[1] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཡེས་ར་ཨེལ་གྱི་སྐོར་གླེང་ན། ཕ་ཡིས་རྒུན་འབྲུམ་སྐྱུར་པོ་བཟས་པས། བུ་ཡི་སོ་བརྩེད་དོ།། ཅེས་པའི་གཏམ་དཔེ་འདི་ཁྱོད་ཚོས་ཅི་ལ་དྲངས་སམ།
[3] ངས་རང་གི་གཏན་དུ་གསོན་པ་ཉིད་དཔང་དུ་བཙུགས་ཏེ་མནའ་བསྐྱལ་དང་། ཁྱོད་ཀྱིས་ཡེས་ར་ཨེལ་གྱི་ནང་དུ་གཏམ་དཔེ་འདི་སླར་དྲངས་པར་མི་འགྱུར་རོ་ཞེས་གཙོ་བོ་ཡ་ཝཱེས་གསུངས་སོ།།
[4] ལྟོས་ཤིག མི་ཐམས་ཅད་ང་ལ་གཏོགས་ཤིང་། ཅི་ལྟར་ཕ་རྣམས་ང་ལ་གཏོགས་པ་བཞིན་དུ། བུ་རྣམས་ཀྱང་ང་ལ་གཏོགས་སོ།། ཡིན་ཡང་སྡིག་སྤྱོད་དག་འཆི་བར་འགྱུར་རོ།།
[5] ཡིན་ཡང་མི་དྲང་བདེན་ཅན་ཡིན་ཞིང་། བདེན་པ་ཉིད་དང་དྲང་བའི་ལས་སྤྱད་དེ།
[6] དེ་ཡིས་རི་རྣམས་ཀྱི་ཁར་མཆོད་རྫས་མི་ཟ་ཞིང་། ཡེས་ར་ཨེལ་ཁྱིམ་རྒྱུད་ཀྱི་སྐུ་འདྲ་རྣམས་ལ་མིག་གིས་རེ་སྨོན་མི་བྱ་ཞིང་། རང་གི་ཁྱིམ་མཚེས་ཀྱི་ཆུང་མ་བརླགས་པར་མ་འགྱུར་ཞིང་། ཟླ་མཚན་དང་ལྡན་པའི་བུད་མེད་ཀྱི་རྩར་མ་འགྲོ་ཞིང་།
[7] མི་སུ་ལའང་བརྙས་བཅོས་དང་གཉའ་གནོན་མ་བྱ་སྟེ། བུན་བདག་གི་གཏའ་མར་བཞག་པ་བྱིན་ཏེ། མི་ཡི་རྒྱུ་ནོར་ཁོས་མི་དབྲོག་ཅིང་། ད་དུང་ལྟོགས་པ་ལ་རང་གི་ཁ་ཟས་སྦྱིན་ཞིང་། གཅེར་བུ་ལ་གོས་བྱིན་ཏེ་གྱོན་པར་བཅུག
[8] མི་ལ་དངོས་པོ་གཡར་ན་ཁོས་བུན་སྐྱེད་མི་ལེན་ཞིང་། མང་པོའང་མི་ལེན་ཞིང་། ཁོས་རང་གི་ལག་པ་ནག་ཉེས་ལས་བྲེལ་བར་བཅུག་ནས། མི་དང་མིའི་བར་དུ་དྲང་བདེན་གྱི་ཁྲིམས་བཅད་དེ།
[9] ངའི་བཀའ་ཁྲིམས་དེས་བརྩིས་ཤིང་། ངའི་ཁྲིམས་ལུགས་བསྲུངས་ནས། དྲང་བདེན་བཞིན་སྤྱད་ན། མི་དེ་ནི་དྲང་བདེན་ཅན་ཞིག་ཡིན་པས། དེ་གསོན་བར་འགྱུར་རོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[10] དེའང་ཁོ་ལ་བུ་ཞིག་སྐྱེས་ན། བུ་དེ་ནི་གཏུམ་དྲག་ཅན་ཡིན་ཞིང་། མི་གཞན་ལ་ཁྲག་བཞུར་དུ་བཅུག་པ་དང་། ཡང་ན་རང་གི་སྤུན་ཟླར་གོང་ནས་བརྗོད་པའི་ངན་སྤྱོད་ལས་གཅིག་སྤྱད་ན།
