[1] དེ་ནས་ཁོས་ང་ཤར་སྒོ་རུ་ཁྲིད་པ་ན།
[2] ལྟོས་ཤིག ཡེས་ར་ཨེལ་དཀོན་མཆོག་གི་གཟི་བརྗིད་དེ་ཤར་ཕྱོགས་ནས་འོངས་ཏེ། ཁོང་གི་གསུངས་སྐད་ནི་ཆུ་ལོག་གི་འུར་སྒྲ་བཞིན་དང་། ཁོང་གི་གཟི་བརྗིད་ཀྱི་ཕྱིར་དུ་ས་གཞི་ལས་འོད་འཕྲོས་སོ།།
[3] ངས་མཐོང་བའི་ཞལ་གཟིགས་དེ་ནི། ཁོང་ཉིད་ཕེབས་ནས་གྲོང་ཁྱེར་དེ་གཏོར་བའི་དུས་སུ་མཐོང་བའི་ཞལ་གཟིགས་དང་མཚུངས་ཤིང་། ཡང་ངས་ཀེ་བར་གཙང་འགྲམ་དུ་མཐོང་བའི་ཞལ་གཟིགས་དང་འདྲ་བས་ང་ཁ་བུབ་ནས་བསྡད་དེ།
[4] གཙོ་བོ་ཡ་ཝཱེའི་གཟི་བརྗིད་ནི་ཤར་སྒོ་ལས་ཕོ་བྲང་ནང་དུ་ཕེབས་སོ།།
[5] དེ་ནས་ཐུགས་ཉིད་ཀྱིས་ང་ཡར་བཀྱགས་ཏེ། ང་རང་ནང་ཁྱམས་དུ་ཁྲིད་པ་ན། གཙོ་བོ་ཡ་ཝཱེའི་གཟི་བརྗིད་ཕོ་བྲང་ནང་དུ་ཁེངས་ཡོད་པ་ངས་མཐོང་ངོ་།
[6] མི་དེ་ངའི་འགྲམ་དུ་ལངས་བསྡད་པའི་སྐབས་སུ། ཕོ་བྲང་ལས་གཙོ་བོས་ང་ལ་བཀའ་གསུངས་པ་ངས་ཐོས་ཏེ།
[7] ཁོང་གིས་ང་ལ་འདི་སྐད་དུ། ཀྱེ་མིའི་བུ། འདི་ནི་ངའི་བཞུགས་ཁྲི་ཡོད་ས་དང་། ངའི་ཞབས་སྟེགས་ཀྱི་གནས་དེ་ཡིན་པས། ང་གནས་དེ་རུ་བཞུགས་ཏེ་ཡེས་ར་ཨེལ་པ་རྣམས་ཀྱི་ནང་དུ་ཇི་སྲིད་བར་དུ་གནས་བར་འགྱུར་ལ། ད་ཕྱིན་ཆད་ཡེས་ར་ཨེལ་གྱི་ཁྱིམ་རྒྱུད་དང་དེ་དག་གི་རྒྱལ་པོ་རྣམས་ཀྱིས་རང་ཉིད་ཀྱི་ལོག་གཡེམ་དང་། རྒྱལ་པོ་རྣམས་ཀྱི་མཐོ་གླིང་གི་རྡོ་རིང་གིས་ངའི་མཚན་དམ་པ་བརླག་པར་མི་འགྱུར་ཏེ།
[8] དེ་དག་གི་སྒོ་ཐེམ་ངའི་སྒོ་ཐེམ་དང་ཐག་ཉེ་ཞིང་། དེ་དག་གི་སྒོ་ལྡང་ངའི་སྒོ་ལྡང་དང་ཐག་ཉེ་ཞིང་། དེ་དག་དང་ངའི་བར་ན་རྩིག་པ་གཅིག་མ་གཏོགས་མེད་པའི་དུས་སུ། དེ་དག་གིས་རང་གིས་སྤྱད་པའི་ཞེན་ལོག་གི་ལས་ཀྱིས་ངའི་མཚན་དམ་པ་བརླགས་པས། ངས་ཐུགས་ཁྲོའི་ནང་དུ་དེ་དག་རྩ་མེད་དུ་བཏང་བ་ཡིན།
[9] ད་ལྟ་ཁོ་ཚོས་ངའི་མདུན་དུ་རང་གི་ལོག་གཡེམ་དང་ཁོ་ཚོའི་རྒྱལ་པོ་དག་གི་རྡོ་རིང་རྣམས་མེད་པར་བཟོས་ན། ཇི་སྲིད་བར་དུ་ང་ཁོ་ཚོའི་ནང་དུ་བཞུགས་པར་འགྱུར་རོ།།
[10] ཀྱེ་མིའི་བུ་ཁྱོད་ཀྱིས་ཕོ་བྲང་འདི་ཡེས་ར་ཨེལ་གྱི་ཁྱིམ་རྒྱུད་ལ་བསྟན་ཏེ། ཁོ་རྣམས་རང་གི་སྡིག་པའི་ཕྱིར་དུ་ངོ་ཚ་བར་གྱུར་ཞིག་དང་། ཡང་ཁོ་ཚོར་མཆོད་ཁང་གི་རིང་ཐུང་ཚད་དུ་གཞུག་ཅིག
