[1] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། ཁྱོད་ཀྱིས་ཡེ་རུ་སཱ་ལེམ་ལ་ཁོ་ཚོའི་ཞེན་ལོག་གི་དོན་རྣམས་སྟོན་པར་གྱུར་ཏེ།
[3] ཁྱོད་ཀྱིས་དེ་དག་ལ། གཙོ་བོ་ཡ་ཝཱེས་ཡེ་རུ་སཱ་ལེམ་གྱི་མི་སྡེ་ལ་འདི་སྐད་དུ་གསུངས་ཏེ། ཁྱོད་ཀྱི་འབྱུང་ཁུངས་དང་སྐྱེས་ས་ནི་ཀ་ན་ཨན་པའི་ཡུལ་ཏེ། ཁྱོད་ཀྱི་ཕ་ནི་ཨེ་མོར་པ་དང་། མ་ནི་ཧེད་པ་ཞིག་གོ །
[4] ཁྱོད་སྐྱེ་བའི་གནས་ཚུལ་བརྗོད་ན། སྐྱེས་པའི་ཞག་ལ་མི་ཡིས་ཁྱོད་ཀྱི་ལྟེ་བ་མ་བཅད་ལ། གཙང་དག་བྱེད་དུ་ཁྱོད་ནི་ཆུའི་ནང་དུའང་མ་བཀྲུས་ཏེ། ཁྱོད་ཀྱི་ལུས་སྟེང་དུ་ཚྭ་ཡང་མ་གཏོར་བར། རས་ཀྱིས་ཁྱོད་ཀྱང་མ་བཏུམས་སོ།།
[5] ཁྱོད་ལ་སྙིང་རྗེ་ཞིང་། དེ་ལྟར་བྱེད་མཁན་མི་གཅིག་ཀྱང་མེད་དེ། མི་ཡིས་ཁྱོད་ནི་ཐང་ཆེན་དུ་དོར་བ་དང་། གང་ལ་ཞེ་ན། ཁྱོད་སྐྱེས་དུས་མི་རྣམས་ཀྱིས་ཁྱོད་ལ་ཞེན་ལོག་པའི་ཕྱིར།
[6] དེའང་ང་རང་ཁྱོད་ཀྱི་མདུན་ནས་རྒྱུ་དུས་སུ། ཁྱོད་ནི་ཁྲག་གི་ནང་དུ་རྡོག་རྒྱག་པ་མཐོང་སྟེ། དུས་དེར་ཁྱོད་ནི་ཁྲག་གི་ནང་དུ་ཉལ་ཏེ། ངས་ཁྱོད་ལ་འདི་སྐད་དུ། གསོན་པར་གྱིས་ཤིག་གསུངས་པ་དང་།
[7] ཞིང་ཁའི་རྩི་ཤིང་བཞིན་དུ་ངས་ཁྱོད་སྐྱེ་བར་མཛད་པ་དང་། དེ་ནས་ཆེས་མཛེས་པའི་མུ་ཏིག་བཞིན་དུ། ཁྱོད་རང་སྐྱེས་ཏེ་ནར་སོན་ཏེ། ཁྱོད་ཀྱི་ནུ་མ་གཉིས་པོ་རྒྱས་ཏེ། ཁྱོད་ཀྱི་སྐྲ་ལོ་རིང་ཡང་། ཁྱོད་ནི་སྒྲེན་མོ་ཡིན་ནོ།།
[8] ཡང་ང་རང་ཁྱོད་ཀྱི་མདུན་དུ་རྒྱུ་བ་ན། གཅེས་འཛིན་གྱིས་གདུང་པའི་དུས་ཁྱོད་ལ་བབས་ཡོད་པ་མཐོང་སྟེ། ངས་རང་གི་གོས་ཐུ་ཡིས་ཁྱོད་ཀྱི་ལུས་གཡོགས་ནས། ཁྱོད་ཀྱི་ལུས་གཅེར་བུ་དེ་བཀབ་པ་དང་། ཡང་ཁྱོད་ལ་མནའ་བསྐྱལ་ཞིང་། ཆད་དོན་བཞག་པས། ཁྱོད་ནི་ང་ལ་གཏོགས་སོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས།
