[1] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། ཁྱོད་ཀྱིས་ཡེས་ར་ཨེལ་གྱི་ཁྱིམ་རྒྱུད་ལ་གབ་ཚིག་ཕོངས་ནས་དཔེ་བཞག་སྟེ་འདི་ལྟར་དུ་སྨྲོས་ཤིག
[3] གཙོ་བོ་ཡ་ཝཱེས་འདི་སྐད་དུ། གཤོག་པ་ཆེ་ཞིང་གཤོག་སྒྲོ་རིང་ལ། བྱ་སྤུ་སྣ་ཚོགས་ཀྱིས་བཀང་བའི་གླག་ཆེན་པོ་ཞིག་ལེ་བ་ནོན་དུ་བབས་ནས། ཐང་ཤིང་གི་རྩེའི་ཡལ་ག་ཞིག་བླངས།
[4] དེས་སྡོང་རྩེ་ཡི་ལྕུག་མ་གསར་པ་ཞིག་བཅད་ནས། ཚོང་རྒྱག་ས་དང་ཚོང་པའི་གྲོང་ཁྱེར་དུ་དེ་ཁྱེར་ནས་བཙུགས།
[5] ཡང་དེས་ཡེས་ར་ཨེལ་གྱི་ས་བོན་ཁྱེར་ཏེ། ལྕང་ཤིང་འཛུགས་པ་བཞིན་དུ། བཅུད་འཛོམས་པའི་ས་ཡི་ནང་དང་། བཞུར་ཆུའི་འགྲམ་དུ་གཏོར་ནས།
[6] ས་བོན་སྐྱེས་ཏེ། གང་སར་མཆེད་པའི་རྒུན་ཤིང་ཆུང་ཆུང་ཞིག་ཏུ་གྱུར་བ་དང་། སྡོང་པའི་ཡལ་ག་རྣམས་གླག་གི་ཕྱོགས་སུ་སྒུར་ཞིང་། རྩ་བ་དེའི་འོག་ན་ཡོད། དེ་བཞིན་དུ་དེ་ནི་རྒུན་ཤིང་ཞིག་ཏུ་གྱུར་ནས། ཡལ་འདབ་རྒྱས་ཤིང་མྱུ་གུ་འབུས་སོ།།
[7] གླག་གཞན་ཞིག་ཡོད་པའང་གཤོག་པ་ཆེ་ཞིང་བྱ་སྤུ་མང་སྟེ། རྒུན་ཤིང་དེ་བཙུགས་པ་ནས་མྱུ་གུ་འབུས་ནས། གླག་དེས་ཆུ་འདྲེན་བའི་ཕྱིར། རྩ་བ་གླག་གི་ཕྱོགས་སུ་བརྐྱངས་ཤིང་། གླག་དེའི་ཕྱོགས་སུ་ཡལ་འདབ་རྒྱས།
[8] དོན་དངོས་སུ་རྒུན་ཤིང་དེ་ནི་སྔ་མོ་ནས་བཅུད་འཛོམས་པའི་སའི་ནང་དང་། བཞུར་ཆུའི་འགྲམ་དུ་བཙུགས་པས། ཡལ་འདབ་རྒྱས་ཤིང་འབྲས་བུ་ཐོགས་ནས་ཡོད་དུ་འོང་བའི་རྒུན་ཤིང་ཞིག་ཏུ་གྱུར་བ་དང་།
[9] ཡང་ཁྱོད་ཀྱིས་འདི་ལྟར་དུ་སྨྲོས་ཤིག གཙོ་བོ་ཡ་ཝཱེས་འདི་སྐད་དུ། རྒུན་ཤིང་འདི་ནི་ཅི་ལྟར་ལོ་འདབ་རྒྱས་སམ། གླག་གིས་དེའི་རྩ་བ་ནས་འདོན་ཞིང་། འབྲས་བུ་བཏོགས་ཏེ། དེ་དང་དེ་ལས་སྐྱེས་པའི་མྱུ་གུ་དག་སྐམ་པར་འགྱུར་བ་མ་ཡིན་ནམ། དོན་དངོས་སུ་དེ་རྩ་བ་ནས་འདོན་པའི་ཕྱིར་དུ་ཤེད་ཆེན་དང་མི་མང་པོ་མི་དགོས་སོ།།
