[1] ཡང་ཁོང་གིས་སྐད་ཆེན་པོ་རྒྱག་བཞིན་འདི་སྐད་དུ། གྲོང་ཁྱེར་ལ་ཉེས་ཆད་གཅོད་མཁན་ཁྱོད་རྣམས་ཀྱིས། རེ་རེས་ལག་ཏུ་སྲོག་ལེན་གྱི་མཚོན་ཆ་ཟུངས་ནས་ཉེ་སར་ཤོག་ཅེས་གསུངས་པ་ངས་ཐོས་ཤིང་།
[2] གློ་བུར་ཉིད་ལ། བྱང་ཕྱོགས་ཀྱི་ཡར་སྒོ་ནས་མི་དྲུག་འོངས་ཏེ། རེ་རེའི་ལག་ཏུ་སྲོག་གཅོད་ཀྱི་མཚོན་ཆ་བཟུང་ནས། ཁོ་ཚོའི་ཁྲོད་དུ་གཅིག་གིས་སོ་རས་གྱོན་པ་དང་། རྐེད་པར་སྣག་བུམ་བཏགས་ཡོད་ཡོད་དེ། ཁོ་ཚོ་ནང་དུ་འོངས་ནས་ལི་ཀྱི་མཆོད་ཁྲི་མདུན་དུ་ལངས་བསྡད་དོ།།
[3] ཡེས་ར་ཨེལ་དཀོན་མཆོག་གི་གཟི་བརྗིད་ནི་ཀེ་རུབ་ཀྱི་གོང་དུ་མཆིས་ཀྱང་། ད་ལྟ་གནས་དེ་ནས་ཕོ་བྲང་གི་སྒོ་ཐེམ་དུ་བསྣུར་ནས། ཡ་ཝཱེས་སོ་རས་གྱོན་པ་དང་རྐེད་པར་སྣག་བུམ་བཏགས་པའི་མི་དེ་བོས་ཏེ།
[4] མི་དེ་ལ་འདི་སྐད་དུ། ཁྱོད་ཡེ་རུ་སཱ་ལེམ་གྱི་གྲོང་ཁྱེར་ཀུན་ཏུ་ཕྱིན་ཏེ། གྲོང་ཁྱེར་ནང་གི་ཞེན་ལོག་གི་ལས་སྤྱད་པའི་ཕྱིར་དུ། དབུགས་རིང་གཏོང་པ་དང་ཡིད་སྐྱོ་བའི་མི་ཡི་དཔྲལ་བར་རྟགས་རྒྱོབ་ཅིག་ཅེས་གསུངས་པ་དང་།
[5] ཁོང་གིས་མི་ལྷག་མ་དག་ལ་འདི་སྐད་དུ། ཁྱོད་རྣམས་མི་དེའི་རྗེས་འབྲང་སྟེ་གྲོང་ཁྱེར་ཡོངས་ལ་སོང་ནས་དམར་གསོད་བྱོས་ཤིག ཁྱོད་ཚོས་མིག་གིས་གཟིགས་སྐྱོང་མ་མཛད་ལ། སྙིང་རྗེ་ཡང་མ་བསྒོམ་ལ།
[6] ཁྱོད་ཚོས་ངའི་གནས་མཆོག་ནས་འགོ་བརྩམས་ཏེ། རྒན་པ་དང་། གཞོན་ནུ་དང་། ན་ཆུང་མ་དང་། ཕྲུ་གུ་དང་། བུད་མེད་བཅས་ཐམས་ཅད་དམར་གསོད་བྱོས་ཤིག ཡིན་ཡང་དཔྲལ་བར་རྟགས་ཡོད་པ་དག་ལ་གནོད་མ་བསྐྱལ་ཞེས་གསུངས་པ་ངས་ཐོས་ཤིང་། དེ་ནས་ཁོ་ཚོས་ཕོ་བྲང་མདུན་གྱི་བགྲེས་པོ་རྣམས་ལས་དམར་གསོད་བྱེད་པར་འགོ་བརྩམས་སོ།།
[7] ཡང་ཁོང་གིས་དེ་དག་ལ་འདི་སྐད་དུ། ཁྱོད་ཅག་གིས་ཕོ་བྲང་འདི་བཙོག་པར་བཟོས་ཤིག་དང་། ཁྱམས་རའི་ནང་དུ་བསད་པའི་མི་ཡིས་བཀང་ཆུགས་ཤིག ད་ཁྱོད་རྣམས་ཕྱིར་སོང་ཞིག་ཅེས་གསུངས་པས། དེ་ཚོ་ཕྱིར་སོང་ནས་གྲོང་ཁྱེར་ནང་དུ་དམར་གསོད་བྱས་སོ།།
[8] དེ་ཚོས་དམར་གསོད་བྱེད་དུས། ང་གཅིག་པུ་ལུས་པ་དང་། དེ་ནས་ང་ཁ་སྦུབ་ཏུ་ལོག་ནས། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱི་ཐུགས་ཁྲོ་ཆེན་པོ་དེ་ཡེ་རུ་སཱ་ལེམ་གྱི་ཐོག་ཏུ་བླུགས་ཏེ། ཡེས་ར་ཨེལ་ལས་ལྷག་པའི་མི་རྣམས་ཀྱང་མེད་པར་མཛད་དམ་ཞེས་འོ་དོད་བཏང་པ་ན།
[9] ཁོང་གིས་ང་ལ་འདི་སྐད་དུ། ཡེས་ར་ཨེལ་དང་ཡ་ཧུ་དཱའི་ཁྱིམ་རྒྱུད་ཀྱི་ཉེས་པ་ཤིན་ཏུ་ཆེ་བས། ཡུལ་ཁམས་སུ་ཁྲག་གིས་བཀང་སྟེ། གྲོང་ཁྱེར་ནང་དུ་རྫུན་གྱིས་བཀང་ངོ་། གང་ལ་ཞེ་ན། དེ་ཚོས་ན་རེ། གཙོ་བོ་ཡ་ཝཱེ་ས་གཞི་འདི་དང་བྲལ་ཏེ། ཁོང་གིས་ངེད་རྣམས་མི་མཐོང་ངོ་ཞེས་ཟེར་ཞིང་།
[10] དེ་བས། ངས་མིག་གིས་གཟིགས་སྐྱོང་མི་མཛད་ཅིང་། ངས་ཀྱང་སྙིང་རྗེ་མི་བསྒོམ་ཏེ། ངས་ཁོ་ཚོས་སྤྱད་པའི་ལས་བཞིན་དུ་ཁོ་ཚོའི་ཐོག་ཏུ་ལན་འཇལ་ཏོ་ཞེས་གསུངས།
[11] དེ་ནས་ལུས་སུ་སོ་རས་གྱོན་པ་དང་། རྐེད་པར་སྣག་བུམ་བཏགས་པའི་མི་དེས་འདི་ལྟར་དུ། ཁྱེད་ཀྱིས་ང་ལ་བཀའ་གནང་བ་བཞིན་དུ་ངས་བསྒྲུབས་སོ་ཞེས་ལན་ཞུས་སོ།།