[9] དུས་དེར་ངས་ཆུ་ཡིས་ཁྱོད་བཀྲུས་ཤིང་། ཁྱོད་ཀྱི་ལུས་སྟེང་གི་ཁྲག་རྣམས་བཀྲུས་ཏེ་སྣུམ་གྱིས་བྱུགས།
[10] ངས་ཁྱོད་ཀྱི་ལུས་ནི་ཚེམ་དྲུབ་ཀྱི་གོས་ཀྱིས་གཡོགས་ཤིང་། རྐང་པར་མཚོ་དོམ་གྱི་ཀོ་ལྷམ་བསྐོན་ཞིང་། ཤིན་ཏུ་འཇམ་པའི་སོ་རས་ཀྱིས་ཁྱོད་ཀྱི་མགོ་འཐུམས་ཏེ། དར་གོས་ཁྱོད་ཀྱི་ལུས་ལ་བསྐོན་ནོ།།
[11] ངས་ཁྱོད་ལ་རྒྱན་ཆ་ཡིས་སྤྲས་ཏེ། ལག་པར་གདུ་བུ་དང་། སྐེ་ལ་སྐེ་རྒྱན་དང་།
[12] སྣ་ལ་སྣ་ལོང་དང་། རྣ་བར་རྣ་ལོང་དང་། མགོ་ལ་ཡིད་དུ་འོང་བའི་ཅོད་པན་བསྐོན།
[13] དེ་ལྟར་ཁྱོད་ལ་གསེར་དངུལ་གྱིས་བརྒྱན་ཏེ། གོས་སུ་ཤིན་ཏུ་འཇམ་པའི་སོ་རས་དང་། དར་དང་། ཚེམ་དྲུབ་ཀྱིས་གཡོགས་ཤིང་། ཁྱོད་ཀྱིས་ཟས་སུ་གྲོ་ཞིབ་དང་། སྦྲང་རྩི་དང་། སྣུམ་བཅས་སྤྱོད་པས། ཁྱོད་ནི་རབ་ཏུ་མཛེས་ཤིང་རྒྱལ་མོའི་ཁྲི་ལའང་བཞུགས་འོས་སོ།།
[14] ཁྱོད་ཀྱི་མཚན་སྙན་ནི་མཛེས་པའི་ཕྱིར་གྱིས་ཡུལ་ཁམས་ཡོངས་སུ་ཁྱབ་ཅིང་། ཁྱོད་ཡོངས་སུ་མཛེས་པ་ནི། ངས་ཁྱོད་ལ་གནང་པའི་དཔལ་དང་གཟི་བརྗིད་ཀྱི་ཕྱིར་ཡིན་ནོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[15] ཡིན་ཡང་ཁྱོད་ཀྱིས་རང་གི་གཟུགས་བྱད་མཛེས་པར་བརྟེན་པ་དང་། ཡང་རང་གི་མཚན་སྙན་ལ་བརྟེན་ནས་ལོག་གཡེམ་སྤྱད་དེ། ལམ་དུ་ཞུགས་མཁན་རེ་རེ་ལ་ཁྱོད་ཀྱིས་རང་དགར་ལོག་གཡེམ་སྤྱད་དོ།།
[16] ཡང་ཁྱོད་ཀྱིས་རང་གི་གོས་རྣམས་ཁྱེར་ཏེ། རང་གི་ཕྱིར་དུ་ཁ་མདོག་སྣ་ཚོགས་ཀྱི་མཐོ་གླིང་བརྩིགས་ཤིང་། གནས་དེར་ལོག་གཡེམ་སྤྱད་དོ།། དོན་དེ་འདྲ་བྱུང་མི་འོས་ལ། མ་འོངས་པར་ཡང་འབྱུང་མི་སྲིད།
[17] ཁྱོད་ཀྱིས་ཡང་ངས་ཁྱོད་ལ་གནང་བའི་ཡིད་དུ་འོང་བའི་གསེར་ཆས་དང་དངུལ་ཆས་རྣམས་ཁྱེར་ཏེ། རང་གི་ཕྱིར་དུ་སྐྱེས་པའི་སྐུ་འདྲ་ལུགས་ནས། དེ་དག་དང་ལོག་གཡེམ་སྤྱད་དེ།
