[1] ངེད་རྣམས་བཙོན་དུ་ཁྲིད་པའི་ལོ་ཉེར་ལྔ་པ་སྟེ། ཡེ་རུ་སཱ་ལེམ་གྲོང་ཁྱེར་བླངས་པའི་ལོ་བཅུ་བཞི་པའི་ལོ་འགོའི་ཟླ་དེའི་ཚེས་བཅུ་པར། ཉིན་དེར་གཙོ་བོ་ཡ་ཝཱེའི་ཕྱག་ངའི་སྟེང་དུ་བཞག་སྟེ། ཁོང་གིས་ང་གནས་དེར་ཁྲིད་པ་དང་།
[2] དཀོན་མཆོག་གི་ཞལ་གཟིགས་ཀྱི་ནང་དུ། ཁོང་གིས་ང་ཡེས་ར་ཨེལ་གྱི་ཡུལ་དུ་ཁྲིད་དེ། རི་ཤིན་ཏུ་མཐོན་པོ་ཞིག་གི་ཁར་ང་བཞག་སྟེ། རི་བོའི་ལྷོ་ཕྱོགས་སུ། རྒྱལ་ས་ལྟ་བུའི་བཟོ་བཀོད་དང་འདྲ་བ་ཞིག་ཡོད་དེ།
[3] ཁོང་གིས་ང་དེར་ཁྲིད་པ་དང་། ངས་མི་ཞིག་མཐོང་སྟེ། དེར་བལྟས་ཚེ་ལི་ཀྱི་མདངས་ལྡན་ཞིང་། ལག་ཏུ་སོ་ཐག་དང་ཚད་ཐིག་ལེན་བྱེད་ཀྱི་སྨྱུག་མ་ཞིག་བཟུང་སྟེ་སྒོ་ཁར་ལངས་ནས་བསྡད་ཡོད།
[4] མི་དེས་ང་ལ་ན་རེ། ཀྱེ་མིའི་བུ། ངས་ཁྱོད་ལ་བསྟན་པ་རྣམས། ཁྱོད་ཀྱིས་མིག་གིས་ལྟོས་དང་། རྣ་བས་ཉོན་ལ། སེམས་སུ་ཞོག་ཅིག ཅིའི་ཕྱིར་ཞེ་ན། ཁྱོད་ལ་སྟོན་པའི་ཕྱིར་ངས་ཁྱོད་གནས་འདིར་དྲངས་ཏེ། ཁྱོད་ཀྱིས་མཐོང་བ་་ཁོ་ན་བཞིན་དུ་ཡེས་ར་ཨེལ་གྱི་ཁྱིམ་རྒྱུད་ལ་ཤོད་ཅིག་ཅེས་བསྒོས་སོ།།
[5] དེ་ནས་ངས་ཕོ་བྲང་གི་ཕྱོགས་བཞི་ན་ཡོད་པའོ་རྩིག་པ་མཐོང་སྟེ། མི་དེའི་ལག་གི་ཚད་ཐུག་ལེན་བྱའི་སྨྱུག་མའི་རིང་ཚད་ལ་ཁྲུ་གསུམ་ཡོད་དེ། ཁོས་བཟོ་བཀོད་དེ་ཚད་པ་ན་རྩིག་པའི་མཐུག་ཚད་ལ་ཁྲུ་གསུམ་དང་། མཐོ་ཚད་ལའང་ཁྲུ་གསུམ་ཡོད་དོ།།
[6] ཡང་མི་དེ་ཤར་ཕྱོགས་ཀྱི་རྒྱ་སྒོར་ཕྱིན་ནས། དེའི་རྡོ་སྐས་ལ་འཛེགས་ཏེ། སྒོ་ཐེམ་ཚད་པ་ན་མཐུག་ཚད་ལ་ཁྲུ་གསུམ་དང་། ཡང་སྒོ་ཐེམ་གཞན་ཞིག་ཚད་དེ་མཐུག་ཚད་ལའང་ཁྲུ་གསུམ་ཡོད་པ་ཡིན།
[7] ཡང་སྒོ་སྲུང་གི་ཁང་པ་ཡོད་དེ། རིང་ཚད་ལ་ཁྲུ་གསུམ་དང་། ཞེང་ལ་ཁྲུ་གསུམ་ཡོད་པ་དང་། སྒོ་སྲུང་གི་ཁང་པ་དང་ཁང་པའི་བར་ཐག་ལ་ཁྲུ་གཉིས་དང་ཕྱེད་ཀ་ཡོད་པ་དང་། དེ་ནི་ཕོ་བྲང་གི་ནང་ཕྱོགས་སུ་ཁ་གཏད་དེ། སྒོ་ཁྱམས་འགྲམ་གྱི་ཐེམ་པའི་མཐུག་ཚད་ལ་ཁྲུ་གསུམ་ཡོད་དོ།།