[10] ལྟོས་ཤིག རྒུན་ཤིང་བཙུགས་ཀྱང་། དེ་རྒྱས་པར་འགྱུར་རམ། ཤར་རླུང་གཡུགས་ནས་དེར་རྒོལ་དུས་དེ་སྐམ་པར་འགྱུར་བ་མ་ཡིན་ནམ། དེ་ནི་མྱུ་གུ་འབུ་དུས་སྐམ་པར་འགྱུར་རོ་ཞེས་གསུངས་སོ།།
[11] གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[12] ཁྱོད་ཀྱིས་ངོ་ལོག་ཅན་གྱི་མི་རྒྱུད་དེ་ལ་འདི་ལྟར་དུ། ཁྱོད་རྣམས་ཀྱིས་བྱ་བ་འདིའི་དོན་ཅི་ལགས་མི་ཤེས་སམ་ཞེས་དྲིས་ཤིག་དང་། ཡང་དེ་ཚོར་འདི་ལྟར་ཤོད་ཅིག ལྟོས་དང་། སྔར་པཱ་པིས་ལུན་གྱི་རྒྱལ་པོ་ཡེ་རུ་སཱ་ལེམ་དུ་འོངས་ནས། ཡུལ་དེའི་རྒྱལ་པོ་དང་དཔོན་པོ་རྣམས་བཟུང་ནས་པཱ་པིས་ལུན་ལ་བཙོན་དུ་ཁྲིད་དེ།
[13] ཁོང་གིས་ཡེས་ར་ཨེལ་གྱི་མི་རྒྱུད་ནང་ནས་མི་ཞིག་བདམས་ཏེ། དེ་དང་ཞལ་ཆད་བཞག་ནས། དེར་མནའ་བསྐྱལ་དུ་བཅུག་པ་དང་། ད་དུང་རྒྱལ་ཁབ་ནང་གི་སྟོབས་ཤུགས་ཡོད་པ་དག་བཙོན་དུ་ཁྲིད་ནས།
[14] རྒྱལ་ཁབ་ཉམས་སུ་བཅུག་སྟེ། ཡང་བསྐྱར་དར་རྒྱས་མ་བྱུང་བས། བཀའ་རྒྱ་བརྩིས་ན་ད་གཟོད་ཁོ་ལུས་པར་འགྱུར་ཞེས་ཟེར་ཡང་།
[15] དམག་རྟ་དང་དཔུང་ཆེན་ཐོབ་པའི་ཕྱིར་དུ། མི་དེ་ཡིས་ཨེ་ཅིབ་ཡུལ་དུ་ཕོ་ཉ་མངགས་ནས་པཱ་པིས་ལུན་གྱི་རྒྱལ་པོར་ངོ་ལོག་བྱས་ཏེ། དོན་དེ་འགྲུབ་ཐུབ་བམ། དོན་དེ་འདྲ་བྱས་པའི་མི་ཅི་ལྟར་ཐར་རམ། མི་དེས་ཞལ་ཆད་མ་བསྲུངས་པས་ཅི་ལྟར་ཐར་རམ།
[16] ངས་ཉིད་ཀྱི་གཏན་དུ་གསོན་པ་ཉིད་དཔང་དུ་བཙུགས་ཏེ་མནའ་བསྐྱལ་དང་། དེས་རང་གི་མནའ་ལ་མཐོང་ཆུང་བྱས་ཤིང་། རྒྱལ་པོ་དང་བཞག་པའི་ཞལ་ཆད་དོར་བས། ཁོ་ཉིད་རྒྱལ་སར་བཀོད་པའི་པཱ་པིས་ལུན་གྱི་རྒྱལ་ཁབ་ཏུ་འཆི་བར་འགྱུར་རོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས།
[17] དགྲ་ཡིས་གྲོང་ཁྱེར་སྐོར་བའི་མཁར་མཐོན་པོ་བརྩིགས་ཤིང་། གྲོང་ཁྱེར་ལ་རྒོལ་བའི་ཕྱིར་དུ་ས་རགས་བརྩིགས་ནས་མི་མང་པོ་ཚར་དུ་གཅོད་དུས། ཕཱར་ཨོལ་གྱིས་དཔུང་ཆེན་དང་དམག་མང་པོ་ཁྲིད་འོངས་ཀྱང་། དེའི་དོན་དུ་གཡུལ་འགྱེད་མི་ཐུབ་བོ།།