[18] ཡང་ཁྱོད་ཀྱིས་རང་གི་ཚེམ་དྲུབ་ཀྱི་གོས་རྣམས་ཁྱེར་ནས། དེ་དག་གི་ཐོག་ཏུ་བཀབ་པ་མ་ཟད། ངའི་སྣུམ་དང་སྤོས་ཀྱང་དེ་དག་གི་མདུན་དུ་བཤམས།
[19] ངས་ཁྱོད་ལ་གནང་བའི་ཟས་རིགས་ཏེ། གྲོ་ཞིབ་དང་སྣུམ། སྦྲང་རྩི་བཅས་ཁྱོད་ཀྱིས་སྐུ་འདྲའི་མདུན་དུ་བཤམས་ཏེ་དྲི་ཞིམ་པའི་མཆོད་རྫས་སུ་བྱས་སོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས།
[20] ཡང་ཁྱོད་ལས་བཙས་པའི་ངའི་བུ་དང་བུ་མོ་སྟེ། རང་གི་བུ་དང་བུ་མོ་རྣམས་ཀྱང་ཁྱོད་ཀྱིས་དེ་དག་ལ་ཁ་ཟས་སུ་ཕུལ་བས། ཁྱོད་ཀྱི་ལོག་གཡེམ་གྱི་ལས་འདི་རྣམས་ད་དུང་ཆུང་བར་བརྩིས་སམ།
[21] ཁྱོད་ཀྱིས་ངའི་བུ་ཕྲུག་རྣམས་བསད་དེ། མེར་བརྒྱུད་ནས་ཁོ་ཚོ་སྐུ་འདྲར་ཕུལ་ཏེ།
[22] ཁྱོད་ཀྱིས་རང་གི་ཞེན་ལོག་གི་དོན་ཐམས་ཅད་དང་། ལོག་གཡེམ་སྤྱོད་པའི་དུས་སུ། རང་ཉིད་ལོ་ན་ཆུང་བའི་དུས་སུ་སྒྲེན་མོར་ཁྲག་གི་ནང་དུ་རྡོག་རྒྱག་པ་མི་དྲན་ནམ།
[23] ཁྱོད་ནི་བཀྲ་མི་ཤིས་ལ། བཀྲ་མི་ཤིས་ཞེས་གཙོ་བོ་ཡ་ཝཱེས་འདི་སྐད་དུ་གསུངས་ཤིང་། ཁྱོད་ཀྱིས་དོན་ངན་དེ་དག་སྤྱད་རྗེས།
[24] ཡང་ཁྱོད་ཀྱིས་རང་གི་ཕྱིར་དུ་གཡེམ་ཁང་བརྩིགས་ཤིང་། ཐང་ཆེན་རེ་རེ་ལ་མཆོད་ཁྲི་བརྩིགས་པ་དང་།
[25] ཁྱོད་ཀྱིས་ལམ་མདོ་རེ་རེ་ནས་མཆོད་ཁྲི་བརྩིགས་ཏེ། རང་གི་བྱད་མཛེས་པོ་དེ་ཞེན་ལོག་ཏུ་བསྒྱུར་ཞིང་། ལམ་དུ་ཞུགས་མཁན་རེ་རེ་དང་ལོག་གཡེམ་གྱི་ལས་མང་པོ་སྤྱད།
[26] ཁྱོད་ཀྱིས་རང་དགར་འདོད་ཆགས་བསྐྱེད་པའི་རང་གི་ཁྱིམ་མཚེས་ཏེ་ཨེ་ཅིབ་པ་དང་ཡང་ལོག་གཡེམ་མང་པོ་སྤྱད་པས། ངའི་ཐུགས་ཁྲོས་སུ་བཅུག