[8] ཡང་དེས་ཕོ་བྲང་གི་ནང་ཕྱོགས་སུ་ཁ་གཏད་ཡོད་པའི་སྒོ་ཐེམ་གྱི་མཐུག་ཚད་ལ་ཁྲུ་གསུམ་ཡོད་པ་ཡིན།
[9] སྒོ་ཐེམ་དེའི་གཏིང་ཚད་ལ་ཁྲུ་བཞི་ཡོད་པ་དང་། རྩིག་པའི་ཀ་བའི་མཐུག་ཚད་ལ་ཁྲུ་གཅིག་ཡོད་དེ། སྒོ་ཁྱམས་ནི་ཕོ་བྲང་གི་ནང་ཕྱོགས་སུ་ཁ་གཏད་དོ།།
[10] ཤར་སྒོའི་ཁང་པ་རྣམས་གཡས་སུ་གསུམ་དང་། གཡོན་དུ་གསུམ་ཡོད་དེ། གསུམ་པོའི་རིང་ཚད་དང་ཞེང་གཅིག་ལ། ཕྱོགས་གཉིས་ཀྱི་རྩིག་པའི་ཀ་བའི་མཐུག་ཚད་ཀྱང་གཅིག་ཡིན།
[11] དེས་ཤར་སྒོ་ཚད་པ་ན། འཇུག་སྒོའི་ཞེང་ལ་ཁྲུ་ལྔ་ཡོད་པ་དང་། བརྒྱུད་ལམ་གྱི་ཞེང་ལ་ཁྲུ་དྲུག་དང་ཕྱེད་ཀ་ཡོད།
[12] སྒོ་སྲུང་གི་ཁང་པ་རེ་རེའི་མདུན་དུ་རྩིག་པ་དམའ་མོ་རེ་ཡོད་དེ། མཐོ་ཚད་ལ་ལི་ཁྲུ་ལྔ་བཅུ་ཡོད་པ་ཡིན། ཕྱོགས་གཉིས་ཀྱི་ཁང་པ་གཉིས་ཀྱང་གཅིག་མཚུངས་ཡིན་ནོ།། ཁང་པ་དེའི་རིང་ཚད་ལ་ཁྲུ་དྲུག་དང་། ཕྱོགས་གཉིས་ནི་གཅིག་མཚུངས་ཡིན།
[13] དེས་ཤར་སྒོ་ཚད་པ་དང་། ཁང་པ་འདིའི་རྒྱབ་སྒོ་ནས་ཁང་པ་དེའི་རྒྱབ་སྒོ་སྟེ། ཁང་ཐོག་འདི་ནས་ཁང་ཐོག་གཞན་ཚད་པ་ན་ཞེང་ལ་ཁྲུ་བཅུ་གཉིས་དང་ཕྱེད་ཀ་ཡོད་དོ།།
[14] ནང་གི་རྩིག་པའི་ཀ་བ་བརྒྱུད་ནས་ཁྱམས་རའི་ཕྱོགས་ཀྱི་རྩིག་པའི་ཀ་བ་བར་དུ་ཚད་པ་ན། བསྡོམས་པས་རིང་ཚད་ལ་ཁྲུ་སུམ་བཅུ་ཡོད་པ་ཡིན།
[15] ཤར་སྒོའི་མདུན་གྱི་འཇུག་སྒོ་ནས་རྒྱབ་ཀྱི་སྒོ་ཁྱམས་བར་དུ་ཁྲུ་ཉེར་ལྔ་ཡོད།
[16] སྒོ་སྲུང་གི་ཁང་པའི་ཤར་སྒོའི་ནང་གི་རྩིག་པའི་ཀ་བ་དང་། སྒོ་ཁྱམས་བཅས་ལ་སྒེའུ་ཁུང་ཡོད་དེ། ནང་གི་ཕྱོགས་བཞི་རུའང་སྒེའུ་ཁུང་རེ་ཡོད་དེ། རྩིག་པའི་སྟེང་དུ་ཏ་ལ་བརྐོས་ཡོད་པ་ཡིན།