[11] ཁོའི་ཨ་ཕས་བྱ་བ་དེ་རྣམས་མ་སྤྱད་ཀྱང་། ཁོས་རི་རྣམས་ཀྱི་ཁར་མཆོད་རྫས་བཟས་ཤིང་། རང་གི་ཁྱིམ་མཚེས་ཀྱི་ཆུང་མ་བརླགས་བར་གྱུར་ཏེ།
[12] དཀའ་སྡུག་ཅན་དང་དབུལ་པོར་བརྙས་བཅོས་དང་གཉའ་གནོན་བྱས་ཤིང་། མི་ཡི་རྒྱུ་ནོར་ཁོས་ཕྲོགས་ཏེ། བུན་བདག་གི་གཏའ་མར་བཞག་པ་མ་བྱིན་ཞིང་། མིག་གིས་སྐུ་འདྲར་རེ་སྨོན་བྱས་ཤིང་། ཞེན་ལོག་གི་ལས་སྤྱད་ཅིང་།
[13] མི་ལ་དངོས་པོ་གཡར་ན་ཁོས་བུན་སྐྱེད་ལེན་ཞིང་། མང་པོ་ལེན་ཞིང་། དེ་ལྟ་བུའི་མི་གསོན་བར་འགྱུར་རམ་ཞེ་ན། དེ་ནི་དངོས་ནས་གསོན་བར་མི་འགྱུར་ཞིང་། ཁོས་ཞེན་ལོག་གི་ལས་འདི་ཐམས་ཅད་སྤྱད་པས། འཆི་བར་འགྱུར་ལ། ཁོའི་སྡིག་པ་རང་གི་ཐོག་ཏུ་འབབ་པར་འགྱུར།
[14] དེའང་ཁོ་ལ་བུ་ཞིག་སྐྱེས་ན། བུ་དེས་རང་གི་ཕ་ཡིས་སྤྱད་པའི་སྡིག་པ་ཐམས་ཅད་མཐོང་སྟེ། བུ་དེས་མཐོང་ཡང་། དེ་བཞིན་དུ་མ་སྤྱད་པར།
[15] ཁོས་རི་རྣམས་ཀྱི་ཁར་མཆོད་རྫས་མ་བཟས་ཤིང་། ཡེས་ར་ཨེལ་ཁྱིམ་རྒྱུད་ཀྱི་སྐུ་འདྲ་རྣམས་ལ་མིག་གིས་རེ་སྨོན་མ་བྱས་ཤིང་། རང་གི་ཁྱིམ་མཚེས་ཀྱི་ཆུང་མ་བརླགས་པར་མ་གྱུར་ཞིང་།
[16] མི་གང་ལའང་བརྙས་བཅོས་དང་གཉའ་གནོན་མ་བྱས་ཤིང་། གཏའ་མར་བཞག་པ་མ་བླངས་པར། མི་ཡི་རྒྱུ་ནོར་མ་ཕྲོགས་ཤིང་། ད་དུང་ལྟོགས་པ་ལ་རང་གི་ཁ་ཟས་སྦྱིན་པ་དང་། གཅེར་བུ་ལ་གོས་བྱིན་ཏེ་གྱོན་དུ་བཅུག་སྟེ།
[17] ཁོས་ཕྱག་བརྐྱངས་ཏེ་དཀའ་སྡུག་ཅན་ལ་བརྙས་བཅོས་དང་གཉའ་གནོན་མ་བྱས་ཤིང་། མི་ལ་དངོས་པོ་གཡར་ན་ཁོས་བུན་སྐྱེད་མ་བླངས་ཤིང་། མང་པོའང་མ་བླངས་པར། ཁོས་ངའི་ཁྲིམས་ལུགས་བསྲུངས་ཏེ། ངའི་བཀའ་ཁྲིམས་བརྩིས་ན། མི་དེ་ནི་རང་གི་ཕ་ཡི་སྡིག་པའི་ཕྱིར་དུ་མི་འཆི་ཞིང་། ངེས་པར་དུ་གསོན་བར་འགྱུར་རོ།།