[27] དེ་བས། ངས་ཉིད་ཀྱི་ཕྱག་བརྐྱངས་ཏེ་ཁྱོད་ལ་རྒོལ་ཞིང་། ཁྱོད་ཀྱི་མངའ་ཁོངས་ཇེ་ཆུང་དུ་བཏང་སྟེ། ཁྱོད་ལ་སྡང་པའི་ཕེ་ལེ་ཤེད་པའི་བུ་མོའི་ལག་ཏུ་ཁྱོད་གཏོད་ཅིང་། དེ་ཚོས་ཁྱོད་ལ་གང་འདོད་བྱ་བར་འགྱུར་ཞིང་། ཡང་ཁྱོད་ཀྱི་འདོད་གཡེམ་གྱི་དབང་གིས་དེ་དག་ངོ་ཚ་བར་འགྱུར་རོ།།
[28] འོན་ཀྱང་ཁྱོད་ད་དུང་ཡིད་མ་ཚིམ་པར་ཨ་སུར་པ་དང་ལོག་གཡེམ་སྤྱད་དེ། ཁྱོད་དེ་དག་དང་ལོག་གཡེམ་བྱས་ཀྱང་ད་དུང་ཡིད་མ་ཚིམ།
[29] དེ་ནས་ཁྱོད་ཀྱིས་རང་གི་གཡེམ་སྤྱོད་མང་དུ་བཏང་སྟེ། ཚོང་བྱེད་པའི་ཀལ་དི་པའི་བར་དུའང་ལོག་གཡེམ་སྤྱད་ཀྱང་ད་དུང་ཡིད་མ་ཚིམ།
[30] ཁྱོད་ཀྱིས་སྤྱད་པ་དེ་ཐམས་ཅད་ནི། རང་གཤིས་གྱོང་པོ་དང་ངོ་ཚ་མེད་པའི་གཡེམ་མ་དང་འདྲ་བས། ཁྱོད་ནི་ཅི་འདྲའི་སེམས་ཤུགས་ཞན་པ་ཤེས་ཐུབ་ཅེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[31] ཁྱོད་ཀྱིས་ལམ་མདོ་རེ་རེ་ནས་རང་གི་གཡེམ་ཁང་བརྩིགས་ཤིང་། ཡང་ཐང་ཆེན་རེ་རེ་ལ་མཆོད་ཁྲི་མཐོན་པོ་བརྩིགས་ཤིང་། ཡིན་ཡང་ཁྱོད་ནི་གཡེམ་མ་བཞིན་མ་ཡིན་ནོ།། གང་ལ་ཞེ་ན། ཁྱོད་ཀྱིས་སྨད་འཚོང་ནས་ཐོབ་པའི་རྔན་པར་མཐོང་ཆུང་བྱས་པའི་ཕྱིར།
[32] རང་གི་ཁྱོ་བོའི་ཚབ་ཏུ་མི་གཞན་དང་ལེན་བྱས་པ་དང་ལོག་གཡེམ་སྤྱད་པའི་ཆུང་མ་ཁྱོད།
[33] མི་རྣམས་ཀྱིས་རྔན་པ་གཡེམ་མར་སྦྱིན་ཡང་། ཁྱོད་ཀྱིས་རང་གི་རྔན་པ་དེ་རང་ཉིད་དགའ་བའི་གྲོགས་པོ་ཚོར་སྦྱིན་ནས། ཁྱོད་དང་མཉམ་དུ་ལོག་གཡེམ་བྱ་བར། དེ་དག་ཕྱོགས་ཀུན་ནས་འོང་བར་བསླུས་སོ།།
[34] ཁྱོད་ཀྱི་གཡེམ་སྤྱོད་ནི་བུད་མེད་གཞན་དང་མི་མཚུངས་ཤིང་། གང་ལ་ཞེ་ན། མི་ཡིས་ཁྱོད་ལ་རྔན་པ་བྱིན་ནས་ཁྱོད་དང་ལོག་གཡེམ་བྱ་བར་མ་ཞུས་ཤིང་། ཁྱོད་ཀྱིས་རྔན་པ་མི་ལ་བྱིན་པས། ཁྱོད་ནི་རིགས་མི་འདྲ་བ་ཞིག་གོ །
[35] དེ་བས་སྨད་འཚོང་མ་ཁྱོད་ཀྱིས་ཡ་ཝཱེའི་བཀའ་ལ་ཉོན་ཞིག