[17] དེ་ནས་དེས་ང་ཁྱམས་ཕྱི་མར་ཁྲིད་པ་དང་། ངས་ཁང་པ་འགའ་ཡོད་པ་མཐོང་སྟེ། ཁྱམས་རའི་ཕྱོགས་བཞིའི་ས་རུ་རྡོ་བཏིངས་ཡོད་པ་དང་། དེའི་ཐོག་ཏུ་ཁང་པ་སུམ་བཅུ་ཡོད་དོ།།
[18] རྡོ་བཏིངས་ཡོད་པའི་ས་དེ་ནི་རྒྱ་སྒོ་རེ་རེའི་འགྲམ་དུ་ཡོད་ཅིང་། སྒོ་ལས་ཅུང་དམའ་ཞིང་། ཞེང་ནི་རྒྱ་སྒོའི་རིང་ཚད་དང་གཅིག་ཡིན།
[19] དེས་འོག་གི་རྒྱ་སྒོ་ནས་ནང་ཁྱམས་ཀྱི་རྩིག་པའི་བར་དུ་ཚད་པ་ན་བསྡོམས་པས་ཞེང་ལ་ཁྲུ་ལྔ་བཅུ་ཡོད་དེ། ཤར་ཕྱོགས་དང་བྱང་ཕྱོགས་ཐམས་ཅད་གཅིག་ཡིན་ནོ།།
[20] ཡང་དེས་ཁྱམས་ཕྱི་མའི་བྱང་ལ་འཁོར་ཡོད་པའི་རྒྱ་སྒོའི་རིང་ཚད་དང་ཞེང་ཚད་པ་ན།
[21] ནང་གི་སྲུང་ཁང་རྣམས་གཡས་སུ་གསུམ་དང་། གཡོན་དུ་གསུམ་ཡོད་དེ། རྩིག་པའི་ཀ་བ་དང་སྒོ་ཁྱམས་ཀྱི་རིང་ཐུང་ཤར་སྒོ་དང་གཅིག་མཚུངས་ཡིན་ཏེ། བྱང་སྒོ་ཡོངས་ཀྱི་རིང་ཚད་ལ་ཁྲུ་ཉེར་ལྔ་དང་ཞེང་ལ་ཁྲུ་བཅུ་གཉིས་དང་ཕྱེད་ཀ་ཡོད།
[22] དེའི་སྒེའུ་ཁུང་དང་། སྒོ་ཁྱམས་དང་བརྐོས་པའི་ཏ་ལ་བཅས་ནི་ཤར་སྒོ་དང་གཅིག་མཚུངས་ཡིན་ཏེ། མི་རིམ་པ་བདུན་གྱི་རྡོ་སྐས་ལ་འཛེག་ན་ད་གཟོད་སྒོ་ཁ་འདིར་བསླེབ་ཐུབ་པ་དང་། མདུན་གྱི་མུ་མཐའ་རུ་སྒོ་ཁྱམས་ཡིན།
[23] ནང་ཁྱམས་སུ་སྒོ་གཞན་སྒོ་འདི་དང་ཁ་གཏད་དུ་ཡོད་པ་དང་། བྱང་ཕྱོགས་དང་ཤར་ཕྱོགས་ཐམས་ཅད་གཅིག་མཚུངས་སོ།། དེས་སྒོ་འདི་ནས་སྒོ་གཞན་གྱི་བར་དུ་ཚད་པ་ན་བསྡོམས་པས་ཁྲུ་ལྔ་བཅུ་ཡོད་དོ།།
[24] ཡང་དེས་ང་ལྷོ་ཕྱོགས་སུ་ཁྲིད་པ་དང་། ངས་ལྷོ་ཕྱོགས་སུ་འཁོར་བའི་སྒོ་དེ་མཐོང་སྟེ། དེས་རྩིག་པའི་ཀ་བ་དང་སྒོ་ཁྱམས་ཚད་པ་ན་ཆེ་ཆུང་སྔོན་དང་འདྲའོ།།
[25] སྒོའི་ནང་ཕྱོགས་དང་སྒོ་ཁྱམས་ཀྱི་མཐའ་སྐོར་དུ་སྒེའུ་ཁུང་ཡོད་པ་དང་། དེ་ཡང་སྔོན་གྱི་སྒེའུ་ཁུང་དང་གཅིག་ཡིན་ནོ།། ལྷོ་སྒོའི་རིང་ཚད་ཡོངས་ལ་ཁྲུ་ཉེར་ལྔ་ཡོད་པ་དང་། ཞེང་ལ་ཁྲུ་བཅུ་གཉིས་དང་ཕྱེད་ཀ་ཡོད།
