[1] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། ཁྱོད་ཀྱིས་ཨམ་མོན་པའི་ཕྱོགས་སུ་གདོང་སྒྱུར་ཏེ། ཁོ་ཚོར་རྒོལ་པའི་ལུང་སྟོན་ཞིག
[3] ཁྱོད་ཀྱིས་ཨམ་མོན་པ་རྣམས་ལ་འདི་ལྟར་དུ་སྨྲོས་ཤིག ཁྱོད་ཚོས་གཙོ་བོ་ཡ་ཝཱེའི་གསུངས་ལ་ཉོན་དང་། གཙོ་བོ་ཡ་ཝཱེས་འདི་སྐད་དུ་གསུངས་ཏེ། ངའི་དམ་པའི་གནས་བརླགས་ཤིང་། ཡེས་ར་ཨེལ་གྱི་ཡུལ་ཁམས་སྟོངས་པར་གྱུར་ནས། ཡ་ཧུ་དཱའི་ཁྱིམ་རྒྱུད་བཙོན་དུ་ཁྲིད་པའི་དུས་སུ། ཁྱོད་ཀྱིས་དེ་དག་ལ་ཁྲེལ་དགོད་བཏང་བས།
[4] ངས་ཁྱོད་ནི་ཤར་ཕྱོགས་པའི་ནོར་སྐལ་བྱེད་དུ་དེའི་ལག་ཏུ་གཏོད་ཅིང་། དེ་དག་གིས་ཁྱོད་ཀྱི་གནས་སུ་གུར་ཕུབ་ཅིང་། ཁྱོད་ཀྱི་དབུལ་སུ་གཞིས་ཆགས་ནས། དེ་དག་གིས་ཁྱོད་ཀྱི་འབྲས་བུ་ཟ་ཞིང་། ཁྱོད་ཀྱི་འོ་མ་བཏུང་བར་འགྱུར།
[5] ངས་རབ་བཱ་ནི་རྔ་མོང་འཚོ་སར་གྱུར་བཅུག་སྟེ། ཨམ་མོན་པའི་ཡུལ་ནི་ལུག་ཁྱུ་ཉལ་སའི་གནས་སུ་གྱུར་ན། ཁྱོད་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་རོ།།
[6] གཙོ་བོ་ཡ་ཝཱེས་འདི་སྐད་དུ། ཁྱོད་ཀྱིས་རྐང་འཁྲབ་ལག་འཁྲབ་བྱས་ནས། སེམས་ནས་མཐོང་ཆུང་བྱས་ཤིང་། ཡེས་ར་ཨེལ་ལ་བྱུང་པའི་སྡུག་བསྔལ་གྱི་ཕྱིར་དུ་དགའ་མགུ་བྱས་པས།
[7] ངས་ཕྱག་བརྐྱངས་ཏེ་ཁྱོད་ལ་རྒོལ་ཞིང་། ཁྱོད་ནི་ཕྱི་ཕྱོགས་པའི་བཅོམ་ནོར་དུ་སྦྱིན་ཞིང་། ངས་མི་སྡེ་ཀུན་གྱི་ནང་དུ་ཁྱོད་ཚར་དུ་གཅད་ཅིང་། ཁྱོད་ནི་ཡུལ་ཀུན་ལས་མེད་པར་འགྱུར་ཞིང་། ངས་ཁྱོད་མེད་པར་མཛད་ན་ཁྱོད་ཀྱིས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་ཞེས་གསུངས་སོ།།
[8] དེའང་གཙོ་བོ་ཡ་ཝཱེས་འདི་སྐད་དུ། མོ་ཨབ་དང་སེ་ཨིར་གཉིས་པོས། ལྟོས་ཤིག ཡ་ཧུ་དཱའི་ཁྱིམ་རྒྱུད་ནི་ཕྱི་ཕྱོགས་པ་ཀུན་དང་འདྲའོ་ཟེར་བས།
[9] ངས་མོ་ཨབ་ཀྱི་ཕྱོགས་གཅིག་གི་འགོག་སྲུང་མེད་པར་མཛད་དེ། ཁོ་ཚོས་གནས་དེའི་གཟི་བརྗིད་དུ་བརྩིས་པའི་པེད་ཡེ་ཤི་མོད་དང་། པཱ་ཨལ་མེ་ཨོན་དང་ཀིར་ཡ་ཐཱ་ཡེམ་བྱ་བའི་གྲོང་ཁྱེར་ཏེ། ས་མཚམས་ཀྱི་གྲོང་ཁྱེར་རྣམས་ནས་འགོ་བརྩམས་ནས།