[36] གཙོ་བོ་ཡ་ཝཱེས་འདི་སྐད་དུ། ཁྱོད་ཀྱིས་རང་གི་འདོད་པ་ཕྱིར་མངོན་ནས། ལུས་སྨད་ཕྱིར་མངོན་ཏེ་རང་གི་གྲོགས་པོ་དང་ལོག་གཡེམ་བྱས་ཤིང་། ཡང་ཁྱོད་ཀྱིས་ཞེན་ལོག་གི་སྐུ་འདྲར་དད་དེ། རང་གི་བུ་ཕྲུག་གི་ཁྲག་བཞུར་བཅུག་སྟེ། ཁྲག་དེ་སྐུ་འདྲ་ལ་ཕུལ་བའི་ཕྱིར།
[37] ངས་ཁྱོད་ཉིད་དགའ་བ་དང་སྡང་བའི་མི་རྣམས་ཏེ། ཁྱོད་དང་མཉམ་དུ་དགའ་མགུར་སྤྱད་པའི་གྲོགས་པོ་ཚང་མ་བསྡུས་ཏེ། ངས་ཕྱོགས་ཀུན་ནས་དེ་རྣམས་བསྡུས་ཏེ་ཁྱོད་ལ་རྒོལ་བར་འགྱུར་ཞིང་། ངས་དེ་དག་གི་མདུན་དུ་ཁྱོད་ཀྱི་ལུས་སྨད་མངོན་བར་གྱུར་ནས། ཁྱོད་ཀྱི་ལུས་ཡོངས་སྒྲེན་མོ་ཡིན་པ་དེ་ཚོར་མཐོང་བར་འཇུག
[38] ལོག་གཡེམ་སྤྱད་པ་དང་མི་ལ་ཁྲག་བཞུར་དུ་བཅུག་པའི་བུད་མེད་བཞིན་དུ། ངས་ཁྱོད་ལ་ཉེས་ཆད་གཅོད་ཅིང་། ངས་ཉིད་ཀྱི་ཐུགས་ཁྲོ་ཆེན་པོ་དང་ཞེ་སྡང་གིས་མི་ལ་ཁྲག་བཞུར་བཅུག་པའི་སྡིག་པ་དེ་ཁྱོད་ལ་འཁུར་དུ་འཇུག
[39] ངས་ཁྱོད་ནི་དེ་ཚོའི་ལག་ཏུ་གཏད་དེ། ཁོ་ཚོས་ཁྱོད་ཀྱི་གཡེམ་ཁང་བཤིག་ཅིང་། ཁྱོད་ཀྱི་མཆོད་ཁྲི་རྣམས་གཏོར་ཞིང་། ཁྱོད་ཀྱི་ལྭ་བ་རྣམས་བཤུས་ནས། ཁྱོད་ཀྱི་མཛེས་སྡུག་ལྡན་པའི་རིན་པོ་ཆེ་རྣམས་ཕྲོགས་ཏེ། ཁྱོད་ནི་ལུས་སྒྲེན་མོར་ལུས་པར་འགྱུར་ཞིང་།
[40] དེ་དག་གིས་མི་མང་པོ་ཁྲིད་དེ་ཡར་འོངས་ནས་ཁྱོད་ལ་རྒོལ་པར་འགྱུར་ཞིང་། ཁྱོད་ནི་རྡོ་རུབ་ལ་བཏང་སྟེ། དེ་དག་གི་རལ་གྲིས་ཁྱོད་ནི་བསྣུན་པར་འགྱུར།
[41] ཡང་དེ་དག་གིས་ཁྱོད་ཀྱི་ཁང་པ་མེར་བསྲེགས་ཏེ། བུད་མེད་མང་པོའི་མདུན་དུ་ཁྱོད་ལ་ཉེས་ཆད་གཅོད་ཅིང་། ངས་ཁྱོད་ཀྱི་གཡེམ་སྤྱོད་བཅད་དེ། ཁྱོད་ཀྱིས་མི་བསླུ་བར་འགྱུར་བའི་རྔན་པ་དེ་སླར་མི་ལ་སྦྱིན་པར་མི་འགྱུར་རོ།།
