[1] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། ཡེས་ར་ཨེལ་གྱི་རྫི་བོ་དག་ལ་ལུང་བསྟན་ཏེ་རྒོལ་ཞིག ཁྱོད་ཀྱིས་དེ་དག་ལ་འདི་ལྟར་དུ། གཙོ་བོ་ཡ་ཝཱེས་འདི་སྐད་དུ། ཡེས་ར་ཨེལ་གྱི་ལུང་སྟོན་པ་རྣམས་ནི་བཀྲ་མི་ཤིས། ཅིའི་ཕྱིར་ཞེ་ན། དེ་དག་གིས་རང་ཉིད་ཁོ་ན་འཚོ་བར་འབད་དོ།། ལུག་རྫིས་ལུག་ཁྱུ་འཚོ་འོས་པ་མ་ཡིན་ནམ།
[3] ཁྱོད་ཚོས་སྣུམ་དང་ཚིལ་ཟ་ཞིང་། ལུག་བལ་གྱོན་པ་དང་། ཤ་རྒྱགས་པའི་ལུག་བསད་ཀྱང་ལུག་ཁྱུ་མ་འཚོས་སོ།།
[4] ཤ་སྐམ་པ་རྣམས་ལ་ཁྱོད་ཚོས་ཤེད་རྒྱས་སུ་མ་བཅུག་སྟེ། ནད་ཕོག་པ་དག་ལ་ཁྱོད་ཚོས་སྨན་བཅོས་མ་བྱས། རྨས་པ་རྣམས་ཁྱོད་ཚོས་མ་དཀྲིས། བསྐྲད་པར་གྱུར་བ་དག་ཁྱོད་རྣམས་ཀྱིས་ཕྱིར་ཁྲིད་མ་འོངས་ལ། བོར་བ་དག་ཁྱོད་ཚོས་མ་བཙལ་པར། ཁྱོིད་ཚོས་ད་དུང་དེ་དག་ལ་བཙན་ཤུགས་ཀྱིས་མངའ་འོག་ཏུ་བསྡུས་སོ།།
[5] དེ་དག་ལ་ལུག་རྫི་མེད་པར་ཁ་ཐོར་དུ་སོང་སྟེ། ཐང་གི་རི་དྭགས་རྣམས་ཀྱི་ཁ་ཟས་སུ་གྱུར་ཏོ།།
[6] ངའི་ལུག་རྣམས་རི་ཀུན་དང་། རི་ཕྲན་མཐོན་པོ་ཀུན་ཏུ་འཁྱམས་པ་དང་། དེ་དག་ས་གཞི་ཡོངས་སུ་ཁ་ཐོར་དུ་སོང་ཡང་བཙལ་མཁན་མེད་ལ། བཙལ་འགྲོ་མཁན་ཡང་མེད་དོ།།
[7] དེ་བས་ཁྱོད་ཚོ་ལུག་རྫི་རྣམས་ཀྱིས་ཡ་ཝཱེའི་བཀའ་ལ་ཉོན་ཞིག་དང་།
[8] ངས་ཉིད་ཀྱི་གསོན་པ་ཉིད་དཔང་དུ་བཙུགས་ཏེ་མནའ་སྐྱེལ་དང་། ངའི་ལུག་ལ་རྫི་བོ་མེད་པས་བརྔོན་དངོས་སུ་གྱུར་ནས། ཐང་གི་རི་དྭགས་རྣམས་ཀྱི་ཁ་ཟས་སུ་གྱུར་ཏོ།། ངའི་ལུག་རྫི་རྣམས་ཀྱིས་་ངའི་ལུག་རྣམས་མི་བཙལ་ཞིང་། ཁོ་ཚོས་རང་ཉིད་འཚོ་བར་འབད་པ་ལས་ངའི་ལུག་རྣམས་མ་འཚོས་སོ་ཞེས་གཙོ་བོ་ཡ་ཝཱེས་གསུངས།
