[1] དེ་ནས་ཡང་དེས་ང་གཙང་ཁང་གི་སྒོ་ཁར་ཁྲིད་པ་དང་། གཙང་ཁང་དེ་ཤར་ཕྱོགས་སུ་འཁོར་ཡོད་པས། དེའི་མདུན་ཕྱོགས་ཀྱི་སྒོ་ཁྱམས་ནས་ཆུ་འོངས་ཏེ་ཤར་ཕྱོགས་སུ་བཞུར་བ་དང་། ཆུ་དེ་ནི་གཙང་ཁང་གི་གཡས་སུ་མཆོད་ཁྲིའི་ལྷོ་ཕྱོགས་ཀྱི་ས་འོག་ནས་བཞུར་འོངས་པ་ཡིན།
[2] དེས་ང་བྱང་སྒོ་ནས་ཕྱི་རོལ་དུ་ཁྲིད་ནས། ཡང་ང་ཕྱི་རོལ་ནས་ཁྲིད་དེ་ཤར་ཕྱོགས་ཀྱི་ཕྱི་སྒོ་ལ་སྐོར་བ་ན། གཡས་ཕྱོགས་ནས་ཆུ་བཞུར་འོངས་པ་ཡིན།
[3] མི་དེའི་ལག་ཏུ་ཚད་བྱེད་ཀྱི་ཐག་པ་ཞིག་བཟུང་སྟེ་ཤར་ཕྱོགས་སུ་འགྲོ་སྐབས། ཁྲུ་ལྔ་བརྒྱའི་རིང་ཐུང་བླངས་པ་དང་། དེ་ནས་དེས་ང་ཆུ་ནང་རྒྱུ་སྟེ་ཁྲིད་པ་ན་ཆུ་ནི་སྲེ་ལོང་བར་དུ་ཐོན་ནོ།།
[4] ཡང་དེས་ཁྲུ་ལྔ་བརྒྱ་ཚད་དེ། ང་ཆུ་ནང་རྒྱུ་སྟེ་ཁྲིད་པ་ན་ཆུ་ནི་པུས་མོ་ཡི་མཚམས་སུ་ཐོན་པ་དང་། ཡང་དེས་ཁྲུ་ལྔ་བརྒྱ་ཚད་དེ། ང་ཆུ་ནང་རྒྱུ་སྟེ་ཁྲིད་པ་ན་ཆུ་སྐེད་པའི་མཚམས་སུ་ཐོན་ནོ།།
[5] དེས་ཡང་བསྐྱར་ཁྲུ་ལྔ་བརྒྱ་ཚད་པ་ན་ཆུ་དེ་ནི་གཙང་པོ་ཞིག་ཏུ་གྱུར་ཏེ། ང་ཡང་དེར་བརྒལ་ནས་འགྲོ་མི་ཐུབ་བོ།། གང་ལ་ཞེ་ན། ཆུ་ཤུགས་རྒྱས་ཏེ་རྐྱལ་ཆོག་པའི་ཆུ་རུ་གྱུར་བས་ཕ་རོལ་དུ་བརྒལ་མི་ཐུབ་པའི་གཙང་པོ་རུ་གྱུར་ཏོ།།
[6] དེས་ང་ལ་འདི་ལྟར་དུ། ཀྱེ་མིའི་བུ། ཁྱོད་ཀྱིས་འདི་མཐོང་ངམ་ཞེས་གསུངས་ནས། ང་ཁྲིད་དེ་སླར་གཙང་འགྲམ་དུ་ཕྱིན།
[7] ང་ཕྱིར་ལོག་དུས་སུ། གཙང་པོའི་ཕར་ཚུར་གཉིས་པོའི་འགྲམ་ན་སྐྱེ་ཤིང་མང་པོ་ཡོད་པ་མཐོང་།
[8] ཡང་དེས་ང་ལ་འདི་ལྟར་དུ། ཆུ་འདི་ནི་ཤར་ཕྱོགས་ཀྱི་གནས་སུ་བཞུར་ཏེ། མར་ཨ་བད་རཱ་རུ་བཞུར་ནས་འཆི་མཚོར་བབས་ཏེ། ཆུ་དེ་འཆི་མཚོ་ནང་དུ་བཞུར་ནས་རྒྱ་མཚོའི་ཆུ་ནང་གི་ཚྭ་ཉུང་བར་གྱུར་བ་དང་།