[26] མི་རིམ་པ་བདུན་གྱི་རྡོ་སྐས་ལ་འཛེག་ན་ད་གཟོད་སྒོ་ཁ་འདིར་བསླེབ་ཐུབ་པ་དང་། མདུན་གྱི་མུ་མཐའ་རུ་སྒོ་ཁྱམས་ཡིན། རྩིག་པའི་ཀ་བའི་སྟེང་དུ་ཕྱོགས་གཉིས་སུ་ཏ་ལ་བརྐོས་ཡོད་པ་ཡིན།
[27] ནང་ཁྱམས་ཀྱི་ལྷོ་ཕྱོགས་སུའང་སྒོ་ཡོད་པ་དང་། དེས་སྒོ་འདི་ནས་ལྷོ་སྒོ་བར་དུ་ཚད་པ་ན་བསྡོམས་པས་ཁྲུ་ལྔ་བཅུ་ཡོད་དོ།།
[28] དེས་ང་ནང་ཁྱམས་ཀྱི་ལྷོ་སྒོ་ནས་ནང་ཁྱམས་སུ་ཁྲིད་ནས། སྒོ་དེ་ཚད་པ་ན་ཆེ་ཆུང་སྔོན་དང་མཚུངས་སོ།།
[29] སྒོ་སྲུང་གི་ཁང་པ་དང་། རྩིག་པའི་ཀ་བ་དང་། སྒོ་ཁྱམས་ཀྱི་རིང་ཐུང་སྔོན་དང་གཅིག་སྟེ།
[30] སྒོའི་ནང་དང་སྒོ་ཁྱམས་ཀྱི་མཐའ་སྐོར་དུ་སྒེའུ་ཁུང་ཡོད་དེ། སྒོ་དེའི་རིང་ཚད་ཡོངས་ལ་ཁྲུ་ཉེར་ལྔ་ཡོད་པ་དང་། ཞེང་ལ་ཁྲུ་བཅུ་གཉིས་དང་ཕྱེད་ཀ་ཡོད།
[31] སྒོ་ཁྱམས་དེ་ཁྱམས་ཕྱི་མའི་ཕྱོགས་སུ་འཁོར་ཡོད་དེ། རྩིག་པའི་ཀ་བ་སྟེང་དུ་ཏ་ལ་བརྐོས་ཡོད་པ་དང་། རྡོ་སྐས་ལ་རིམ་པ་བརྒྱད་ཡོད་དོ།།
[32] དེས་ང་ནང་ཁྱམས་ཀྱི་ཤར་སྒོ་རུ་ཁྲིད་ནས། དེས་སྒོ་དེ་ཚད་པ་ན་ཆེ་ཆུང་སྔོན་དང་མཚུངས་པ་དང་།
[33] སྒོ་སྲུང་གི་ཁང་པ་དང་། རྩིག་པའི་ཀ་བ་དང་། སྒོ་ཁྱམས་ཀྱི་རིང་ཐུང་སྔོན་དང་གཅིག་སྟེ། སྒོའི་ནང་དང་སྒོ་ཁྱམས་ཀྱི་མཐའ་སྐོར་དུ་སྒེའུ་ཁུང་ཡོད་དེ། སྒོ་དེའི་རིང་ཚད་ཡོངས་ལ་ཁྲུ་ཉེར་ལྔ་ཡོད་པ་དང་། ཞེང་ལ་ཁྲུ་བཅུ་གཉིས་དང་ཕྱེད་ཀ་ཡོད།
[34] སྒོ་ཁྱམས་དེ་ཁྱམས་ཕྱི་མའི་ཕྱོགས་སུ་འཁོར་ཡོད་དེ། རྩིག་པའི་ཀ་བ་སྟེང་དུ་ཕྱོགས་གཉིས་སུ་ཏ་ལ་བརྐོས་ཡོད་པ་དང་། རྡོ་སྐས་ལ་རིམ་པ་བརྒྱད་ཡོད་དོ།།
[35] དེས་ང་ནང་ཁྱམས་ཀྱི་བྱང་སྒོ་རུ་ཁྲིད་ནས། སྒོ་དེ་ཚད་པ་ན་ཆེ་ཆུང་སྔོན་དང་མཚུངས་སོ།།
