[1] དེའང་ལོ་སུམ་བཅུ་པའི་ཟླ་བཞི་པ་ཡི་ཚེས་ལྔ་པར། ང་རང་ཆུ་པོ་ཀེ་བར་གྱི་འགྲམ་དུ་ཡོད་དུས། ནམ་མཁའ་ཕྱེས་ནས། ངས་དཀོན་མཆོག་གི་ཞལ་གཟིགས་མཐོང་སྟེ། དུས་དེར། ང་ནི་བཙོན་དུ་ཁྲིད་པའི་མིའི་ཁྲོད་དུ་ཡོད་དོ།།
[2] ཡང་རྒྱལ་པོ་ཡེ་ཧོ་ཡཱ་ཀིན་བཙོན་ལ་ཁྲིད་པའི་ལོ་ལྔ་པའི་ཟླ་བཞི་པ་ཡི་ཚེས་ལྔ་ཡི་ཉིན་དེ་ལ།
[3] ཀལ་དི་པའི་ཡུལ་ཁམས་ཀྱི་ཀེ་བར་བྱ་བའི་གཙང་པོའི་འགྲམ་དུ། གཙོ་བོ་ཡ་ཝཱེའི་བཀའ་ནི་བུ་ཟིའི་བུ་སྟེ་མཆོད་དཔོན་ཨེ་ཟེ་ཀི་ཨེལ་ལ་དངོས་སུ་བྱུང་སྟེ། གཙོ་བོ་ཡ་ཝཱེའི་ཕྱག་ནི་དེ་རུ་ཁོའི་སྟེང་དུ་བཞག་གོ །
[4] ཡང་ངས་བལྟས་ཏེ། བྱང་ཕྱོགས་ནས་རླུང་དམར་ཞིག་འོངས་པ་དང་བཅས། མེ་ལྕེ་ཁྱུག་པའི་སྤྲིན་ཕུང་ཆེན་པོ་ཞིག་མཐོང་བ་དང་། དེའི་མཐའ་བཞི་ནས་འོད་ཟེར་འཕྲོས་ཤིང་། སྤྲིན་གྱི་མེ་ལྕེ་ནང་དུ་འོད་འཕྲོ་བའི་ལྕགས་རིགས་ཤིག་ཡོད་པ་དང་འདྲ་སྟེ།
[5] མེ་ལྕེ་དེའི་ནང་དུ་སེམས་ཅན་བཞིའི་རྣམ་པ་ཤར་བྱུང་ལ། དེ་དག་གི་རྣམ་པ་ནི་འདི་བཞིན། དེ་ཐམས་ཅད་ལ་མིའི་གཟུགས་དབྱིབས་ཡོད་པ་དང་།
[6] དེ་དག་རེ་རེ་ལ་གདོང་བཞི་དང་། གཤོག་པ་བཞི་ཡོད་དེ།
[7] དེ་དག་གི་རྐང་པ་ནི་དྲང་པོ་ཡིན་ཏེ། རྐང་མཐིལ་ནི་བ་ཕྲུག་གི་སུག་མཐིལ་དང་འདྲ་ཞིང་། ཡོད་ཚད་འོད་སྟོང་འཕྲོ་ཞིང་། གཡའ་དག་པའི་ལི་དང་འདྲའོ།།
[8] ཡང་དེ་དག་གི་ཕྱོགས་བཞིའི་གཤོག་པ་འོག་ཏུ་མིའི་ལག་པ་ཡོད་དེ། སེམས་ཅན་བཞི་པོ་དེ་དག་གི་གདོང་དང་གཤོག་པ་འདི་ལྟ་སྟེ།
[9] དེ་དག་གི་གཤོག་པ་ནི་ཕན་ཚུན་ཐུག་པ་དང་། འགྲོ་དུས་ཁ་ཕྱིར་འཁོར་མི་དགོས་ལ། ཐམས་ཅད་མདུན་ཕྱོགས་སུ་འགྲོ་བ་ཡིན།
[10] ཡང་དེ་དག་གི་གདོང་གི་རྣམ་པ་ནི། སེམས་ཅན་བཞི་པོ་རེ་རེ་ལ་མིའི་གདོང་ཞིག་ཡོད་པ་དང་། གཡས་ཕྱོགས་སུ་རེ་རེ་ལ་སེང་གེའི་གདོང་དང་། གཡོན་ཕྱོགས་སུ་རེ་རེ་ལ་གླང་གི་གདོང་ཡོད་དེ། རྒྱབ་ཏུ་རེ་རེ་ལ་གླག་གི་གདོང་ཡོད་དོ།།