[9] དུས་དེར། ཆུ་བཞུར་ས་ཀུན་ཏུ་སྐྱེ་འཕེལ་བྱུང་བའི་སྲོག་ཆགས་ཐམས་ཅད་གསོན་པར་འགྱུར་ཞིང་། ཆུ་དེ་གང་དུ་བཞུར་ན་དེ་རུ་ཉ་ཤུན་ཏུ་མང་ཞིང་། ཅིའི་ཕྱིར་ཞེ་ན། གཙང་པོ་དེ་གང་དུ་བཞུར་ན་རྒྱ་མཚོའི་ཚྭ་ཇེ་ཉུང་དུ་སོང་སྟེ། སྲོག་ཆགས་ཐམས་ཅད་གསོན་ཐུབ་པར་གྱུར་སོང་།
[10] དེ་ནས་ཨེན་གེ་དི་ནས་ཨེན་ཨེག་ལཱ་ཡིམ་གྱི་བར་དུ་ཉ་པ་རྣམས་གཙང་འགྲམ་དུ་ལངས་ཏེ་ཐམས་ཅད་ཉ་དྲ་གདིང་ས་ཡིན་ཏེ། རྒྱ་མཚོ་ནང་གི་ཉ་བཞིན་དུ་ཉ་སྣ་ཆོགས་ཤིན་ཏུ་མང་ངོ་།
[11] ཡིན་ཡང་ན་འདམ་དང་གཤོང་སའི་ཆུ་ནི་ཚྭ་མེད་པར་འགྱུར་མི་རུང་བར་ཚྭ་ཐང་དུ་འགྱུར་བར་འགྱུར།
[12] གཙང་པོའི་ཕར་ཚུར་གཉིས་པོའི་འགྲམ་ན་འབྲས་ཤིང་སྣ་ཚོགས་སྐྱེ་སྟེ་བཟའ་ཆས་སུ་འགྱུར་ཞིང་། ཤིང་སྡོང་གི་ལོ་མ་སྐམ་པར་མི་འགྱུར་ལ། འབྲས་བུའང་ཆད་པར་མི་འགྱུར་བར་ཟླ་རེ་རེ་ལ་འབྲས་བུ་གསར་པ་ཐོགས་ཤིང་། གང་ལ་ཞེ་ན། ཤིང་སྡོང་ལ་མཁོ་བའི་ཆུ་དེ་ནི་གནས་མཆོག་ལས་བཞུར་འོངས་བའི་ཕྱིར། ཡང་ཤིང་སྡོང་གི་འབྲས་བུ་བཟའ་ཆས་སུ་སྤྱོད་པ་དང་ལོ་མས་ནད་གསོ་ཆོག་གོ་ཅེས་སྨྲས་སོ།།
[13] གཙོ་བོ་ཡ་ཝཱེས་འདི་སྐད་དུ། ཁྱོད་ཚོས་ཡེས་ར་ཨེལ་གྱི་སྡེ་ཁག་བཅུ་གཉིས་བཞིན་དུ་ས་སྒོས་ཏེ་ནོར་སྐལ་དུ་བྱོས་དང་། ས་མཚམས་འདི་དག་བཞིན་དུ་ཡོ་སེབ་ལ་གཉིས་སྐལ་ཐོབ་པར་འགྱུར།
[14] ཁྱོད་ཚོས་ས་སྐལ་འདི་ཆ་ཉམས་ངང་སྒོས་ཏེ་ནོར་སྐལ་དུ་བྱོས་ཤིག ཅིའི་ཕྱིར་ཞེ་ན། ངས་ཉིད་ཀྱི་ཕྱག་བརྐྱངས་ཏེ་ཁྱོད་ཅག་གི་མེས་པོ་རྣམས་ལ་ས་འདི་སྦྱིན་པར་ཁས་བླངས་པས། ཡུལ་ཁམས་འདི་ཁྱོད་ཚོའི་ས་སྐལ་དུ་ཐོབ་པར་འགྱུར།
[15] ཡུལ་འདིའི་ས་མཚམས་ནི་བྱང་ཕྱོགས་ཀྱི་རྒྱ་མཚོ་ཆེན་པོ་བརྒྱུད་དེ་ཧེད་ལོན་གྱི་ལམ་ལ་ཞུགས་ནས་ཚེ་དད་འགྲོ་སར་ཐོན་པ་དང་།
[16] ཡང་ཧ་མཱད་དང་པེ་རོ་ཏ། དཱ་མེ་སེག་དང་ཧ་མཱད་ཀྱི་ས་མཚམས་སུ་ཡོད་པའི་སིབ་ར་ཨིམ་བརྒྱུད་དེ། ཧོ་རན་ས་མཚམས་ཀྱི་ཧ་ཚར་ཧད་ཏི་ཀན་ལ་ཐོན་ནོ།།