[9] དེ་བས། ཁྱོད་ཚོ་ལུག་རྫི་རྣམས་ཀྱིས་གཙོ་བོ་ཡ་ཝཱེའི་བཀའ་ལ་ཉོན་ཞིག་ཅེས་ལུང་སྟོན་ཞིག་དང་།
[10] གཙོ་བོ་ཡ་ཝཱེས་འདི་སྐད་དུ། ལྟོས་ཤིག ངས་ལུག་རྫི་རྣམས་དགྲར་འཛིན་ཏེ། ངས་དེ་ཚོའི་ལག་ནས་ངའི་ལུག་རྣམས་བླངས་ནས། དེ་དག་ལ་ཡང་བསྐྱར་ལུག་འཚོ་བར་མི་འཇུག་སྟེ། ད་ཕྱིན་ཆད་དུ་ལུག་རྫི་རྣམས་ཀྱིས་རང་ཉིད་ཀྱང་འཚོ་བར་མི་འགྱུར་རོ།། གང་ལ་ཞེ་ན། དེ་དག་གི་ཁ་ཟས་སུ་མི་འགྱུར་ཆེད་དུ། ངས་ཉིད་ཀྱི་ལུག་རྣམས་བསྐྱབ་ནས་དེ་དག་གི་ཁ་ནས་ཤོར་བར་འགྱུར་ཞེས་གསུངས་སོ།།
[11] ཅིའི་ཕྱིར་ཞེ་ན། གཙོ་བོ་ཡ་ཝཱེས་འདི་སྐད་དུ། ལྟོས་ཤིག ང་རང་ཉིད་ཀྱིས་ངའི་ལུག་རྣམས་བཙལ་ཞིང་། དེ་དག་རྙེད་པར་འགྱུར་རོ།།
[12] ཇི་སྟེ་ལུག་རྣམས་ཐོར་བའི་དུས་སུ་ལུག་རྫིས་རང་གི་ལུག་རྣམས་འཚོལ་བ་བཞིན་དུ། ངས་ཀྱང་དེ་བཞིན་དུ་ཉིད་ཀྱི་ལུག་རྣམས་འཚོལ་ཞིང་། ལུག་འདི་རྣམས་ནི་སྤྲིན་ནག་འཐིབས་ཤིང་མུན་པའི་དུས་སུ་ཡུལ་སོ་སོར་ཁ་ཐོར་དུ་སོང་བ་རྣམས། ངས་ཡུལ་དེ་ནས་དེ་དག་བསྐྱབ་པར་འགྱུར་རོ།།
[13] ངས་དེ་དག་མི་སྡེ་ཀུན་གྱི་ནང་དུ་ཁྲིད་འོངས་ནས། མི་རྒྱུད་ཀུན་ལས་བསྡུས་ཏེ། རང་ཡུལ་དུ་འཁྲིད་པར་འགྱུར་ཞིང་། ཡེས་ར་ཨེལ་གྱི་རི་རྣམས་དང་གཙང་པོའི་འགྲམ་དང་། ཡུལ་ཁམས་ཀྱི་ནང་ན་སྡོད་པའི་གནས་ཀུན་ཏུ་དེ་དག་འཚོ་བར་བྱའོ།།
[14] ངས་དེ་དག་རྩྭ་ཆུ་འཛོམས་པའི་གནས་སུ་འཚོ་ཞིང་། ཡེས་ར་ཨེལ་གྱི་རི་ཕྲན་མཐོན་པོ་རྣམས་དེ་དག་འཚོ་བའི་གནས་སུ་འགྱུར་ཞིང་། གནས་དེར་དེ་རྣམས་རྩྭ་བཟང་པོ་སྟེང་ཉལ་ཞིང་། ཡེས་ར་ཨེལ་གྱི་རི་རྣམས་ཀྱི་རྩྭ་ཁ་བཅུད་ལྡན་པ་ལ་སྤྱོད་པར་འགྱུར།
[15] ངས་རང་གི་ལུག་རྣམས་འཚོ་ཞིང་། ཉལ་དུ་གཞུག་གོ་ཅེས་གཙོ་བོ་ཡ་ཝཱེས་འདི་སྐད་དུ་གསུངས་པ་དང་།