[10] ངས་མོ་ཨབ་དང་ཨམ་མོན་པ་བཅས་མཉམ་དུ་ཤར་ཕྱོགས་པའི་ནོར་སྐལ་དུ་སྦྱིན་ཞིང་། མི་རྒྱུད་ཀུན་གྱི་ནང་དུ་ཨམ་མོན་པ་ནི་ཡང་བསྐྱར་དྲན་པར་མི་འགྱུར།
[11] ངས་མོ་ཨབ་ལ་ཉེས་ཆད་བཅད་ན། ཁོ་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་རོ།།
[12] གཙོ་བོ་ཡ་ཝཱེས་འདི་སྐད་དུ། ཨེ་དོམ་གྱིས་ཡ་ཧུ་དཱའི་ཁྱིམ་རྒྱུད་ལ་འཁོན་ལན་བསློགས་པས། ཁོ་ཚོས་དེ་བཞིན་སྤྱད་པ་ནི་སྡིག་པ་བྱས་སོ།།
[13] དེ་བས་གཙོ་བོ་ཡ་ཝཱེས་འདི་སྐད་དུ། ངས་ཨེ་དོམ་ཐོག་ཏུ་ཕྱག་བརྐྱངས་ནས་དེ་ལ་རྒོལ་ཞིང་། ཡུལ་དེའི་མི་དང་དུད་འགྲོ་གཉིས་པོ་ཚར་དུ་གཅོད་ཅིང་། ངས་ཨེ་དོམ་ནི་སྟོངས་སུ་འཇུག་ཅིང་། ཐེ་མཱན་ནས་དི་དན་གྱི་བར་དུ་དེ་རྣམས་རལ་གྲི་འོག་ཏུ་འཆི་བར་འགྱུར།
[14] ངས་ཉིད་ཀྱི་མི་སྡེ་ཡེས་ར་ཨེལ་པའི་ལག་པ་བརྒྱུད་དེ་ཨེ་དོམ་ལ་ལན་འཇལ་ཞིང་། ཡེས་ར་ཨེལ་པས་ངའི་ཐུགས་ཁྲོ་བཞིན་དང་། ངའི་ཁྲོ་གཏུམ་ཆེན་པོ་བཞིན་དུ་ཨེ་དོམ་ལ་བྱེད་ཅིང་། དེ་ནས་ཨེ་དོམ་པའི་དེ་ནི་ངས་ལན་འཇལ་བ་རྟོགས་སོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[15] གཙོ་བོ་ཡ་ཝཱེས་འདི་སྐད་དུ། ཡང་ཕེ་ལེ་ཤེད་པས་ཡ་ཧུ་དཱ་པ་རྣམས་ལ་འཁོན་ལན་བསློགས་ཤིང་། སེམས་ནས་མཐོང་ཆུང་བྱས་ནས་འཁོན་ལན་བསློགས་ཏེ། ནམ་ཡིན་ཡང་འཁོན་སེམས་བསྐྱེད་དེ་ཡ་ཧུ་དཱ་མེད་པར་བཟོ་ཞེས་དྲན་པས།
[16] གཙོ་བོ་ཡ་ཝཱེས་འདི་སྐད་དུ། ལྟོས་ཤིག ངས་ཕྱག་བརྐྱངས་ཏེ་ཕེ་ལེ་ཤེད་པ་ལ་རྒོལ་བར་འགྱུར་ཞིང་། ཀེ་རེད་པ་རྣམས་ཚར་དུ་གཅད་ཅིང་། རྒྱ་མཚོའི་འགྲམ་གྱི་ཕྱི་ལུས་རྣམས་ཀྱང་མེད་པར་བྱ་སྟེ།
[17] ངའི་ཁྲོ་གཏུམ་ཆེན་པོས་དེ་དག་ལ་སྐྱོན་བཙུགས་ནས། དེ་དག་ལ་འཁོན་ལན་བསློག་ཅིང་། ངས་དེ་དག་ལ་འཁོན་ལན་སློག་པའི་དུས་སུ། ཁོ་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་རོ་ཞེས་གསུངས་སོ།།