[18] དེས་མནའ་ལ་མཐོང་ཆུང་བྱས་ཤིང་། ཞལ་ཆད་དོར་ནས། ཁོས་བློ་དཀར་བའི་དམ་བཅའ་བཞག་ཀྱང་། ཡང་བྱ་བ་དེ་ཐམས་ཅད་སྤྱད་པས། ཁོ་ནི་ཐར་བར་མི་འགྱུར་རོ།།
[19] དེ་བས་གཙོ་བོ་ཡ་ཝཱེས་འདི་སྐད་དུ། ངས་ཉིད་ཀྱི་གཏན་དུ་གསོན་པ་ཉིད་དཔང་དུ་བཙུགས་ཏེ་མནའ་བསྐྱལ་དང་། ཁོས་ངའི་མནའ་ཚིག་ལ་མཐོང་ཆུང་བྱས་ཏེ། ངའི་ཞལ་ཆད་དོར་བས། ངས་སྡིག་པ་དེ་ཁོའི་ཐོག་ལ་དགལ་བར་འགྱུར།
[20] ངས་རང་གི་དྲ་དེའི་ཐོག་ཏུ་གཏོར་ན། ཁོ་ངའི་དྲ་ཡི་ནང་དུ་འཚུད་པར་འགྱུར་ཞིང་། ངས་དེ་པཱ་པིས་ལུན་དུ་ཁྲིད་དེ། ཁོས་ང་ལ་བློ་མ་དཀར་བར་སྡིག་པ་བྱས་པའི་ཕྱིར་དུ། གནས་དེར་ངས་ཁོ་ལ་ཉེས་ཆད་གཅད་བར་འགྱུར།
[21] དེ་ནས་ཁོའི་དམག་དཔུང་ནང་གི་སྤུས་ལེགས་དམག་མི་ཚང་མ་རལ་གྲི་འོག་ཏུ་འཆི་བར་འགྱུར་ཞིང་། ལུས་པར་གྱུར་བ་རྣམས་ཕྱོགས་བཞིར་ཁ་ཐོར་དུ་སོང་ན། ཁྱོད་ཚོས་གསུངས་འདི་ཡ་ཝཱེ་ཁོང་གིས་གསུངས་བ་ཡིན་པ་རྟོགས་པར་འགྱུར་རོ།།
[22] གཙོ་བོ་ཡ་ཝཱེས་འདི་སྐད་དུ། ངས་ཐང་ཤིང་མཐོན་པོའི་རྩེ་ནས་ཡལ་ག་ཞིག་བླངས་ཏེ་འཛུགས་ཤིང་། ངས་དེའི་རྩེ་མོའི་ལྕུག་མ་གསར་པ་ཞིག་བཅད་དེ། རི་མཐོན་པོ་ཁར་འཛུགས་བར་བྱ་སྟེ།
[23] ངས་ཡེས་ར་ཨེལ་གྱི་རི་མཐོན་པོའི་ཁར་དེ་བཙུགས་ནས། དེར་ཡལ་ག་སྐྱེས་ནས་ཤིང་ཏོག་ཐོགས་པར་གྱུར་ནས། ཡིད་དུ་འོང་བའི་ཐང་ཤིང་དུ་འགྱུར་ཞིང་། འདབ་ཆགས་སྣ་ཚོགས་དེའི་འོག་ཏུ་སྡོད་ཅིང་། དེའི་ཡལ་གའི་བསིལ་གྲིབ་འོག་ཏུ་སྡོད་པར་འགྱུར།
[24] དེ་ནས་ཡ་ཝཱེ་ངས་སྐྱེ་ཤིང་མཐོན་པོ་རྣམས་དམའ་མོ་དང་། དམའ་མོ་རྣམས་མཐོན་པོ་དང་། སྐྱེ་ཤིང་ལྗང་ནག་རྣམས་སྐམ་པོ་དང་། སྐམ་པོ་རྣམས་ལོ་འདབ་རྒྱས་བར་གྱུར་བ་ཐང་གི་ཤིང་སྡོང་རྣམས་ཀྱིས་ཤེས་བར་འགྱུར་ཞིང་། ཡ་ཝཱེ་ངས་ཅི་ལྟར་གསུངས་པ་དེ་བཞིན་དུ་འགྲུབ་པར་འགྱུར་རོ།།