[18] དེའི་ཨ་ཕ་ལ་མཚོན་ན། ཁོས་མི་གཞན་གྱི་དངོས་པོ་བཙན་ལེན་བྱས་ཏེ། སྤུན་ཟླའི་དངོས་པོ་ཕྲོགས་ཤིང་། རང་གི་མི་སྡེའི་མདུན་དུ་ངན་པ་སྤྱད་པས། དེ་ནི་རང་གི་སྡིག་པའི་ཕྱིར་དུ་འཆི་བར་འགྱུར།
[19] ཡང་ཁྱོད་ཚོས། བུ་ཡིས་རང་གི་ཕ་ཡི་སྡིག་པ་ཅིའི་ཕྱིར་མི་འཁུར་ཞེས་ཟེར་ན། གལ་ཏེ་བུ་ཡིས་དྲང་བདེན་དང་བདེན་པ་ཉིད་ཀྱི་དོན་སྤྱད་ཅིང་། ངའི་བཀའ་ཁྲིམས་ནང་དུ་འགྲུལ་ན་དེ་ངེས་པར་དུ་གསོན་བར་འགྱུར་རོ།།
[20] སྡིག་པ་བྱས་པ་དེ་ཁོ་ན་འཆི་བར་འགྱུར་ཞིང་། བུ་ཡིས་རང་གི་ཕ་ཡི་སྡིག་པ་མི་འཁུར་ཞིང་། ཕ་ཡིས་ཀྱང་རང་གི་བུའི་སྡིག་པ་འཁུར་མི་དགོས་པར། དྲང་བདེན་ཅན་གྱི་དྲང་བ་ཉིད་དེ་རང་གི་ཐོག་ཏུ་འབབ་པར་འགྱུར་ལ། སྡིག་སྤྱོད་ཀྱི་ངན་ཡང་རང་གི་ཐོག་ཏུ་འབབ་པར་འགྱུར།
[21] ཇི་སྟེ་སྡིག་སྤྱོད་ཅན་ནི་རང་གི་སྡིག་པ་ཐམས་ཅད་ལས་བྲལ་ཞིང་ཕྱིར་ལོག་ནས། ངའི་བཀའ་ཁྲིམས་ཐམས་ཅད་བསྲུངས་ཤིང་། དྲང་བདེན་དང་བདེན་པ་ཉིད་ཀྱི་དོན་སྤྱད་ན། གསོན་བར་འགྱུར་བ་ལས། འཆི་བར་མི་འགྱུར་རོ།།
[22] ཡང་དེ་ལ་ནག་ཉེས་བགྲང་བའི་ཁ་གཡོར་བྱེད་དུ། དེས་བྱས་པའི་སྡིག་པ་ཐམས་ཅད་ཀྱང་དྲན་པར་མི་བྱ་སྟེ། དེ་ནི་རང་གིས་བྱས་པའི་དྲང་བ་ཉིད་ཀྱི་ཕྱིར་དུ་གསོན་བར་འགྱུར།
[23] སྡིག་སྤྱོད་རང་གི་ལམ་ནང་འཆི་བར་ང་དགའ་ཞིང་། ཁོ་ཚོས་སྤྱད་པའི་ལས་ནས་ཕྱིར་ལོག་སྟེ་གསོན་བར་གྱུར་ན་ང་མི་དགའ་འམ་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[24] ཇི་སྟེ་མི་དྲང་བདེན་ཅན་གྱིས་རང་གི་བདེན་པ་ཉིད་དང་བྲལ་ཏེ་ངན་པ་སྤྱད་དེ། སྡིག་སྤྱོད་བཞིན་དུ་ཞེན་ལོག་གི་དོན་སྤྱད་ན། ཁོ་ནི་གསོན་བར་འགྱུར་རམ། ཁོས་སྤྱད་པའི་བདེན་པ་ཉིད་ཐམས་ཅད་དྲན་པར་མི་འགྱུར་ཞིང་། རང་གིས་སྤྱད་པའི་གཞུང་དྲང་མིན་པའི་དོན་དང་ཁོས་སྤྱད་པའི་ཉེས་སྡིག་གི་ཕྱིར་དུ་ཁོ་འཆི་བར་འགྱུར་རོ།།
