྟར་སྨྲོས་ཤིག ཡེས་ར་ཨེལ་ཁྱིམ་རྒྱུད་ཀྱི་སྐྱུག་བྲོ་བའི་སྤྱོད་ངན་གྱི་ཕྱིར་དུ་སྐྱོ་བ་ལ། དེ་རྣམས་རལ་གྲི་དང་། མུ་གེ་དང་། རིམས་ནད་ཀྱི་འོག་ཏུ་འགྱེལ་བར་འགྱུར།
[12] ཐག་རིང་ན་ཡོད་པ་རྣམས་རིམས་ནད་ཀྱིས་འཆི་ཞིང་། ཉེ་སར་ཡོད་པ་རྣམས་རལ་གྲིས་འགྱེལ་བར་འགྱུར་ཞིང་། མཐའ་རུ་སྐོར་ཞིང་ལུས་པ་རྣམས་མུ་གེས་འཆི་བར་འགྱུར་ལ། དེ་ལྟར་ངའི་རང་གི་ཁོང་ཁྲོ་དེ་དག་གི་ཐོག་ཏུ་བླུག་རྫོགས་པར་འགྱུར།
[13] དེ་དག་གི་སྐུ་འདྲའི་མདུན་དང་། དེ་དག་གི་མཆོད་ཁྲིའི་མཐའ་འཁོར་དང་། རི་མཐོན་པོ་རེ་རེ་དང་། རི་རྩེ་རེ་རེ་དང་། ལྗང་ཐིང་ཐིང་གི་ཤིང་སྡོང་དང་བེ་ཤིང་སྟུག་པོ་ཀུན་གྱི་འོག་སྟེ། དེ་དག་གིས་སྐུ་འདྲ་ཀུན་ལ་སྤོས་དྲི་བདུག་པའི་གནས་སུ། དེ་དག་སྲོག་དང་བྲལ་བའི་མི་རྣམས་འགྱེལ་བར་འགྱུར་ཞིང་། དུས་དེར་ཁོ་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་རོ།།
[14] ཡང་ངས་ཉིད་ཀྱི་ཕྱག་བརྐྱངས་ནས་དེ་དག་ལ་རྒོལ་ཞིང་། དེ་དག་སྡོད་པའི་གནས་ཏེ། དབེན་སྟོང་ནས་རིབ་ལཱ་ཡི་བར་དུ་ས་སྟོང་དུ་བྱ་སྟེ། དེ་ནས་ཁོ་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར།