[1] གཙོ་བོ་ཡ་ཝཱེས་འདི་སྐད་དུ། ལས་བྱེད་པའི་ཉིན་དྲུག་གི་ནང་དུ། ནང་ཁྱམས་ཀྱི་ཤར་སྒོ་དེ་ངེས་པར་དུ་རྒྱག་དགོས་ཏེ། ཡིན་ཡང་ངལ་གསོ་བའི་ཉིན་ལ་སྒོ་འབྱེད་དགོས་པ་དང་། ཟླ་མཇུག་གི་དུས་སུའང་སྒོ་འབྱེད་དགོས།
[2] རྒྱལ་པོ་ནི་ཕྱི་རོལ་ནས་སྒོ་དེའི་སྒོ་ཁྱམས་བརྒྱུད་དེ་ནང་དུ་ཕྱིན་ཏེ་སྒོ་ལྡང་འགྲམ་དུ་འགྲེང་འདུག་དགོས་པ་དང་། མཆོད་དཔོན་རྣམས་ཀྱིས་ཁོང་གི་ཕྱིར་དུ་སྦྱིན་སྲེག་དང་ཞི་བདེའི་མཆོད་པ་རྣམས་གྲ་སྒྲིག་བྱེད་དགོས་ཏེ། ཡང་ཁོང་གིས་སྒོ་ཐེམ་ཁར་ཕྱག་འཚལ་ནས་ཕྱི་རོལ་དུ་འགྲོ་དགོས་པ་དང་། སྒོ་འདི་ནི་དགོང་མོ་བར་དུ་རྒྱག་བར་མི་བྱའོ།།
[3] ངལ་གསོ་བའི་དུས་དང་ཟླ་མཇུག་ལ། ཡུལ་ཁམས་ཀྱི་མི་སྡེ་ཀུན་གྱིས་སྒོ་ཁར་ཡ་ཝཱེའི་དྲུང་དུ་ཕྱག་འཚལ་དགོས་ཏེ།
[4] ངལ་གསོ་བའི་དུས་སུ་རྒྱལ་པོས་ཡ་ཝཱེར་ཕུལ་བའི་སྦྱིན་སྲེག་གི་མཆོད་པ་ནི་སྐྱོན་མེད་པའི་ལུ་གུ་དྲུག་དང་སྐྱོན་མེད་པའི་ལུག་ཐུག་གཅིག་ཡིན་ཞིང་།
[5] དེས་ཕུལ་བའི་དཀར་མཆོད་ནི་འདི་ལྟ་སྟེ། ལུག་ཐུག་ནི་ཕྱེ་སྤྱི་བྲེ་བཅུ་བདུན་དང་མཉམ་དུ་ཕུལ་བ་དང་། དེས་རང་གི་ནུས་པ་བཞིན་དུ་ལུ་གུ་དེ་དག་དང་མཉམ་དུ་བགོ་སྐལ་ལྟར་ཕྱེ་ཡང་ཕུལ་དགོས་ཏེ། ཡིན་ཡང་བགོ་སྐལ་གཅིག་གི་ཕྱེའི་ནང་དུ་སྣུམ་སྤྱི་བྲེ་གསུམ་བླུག་དགོས།
[6] ཡང་དེས་ཟླ་མཇུག་ཏུ་སྐྱོན་མེད་པའི་གླང་དར་མ་ཞིག་དང་། ལུ་གུ་དྲུག་དང་ལུག་ཐུག་གཅིག་ཕུལ་དགོས་ཏེ། ཐམས་ཅད་སྐྱོན་མེད་པ་ཡིན་ནོ།།
[7] དེས་དཀར་མཆོད་ཀྱི་རྫས་གྲ་སྒྲིག་བྱེད་དགོས་ཏེ། གླང་དར་མ་དེ་ཕྱེ་སྤྱི་བྲེ་བཅུ་བདུན་དང་མཉམ་དུ་ཕུལ་བ་དང་། ལུག་ཐུག་ནི་ཕྱེ་སྤྱི་བྲེ་བཅུ་བདུན་དང་མཉམ་དུ་ཕུལ་བ་དང་། དེས་རང་གི་ནུས་པ་བཞིན་དུ་ལུ་གུ་དེ་དག་དང་མཉམ་དུ་བགོ་སྐལ་ལྟར་ཕྱེ་ཡང་ཕུལ་དགོས་ཏེ། ཡིན་ཡང་བགོ་སྐལ་གཅིག་གི་ཕྱེའི་ནང་དུ་སྣུམ་སྤྱི་བྲེ་གསུམ་བླུག་དགོས།
[8] རྒྱལ་པོ་ནང་དུ་འགྲོ་དུས་སུ། སྒོ་འདིའི་སྒོ་ཁྱམས་བརྒྱུད་དེ་འཛུལ་དགོས་པ་དང་། ཡང་ལམ་དེ་ནས་ཕྱིར་འགྲོ་དགོས་སོ།།
[9] གཏན་འཁེལ་བྱས་པའི་དུས་ཆེན་གྱི་ནང་དུ། ཡུལ་ཁམས་ཀྱི་མི་སྡེ་རྣམས་ཡ་ཝཱེའི་དྲུང་དུ་འོང་དུས་སུ། བྱང་སྒོ་ནས་ཕྱག་འཚལ་དུ་འོངས་པ་རྣམས་ལྷོ་སྒོ་ནས་ཕྱིར་འབུད་དགོས་པ་དང་། ལྷོ་སྒོ་ནས་འོངས་པ་རྣམས་བྱང་སྒོ་བརྒྱུད་དེ་ཕྱིར་འབུད་དགོས་ཏེ། མི་སུ་ཞིག་ཀྱང་རང་ཉིད་ནང་དུ་འོངས་པའི་སྒོ་དེ་ལས་ཕྱིར་འབུད་མི་རུང་བར། ཁ་གཏད་པའི་སྒོ་ལས་ཕྱིར་འབུད་དགོས་པ་ཡིན།
[10] རྒྱལ་པོ་མི་སྡེའི་ནང་དུ། མི་སྡེ་ནང་དུ་འགྲོ་དུས་ཁོང་ཡང་མཉམ་དུ་འགྲོ་དགོས་ཏེ། མི་སྡེ་ཕྱིར་འབུད་དུས་ཁོང་ཡང་ཕྱིར་འབུད་དགོས།
[11] གཏན་འཁེལ་བྱས་པའི་དུས་ཆེན་གྱི་ནང་དུ། དཀར་མཆོད་ནི་འདི་ལྟར་ཕུལ་དགོས་ཏེ། གླང་དར་མ་རེ་ཕྱེ་སྤྱི་བྲེ་བཅུ་བདུན་དང་མཉམ་དུ་ཕུལ་བ་དང་། ལུག་ཐུག་རེའང་ཕྱེ་སྤྱི་བྲེ་བཅུ་བདུན་དང་མཉམ་དུ་ཕུལ་དགོས་ལ། ལུ་གུ་རེ་ནི་རང་ཉིད་ཀྱི་ནུས་པ་བཞིན་དུ་ཕྱེ་དང་མཉམ་དུ་ཕུལ་དགོས་པ་དང་། ཕྱེ་བགོ་སྐལ་སྤྱི་བྲེ་གཅིག་གི་ནང་དུ་སྣུམ་སྤྱི་བྲེ་གསུམ་བླུག་དགོས་པ་ཡིན།