[25] ཇི་སྟེ་ཁྱོད་ཚོས་ད་དུང་ན་རེ། གཙོ་བོས་མཛད་པ་བདེན་པ་ཉིད་མིན་ནོ་ཟེར་ཞིང་། ཀྱེ་ཡེས་ར་ཨེལ་གྱི་ཁྱིམ་རྒྱུད་ལགས། ཁྱོད་ཚོས་ཉོན་ཞིག ངས་མཛད་པ་གང་ནས་དྲང་བདེན་མ་ཡིན་ནམ། ཁྱོད་ཚོས་སྤྱད་པ་དྲང་བདེན་མ་ཡིན་པ་མིན་ནམ།
[26] མི་དྲང་བདེན་ཅན་གྱིས་རང་གི་བདེན་པ་ཉིད་དང་བྲལ་ཏེ་ངན་པ་སྤྱད་ན། ཁོ་ནི་དེའི་ཕྱིར་དུ་འཆི་བར་འགྱུར་ཞིང་། དེ་ནི་རང་གིས་སྤྱད་པའི་བདེན་པ་མིན་པ་དེ་ཕྱིར་དུ་འཆི་བར་འགྱུར།
[27] ཡང་ཇི་སྟེ་སྡིག་སྤྱོད་རང་གིས་བྱས་པའི་ངན་པ་ལས་བྲལ་ཏེ་ཕྱིར་ལོག་ཅིང་། དྲང་བ་ཉིད་དང་བདེན་པ་ཉིད་ཀྱི་དོན་སྤྱད་ན། དེས་རང་གི་ཚེ་སྲོག་སྐྱོབ་པར་འགྱུར་རོ།།
[28] གང་ལ་ཞེ་ན། ཁོས་བསམ་བློ་བཏང་རྗེས། རང་གི་སྤྱད་པའི་སྡིག་པ་ཐམས་ཅད་ལས་བྲལ་བས། ཁོ་ནི་གསོན་པར་ལུས་ཤིང་འཆི་བར་མི་འགྱུར་རོ།།
[29] ཡིན་ཡང་ཡེས་ར་ཨེལ་ཁྱིམ་རྒྱུད་རྣམས་ཀྱིས་ན་རེ། གཙོ་བོས་མཛད་པ་དྲང་བདེན་མ་ཡིན་ནོ་ཟེར་ཞིང་། ཀྱེ་ཡེས་ར་ཨེལ་གྱི་ཁྱིམ་རྒྱུད་ལགས། ངས་སྤྱད་པ་གང་ནས་དྲང་བདེན་མ་ཡིན་ནམ། ཁྱོད་ཚོས་སྤྱད་པ་དྲང་བདེན་མིན་པ་མ་ཡིན་ནམ།
[30] དེ་བས། ཀྱེ་ཡེས་ར་ཨེལ་གྱི་ཁྱིམ་རྒྱུད་ལགས། ངས་ཁྱོད་ཚོ་རེ་རེས་སྤྱད་པའི་ལས་བཞིན་དུ་ཁྱོད་ཚོར་ཉེས་ཆད་གཅད་ཅིང་། སྡིག་པ་དེ་རང་གི་བཀག་རྡོ་རུ་མི་འགྱུར་བའི་ཆེད་དུ། ཁྱོད་ཚོ་རང་གི་སྡིག་པ་ཐམས་ཅད་ལས་བྲལ་ནས་ཕྱོར་ལོག་པར་གྱུར་ཞིག་ཅེས་གཙོ་བོ་ཡ་ཝཱེས་འདི་སྐད་དུ་གསུངས།
[31] ཁྱོད་ཚོས་རང་གིས་སྤྱད་པའི་སྡིག་པ་ཐམས་ཅད་དོར་ནས། རང་གི་ཕྱིར་དུ་སེམས་གསར་པ་དང་ཐུགས་ཉིད་གསར་པ་ཞིག་སྐྱེད་དུ་ཆུགས། ཀྱེ་ཡེས་ར་ཨེལ་གྱི་ཁྱིམ་རྒྱུད་ལགས། ཁྱོད་རྣམས་ཅིའི་ཕྱིར་འཆི་བར་གྱུར་རམ།
[32] སུ་ཞིག་འཆི་བར་གྱུར་ཡང་ང་མི་དགའ་བས། ཁྱོད་རྣམས་ཕྱིར་ལོག་དང་གསོན་བར་འགྱུར་ཞེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།