[36] སྒོ་སྲུང་གི་ཁང་པ་དང་། རྩིག་པའི་ཀ་བ་དང་སྒོ་ཁྱམས་བཅས་ཐམས་ཅད་མཚུངས་ཏེ། སྒོའི་ནང་དང་མཐའ་སྐོར་དུ་སྒེའུ་ཁུང་ཡོད་དེ། སྒོ་དེའི་རིང་ཚད་ཡོངས་ལ་ཁྲུ་ཉེར་ལྔ་ཡོད་པ་དང་། ཞེང་ལ་ཁྲུ་བཅུ་གཉིས་དང་ཕྱེད་ཀ་ཡོད།
[37] སྒོ་ཁྱམས་དེ་ཁྱམས་ཕྱི་མའི་ཕྱོགས་སུ་འཁོར་ཡོད་དེ། རྩིག་པའི་ཀ་བ་སྟེང་དུ་ཕྱོགས་གཉིས་སུ་ཏ་ལ་བརྐོས་ཡོད་པ་དང་། རྡོ་སྐས་ལ་རིམ་པ་བརྒྱད་ཡོད་དོ།།
[38] ཡང་སྒོ་རྣམས་ཀྱི་རྩིག་པའི་ཀ་བའི་འགྲམ་དུ་སྒོ་ཡོད་པའི་ཁང་པ་ཞིག་ཡོད་པ་དང་། དེ་ནི་སྦྱིན་སྲེག་གི་མཆོད་པའི་མཛད་སྒོ་སྤེལ་ཕྱིར་ཕྱུགས་ཟོག་བཀྲུ་བྱེད་ཀྱི་གནས་ཏེ།
[39] སྒོ་ཁྱམས་ཀྱི་ནང་དུ། གཡས་ཕྱོགས་སུ་ཅོག་ཙེ་གཉིས་དང་། གཡོན་ཕྱོགས་སུ་ཅོག་ཙེ་གཉིས་ཡོད་པ་དང་། ཐོག་ཏུ་སྦྱིན་སྲེག་གི་མཆོད་པ་འབུལ་བྱེད་ཀྱི་ཕྱུགས་ཟོག་དང་། མིའི་སྡིག་བཤགས་དང་སྡིག་སེལ་གྱི་ཕྱིར་དུ་མཆོད་པ་འབུལ་བའི་ཕྱུགས་ཟོག་རྣམས་ཀྱང་བཤའ་ཆོག
[40] ཤར་སྒོ་ལ་འཇུག་པའི་རྡོ་སྐས་ཀྱི་ཕྱི་རོལ་ལ་ཁ་གཏད་པའི་གནས་སུ་ཅོག་ཙེ་གཉིས་ཡོད་པ་དང་། སྒོ་ཁྱམས་ལ་ཁ་གཏད་པའི་ཕྱོགས་སུའང་ཅོག་ཙེ་གཉིས་ཡོད།
[41] ཕྱུགས་ཟོག་བཤའ་བའི་ཕྱིར་དུ། སྒོ་ཆེན་གྱི་ཁར་གཡས་ཕྱོགས་སུ་ཅོག་ཙེ་བཞི་དང་། གཡོན་ཕྱོགས་སུ་ཅོག་ཙེ་བཞི་སྟེ་བསྡོམས་པས་ཅོག་ཙེ་བརྒྱད་ཡོད།
[42] གཞན་ཅོག་ཙེ་བཞི་ཡོད་པ་ནི་སྦྱིན་སྲེག་གི་མཆོད་པའི་མཛད་སྒོ་སྤེལ་ཕྱིར་ཡིན་པ་དང་། དེ་ནི་རྡོ་བརྐོས་མས་བཟོས་ཏེ། རིང་ཚད་ལ་ལི་ཁྲུ་བདུན་བཅུ་དོན་ལྔ་དང་། ཞེང་ལ་ལི་ཁྲུ་བདུན་བཅུ་དོན་ལྔ་དང་། མཐོ་ཚད་ལ་ལི་ཁྲུ་ལྔ་བཅུ་ཡོད་པ་དང་། སྤྱིན་སྲེག་གི་ཕྱུགས་ཟོག་བཤའ་བ་དང་ཕྱུགས་ཟོག་གཞན་བཤའ་དུས་སྤྱོད་པའི་སྣོད་ཆས་རྣམས་དེར་བཞག་གོ །