[42] དེ་བཞིན་དུ་ངས་ཁྱོད་ཀྱི་ཕྱིར་དུ་ལངས་པའི་ཁོང་ཁྲོ་དེ་ཞི་ཞིང་། ངའི་ཞེ་སྡང་ཡང་ཁྱོད་དང་བྲལ་ནས། ང་ལྷིང་འཇགས་སུ་འགྱུར་ཞིང་སླར་ཐུགས་ཁྲོ་བར་མི་འགྱུར།
[43] དེ་ཅིའི་ཕྱིར་ཞེ་ན། ཁྱོད་ཀྱིས་རང་གི་ན་ཆུང་གི་དུས་རྗེས་དྲན་མ་བྱ་བར། ད་དུང་དོན་དེ་ཐམས་ཅད་ཀྱི་སྟེང་དུ་ངའི་ཐུགས་ཁྲོས་སུ་བཅུག་པས། ལྟོས་ཤིག ཁྱོད་ཀྱིས་སྤྱད་པ་བཞིན་དུ་ངས་ཁྱོད་ལ་ལན་འཇལ་ཏོ་ཞེས་གཙོ་བོ་ཡ་ཝཱེས་གསུངས་སོ།། ཁྱོད་ཀྱི་ཞེན་ལོག་གི་དོན་རྣམས་མ་གཏོགས་པར། ཁྱོད་ཀྱིས་ད་དུང་ལོག་གཡེམ་གྱི་སྐྱུག་བྲོ་བའི་ལས་སྤྱད་པ་མ་ཡིན་ནམ།
[44] གཏམ་དཔེ་འདྲེན་མཁན་རྣམས་ཀྱིས། གཏམ་དཔེ་འདི་དྲངས་ཏེ་ཁྱོད་ལ། མ་གང་འདྲ་ལ་བུ་མོ་དེ་འདྲ་ཡོད་ཅེས་བཤད་པར་འགྱུར།
[45] ཁྱོད་ནི་དངོས་ནས་རང་གི་ཁྱོ་ག་དང་ཕྲུ་གུ་རྣམས་དོར་མཁན་གྱི་མ་ཡི་བུ་མོ་དང་། ཁྱོད་ནི་དངོས་ནས་རང་གི་ཁྱོ་ག་དང་ཕྲུ་གུ་རྣམས་དོར་མཁན་གྱི་གཅེན་གཅུང་གི་ཨ་ཅེ་དང་སྲིང་མོ་སྟེ། ཁྱོད་ཚོའི་མ་ནི་ཧེད་པ་དང་། ཁྱོད་ཚོའི་ཕ་ནི་ཨེ་མོར་པ་ཡིན།
[46] ཁྱོད་ཀྱི་གཅེན་མོ་ནི་སཱ་མར་ཡ་སྟེ། མོ་དང་མོའི་བུ་མོ་རྣམས་ནི་ཁྱོད་ཀྱི་བྱང་ཕྱོགས་སུ་བསྡད་དེ། ཁྱོད་ཀྱི་སྲིང་མོ་ནི་སཱ་དོམ་ཡིན་ཏེ། མོ་དང་མོའི་བུ་མོ་རྣམས་ནི་ཁྱོད་ཀྱི་ལྷོ་ཕྱོགས་སུ་བསྡད་དོ།།
[47] ཁྱོད་ཀྱིས་དེ་ཚོས་སྤྱད་པ་བཞིན་དུ་སྤྱད་པ་དང་། དེ་དག་གིས་ཞེན་ལོག་གི་དོན་སྤྱད་པ་བཞིན་དུ་སྤྱད་པ་མ་ཟད། ད་དུང་ཁྱོད་ཀྱིས་དོན་དེ་རྣམས་ཆུང་བར་བརྩིས་ཤིང་། ཁྱོད་ཀྱིས་སྤྱད་པའི་ལས་རྣམས་ནི་དེ་ལས་ཀྱང་ལྷག་གོ །
[48] ངས་ཉིད་ཀྱི་གཏན་དུ་གསོན་པ་ཉིད་དཔང་དུ་བཙུགས་ནས་མནའ་བསྐྱལ་ཏེ། ཁྱོད་ཀྱི་སྲིང་མོ་སཱ་དོམ་དང་མོའི་བུ་མོ་རྣམས་ཀྱིས་ཀྱང་། ཁྱོད་དང་ཁྱོད་ཀྱི་བུ་མོ་རྣམས་ཀྱིས་སྤྱད་པ་བཞིན་དུ་མ་སྤྱད་དོ་ཅེས་གཙོ་བོ་ཡ་ཝཱེས་གསུངས།
