[1] གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། ཡེས་ར་ཨེལ་གྱི་ནང་དུ་ལུང་བསྟན་པའི་ལུང་སྟོན་པ་དེ་དག་ལ་ཁྱོད་ཀྱིས་ལུང་བསྟན་ནས་རྒོལ་ཞིག་དང་། རང་གི་བསམ་པ་བཞིན་དུ་ལུང་སྟོན་པ་དེ་དག་ལ་འདི་ལྟར་དུ་སྨྲོས་ཤིག ཁྱོད་རྣམས་ཀྱིས་གཙོ་བོ་ཡ་ཝཱེའི་གསུངས་ལ་ཉོན་དང་།
[3] གཙོ་བོ་ཡ་ཝཱེས་འདི་སྐད་དུ། ཞལ་གཟིགས་ཅི་ཡང་མ་མཐོང་བར། རང་གི་ཐུགས་ཉིད་བཞིན་དུ་ལུང་སྟོན་པའི་བླུན་རྨོངས་ཅན་གྱི་ལུང་སྟོན་པ་དེ་དག་བཀྲ་མི་ཤིས་ལ།
[4] ཀྱེ་ཡེས་ར་ཨེལ། ཁྱོད་ཀྱི་ལུང་སྟོན་པ་དག་ནི་ཐང་སྟོང་གི་ཝ་མོ་བཞིན།
[5] གཙོ་བོ་ཡ་ཝཱེའི་ཉིན་མོར་དམག་འཐབ་ནང་དུ་ལངས་སྡོད་པའི་ཕྱིར་དུ། དེ་དག་ཡར་སོང་ནས་ཁ་ཤོར་བ་མ་བཀག་སྟེ། ཡེས་ར་ཨེལ་གྱི་ཁྱིམ་རྒྱུད་ཕྱིར་དུ་ཡང་བསྐྱར་རྩིག་པའང་མ་བརྩིགས།
[6] དེ་དག་གིས་མཐོང་བ་ནི་ཞལ་གཟིགས་རྫུས་མ་དང་། མགོ་སྐོར་གཏོང་པའི་མོ་བ་སྟེ། ཡ་ཝཱེས་དེ་རྣམས་མ་མངགས་ཀྱང་། ཁོ་ཚོས་ན་རེ། འདི་ནི་གཙོ་བོ་ཡ་ཝཱེའི་གསུངས་ལགས་ཟེར་ཞིང་། དེ་དག་གིས་རང་གིས་བཤད་པ་རྣམས་མངོན་པར་རེའོ།།
[7] ཁྱོད་ཚོས་ཞལ་གཟིགས་རྫུས་མ་མཐོང་ཞིང་། མགོ་སྐོར་གཏོང་པའི་མོ་བཏབ་པ་མ་ཡིན་ནམ། ཁྱོད་ཚོས་ད་དུང་འདི་ནི་ཡ་ཝཱེས་གསུངས་སོ་ཟེར་ཡང་། དོན་དངོས་སུ་ངས་དེ་ལྟར་མ་གསུངས་ཞེས་གསུངས།
[8] དེ་བས་ན་གཙོ་བོ་ཡ་ཝཱེས་འདི་སྐད་དུ། ཁྱོད་རྣམས་ཀྱིས་བཤད་པ་ནི་རྫུན་དང་། མཐོང་པ་ནི་གཡོ་འཕྲུལ་ཡིན་པས། ངས་ཁྱོད་རྣམས་ལ་རྒོལ་ཏོ་ཞེས་གསུངས་པ་དང་།
[9] ཞལ་གཟིགས་རྫུས་མ་མཐོང་མཁན་དང་། མོ་བཏབ་ནས་མི་ལ་མགོ་སྐོར་གཏོང་པའི་ལུང་སྟོན་པ་དེ་དག་ལ་ངའི་ཕྱག་གིས་རྒོལ་ཞིང་། དེ་དག་ངའི་མི་སྡེའི་ཚོགས་ཀྱི་ནང་དུ་སྡོད་མི་རུང་ལ། ཡེས་ར་ཨེལ་ཁྱིམ་རྒྱུད་ཀྱི་མིང་ཐོ་རུའང་འགོད་མི་རུང་བར། ཡེས་ར་ཨེལ་གྱི་ཡུལ་ཁམས་ནང་དུའང་འགྲོ་མི་ཆོག་སྟེ། དེ་ནས་ཁྱོད་ཚོས་ང་ནི་གཙོ་བོ་ཡ་ཝཱེ་ཡིན་པ་རྟོགས་པར་འགྱུར།