[11] ཡང་དེ་དག་གི་གདོང་ནི་འདི་ལྟ་སྟེ། དེ་དག་གིས་ཡར་གཤོག་པ་བརྐྱངས་ཏེ། རེ་རེ་ཡིས་གཤོག་པ་གཉིས་པོས་ཕན་ཚུན་ཐུག་པ་དང་། གཤོག་པ་གཉིས་པོས་ལུས་པོ་བཀབ་པའོ།།
[12] དེ་དག་རེ་རེ་ནི་མདུན་ཕྱོགས་སུ་འགྲོ་བ་དང་། ཐུགས་ཉིད་གང་དུ་སོང་ན། དེ་དག་གང་དུ་འགྲོ་བ་དང་། དེ་དག་འགྲོ་དུས་ཁ་ཕྱིར་འཁོར་མི་དགོས་སོ།།
[13] སེམས་ཅན་བཞི་ཡི་རྣམ་པ་ནི། མེ་ཡིས་འབར་བའི་སོལ་བ་དང་། ཡང་དཔལ་འབར་དང་འདྲ་ཞིང་། མེ་ལྕེ་དེ་ནི་སེམས་ཅན་བཞི་ཡི་དཀྱིལ་ན་གང་སར་རྒྱུ་བ་དང་། མེ་དེ་ཤིན་ཏུ་གསལ་ཞིང་། དེ་ལས་གློག་འཁྱུག་གོ །
[14] གློག་འཁྱུག་པ་བཞིན་སེམས་ཅན་བཞི་པོ་ཕར་ཚུར་རྒྱུ་བར་བྱས།
[15] ངས་སེམས་ཅན་དེ་དག་ལ་ལྟ་དུས། སེམས་ཅན་བཞི་པོའི་འགྲམ་དུ་ས་ལ་ཐུག་པའི་འཁོར་ལོ་བཞི་ཡོད་པ་མཐོང་སྟེ།
[16] འཁོར་ལོ་བཞིའི་ཚུགས་ཀ་དང་གྲུབ་ཚུལ་ནི་རྣམ་པ་གཅིག་ཡིན་པ་དང་། དེ་དག་ནི་འོད་ཟེར་ལྡན་པའི་ལྗང་སེར་ཅན་གྱི་གཡུ་སྐོར་དང་འདྲ་ཞིང་། ཡང་འཁོར་ལོ་གཅིག་གིས་གཅིག་ལ་སྦྲེལ་པ་དང་འདྲ།
[17] འཁོར་ལོ་དེ་དག་ཕྱོགས་བཞིར་སྐྱོད་དུས། ཁ་ལོ་འཁོར་མི་དགོས་ལ།
[18] འཁོར་ལོའི་མུ་ཁྱུད་ཤིན་ཏུ་མཐོ་ཞིང་འཇིགས་སུ་རུང་བ་ཞིག་ཡིན་ཏེ། འཁོར་ལོའི་མུ་ཁྱུད་བཞི་པོའི་སྟེང་དུ་མིག་གིས་ཁེངས་སོ།།
[19] ཡང་སེམས་ཅན་དེ་དག་རྒྱུ་དུས། དེ་དག་འགྲམ་གྱི་འཁོར་ལོ་རྣམས་ཀྱང་མཉམ་དུ་རྒྱུ་ཞིང་། སེམས་ཅན་དེ་དག་ས་ལས་འཕགས་དུས། འཁོར་ལོ་དེ་རྣམས་ཀྱང་འཕགས་པ་ཡིན།
[20] ཐུགས་ཉིད་གང་སར་སོང་ན། སེམས་ཅན་དེ་རུ་འགྲོ་ཞིང་། འཁོར་ལོ་དག་ཀྱང་མཉམ་དུ་འཕགས་པ་ཡིན། ཅིའི་ཕྱིར་ཞེ་ན། སེམས་ཅན་གྱི་ཐུགས་ཉིད་དེ་ནི་འཁོར་ལོ་ནང་དུ་ཡོད་པའི་ཕྱིར།