[49] དེའང་ཁྱོད་ཀྱི་སྲིང་མོ་སཱ་དོམ་གྱི་སྡིག་པ་ནི་འདི་ལྟ་སྟེ། མོ་དང་མོའི་བུ་མོ་རྣམས་ནི་ང་རྒྱལ་ཆེ་ཞིང་རང་རློམ་མཐོ་སྟེ། འབྲུ་རིགས་ཕུན་སུམ་ཚོགས་ཤིང་། འཚོ་བ་སྐྱིད་ཀྱང་། ཉམ་ཐག་པའི་མི་དང་དབུལ་ཕོངས་ཅན་ལ་རོགས་རམ་མ་བྱས་སོ།།
[50] དེ་དག་རང་སྣང་མཐོ་ཞིང་ང་རྒྱལ་ཆེ་བས། ངའི་མདུན་དུ་ཞེན་ལོག་གི་ལས་སྤྱད་པ་ངས་མཐོང་བས། དེ་རྣམས་མེད་པར་མཛད་པ་ཡིན།
[51] སཱ་མར་ཡ་ཡིས་ཁྱོད་ཀྱི་སྡིག་པའི་ཕྱེད་ཀ་ཙམ་ཡང་མ་བྱས་ལ། ཁྱོད་ཀྱིས་ཞེན་ལོག་གི་ལས་སྤྱད་པ་ནི་དེ་ལས་ཀྱང་མང་སྟེ། ཐ་ན་ཁྱོད་ཀྱིས་སྡིག་པའི་ལས་སྤྱད་པ་ལ་བསྡུར་ན་ཁྱོད་ཀྱི་གཅེན་གཅུང་དག་ནི་དྲང་བདེན་དུ་མངོན་པར་གྱུར།
[52] ཁྱོད་ཀྱིས་རང་གི་གཅེན་གཅུང་རྣམས་ནི་རང་ཉིད་ལས་དྲང་བདེན་ཡིན་པར་མངོན་གྱུར་ན། ཁྱོད་ཀྱིས་རང་གི་ངོ་ཚ་འཁུར་དགོས་ཏེ། གང་ལ་ཞེ་ན། ཁྱོད་ཀྱིས་སྤྱད་པའི་སྡིག་པ་ནི་དེ་དག་ལས་ཀྱང་སྐྱུག་བྲོ་བ་ཡིན་ཞིང་། དེ་དག་ཁྱོད་དང་བསྡུར་ན་དྲང་བདེན་ཡིན། ཁྱོད་ཀྱིས་རང་གི་གཅེན་གཅུང་ལ་དྲང་བདེན་མངོན་གྱུར་བས། ཁྱོད་ནི་ངོ་ཚ་དགོས་པ་དང་། རང་གི་ངོ་ཚ་འཁུར་དགོས་སོ།།
[53] ངས་སཱ་དོམ་དང་མོའི་བུ་མོ་རྣམས་དང་། སཱ་མར་ཡ་དང་མོའི་བུ་མོ་རྣམས་ནི་དཀའ་གནས་ལས་ལོག་པར་གཞུག་སྟེ། ངས་ཁྱོད་རྣམས་ཀྱང་དེ་དག་དང་མཉམ་དུ་ལོག་པར་གཞུག་ནས།
[54] ཁྱོད་ལ་རང་གི་ངོ་ཚ་འཁུར་བར་གཞུག་ཅིང་། ཁྱོད་ཀྱིས་སྤྱད་པའི་ལས་ཐམས་ཅད་ཀྱི་ཕྱིར་དུ་དེ་ཚོར་སེམས་གསོ་ཐོབ་པར་གྱུར་ན། ཁྱོད་ནི་ངོ་ཚ་བར་འགྱུར་རོ།།
[55] ཡང་ཁྱོད་ཀྱི་སྲིང་མོ་སཱ་དོམ་དང་། མོའི་བུ་མོ་རྣམས་ནི་སྔར་བཞིན་གནས་ཤིང་། སཱ་མར་ཡ་དང་། མོའི་བུ་མོ་རྣམས་ཀྱང་སྔར་བཞིན་གནས་བར་འགྱུར་ཞིང་། ཁྱོད་དང་ཁྱོད་ཀྱི་བུ་མོ་རྣམས་ཀྱང་སྔར་བཞིན་གནས་བར་འགྱུར།
