[1] དེ་ནས་ཐུགས་ཉིད་ཀྱིས་ང་རང་ཡར་བཀྱགས་ཏེ། གཙོ་བོ་ཡ་ཝཱེའི་ཕོ་བྲང་གི་ཤར་ཕྱོགས་ཀྱི་སྒོ་རུ་ཁྲིད་ནས། སྒོ་ཁར་མི་ཉེར་ལྔ་ཡོད་པ་དང་། དེ་དག་གི་ཁྲོད་ནས་མི་སྡེའི་དཔོན་པོ་ཨ་ཟུར་གྱི་བུ་ཡ་ཨ་ཟན་ཡཱ་དང་། པེ་ནཱ་ཡའི་བུ་ཕེ་ལད་ཡཱ་གཉིས་ཡོད་པ་ངས་མཐོང་སྟེ།
[2] ཡ་ཝཱེས་ང་ལ་འདི་སྐད་དུ། ཀྱེ་མིའི་བུ། འདི་དག་ནི་སྡིག་པའི་ཇུས་བྱེད་མཁན་དང་། གྲོང་ཁྱེར་ནང་དུ་གྲོས་ངན་བྱེད་མཁན་རྣམས་ཏེ།
[3] ཁོ་ཚོས་ན་རེ། ཁང་པ་བརྩིག་པའི་དུས་ད་དུང་མ་ཐོན་ཏེ། གྲོང་ཁྱེར་འདི་ནི་ཆག་སྒོ་ཡིན་ལ། ངེད་ཅག་ནི་ཤ་དེ་ཡིན་ཟེར་བས།
[4] ཀྱེ་མིའི་བུ། ཁྱོད་ཀྱིས་ལུང་སྟོན་ཞིག ལུང་བསྟན་ནས་དེ་ཚོར་རྒོལ་ཞིག་ཅེས་གསུངས་སོ།།
[5] ཡ་ཝཱའི་ཐུགས་ཉིད་ངའི་སྟེང་དུ་བབས་ནས། ཁོང་གིས་ང་ལ་འདི་སྐད་དུ། ཁྱོད་ཀྱིས་འདི་ལྟར་དུ། གཙོ་བོ་ཡ་ཝཱེས་འདི་སྐད་དུ་གསུངས་ཏེ། ཀྱེ་ཡེས་ར་ཨེལ་གྱི་ཁྱིམ་རྒྱུད། ཁྱོད་ཚོས་ངག་ལས་བརྗོད་པ་དང་། སེམས་ནས་དྲན་པ་བཅས་ངས་མཁྱེན་ནོ་གསུངས་སོ་ཞེས་སྨྲོས་ཤིག
[6] ཁྱོད་རྣམས་ཀྱིས་གྲོང་ཁྱེར་འདིའི་ནང་དུ་མི་མང་ཙམ་བསད་དེ། སྲང་ལམ་དུ་རོ་ཡིས་བཀང་བར་བྱས་པས།
[7] གཙོ་བོ་ཡ་ཝཱེས་འདི་སྐད་དུ། ཁྱོད་ཚོས་གྲོང་ཁྱེར་ནང་དུ་དོར་བའི་གཤིན་པོ་རྣམས་ནི་ཤ་དེ་ཡིན་ཞིང་། གྲོང་ཁྱེར་འདི་ནི་ཆག་སྒོ་སྟེ། ཁྱོད་ཚོ་ནི་གྲོང་ཁྱེར་ལས་ཕྱིར་བསྐྲད་པར་འགྱུར།
[8] ཁྱོད་རྣམས་རལ་གྲིར་འཇིགས་ཀྱང་། ཁྱོད་ཅག་གི་ཐོག་ཏུ་ངས་རལ་གྲི་ཐེབས་པར་འགྱུར་ ཞེས་གཙོ་བོ་ཡ་ཝཱེས་གསུངས།
[9] ངས་ཁྱོད་རྣམས་གྲོང་ཁྱེར་ལས་ཕྱིར་བསྐྲད་དེ། ཕྱི་རོལ་པའིམི་རྒྱུད་ལག་ཏུ་གཏོད་ཅིང་། ངས་ཁྱོད་རྣམས་ལ་ཁྲིམས་གཅོད་པར་བྱའོ།།