[43] ཕྱོགས་བཞིའི་རྩིག་ངོས་སུ་ལྕགས་ཀྱུ་རྣམས་བརྡབ་ཡོད་པ་དང་། དེ་རེ་རེའི་རིང་ཚད་ལ་ལི་སྨི་བདུན་དང་ཕྱེད་ཀ་ཡོད་དོ།། ཡང་ཅོག་ཙེ་ཐོག་ཏུ་མཆོད་པའི་མཛད་སྒོ་སྤེལ་བྱེད་ཀྱི་ཤ་རྣམས་བཞག་པ་ཡིན།
[44] ནང་ཁྱམས་ཀྱི་སྒོའི་ཕྱི་རོལ་དུ་ཁང་པ་གཉིས་ཡོད་དེ། གཅིག་ནི་བྱང་སྒོའི་འགྲམ་དུ་ལྷོ་ཕྱོགས་སུ་འཁོར་ཡོད་པ་དང་། ཅིག་ཤོས་ནི་ལྷོ་སྒོའི་འགྲམ་དུ་བྱང་ཕྱོགས་སུ་འཁོར་ཡོད།
[45] དེ་ནས་ཁོས་ང་ལ་ན་རེ། ལྷོ་ཕྱོགས་སུ་འཁོར་བའི་ཁང་པ་འདི་ནི་མཆོད་ཁང་གི་བྱ་བར་འགན་ཁུར་བའི་མཆོད་དཔོན་རྣམས་ཀྱི་ཕྱིར་དུ་བཀོད་པ་ཡིན་ཏེ།
[46] བྱང་ཕྱོགས་སུ་འཁོར་བའི་ཁང་པ་དེ་ནི་མཆོད་ཁྲིའི་བྱ་བ་ལ་འགན་ཁུར་བའི་མཆོད་དཔོན་རྣམས་ཀྱི་ཕྱིར་དུ་བཀོད་པ་ཡིན་ཏེ། མཆོད་དཔོན་འདི་ཐམས་ཅད་ནི་ཟཱ་ཏོག་གི་བུ་རྒྱུད་ཡིན་པ་དང་། ལེ་ཝི་པའི་ཁྲོད་ལས་ཁོ་ཚོས་གཙོ་བོ་ཡ་ཝཱེའི་སྤྱན་སྔར་ཞབས་ཕྱི་བསྒྲུབས་པ་ཡིན།
[47] ཡང་དེས་ནང་ཁྱམས་ཚད་པ་ན་རིང་ཐུང་ལ་ཁྲུ་ལྔ་བཅུ་དང་། ཞེང་ལ་ཁྲུ་ལྔ་བཅུ་ཡོད་པའི་གྲུ་བཞི་ཅན་ཞིག་ཡིན་པ་དང་། མཆོད་ཁྲི་ནི་མཆོད་ཁང་གི་མདུན་དུ་ཡོད།
[48] དེ་ནས་ཁོས་ང་མཆོད་ཁང་གི་བར་ཁྱམས་སུ་ཁྲིད་དེ། སྒོ་ཁྱམས་ཀྱི་རྩིག་པའི་ཀ་བ་ཚད་པ་ན་གཡས་ཀྱི་མཐུག་ཚད་ལ་ཁྲུ་གཉིས་དང་ཕྱེད་ཀ་དང་། གཡོན་གྱི་མཐུག་ཚད་ལའང་ཁྲུ་གཉིས་དང་ཕྱེད་ཀ་ཡོད་པ་ཡིན། སྒོ་ཁའི་ཞེང་ལ་ཁྲུ་བདུན་དང་། སྒོ་ནང་གི་རྩིག་པར་གཡས་ལ་ཁྲུ་གཅིག་དང་ཕྱེད་ཀ་སྟེ། གཡོན་ལ་ཁྲུ་གཅིག་དང་ཕྱེད་ཀ་ཡོད་དོ།།
[49] ཡང་སྒོ་ཁྱམས་ཀྱི་ཞེང་ལ་ཁྲུ་བཅུ་དང་། གཏིང་ཚད་ལ་ཁྲུ་དྲུག་ཡོད་དེ། མི་རྡོ་སྐས་ལ་འཛེག་ན་ད་གཟོད་སྒོ་ཁྱམས་སུ་བསླེབ་ཐུབ་པ་དང་། རྩིག་པའི་འགྲམ་དུ་ཀ་བ་གཉིས་ཕྱོགས་གཉིས་སུ་ཡོད་དོ།།