[56] ཁྱོད་ང་རྒྱལ་ཆེ་ཞིང་རང་རློམ་མཐོ་བའི་དུས་ལ། ཁྱོད་ཀྱི་སྲིང་མོ་སཱ་དོམ་ནི་ཁྱོད་ཀྱི་ངག་གི་དགོད་གཞི་རུ་གྱུར་བ་མ་ཡིན་ནམ།
[57] དུས་དེར་ཁྱོད་ཀྱི་ངན་སྤྱོད་ནི་ད་རུང་ཕྱིར་མ་མངོན་ཏེ། ཡིན་ཡང་ད་ལྟ་ཁྱོད་ནི་ཨ་རམ་གྱི་བུ་མོ་རྣམས་དང་། ཕྱོགས་བཞིའི་མི་སྡེ་རྣམས་དང་། ཕེ་ལེ་ཤེད་ཀྱི་བུ་མོ་ཚོས་དགོད་གཞིའི་ཡུལ་དུ་གྱུར་བ་དང་། ཁྱོད་ཀྱི་མཐའ་འཁོར་གྱི་མི་རྣམས་ཀྱིས་ཀྱང་ཁྱོད་ལ་མཐོང་ཆུང་བྱ་བར་འགྱུར།
[58] ཁྱོད་ཀྱིས་རང་གི་ལོག་གཡེམ་དང་ཞེན་ལོག་གི་ལས་སྤྱད་པའི་འབྲས་བུ་དེ་འཁུར་དགོས་སོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[59] ཡང་གཙོ་བོ་ཡ་ཝཱེས་འདི་སྐད་དུ། ཀྱེ་མནའ་ཚིག་ལ་མཐོང་ཆུང་བྱེད་མཁན་དང་། ཞལ་ཆད་དོར་མཁན་ཁྱོད་ལ། ངས་ཁྱོད་ཀྱིས་སྤྱད་པ་བཞིན་དུ་ལན་འཇལ་བར་འགྱུར་ཏེ།
[60] ཡིན་ཡང་ངས་ད་དུང་ཁྱོད་གཞོན་དུས་སུ་ཁྱོད་དང་བཞག་པའི་ཞལ་ཆད་དེ་དྲན་ཞིང་། ཁྱོད་དང་མཉམ་དུ་གཏན་གནས་ཀྱི་ཞལ་ཆད་ཅིག་འཇོག་པར་འགྱུར།
[61] དེ་ནས་ཁྱོད་ཀྱིས་རང་གི་གཅེན་མོ་དང་སྲིང་མོ་དང་ལེན་བྱེད་དུས་སུ། རང་གིས་སྤྱད་པའི་ལས་རྣམས་དྲན་ཚེ་ངོ་ཚ་བར་འགྱུར་ལ། ངས་དེ་ཚོ་ནི་ཁྱོད་ལ་བུ་མོ་རུ་གནང་ཡང་། འདི་ནི་ངས་ཁྱོད་དང་མཉམ་དུ་བཞག་པའི་ཞལ་ཆད་ལས་བྱུང་བ་མ་ཡིན་ནོ།།
[62] ངས་ཁྱོད་དང་མཉམ་དུ་བཞག་པའི་ཞལ་ཆད་དེ་གཏན་པོར་མཛད་ན། ཁྱོད་ཀྱིས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར།
[63] ངས་ཁྱོད་ཀྱིས་ཅི་བྱས་ཐམས་ཅད་ལ་ཀུ་ཡངས་གཏོང་བའི་ཚེ། ཁྱོད་ཀྱིས་ཕྱིར་དྲན་ཞིང་ངོ་ཚ་བར་འགྱུར་ཏེ། ཁྱོད་ལ་ངོ་ཚ་ཐེབས་པའི་རྐྱེན་གྱིས་ཡང་བསྐྱར་ཁ་འབྱེད་པར་མི་འགྱུར་རོ་ཞེས་གཙོ་བོ་ཡ་ཝཱེས་གསུངས་སོ།།