[10] གང་ལ་ཞེ་ན། ཞི་བདེ་མེད་ཀྱང་། དེ་ཚོས་ངའི་མི་སྡེ་ལ་ཞི་བདེ་ཡོད་ཅེས་བསླུས་ཤིང་། མི་ཡིས་རྩིག་པ་རྩིག་དུས་སུ། དེ་དག་གིས་རྩིག་པར་སྤྱིན་འདམ་གྱིས་བྱུགས།
[11] དེ་བས་ཁྱོད་ཀྱིས་རྩིག་པར་སྤྱིན་འདམ་གྱིས་བྱུགས་མཁན་རྣམས་ལ་འདི་ལྟར་དུ། རྩིག་པ་དེ་ནི་ལོག་པར་འགྱུར་བ་མ་ཟད། དྲག་ཆར་གྱིས་ནུབ་པར་འགྱུར་ཞེས་ཟེར་ཞིག ཀྱེ་སེར་བ་ཆེན་པོ་ཁྱོད་ནི་བོབས་དང་། དྲག་རླུང་ཡང་གཡུག་པར་འགྱུར།
[12] རྩིག་པ་དེ་ལོག་རྗེས། མི་ཡིས་ཁྱོད་རྣམས་ལ། ཁྱོད་རྣམས་ཀྱིས་བྱུགས་པའི་རྩིག་པ་དེ་གང་ན་ཡོད་ཅེས་མི་འདྲི་འམ།
[13] དེ་བས་གཙོ་བོ་ཡ་ཝཱེས་འདི་སྐད་དུ། ངས་ཉིད་ཀྱི་ཐུགས་ཁྲོ་ཆེན་པོས་དྲག་རླུང་གཡུག་པར་འགྱུར་ཞིང་། ཉིད་ཀྱི་ཞེ་སྡང་གི་ནང་དུ་དྲག་ཆར་གྱིས་ནུབ་པར་འགྱུར་ལ། ཐུགས་ཁྲོ་ཆེན་པོའི་སེར་བ་འབབ་པར་གྱུར་ནས་རྩིག་པ་དེ་མེད་པར་བྱ་སྟེ།
[14] ཁྱོད་ཚོས་སྤྱིན་འདམ་གྱིས་བྱུགས་པའི་རྩིག་པ་དེ་ངས་བཤིག་སྟེ། ས་ལ་འགྱེལ་པར་འགྱུར་ཞིང་། ཐ་ན་དེའི་རྨང་རྡོ་ཡང་མངོན་པར་འགྱུར་ལ། རྩིག་པ་ལོག་པར་འགྱུར་ལ། ཁྱོད་རྣམས་ཀྱང་དེའི་ནང་དུ་མེད་པར་འགྱུར་པས། དེ་ནས་ཁྱོད་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་ཞེས་གསུངས།
[15] དེ་ལྟར་ངས་རྩིག་པ་དང་། སྤྱིན་འདམ་གྱིས་རྩིག་པར་བྱུགས་པའི་མི་དེ་དག་གི་ཐོག་ཏུ་ཉིད་ཀྱི་ཁོང་ཁྲོ་བླུགས་རྫོགས་ནས། ངས་དེ་དག་ལ་འདི་སྐད་དུ། རྩིག་པ་མེད་པར་གྱུར་ཏེ། རྩིག་པར་སྤྱིན་འདམ་བྱུགས་མཁན་ཡང་མེད་པར་གྱུར་ཏེ།
[16] རྩིག་པར་སྤྱིན་འདམ་བྱུགས་མཁན་དེ་ཚོ་ནི། ཡེ་རུ་སཱ་ལེམ་ལུང་སྟོན་པ་རྣམས་ཡིན་ཞིང་། ཁོ་ཚོས་ཡེ་རུ་སཱ་ལེམ་གྱི་ཕྱོགས་སུ་ལུང་བསྟན་ཏེ། ཞི་བདེ་མེད་པའི་དུས་སུ། གྲོང་ཁྱེར་དེའི་ཆེད་དུ་ཞི་བདེའི་ཞལ་གཟིགས་མཐོང་བར་གྱུར་ཞེས་གཙོ་བོ་ཡ་ཝཱེས་གསུངས་སོ།།
[17] ཀྱེ་མིའི་བུ། ཁྱོད་ཀྱིས་མི་སྡེའི་ནང་གི་རང་གི་བསམ་པ་བཞིན་དུ་ལུང་སྟོན་པའི་བུད་མེད་དེ་དག་གི་ཕྱོགས་སུ་གདོང་བསྒྱུར་ཏེ། དེ་དག་ལ་རྒོལ་པའི་ལུང་སྟོན་ཞིག ཁྱོད་ཀྱིས་འདི་ལྟར་དུ།