[10] ཡེས་ར་ཨེལ་གྱི་ས་མཚམས་ཀྱི་བར་དུ། ཁྱོད་རྣམས་རལ་གྲིའི་འོག་ཏུ་འགྱེལ་བར་འགྱུར་ཞིང་། ངས་ཁྱོད་ཅག་ལ་ཁྲིམས་བཅད་ན། ཁྱོད་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་རོ།།
[11] གྲོང་ཁྱེར་འདི་ནི་ཁྱོད་ཚོའི་སླ་ངར་མི་འགྱུར་ཞིང་། ཁྱོད་རྣམས་ཀྱང་དེའི་ནང་གི་ཤ་རུ་མི་འགྱུར་ཏེ། ཡེས་ར་ཨེལ་གྱི་ས་མཚམས་ཀྱི་བར་དུ་ངས་ཁྱོད་ཅག་ལ་ཆད་པ་བཅད་ན།
[12] ཁྱོད་ཚོས་ང་ནི་ཡ་ཝཱེ་ལགས་ཡིན་པ་རྟོགས་ཤིང་། གང་ལ་ཞེ་ན། ཁྱོད་ཚོས་ངའི་བཀའ་ཁྲིམས་མ་བརྩིས་ཤིང་། ངའི་ཁྲིམས་ལུགས་ལྟར་མ་བསྲུངས་པར། ཁྱོད་ཚོའི་ཉེ་འཁོར་གྱི་མི་རྒྱུད་ཀུན་གྱི་ཚུལ་བཞིན་དུ་སྤྱད་པ་ཡིན་ཞེས་གསུངས་སོ།།
[13] ཡང་ངས་ལུང་སྟོན་དུས། པེ་ནཱ་ཡའི་བུ་ཕེ་ལད་ཡཱ་ཤི་སྟེ། དེ་ནས་ང་ཁ་སྦུབ་ཏུ་ལོག་སྟེ་སྐད་ཆེན་པོས་འདི་ལྟར་དུ། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ཡེས་ར་ཨེལ་ལས་ལྷག་པའི་མི་རྣམས་ཀྱང་མེད་པར་མཛད་དམ་ཞེས་ཞུས་པ་དང་།
[14] གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[15] ཀྱེ་མིའི་བུ། ཁྱོད་ཀྱི་སྤུན་ཟླ་རྣམས་དང་། གཉེན་ཉེ་དག་དང་། ཁྱོད་དང་མཉམ་དུ་བཙོན་ལ་ཁྲིད་པའི་ཡེས་ར་ཨེལ་གྱི་ཁྱིམ་རྒྱུད་རྣམས་ཀྱི་སྐོར་གླེང་ན། སྔོན་ཡེ་རུ་སཱ་ལེམ་གྱི་མི་སྡེ་རྣམས་ཀྱིས་ན་རེ། ཁོ་རྣམས་གཙོ་བོ་ཡ་ཝཱེ་དང་རྒྱང་རིང་བར་བྲལ་ཏེ། ཡུལ་ཁམས་འདི་ནི་ང་ཚོའི་ནོར་སྐལ་དུ་གནང་བ་ཡིན་ཞེས་ཟེར་བས།
[16] ཁྱོད་ཀྱིས་འདི་ལྟར་དུ། གཙོ་བོ་ཡ་ཝཱེས་འདི་སྐད་དུ། ངས་དེ་དག་རྒྱང་རིང་ཡུལ་དུ་མི་རྒྱུད་ཀུན་གྱི་ཁྲོད་དུ་བསྐྲད་དེ། ཁོ་རྣམས་ཡུལ་སོ་སོར་གཏོར་ཡང་། དེ་རྣམས་ཐོན་པའི་ཡུལ་སོ་སོ་རུ་ང་ནི་ཁོ་ཚོའི་གནས་སྐབས་ཀྱི་གནས་མཆོག་དུ་འགྱུར་བར་འགྱུར་ཞེས་གསུངས་བརསྨྲོས་ཤིག