[17] ཡང་ས་མཚམས་འདི་ནི་རྒྱ་མཚོ་ནས་ཧ་ཚར་ཨེ་ནན་དང་། བྱང་ཕྱོགས་སུ་དཱ་མེ་སེག་གི་ས་མཚམས་དང་། བྱང་གི་བྱང་ཕྱོགས་སུ་ཧ་མཱད་ཀྱི་ས་མཚམས་ཡིན་པ་དང་། འདི་ནི་བྱང་ཕྱོགས་ཀྱི་ས་མཚམས་ཡིན།
[18] ཤར་ཕྱོགས་ཀྱི་ས་མཚམས་ནི་ཧོ་རན་དང་དཱ་མེ་སེག་གཉིས་ཀྱི་བར་དང་། གིལ་ཨད་དང་ཡེས་ར་ཨེལ་ཡུལ་གྱི་བར་གྱི་ཡོར་དན་གཙང་པོ་ཡིན་པ་དང་། ཁྱོད་ཚོས་བྱང་ཕྱོགས་ཀྱི་མཚམས་ནས་ཤར་ཕྱོགས་ཀྱི་རྒྱ་མཚོའི་བར་དུ་ཚད་ན་དེ་ནི་ཤར་ཕྱོགས་ཀྱི་ས་མཚམས་ཡིན།
[19] ལྷོ་ཕྱོགས་ཀྱི་ས་མཚམས་ནི་ཐལ་མཱར་ནས་ཀཱ་དེའེ་ཤཱའི་མེ་རི་བཱའི་ཆུ་རྣམས་དང་། ཨེ་ཅིབ་ཀྱི་གཙང་པོ་ཆུང་ཆུང་རྣམས་བརྒྱུད་ནས་རྒྱ་མཚོར་བསླེབ་པ་དང་། དེ་ནི་ལྷོ་ཕྱོགས་ཀྱི་ས་མཚམས་ཡིན།
[20] ནུབ་ཕྱོགས་ཀྱི་ས་མཚམས་ནི་རྒྱ་མཚོ་ཡིན་ཞིང་། ལྷོ་ཕྱོགས་ཀྱི་ས་མཚམས་ནས་ཧ་མཱད་ཁར་གྱི་ཁ་གཏད་ས་དེ་ནི་ནུབ་ཕྱོགས་ཀྱི་ས་མཚམས་ཡིན།
[21] ཁྱོད་ཚོས་ཡེས་ར་ཨེལ་གྱི་སྡེ་ཁག་བཞིན་དུ་ས་འདི་སྒོས་ཤིག
[22] ཁྱོད་རྣམས་དང་ཁྱོད་ཀྱི་ནང་དུ་ཡོད་པའི་ཕྱི་ཕྱོགས་པ་རྣམས་ལ་གཏོགས་བའི་ཕྱིར་དུ། མ་འོངས་པར་ཁྱོད་ཚོས་རྒྱན་བླང་སྟེ་ས་འདི་ནོར་སྐལ་དུ་སྒོས་ཤིག་དང་། དེ་དག་གིས་ཁྱོད་ཀྱི་ནང་དུ་བུ་ཕྲུག་སྐྱེ་བས། ཁྱོད་ཅག་གིས་དེ་རྣམས་ནི་ས་གནས་སུ་སྐྱེས་པའི་ཡེས་ར་ཨེལ་པ་རྣམས་བཞིན་དུ་འཛིན་དགོས་ཤིང་། དེ་རྣམས་ལའང་ཡེས་ར་ཨེལ་གྱི་སྡེ་ཁག་ནང་དུ་ཁྱོད་ཅག་དང་མཉམ་དུ་རྒྱན་བླང་སྟེ་ས་བསྒོས་ནས་ནོར་སྐལ་ཐོབ་པར་འགྱུར་ཞིང་།
[23] མ་འོངས་པར་སྡེ་ཁག་གང་ཞིག་གི་ནང་དུ་ཕྱི་ཕྱོགས་པ་གནས་ཡོད་ན། ཁྱོད་རྣམས་ཀྱིས་གནས་དེ་རུ་དེ་དག་ལ་ནོར་སྐལ་སྒོས་ཤིག་ཅེས་གཙོ་བོ་ཡ་ཝཱེས་གསུངས་སོ།།