[1] དེའང་ལོ་བཅུ་གཅིག་པའི་ཟླ་གསུམ་པའི་ཚེས་གཅིག་ལ། གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། ཁྱོད་ཀྱིས་ཨེ་ཅིབ་ཀྱི་རྒྱལ་པོ་ཕཱར་ཨོལ་དང་དེའི་མི་སྡེ་ལ་འདི་ལྟར་དུ་སྨྲོས་ཤིག ཁྱོད་རླབས་ཆེན་ཡིན་པ་བརྗོད་ན། སུ་ཞིག་ཁྱོད་དང་འགྲན་ནུས་སམ།
[3] ལྟོས་ཤིག སྔོན་ཨ་སུར་ནི་ལེ་བ་ནོན་གྱི་ཐང་ཤིང་ཞིག་སྟེ། ལྕུག་ཕྲན་མཛེས་ཤིང་། ནགས་ཤིང་སྟུག་ཅིང་། ཤིང་སྡོང་མཐོ་ཞིང་། ཤིང་རྩེ་ནི་ཤིན་ཏུ་སྟུག་པའི་སྡོང་ལོ་ཐོག་ཏུ་ཡོད་པ་ཡིན།
[4] ཆུ་རྣམས་ཀྱིས་དེ་སྐྱེ་བར་བཅུག་སྟེ། གཡང་རོང་གིས་དེ་མཐོ་རུ་སྐྱེས་བཅུག་ཅིང་། གཙང་ཆུ་ནི་གཏིང་ཟབ་ས་ནས་བཞུར་འོངས་ནས་དེ་བཙུགས་པའི་གནས་སུ་སྐོར་བ་དང་། ཆུ་ཕྲན་རྣམས་ཀྱང་ཐང་གི་སྐྱེ་ཤིང་ཡོད་སར་བཞུར་བ་ཡིན།
[5] དེ་བས། ཤིང་སྡོང་དེ་མཐོ་ཞིང་། ཐང་གི་སྐྱེ་ཤིང་རྣམས་ལས་ཀྱང་མཐོ་ལ། དེ་སྐྱེ་ཞིང་ཡལ་ག་རྒྱས་པའི་དུས་སུ། ཆུ་འཛོམས་པའི་ཕྱིར་དུ། ཡལ་ག་རྒྱས་ཤིང་ལྕུག་ཕྲན་རིང་ངོ་།
[6] གནམ་གྱི་བྱ་ཐམས་ཅད་ཀྱིས་དེའི་ཡལ་འདབ་སྟེང་དུ་ཚང་བཅས་པ་དང་། ཐང་གི་རི་དྭགས་ཐམས་ཅད་ཀྱིས་དེའི་ཡལ་གའི་འོག་ཏུ་ཕྲུ་གུ་སྐྱེས་ཤིང་། མི་རྒྱུད་ཆེན་པོ་ཐམས་ཅད་དེའི་བསིལ་གྲིབ་འོག་ཏུ་བསྡད་པ་ཡིན།
[7] ཤིང་སྡོང་དེ་མཐོ་ཞིང་། ལྕུག་ཕྲན་རིང་བས་མཛེས་པར་མངོན་ཞིང་། གང་ལ་ཞེ་ན། དེའི་རྩ་བ་ནི་ཆུ་མང་པོའི་འོག་ཏུ་ཟུག་པའི་ཕྱིར།
[8] དཀོན་མཆོག་གི་ལྡུམ་ར་ནང་གི་ཐང་ཤིང་ཡང་དེ་དང་འགྲན་ཟླ་མེད་དེ། གསོམ་ཤིང་ཡང་དེའི་ཡལ་གའི་ཚད་དུ་མ་ཕྱིན་ལ། ཇ་སྡོང་སེར་པོའང་དེའི་ལྕུག་ཕྲན་གྱི་ཚད་དུ་མ་ཕྱིན་ཏེ། དཀོན་མཆོག་གི་ལྡུམ་ར་ནང་གི་སྐྱེ་ཤིང་གང་ལའང་དེ་ལྟ་བུའི་མཛེས་པ་མེད།
[9] དེའི་ལྕུག་ཕྲན་མང་པའི་སྒོ་ནས་ངས་དེ་མཛེས་པར་མངོན་བཅུག་སྟེ། ཐ་ན་དཀོན་མཆོག་གི་ལྡུན་ར་སྟེ་ཨེ་དེན་གྱི་སྐྱེ་ཤིང་ཐམས་ཅད་ཀྱིས་ཀྱང་དེ་ལ་ཕྲག་དོག་བྱེད་དོ།།
[10] དེ་བས་གཙོ་བོ་ཡ་ཝཱེས་འདི་སྐད་དུ། ཤིང་སྡོང་དེ་ནི་མཐོ་ཞིང་། ཤིང་རྩེ་ནི་ཤིན་ཏུ་སྟུག་པའི་སྡོང་ལོ་ཐོག་ཏུ་ཡོད་པའི་ཕྱིར་དུ་དང་། ཡང་མཐོ་བའི་ཕྱིར་དུ་དེ་ལ་ང་རྒྱལ་ཆེ་བས།
[11] ངས་དེ་ནི་མི་རྒྱུད་ཀུན་གྱི་མགོ་དཔོན་ལག་ཏུ་གཏད་ཅིང་། དེས་དེ་ལ་ཐག་གཅོད་བྱ་བར་འགྱུར་ཞིང་། དེའི་སྡུག་པའི་ཕྱིར་དུ་ངས་དེ་ཕྱིར་བསྐྲད་དོ།།