[17] དེ་བས་ཁྱོད་ཀྱིས་འདི་ལྟར་དུ། གཙོ་བོ་ཡ་ཝཱེས་འདི་སྐད་དུ། ངས་མི་སྡེ་རྣམས་ཀྱི་ནང་དུ་ཁྱོད་རྣམས་བསྡུས་ཏེ། ཁྱོད་རྣམས་གཏོར་པའི་ཡུལ་སོ་སོ་ནས་བསྡུས་ནས། ཡེས་ར་ཨེལ་གྱི་ཡུལ་ཁམས་ཁྱོད་ཅག་ལ་གནང་བར་བྱའོ་ཞེས་གསུངས་བར་སྨྲོས་ཤིག
[18] དེ་ནས་ཁོ་རྣམས་ཕྱིར་ཡུལ་དེར་ལོག་ཅིང་། དེའི་ཞེན་ལོག་གི་སྐུ་འདྲ་དག་དང་སྐྱུག་བྲོ་བའི་དངོས་པོ་རྣམས་མེད་པར་བྱའོ།།
[19] ངས་དེ་དག་ལ་སེམས་ཤིག་གནང་སྟེ། ཐུགས་ཉིད་གསར་པ་ཞིག་ཁོ་ཚོའི་ནང་དུ་བཞག་ནས། ངས་ཁོ་ཚོའི་ལུས་པོ་ལས་རྡོ་སེམས་བླངས་ནས། དེ་དག་ལ་ཤ་ཡི་སེམས་ཤིག་གནང་བར་བྱ་སྟེ།
[20] དེ་དག་ལ་ངའི་བཀའ་ཁྲིམས་བརྩི་བར་གཞུག་སྟེ། ངའི་ཁྲིམས་ལུགས་ནན་གྱིས་བསྲུང་བར་བཅུག་ནས། དེ་དག་ངའི་མི་སྡེ་དང་། ང་དེ་དག་གི་དཀོན་མཆོག་ཏུ་འགྱུར་བར་བྱའོ།།
[21] ཡིན་ཡང་རང་སེམས་ཞེན་ལོག་གི་སྐུ་འདྲ་དང་སྐྱག་བྲོ་བའི་དངོས་པོ་རྣམས་ཀྱི་རྗེས་སུ་འབྲངས་པའི་མི་དག་ལ། དེ་དག་གིས་སྤྱད་པའི་ལས་བཞིན་དུ། ངས་ཁོ་ཚོའི་ཐོག་ཏུ་ལན་འཇལ་ཏོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས།
[22] དེ་ནས། ཀེ་རུབ་རྣམས་ཀྱིས་གཤོག་པ་བརྐྱངས་ཏེ། འཁོར་ལོ་རྣམས་དེ་དག་གི་འགྲམ་དུ་ཡོད་དེ། ཡེས་ར་ཨེལ་གྱི་དཀོན་མཆོག་གི་གཟི་བརྗིད་དེ་དག་གི་སྟེང་དུ་མཆིས་སོ།།
[23] གཙོ་བོ་ཡ་ཝཱེའི་གཟི་བརྗིད་གྲོང་ཁྱེར་ནང་ནས་ཡར་འཕགས་ཏེ། གྲོང་ཁྱེར་ཤར་ཕྱོགས་ཀྱི་རི་རྩེ་དེར་བཞུགས་པ་དང་།
[24] ཐུགས་ཉིད་ཀྱིས་ང་ཡར་བཀྱགས་ཏེ། ཞལ་གཟིགས་ཀྱི་ནང་དུ་དཀོན་མཆོག་གི་ཐུགས་ཉིད་ལ་བརྟེན་ནས། ང་ནི་ཀལ་དི་རུ་བཙོན་པ་རྣམས་ཀྱི་རྩར་ཁྲིད་དེ། ངས་མཐོང་པའི་ཞལ་གཟིགས་དེ་ང་ལས་བྲལ་ཏེ་ཡར་འཕགས་སོ།།
[25] དེ་ནས་ངས་ཡ་ཝཱེས་ང་ལ་བསྟན་པའི་དོན་ཐམས་ཅད་བཙོན་པ་རྣམས་ལ་བཤད་དོ།།