[18] གཙོ་བོ་ཡ་ཝཱེས་འདི་སྐད་དུ་གསུངས་ཏེ། མི་རྣམས་ཀྱི་སྲོག་ལེན་པའི་ཕྱིར་དུ། མི་རྣམས་ཀྱི་ལག་རྩར་སྔགས་ལྡན་པའི་ཐི་གུ་བཙེམས་པ་དང་། མི་རྣམས་ཀྱི་ཕྱིར་དུ་རིང་ཐུང་མི་འདྲ་བའི་མགོ་རས་བཟོ་བའི་བུ་མོ་རྣམས་ནི་བཀྲ་མི་ཤིས་ལ། ཁྱོད་ཚོས་ངའི་མི་སྡེའི་སྲོག་བླངས་ན། རང་སྲོག་སྐྱོབ་ཐུབ་བམ།
[19] སོ་བ་ཁ་ཤས་དང་བག་ལེབ་དུམ་བུའི་ཕྱིར་དུ། ཁྱོད་ཚོས་ངའི་མི་སྡེའི་ནང་དུ་ང་ཁྱད་དུ་བསད་དེ། རྫུན་ཚིག་ལ་ཉན་འདོད་པའི་ངའི་མི་སྡེ་རྣམས་ལ་ཁྱོད་ཚོས་རྫུན་གཏམ་ལབ་ཅིང་། འཆི་བར་མི་འོས་པ་རྣམས་ཁྱོད་ཚོས་བསད་དེ། གསོན་མི་འོས་པ་དེ་ཚོར་ཁྱོད་ཚོས་སྲོག་བསྐྱབས་པས།
[20] གཙོ་བོ་ཡ་ཝཱེས་འདི་སྐད་དུ་གསུངས་ཏེ། ངས་ཁྱོད་ཚོའི་སྔགས་ལྡན་པའི་ཐི་གུ་དེ་དང་རྒོལ་ཞིང་། ཁྱོད་ཚོས་འདབ་ཆགས་བཟུང་པ་བཞིན་དུ། ཐི་གུ་དེ་རྣམས་ཀྱིས་མིའི་སྲོག་བླངས་པས། ངས་དེ་རྣམས་ཁྱོད་ཚོའི་མཆན་ཁུང་ནས་ལེན་པར་འགྱུར་པ་དང་། འདབ་ཆགས་བཟུང་པ་བཞིན་དུ་ཁྱོད་ཚོས་སྲོག་བླངས་པ་དེ་དག་སྒྲོལ་པར་བྱའོ།།
[21] ཡང་ཁྱོད་ཀྱི་མགོ་རས་རྣམས་བཤགས་ཏེ། ངའི་མི་སྡེ་ཁྱོད་ཀྱི་ལག་ནས་སྒྲོལ་བར་བྱ་སྟེ། ད་ཕྱིན་ཆད་ཁོ་ཚོ་ཁྱོད་ཀྱི་ལག་ལ་མི་འཚུད་པ་དང་། དེ་ནས་ཁྱོད་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་རོ།།
[22] དེ་ཅིའི་ཕྱིར་ཞེ་ན། ངས་དྲང་བདེན་ཅན་གྱི་སེམས་མ་བསད་ཀྱང་། ཁྱོད་ཚོས་རྫུན་གཏམ་གྱིས་དེ་དག་གི་སེམས་བསད་དེ། ཡང་མི་ངན་གྱི་ལག་པ་བརྟན་པོར་མཛད་པ་མ་ཟད། དེ་དག་ངན་སྤྱོད་ལས་ལོག་སྟེ་ཐར་པ་ཐོབ་དུ་མ་བཅུག་གོ །
[23] དེ་བས། ཁྱོད་ཚོས་ད་ཕྱིན་ཆད་ཞལ་གཟིགས་རྫུན་མ་མཐོང་བར་མི་འགྱུར་ལ། མོ་འདེབས་པའི་དོན་སོགས་སྤྱོད་མི་རུང་སྟེ། གང་ལ་ཞེ་ན། ངས་ཉིད་ཀྱི་མི་སྡེ་ཁྱོད་ཀྱི་ལག་ནས་སྒྲོལག་བར་བྱ་སྟེ། དེ་ནས་ཁྱོད་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་རོ།།