[12] ཕྱི་ཕྱོགས་པའི་ནང་གི་ཆེས་བཙན་ཤུགས་ཅན་གྱི་མི་སྡེ་ཡིས་དེ་བཅད་ནས་དོར་བར་འགྱུར་ལ། དེའི་ཡལ་ག་རི་དང་ལུང་པ་ཐམས་ཅད་ནང་དུ་ལྷུང་ཞིང་། དེའི་ཡལ་ག་འཆགས་ཏེ་ས་གཞིའི་ཆུ་རྐ་ཐམས་ཅད་ནང་དུ་ལྷུང་བར་འགྱུར། ས་གཞིའི་མི་སྡེ་ཐམས་ཅད་དེའི་བསིལ་གྲིབ་ལས་བྲལ་བར་གྱུར་ནས་དེ་སྤངས་སོ།།
[13] གནམ་མཁའི་བྱ་ཐམས་ཅད་ལོག་པར་གྱུར་བའི་ཤིང་སྡོང་སྟེང་དུ་འདུག་ཅིང་། ཐང་གི་རི་དྭགས་ཐམས་ཅད་དེའི་ལྕུག་ཕྲན་བར་དུ་སྡོད་པར་འགྱུར་རོ།།
[14] ཅིའི་ཕྱིར་ཞེ་ན། ད་ཕྱིན་ཆད་ཆུ་འགྲམ་གྱི་སྐྱེ་ཤིང་ཐམས་ཅད་ཀྱི་ནང་དུ་གང་གིས་ཀྱང་རང་ཉིད་མཐོ་བའི་ཕྱིར་དུ་རང་མཐོང་མི་བྱེད་པ་དང་། རང་གི་རྩེ་མོ་སྟུག་པའི་སྡོང་ལོ་སྟེང་དུ་རྒྱས་པར་མི་འཇུག་ཅིང་། ཆུ་ཡིས་བརླན་བསྐྱེད་པའི་ཤིང་གང་ཡང་ང་རྒྱལ་ངང་ལངས་བར་མི་འགྱུར་ཏོ།། ཅིའི་ཕྱིར་ཞེ་ན། དེ་དག་ས་གཞིའི་མི་རྣམས་ཀྱི་ནང་དུ་དང་། དམྱལ་བར་ལྷུང་བའི་མི་རྣམས་དང་བཅས་སུ་འཆི་བ་དང་ས་གཞིའི་གཏིང་ཟབ་སར་གཏད་དོ་ཅེས་གསུངས་སོ།།
[15] གཙོ་བོ་ཡ་ཝཱེས་འདི་སྐད་དུ། དེ་དམྱལ་ཡུལ་དུ་འབབ་པའི་ཉིན་མོར་ཁོའི་ཕྱིར་དུ། ངས་སྐྱོ་བས་གཏིང་ཟབ་པོ་དེ་དགབ་ཞིང་། གཏིང་ཟབ་པའི་གཙང་པོ་རྣམས་དགག་ནས་ཆུ་ཆེན་པོའི་བཞུར་མཚམས་གཅོད་པ་དང་། ལེ་བ་ནོན་ལ་ངས་དེའི་དོན་དུ་སྡུག་བསྔལ་བྱེད་དུ་འཇུག་ཅིང་། ཐང་གི་སྐྱེ་ཤིང་ཐམས་ཅད་དེའི་ཕྱིར་དུ་སྐམ་པར་འགྱུར།
[16] ངས་དེ་དམྱལ་བར་དབྱུགས་ནས། དེ་དམྱལ་བར་ལྷུང་བའི་མི་དག་དང་མཉམ་དུ་སྡོད་དུས་སུ། དེ་ལྷུང་བའི་སྒྲ་ཡིས་ངས་མི་རྒྱུད་ཀུན་འདར་བཅུག་ན། ཨེ་དེན་གྱི་ཤིང་ཐམས་ཅད་དེ། ལེ་བ་ནོན་གྱི་ཆུ་ཡིས་བརླན་པར་གྱུར་བའི་ཤིང་དང་། ཆེས་བཟང་ཞིང་ལེགས་པའི་ཤིང་ཐམས་ཅད་ལ་ས་འོག་ཏུ་སེམས་གསོ་ཐོབ་པར་འགྱུར།
[17] ཤིང་དེ་དག་ཀྱང་དེ་དང་མཉམ་དུ་དམྱལ་བར་འབབ་ཅིང་། རལ་གྲིས་བཀུམ་པའི་མི་རྣམས་ཀྱི་དྲུང་དུ་འགྲོ་ཞིང་། མི་དེ་རྣམས་དེའི་དཔུང་ཡ་ཡིན་ཞིང་། སྔོན་མི་རྒྱུད་ཀུན་གྱི་ནང་དུ་དེའི་བསིལ་གྲིབ་འོག་ཏུ་བསྡད་པ་ཡིན།
[18] ཁྱོད་ཀྱི་དཔལ་དང་མཐོ་ཞིང་ཆེ་བ་ལ་ཨེ་དེན་གྱི་ལྗོན་ཤིང་ལས་སུས་འགྲན་ཟླ་བྱེད་ནུས་སམ། ཡིན་ཡང་ཁྱོད་ཨེ་དེན་གྱི་ལྗོན་པ་རྣམས་དང་བཅས་ས་འོག་ཏུ་འབབ་པ་མ་ཟད། རལ་གྲིས་བཀུམ་པ་རྣམས་དང་བཅས་སུ་མདུན་ལྤགས་མ་བཅད་པའི་མི་དང་མཉམ་དུ་ཁྱོད་ཉལ་བར་འགྱུར། ཤིང་སྡོང་འདི་ནི་ཕཱར་ཨོལ་དང་། ཁོའི་མི་སྡེ་རྣམས་ཡིན་ཞེས་གཙོ་བོ་ཡ་ཝཱེས་གསུངས་སོ།།