[16] བོར་བ་རྣམས་ངས་ཕྱིར་འཚོལ་ཞིང་། ཁ་ཐོར་དུ་སོང་བ་རྣམས་ངས་ཕྱིར་འཁྲིད་འོངས་ཤིང་། རྨས་པ་རྣམས་ངས་དཀྲིས་ཤིང་། ནད་ཕོག་པ་རྣམས་ངས་ཤེད་རྒྱས་པར་འགྱུར་ལ། ཡིན་ཡང་རྒྱགས་པ་དག་ངས་ཚར་དུ་གཅད་ཅིང་། དྲང་བདེན་བཞིན་དུ་ངས་དེ་རྣམས་འཚོ་བར་འགྱུར་ཏོ།།
[17] ཀྱེ་ངའི་ལུག་ཁྱུ། ཁྱོད་ཚོའི་སྐོར་ལ་གཙོ་བོ་ཡ་ཝཱེས་འདི་སྐད་དུ། ངས་ལུག་དང་ལུག་གི་བར་དང་། ལུག་ཐུག་དང་ར་ཐུག་བར་ནས་ཉེས་ཆད་གཅོད་ཅིང་།
[18] ཁྱོད་ཚོས་རྩྭ་ཁ་བཅུད་ལྡན་པ་ལ་སྤྱད་ཀྱང་ད་དུང་ཡིད་མི་ཚིམ་མམ། རང་གི་རྩྭ་ཁའི་ལྷག་མ་རྣམས་ལ་རྡོག་བརྫིས་བརྒྱབ་ཏེ། ཡང་ཁྱོད་ཅག་གིས་ཆུ་དྭངས་པོ་འཐུངས་ཀྱང་། ལྷག་མ་རྣམས་རྐང་པས་རྙོག་པར་གྱུར།
[19] ཡིན་ཡང་ངའི་ལུག་ཁྱུས་ཁྱོད་ཚོས་བརྫིས་པ་དེ་ཟ་ཞིང་། རྐང་པས་རྙོགས་པ་དེ་འཐུང་ངོ་ཞེས་གསུངས་སོ།།
[20] དེ་བས། གཙོ་བོ་ཡ་ཝཱེས་དེ་རྣམས་ལ་འདི་སྐད་དུ། ལྟོས་ཤིག ངས་ལུག་རྒྱགས་པ་དང་ལུག་སྐམ་པའི་བར་ནས་ཉེས་ཆད་གཅོད་ཅིང་།
[21] ཅིའི་ཕྱིར་ཞེ་ན། ཁྱོད་ཚོས་རང་གི་རྐེད་པ་དང་ཕྲག་པས་ལུག་སྐམ་པ་རྣམས་ལ་འཚང་ཁ་བརྒྱབ་ནས། དེ་དག་ཕྱིར་བསྐྲད་པའི་ཕྱིར་དུ་རང་གི་རྭ་ཅོས་དེ་རྣམས་ལ་བརྡུངས་སོ།།
[22] དེ་བས། ངས་རང་གི་ལུག་རྣམས་བརྔོན་དངོས་སུ་མི་འགྱུར་ཆེད་དུ་དེ་རྣམས་བསྐྱབ་ཅིང་། ངས་ལུག་དང་ལུག་བར་ནས་ཉེས་ཆད་གཅོད་པར་འགྱུར་ཞེས་གསུངས་སོ།།
[23] ངས་རང་གི་གཡོག་པོ་དཱ་བིད་ལུག་རྫིར་བསྐོས་ཏེ། ལུག་ཁྱུ་ལ་ལྟ་ཞིང་འཚོ་བར་འགྱུར་ཞིང་། ཁོས་ལུག་ཁྱུ་འཚོས་ནས་དེ་དག་གི་ལུག་རྫི་རུ་བྱའོ།།
[24] དེ་ནས་ཡ་ཝཱེ་ང་ཁོ་ཚོའི་དཀོན་མཆོག་དང་། ངའི་གཡོག་པོ་དཱ་བིད་ཁོ་ཚོའི་དཀྱིལ་དུ་རྒྱལ་པོར་འགྱུར་ཞེས་ཡ་ཝཱེ་ངས་གསུངས་སོ།།