[12] རྒྱལ་པོས་ཕུལ་འདོད་པའི་སྦྱིན་སྲེག་དང་ཞི་བདེའི་མཆོད་པ་ཡ་ཝཱེར་ཕུལ་དུས་སུ། ཤར་ཕྱོགས་ཀྱི་སྒོ་དེ་ཁོང་གི་ཆེད་དུ་འབྱེད་དགོས་ཤིང་། དེ་ནས་ཁོང་གིས་ངལ་གསོ་བའི་ཉིན་ལ་མཆོད་པ་ཕུལ་བ་བཞིན་དུ། རང་གི་སྦྱིན་སྲེག་དང་ཞི་བདེའི་མཆོད་པ་ཕུལ་ཏེ། ཁོང་གིས་མཆོད་པ་ཕུལ་རྗེས་ཕྱིར་འགྲོ་བ་དང་། ཁོང་ཕྱིར་སོང་རྗེས་སྒོ་ཡང་བརྒྱབ་པ་ཡིན་ནོ།།
[13] ཉི་མ་རེ་རེར་ཁྱོད་ཀྱིས་སྐྱོན་མེད་པའི་ལོ་གཅིག་ཅན་གྱི་ལུ་གུ་ཞིག་གྲ་སྒྲིག་བྱས་ཏེ་ཡ་ཝཱེ་ལ་སྦྱིན་སྲེག་གི་མཆོད་པར་ཕུལ་དགོས་ཏེ། ཞོགས་པ་རེ་རེར་དེ་ལྟར་ཕུལ་དགོས།
[14] ཡང་ཞོགས་པ་རེ་རེ་ལ་མཉམ་དུ་ཕུལ་བའི་དཀར་མཆོད་ཀྱང་གྲ་སྒྲིག་བྱ་དགོས་ཏེ། གྲོ་ཞིབ་སྤྱི་བྲེ་གཉིས་ནི་དེ་བརྫི་བྱེད་ཀྱི་སྣུམ་སྤྱི་བྲེ་གཅིག་དང་བཅས་སུ། ཡ་ཝཱེ་ལ་རྒྱུན་དུ་ཕུལ་བའི་དཀར་མཆོད་དུ་བྱ་སྟེ། འདི་ནི་གཏན་གྱི་རྒྱུན་སྲོལ་ཡིན་པས།
[15] ཞོགས་པ་རེ་རེར་འདི་ལྟར་ལུ་གུ་དང་། དཀར་མཆོད་དང་སྣུམ་བཅས་གྲ་སྒྲིག་བྱས་ཏེ་རྒྱུན་དུ་ཕུལ་བའི་སྦྱིན་སྲེག་གི་མཆོད་པར་བྱའོ་ཞེས་གསུངས་སོ།།
[16] ཡང་གཙོ་བོ་ཡ་ཝཱེས་འདི་སྐད་དུ། ཇི་སྟེ་རྒྱལ་པོས་ལེགས་སྐྱེས་སུ་རང་གི་ནོར་སྐལ་ལས་ཆ་ཞིག་ཉིད་ཀྱི་བུ་ཞིག་ལ་གནང་ན། ནོར་སྐལ་དེ་ནི་དེའི་བུ་རྒྱུད་རྣམས་ལ་དབང་ཞིང་། དེ་ནི་ཁོ་ཚོས་དང་ལེན་བྱ་བའི་ནོར་སྐལ་ཏོ།།
[17] ཇི་སྟེ་རྒྱལ་པོས་ལེགས་སྐྱེས་སུ་རང་གི་ནོར་སྐལ་ལས་ཆ་ཞིག་ཉིད་ཀྱི་བློན་ཞིག་ལ་གནང་ན། ཁོ་ཐར་བའི་ལོ་བར་དུ་ནོར་སྐལ་བློན་དེ་ལ་དབང་ཞིང་། དེ་ནས་རྒྱལ་པོར་ཕྱིར་སྤྲོད་དགོས་པ་དང་། རྒྱལ་པོའི་ནོར་སྐལ་ནི་མཐར་རང་གི་བུ་ལ་དབང་དགོས།