[21] སེམས་ཅན་རྒྱུ་དུས། འཁོར་ལོ་རྣམས་ཀྱང་མཉམ་དུ་རྒྱུ་སྟེ། སེམས་ཅན་ལངས་ནས་སྡོད་དུས། འཁོར་ལོ་དག་ཀྱང་བསྡད་དེ། སེམས་ཅན་དག་ས་ལས་འཕག་དུས། འཁོར་ལོ་རྣམས་ཀྱང་འཕགས་པར་གྱུར། ཅིའི་ཕྱིར་ཞེ་ན། སེམས་ཅན་གྱི་ཐུགས་ཉིད་ནི་འཁོར་ལོ་ནང་དུ་ཡོད་པའི་ཕྱིར།
[22] སེམས་ཅན་དེའི་གཙུག་ཏུ་ནམ་མཁའི་དབྱིབས་དང་འདྲ་བ་ནི། འོད་ཟེར་འཕྲོ་བའི་ཆུ་ཤེལ་བཞིན་ཤིན་ཏུ་འཇིགས་སུ་རུང་བ་དང་། དེ་དག་ནི་སེམས་ཅན་གྱི་གཙུག་ཏུ་རྒྱས་པ་ཡིན།
[23] ནམ་མཁའི་འོག་ཏུ་སེམས་ཅན་གྱི་གཤོག་པ་ནི་ཕན་ཚུན་ཐུག་ནས་དྲང་པོར་བརྐྱངས་ཏེ་ཕན་ཚུན་ཐུག་ནས། རེ་རེས་གཤོག་པ་གཉིས་པོས་ལུས་པོ་བཀབ་པ་ཡིན།
[24] སེམས་ཅན་འགྲོ་དུས་སུ། ཆུ་ལོག་གི་སྒྲའམ། ཀུན་དབང་གི་གསུངས་སྒྲའམ། ཡང་ན་དཔུང་ཚོགས་ཀྱིས་ཅ་ཅོ་སྒྲོག་པ་བཞིན་དུ་ངས་དེ་དག་གི་གཤོག་སྒྲ་ཐོས་པ་དང་། ཡང་དེ་དག་ལངས་སྡོད་དུས་གཤོག་པ་ནི་ཐུར་དུ་འཕྱང་ངོ་།།
[25] ཁོ་ཚོའི་མགོ་ཐོག་གི་ནམ་མཁའ་ནས་གསུངས་སྐད་ཅིག་བྱུང་དུས། དེ་དག་ལངས་ནས་བསྡད་པ་དང་། གཤོག་པ་ནི་ཐུར་དུ་འཕྱང་བ་ཡིན།
[26] དེ་ཚོའི་མགོ་ཐོག་གི་ནམ་མཁའི་སྟེང་དུ། རྡོ་རྗེ་ཕ་ལམ་སྔོན་པོ་དང་འདྲ་བའི་བཞུགས་ཁྲིའི་དབྱིབས་ཡོད་དེ། བཞུགས་ཁྲིའི་དབྱིབས་དེའི་སྟེང་དུ་མིའི་རྣམ་པ་དང་འདྲ་བའི་གཟུགས་བརྙན་ཞིག་ཡོད་དོ།།
[27] ཡང་ངས་དེའི་རྐེད་པ་ཡིན་འདྲ་བའི་ཡན་ཆད་དུ་འོད་འཕྲོས་པའི་ལྕགས་རིགས་དང་། མེ་ཡིས་དེའི་ཕྱོགས་བཞིར་སྐོར་ཡོད་པ་མཐོང་སྟེ། དེའི་རྐེད་པ་ཡིན་འདྲ་བའི་མན་ཆད་དུ། ངས་མེ་ཡོད་པ་དང་། འོད་ཟེར་གྱིས་ཁོང་གི་མཐའ་ནས་སྐོར་ཡོད་པ་མཐོང་བྱུང་།
[28] ཆར་དུས་སུ། སྤྲིན་གྱི་ནང་ནས་འཆར་བའི་འཇའ་ཚོན་ཅི་བཞིན་ཡིན་པ། ཁོང་གི་མཐའ་ནས་སྐོར་བའི་འོད་ཟེར་ཡང་དེ་བཞིན་ཏེ། འདི་ནི་གཙོ་བོ་ཡ་ཝཱེའི་གཟི་བརྗིད་ཀྱི་སྣང་བརྙན་ལགས་ཏེ། ངས་དེ་མཐོང་བ་ཙམ་གྱིས། ས་ལ་ཁ་སྦུབ་ལོག་པ་དང་། དེ་ནས་གསུངས་སྐད་ཅིག་ཐོས་སོང་།