[11] ཁོ་ཚོ་རང་གིས་སྤྱད་པའི་ལས་ཀྱི་ཕྱིར་དུ་ངོ་ཚ་བར་གྱུར་ན། ཁྱོད་ཀྱིས་ཕོ་བྲང་གི་ཇུས་འགོད་དང་། སྒྲིག་གཞི་དང་། ནང་འཇུག་དང་ཕྱིར་ཐོན་གྱི་གནས་དང་། ད་དུང་ཇུས་འགོད་ཡོངས་དང་། ལམ་སྲོལ་དང་། གུས་ལུགས་དང་། བཀའ་ཁྲིམས་སོགས་དེ་དག་ལ་སྟོན་ཞིག ཡང་དེ་དག་གི་མིག་མདུན་དུ་ཡི་གེར་བཀོད་དེ། གཙང་ཁང་གི་ཇུས་འགོད་ཡོངས་དང་ལམ་སྲོལ་བཞིན་དུ་དེ་དག་ལ་སྤྱོད་པར་གྱུར་ཞིག
[12] གཙང་ཁང་གི་བཀའ་ཁྲིམས་ནི་འདི་ལྟ་སྟེ། གཙང་ཁང་གི་རི་རྩེའི་མཐའ་འཁོར་གྱི་ས་མཚམས་ཀུན་དམ་པར་བརྩིས་པ་ནི་གཙང་ཁང་གི་བཀའ་ཁྲིམས་ཡིན་ཞེས་གསུངས་སོ།།
[13] མཆོད་ཁྲིའི་རིང་ཐུང་ནི། སྟེགས་བུ་ལ་ལི་ཁྲུ་ལྔ་བཅུ་དང་། མཐའི་ཞེང་ལ་ལི་སྨི་ཁྲུ་བཅུ་ཡོད་དེ། ཕྱོགས་བཞི་རུ་མཐའ་ཡོད་པའི་མཐོ་ཚད་ལ་ལི་ཁྲུ་ཉེར་ལྔ་ཡོད་པ་འདི་ནི་མཆོད་ཁྲིའི་སྟེགས་བུ་ཡིན་ནོ།།
[14] སྟེགས་བུ་ནས་འོག་རིམ་གྱི་ཁྲི་སྟེགས་བར་དུ། མཐོ་ཚད་ལ་ཁྲུ་གཅིག་དང་། མཐའ་ཡི་ཞེང་ལ་ལི་སྨི་ལྔ་བཅུ་ཡོད་དེ། ཁྲི་སྟེགས་ཆུང་པ་ནས་ཆེ་པའི་བར་དུ་མཐོ་ཚད་ལ་ཁྲུ་གཉིས་དང་། མཐའ་ཡི་ཞེང་ལ་ལི་སྨི་ལྔ་བཅུ་ཡོད་དོ།།
[15] མཆོད་ཁྲིའི་མཆོད་རྫས་བཤམས་སའི་མཐོ་ཚད་ལ་ཁྲུ་གཉིས་དང་། མཆོད་རྫས་བཤམས་ས་ནས་ཟུར་བཞི་ཕྱི་རུ་འབུར་ཡོད་པ་ཡིན།
[16] མཆོད་རྫས་བཤམས་སའི་རིང་ཐུང་ལ་ཁྲུ་དྲུག་དང་། ཞེང་ལ་ཁྲུ་དྲུག་ཡོད་དེ། ཕྱོགས་བཞིའི་དབྱིབས་གྲུ་བཞི་ཡིན།
[17] ཁྲི་སྟེགས་ཆེ་པའི་རིང་ཐུང་ལ་ཁྲུ་བདུན་དང་། ཞེང་ལ་ཁྲུ་བདུན་ཡོད་དེ། ཕྱོགས་བཞིའི་དབྱིབས་གྲུ་བཞི་ཡིན་ལ། མཐའ་བཞིའི་མཐོ་ཚད་ལ་ལི་ཁྲུ་ཉེར་ལྔ་ཡོད་པ་དང་། སྟེགས་བུའི་ཕྱོགས་བཞིའི་མཐའ་ཡི་ཞེང་ལ་ལི་ཁྲུ་ལྔ་བཅུ་ཡོད། ཡང་སྐས་རྐང་ནི་ཤར་ཕྱོགས་སུ་འཁོར་ཡོད་པ་ཡིན།
[18] དེས་ང་ལ་ན་རེ། ཀྱེ་མིའི་བུ། གཙོ་བོ་ཡ་ཝཱེས་འདི་སྐད་དུ། མཆོད་ཁྲིའི་ལམ་སྲོལ་འདི་ལྟ་སྟེ། མཆོད་ཁྲི་བཞེངས་ཤིང་ཐོག་ཏུ་སྦྱིན་སྲེག་གི་མཆོད་པའི་མཛད་སྒོ་སྤེལ་བ་དང་། ཁྲག་གཏོར་བའི་དུས་སུ།
