[1] དེའང་ལོ་དྲུག་པའི་ཟླ་དྲུག་པ་ཡི་ཚེས་ལྔ་པར། ང་ཁྱིམ་དུ་སྡོད་དུས། ཡ་ཧུ་དཱའི་རྒན་རབས་ཚོའང་ངའི་མདུན་དུ་ཡོད་དུས། དེར་གཙོ་བོ་ཡ་ཝཱེའི་ཐུགས་ཉིད་ངའི་སྟེང་དུ་བབས་ཏེ།
[2] ངས་བལྟས་པ་ན། གཟུགས་དབྱིབས་མི་དང་འདྲ་བ་ཞིག་མཐོང་སྟེ། དེའི་རྐེད་པ་དང་འདྲ་བའི་མན་ཆད་ན་མེའི་དབྱིབས་ཡོད་དེ། དེའི་རྐེད་པ་དང་འདྲ་བའི་ཡན་ཆད་ན་འོད་ཟེར་འཕྲོས་པའི་ལྕགས་རིགས་དང་འདྲ་བ་ཞིག་ཡོད།
[3] དེས་གཟུགས་ཕྱག་དང་འདྲ་བ་ཞིག་བརྐྱངས་ཏེ། ངའི་སྐྲ་ཉག་གཅིག་གིས་བཟུང་ནས། ཐུགས་ཉིད་ཀྱིས་ང་ནི་གནམ་སའི་བར་དུ་ཡར་དྲངས་ཤིང་། དཀོན་མཆོག་གི་ཞལ་གཟིགས་ཀྱི་ནང་དུ། དེས་ང་ནི་ཡེ་རུ་སཱ་ལེམ་གྱི་ཕོ་བྲང་དམ་པའི་བྱང་སྒོའི་ནང་ཁྱམས་ཀྱི་འཇུག་སྒོར་ཁྲིད་པ་དང་། དེར་བཀའ་ཡོད་དེ། དཀོན་མཆོག་གི་ཐུགས་དཀྲུགས་པ་དང་། དཀོན་མཆོག་སྡང་པའི་སྐུ་འདྲའི་གཞི་དེར་ཡོད།
[4] བསམ་ཡུལ་ལས་འདས་པ་ཞིག་ལ། ངས་ཐང་དུ་མཐོང་བའི་ཞལ་གཟིགས་ཁོ་ན་བཞིན་དུ། ཡེས་ར་ཨེལ་གྱི་དཀོན་མཆོག་གི་གཟི་བརྗིད་དེར་མཆིས་སོ།།
[5] ཁོང་གིས་ང་ལ་འདི་སྐད་དུ། ཀྱེ་མིའི་བུ། མགོ་བོ་ཡར་བཀྱགས་ཏེ་བྱང་ཕྱོགས་སུ་ལྟོས་ཤིག་ཅེས་གསུངས་པ་དང་། ངས་མགོ་བོ་ཡར་བཀྱགས་ནས་བྱང་ཕྱོགས་སུ་བལྟས་པ་ན། མཆོད་ཁྲིའི་སྒོ་ཡི་བྱང་ཕྱོགས་ཀྱི་འཇུག་སྒོ་རུ་བཀའ་ཡོད་དེ། དཀོན་མཆོག་སྡང་པའི་སྐུ་འདྲ་དེར་ཡོད།
[6] ཡང་ཁོང་གིས་ང་ལ་འདི་སྐད་དུ། ཀྱེ་མིའི་བུ། དེ་ཚོས་སྐྱུག་བྲོ་བའི་དོན་སྤྱད་དེ། ངའི་གནས་མཆོག་ལས་ང་རང་བྲལ་བར་གྱུར་ཏེ། ཡེས་ར་ཨེལ་ཁྱིམ་རྒྱུད་ཀྱིས་འདིར་སྤྱད་པ་དག་ཁྱོད་ཀྱིས་མཐོང་ངམ། ཡིན་ཡང་ཁྱོད་ཀྱིས་ད་དུང་དེ་ལས་ལྷག་པའི་དོན་ངན་མཐོང་བར་འགྱུར་རོ་ཞེས་གསུངས་སོ།།
[7] ཡང་དེས་ང་ནི་ཁྱམས་རའི་སྒོ་ཁར་ཁྲིད་དེ། ངས་བལྟས་པ་ན། རྩིག་ངོས་སུ་དོང་ཞིག་ཡོད་པ་མཐོང་སྟེ།
[8] ཁོང་གིས་ང་ལ་འདི་སྐད་དུ། ཀྱེ་མིའི་བུ། རྩིག་པ་རྐོས་ཤིག་ཅེས་གསུངས་པ་དང་། ངས་བརྐོས་ཏེ་བསམ་ཡུལ་ལས་འདས་པ་ཞིག་ལ་སྒོ་ཞིག་མཐོང་བྱུང་།
[9] དེ་ནས་ཁོང་གིས་ང་ལ་འདི་སྐད་དུ། ཁྱོད་ནང་དུ་སོང་ཞིག་དང་། དེ་དག་གིས་འདི་ནས་སྤྱོད་པའི་ཞེན་ལོག་གི་ལས་ལ་ལྟོས་ཤིག་ཅེས་གསུངས་པ་དང་།