[18] རྒྱལ་པོས་མི་སྡེའི་ནོར་སྐལ་འཕྲོག་ནས། དེ་རྣམས་རང་གི་ནོར་སྐལ་ལས་ཕྱིར་བསྐྲད་མི་རུང་སྟེ། ངའི་མི་སྡེ་རྣམས་རང་གི་ནོར་སྐལ་ལས་ཕྱིར་བསྐྲད་པའི་ཕྱིར་དུ་ཁ་འཐོར་ལ་མི་འགྲོ་ཆེད་དུ། ཁོང་གིས་རང་གི་ནོར་སྐལ་ལས་རང་གི་བུ་རྣམས་ལ་ས་སྐལ་སྦྱིན་པར་བྱའོ་ཞེས་གསུངས་སོ།།
[19] ང་ཁྲིད་མཁན་དེས་ང་རང་སྒོ་འགྲམ་ན་ཡོད་པའི་འཇུག་སྒོར་ཁྲིད་ཅིང་། བྱང་ཕྱོགས་ཀྱི་མཆོད་དཔོན་རྣམས་ཀྱིས་སྤྱོད་པའི་གཙང་ཁང་ནང་དུ་བསླེབས་པ་ན། ནུབ་ཀྱི་མུ་མཐའ་རུ་ས་སྟོང་ཞིག་ཡོད་པ་དང་།
[20] དེས་ང་ལ་ན་རེ། མཆོད་རྫས་དག་ཕྱིའི་ཁྱམས་དུ་ཁྱེར་ཏེ། མི་སྡེ་དམ་པར་མི་འགྱུར་ཆེད་དུ། འདི་དག་ནི་མཆོད་དཔོན་རྣམས་ཀྱིས་མིའི་སྡིག་བཤགས་དང་སྡིག་སེལ་གྱི་ཕྱིར་དུ་མཆོད་པ་འབུལ་བའི་ཤ་རྣམས་བཙོ་ས་དང་། དཀར་མཆོད་བསྲེག་སའང་ཡིན་ཞེས་སྨྲས་སོ།།
[21] ཡང་དེས་ང་ཕྱིའི་ཁྱམས་དུ་ཁྲིད་དེ། ང་ནི་ཁྱམས་རའི་གྲུ་ཁ་བཞི་ལ་རྒྱུ་བཅུག་སྟེ། ཁྱམས་རའི་གྲུ་ཁ་རེ་རེ་ན་ཡང་ཁྱམས་ཆུང་ཆུང་ཞིག་ཡོད་དེ།
[22] ཁྱམས་རའི་གྲུ་ཁ་བཞི་པོའི་ཁྱམས་ཆུང་ཆུང་དེ་རེ་རེའི་རིང་ཚད་ལ་ཁྲུ་ཉི་ཤུ་དང་། ཞེང་ལ་ཁྲུ་བཅོ་ལྔ་ཡོད་པ་དང་། གྲུ་ཁ་བཞི་པོའི་ཁྱམས་ཀྱི་ཆེ་ཆུང་གཅིག་ཡིན་ནོ།།
[23] ཁྱམས་ཆུང་ཆུང་བཞིའི་ནང་གི་ཕྱོགས་རེ་རེར་ཤུར་དུ་ཡོད་པའི་རྡོའི་རྩིག་པ་ཡོད་དེ། རྡོའི་རྩིག་པ་ཤུར་བཞི་པོའི་འོག་ཏུ་ཐབ་ཀ་ཡོད་པ་ཡིན།
[24] དེས་ང་ལ་ན་རེ། འདི་དག་ནི་ཐབ་ཚང་སྟེ། གཙང་ཁང་དམ་པ་ནང་དུ་ཞབས་ཏོག་སྒྲུབ་མཁན་རྣམས་ཀྱིས་གནས་འདི་ནས་མི་སྡེའི་མཆོད་རྫས་རྣམས་གཡོ་དགོས་ཞེས་སྨྲས་སོ།།