[25] ཡང་ངས་དེ་དག་དང་ཞི་བདེའི་ཞལ་ཆད་བཞག་སྟེ། ཡུལ་ཁམས་ཀྱི་ནང་ནས་གཅན་གཟན་ངན་པ་རྣམས་མེད་པར་བཟོ་ཞིང་། དེ་ནས་དེ་དག་དབེན་སྟོང་དུ་བདེ་བར་གནས་ཤིང་། ནགས་ཚལ་ནང་དུ་ཉལ་བར་འགྱུར།
[26] ངས་དེ་དག་དང་ངའི་རི་ཡི་མཐའ་སྐོར་ལའང་བྱིན་རླབས་གནང་སྟེ། དུས་བཞིན་དུ་ཆར་འབབ་འཇུག་སྟེ། དེ་ནི་བྱིན་རླབས་ཀྱི་ཆར་པ་ཡིན།
[27] ཐང་གི་ཤིང་སྡོང་ལ་འབྲས་བུ་ཐོགས་ཤིང་། ས་གཞིར་རང་གི་ཐོན་རྫས་ཡོད་པས། དེ་དག་རང་ཡུལ་དུ་བདེ་བར་གནས་ཤིང་། ཡང་ངས་དེ་དག་གི་གཉའ་ཤིང་བཅག་སྟེ། གཡོག་ཏུ་བཀོལ་བའི་མི་རྣམས་ཀྱི་ལག་ནས་དེ་རྣམས་སྐྱོབ་དུས་སུ། ཁོ་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར།
[28] དེ་དག་ཡང་བསྐྱར་མི་རྒྱུད་ཀུན་གྱི་བརྔོན་དངོས་སུ་མི་འགྱུར་ལ། ས་གཞིའི་རི་དྭགས་རྣམས་ཀྱིས་ཀྱང་དེ་མི་ཟ་བར། དེ་དག་བདེ་བར་གནས་ཤིང་། ཁོ་ཚོར་འཇིགས་བསྐུལ་མཁན་སུའང་མེད་དོ།།
[29] བཏབ་ནས་མིང་དུ་གྲགས་པའི་གནས་ཤིག་ངས་ཁོ་ཚོའི་ཕྱིར་དུ་དར་བར་འགྱུར་ཞིང་། མུ་གེས་ཡུལ་ཁམས་ནང་དུ་དེ་དག་ལ་ཡང་བསྐྱར་མེད་པར་མི་བཟོ་ཞིང་། སླར་མི་རྒྱུད་ཀུན་གྱི་ངོ་ཚའང་འཁུར་བར་མི་འགྱུར།
[30] དུས་དེར། ང་ཡ་ཝཱེ་ཁོ་ཚོའི་དཀོན་མཆོག་ཁོ་ཚོ་དང་མཉམ་དུ་བཞུགས་པ་རྟོགས་ཤིང་། ཡེས་ར་ཨེལ་གྱི་ཁྱིམ་རྒྱུད་ནི་ངའི་མི་སྡེ་ཡིན་པའང་རྟོགས་པར་འགྱུར་རོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[31] ཁྱོད་ཚོ་ངའི་ལུག་ཁྱུ་དང་། ངའི་རྩྭ་ར་ནང་ཡོད་པའི་ལུག་ཁྱུ་སྟེ། ང་ནི་ཁྱོད་ཅག་གི་དཀོན་མཆོག་ལགས་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།