[10] ང་ནང་དུ་སོང་ནས་བལྟས་པ་ན། ཕྱོགས་བཞིའི་རྩིག་ངོས་སུ་རྣམ་པ་སྣ་ཚོགས་ཀྱི་ལྟོ་འགྲོ་དང་འབུ་སྲིན་དང་། ཞེན་ལོག་གི་རི་དྭགས་སྣ་ཚོགས་དང་། ད་དུང་ཡེས་ར་ཨེལ་ཁྱིམ་རྒྱུད་ཀྱི་སྐུ་འདྲ་རྣམས་བརྐོས་ཡོད་དེ།
[11] ཡེས་ར་ཨེལ་ཁྱིམ་རྒྱུད་ཀྱི་རྒན་པོའི་ཁྲོད་ལས་མི་བདུན་བཅུ་དེ་དག་གི་མདུན་དུ་འགྲེང་སྟེ། ཤཱ་ཕན་གྱི་བུ་ཡ་ཨ་ཟན་ཡཱ་ཞེས་པའང་དེ་དག་གི་ཁྲོད་དུ་ལངས་བསྡད་དེ། ཁོ་ཚོ་རེ་རེའི་ལག་ཏུ་རང་གི་སྤོས་ཕོར་བཟུང་སྟེ། སྤོས་ཀྱི་དུ་བ་ཡར་འཕྱུར་བཞིན་འདུག
[12] དེ་ནས་ཁོང་གིས་ང་ལ་འདི་སྐད་དུ། ཀྱེ་མིའི་བུ། ཡེས་ར་ཨེལ་ཁྱིམ་རྒྱུད་གྱི་རྒན་པོ་རྣམས་ཀྱིས་སོ་སོས་རང་གི་སྐུ་འདྲའི་ཁང་པའི་ལྐོག་ནས་ཅི་སྤྱད་པ་ཁྱོད་ཀྱིས་མཐོང་ངམ། དེ་དག་གིས་ན་རེ། གཙོ་བོ་ཡ་ཝཱེས་ངེད་རྣམས་མ་མཐོང་སྟེ། གཙོ་བོ་ཡ་ཝཱེ་ས་གཞི་འདི་དང་བྲལ་ཏོ་ཟེར་ཞིང་། ཞེས་གསུངས་སོ།།
[13] ཡང་ཁོང་གིས་ང་ལ་འདི་སྐད་དུ། ཡང་དེ་ཚོས་སྤྱད་པའི་ཞེན་ལོག་གི་ལས་འདི་ལས་ཀྱང་ལྷག་པ་ཁྱོད་ཀྱིས་མཐོང་བར་འགྱུར་ཞེས་གསུངས་ནས།
[14] དེས་ང་གཙོ་བོ་ཡ་ཝཱེའི་ཕོ་བྲང་གི་བྱང་སྒོ་རུ་ཁྲིད་ནས། དེར་བུད་མེད་འགའ་བསྡད་ཡོད་པ་དང་། མོ་རྣམས་ཐམ་མུ་སིའི་ཕྱིར་དུ་ངུ་བཞིན་འདུག
[15] ཁོང་གིས་ང་ལ་འདི་སྐད་དུ། ཀྱེ་མིའི་བུ། ཁྱོད་ཀྱིས་མཐོང་ངམ། ཞེན་ལོག་གི་ལས་འདི་ལས་ཀྱང་ལྷག་པ་ཁྱོད་ཀྱིས་མཐོང་བར་འགྱུར་ཞེས་གསུངས་སོ།།
[16] ཡང་དེས་ང་གཙོ་བོ་ཡ་ཝཱེའི་ཕོ་བྲང་གི་ནང་ཁྱམས་ལ་ཁྲིད་དེ། བར་ཁྱམས་དང་མཆོད་ཁྲིའི་བར་གྱི་གཙོ་བོ་ཡ་ཝཱེའི་མཆོད་ཁང་གི་སྒོ་ཁར་མི་ཉེར་ལྔ་ཡོད་དེ། ཁོ་ཚོས་གཙོ་བོ་ཡ་ཝཱེའི་མཆོད་ཁང་གི་ཕྱོགས་སུ་རྒྱབ་བསྟན་ཡོད་པ་དང་། གདོང་ཤར་ཕྱོགས་སུ་འཁོར་ཏེ། ཁོ་ཚོས་ཤར་གྱི་ཉི་མའི་ཕྱོགས་སུ་ཕྱག་འཚལ་བཞིན་ཡོད།
[17] ཁོང་གིས་ང་ལ་འདི་སྐད་དུ། ཀྱེ་མིའི་བུ། ཁྱོད་ཀྱིས་མཐོང་ངམ། ཡ་ཧུ་དཱའི་ཁྱིམ་རྒྱུད་ཀྱིས་འདིར་ཞེན་ལོག་གི་ལས་སྤྱོད་པ་ནི་དོན་ཆུང་ཆུང་ཡིན་ནམ། གང་ལ་ཞེ་ན། དེ་དག་གིས་གནས་འདི་ལ་བཙན་ཤུགས་ཀྱིས་ཁེངས་བཅུག་སྟེ། ཡང་ཡང་ངའི་ཐུགས་དཀྲུགས་ཤིང་། ལྟོས་ཤིག དེ་དག་གིས་ཡལ་ག་རང་གི་སྣ་མདུན་དུ་ཁྱེར་བས།
[18] ངས་དེ་དག་ལ་ཁོང་ཁྲོ་ཆེན་པོ་འཛིན་ཞིང་། ངའི་སྤྱན་གྱིས་དེ་དག་ལ་མི་གཟིགས་ཤིང་། སྙིང་རྗེ་ཡང་མི་བསྒོམ་པར། དེ་ཚོས་སྐད་ཆེན་པོས་ངའི་སྙན་དུ་ཞུས་ཀྱང་། ངས་དེ་དག་ལ་གསན་པར་མི་བྱའོ་ཞེས་གསུངས་སོ།།