[19] ང་དང་བློ་ཉེ་བ་དང་། ང་ལ་ཞབས་ཕྱི་སྒྲུབ་པའི་ལེ་ཝི་པའི་མཆོད་དཔོན་ཏེ་ཟཱ་ཏོག་གི་བརྒྱུད་པ་ལ། སྡིག་བཤགས་ཀྱི་མཆོད་པའི་དོན་དུ་ཁྱོད་ཀྱིས་གླང་དར་མ་ཞིག་བྱིན་ཞིག་ཅེས་གཙོ་བོ་ཡ་ཝཱེས་གསུངས་པ་དང་།
[20] དེ་ནས་ཁྱོད་ཀྱིས་གླང་དར་མའི་ཁྲག་ཅུང་ཙམ་བླངས་ཏེ། མཆོད་ཁྲིའི་ཕྱོགས་བཞིའི་ཁྲི་སྟེགས་ཀྱི་ཟུར་བཞི་དང་། ཕྱོགས་བཞིའི་འབུར་ཡོད་པའི་མཐའ་རུ་སྐུས་ཤིག འདི་ལྟར་དུ་ཁྱོད་ཀྱིས་མཆོད་ཁྲི་གཙང་བར་བཅུག་ན་དེ་གཙང་བར་འགྱུར་རོ།།
[21] ཡང་ཁྱོད་ཀྱིས་སྡིག་བཤགས་ཀྱི་མཆོད་པར་འབུལ་བའི་གླང་དར་མ་དེ། གཏན་འཁེལ་བྱས་པའི་གནས་ཏེ་གནས་མཆོག་དམ་པའི་ཕྱི་རོལ་དུ་སྲེགས་ཤིག
[22] མཆོད་ཁྲི་གཙང་མར་མཛད་པ་དང་། གླང་དར་མས་མཆོད་ཁྲི་གཙང་བར་མཛད་པ་བཞིན་དུ། དེའི་ཕྱི་ཉིན་ཁྱོད་ཀྱིས་སྐྱོན་མེད་པའི་ར་ཕོ་ཞིག་སྡིག་བཤགས་ཀྱི་མཆོད་པར་ཕུལ་ཞིག་དང་།
[23] ཁྱོད་ཀྱིས་མཆོད་ཁྲི་གཙང་མར་མཛད་རྗེས་སྐྱོན་མེད་པའི་གླང་དར་མ་ཞིག་དང་། ལུག་ཁྱུ་ལས་སྐྱོན་མེད་པའི་ལུག་ཐུག་ཅིག་བླངས་ཏེ་ཕུལ་ཞིག
[24] ཁྱོད་ཀྱིས་དེ་དག་ཡ་ཝཱེའི་ཞལ་ངོར་ཕུལ་ཞིག་དང་། མཆོད་དཔོན་རྣམས་ཀྱིས་དེ་ཐོག་ཏུ་ཚྭ་གཏོར་ཞིང་། སྦྱིན་སྲེག་གི་མཆོད་པར་ཡ་ཝཱེ་ལ་ཕུལ་ཞིག
[25] ཁྱོད་ཀྱིས་ཞག་བདུན་ཉིན་རེ་བཞིན་སྡིག་བཤགས་ཀྱི་མཆོད་པའི་ཕྱིར་ར་ཐུག་ཅིག་དང་། གླང་དར་མ་ཞིག་དང་ལུག་ཁྱུ་ལས་ལུག་ཐུག་ཅིག་གྲ་སྒྲིག་བྱོས་དང་། ཐམས་ཅད་སྐྱོན་མེད་པ་ཡིན་དགོས།
[26] ཉིན་ཞག་བདུན་ལ་མཆོད་དཔོན་རྣམས་ཀྱིས་མཆོད་ཁྲི་གཙང་བར་མཛད་ན། མཆོད་ཁྲི་གཙང་བར་འགྱུར་ཞིང་། དེ་བཞིན་དུ་ཁོ་ཚོས་མཆོད་ཁྲི་དམ་པར་མཚད་པ་ཡིན།
[27] ཉིན་བདུན་ཚང་རྗེས་ཀྱི་ཉིན་བརྒྱད་པ་ནས་བཟུང་། མཆོད་དཔོན་རྣམས་ཀྱིས་མཆོད་ཁྲི་སྟེང་དུ་རང་གི་སྦྱིན་སྲེག་དང་ཞི་བདེའི་མཆོད་པའི་མཛད་སྒོ་སྤེལ་དགོས་པ་དང་། དུས་དེར་ངས་དགའ་མགུ་ངང་ཁྱོད་རྣམས་དང་དུ་ལེན་ནོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།