[1] ཁྱོད་ཚོས་རྒྱན་བླངས་ཏེ་ནོར་སྐལ་དུ་ས་བགོད་དུས། རིང་ཚད་ལ་སྤྱི་ལེ་བཅུ་གཉིས་ར་ཕྱེད་ཀ་དང་། ཞེང་ལ་སྤྱི་ལེ་བཅུ་ཡི་ས་སྐལ་ཞིག་དམ་པར་འགྱུར་ཆེད་ཡ་ཝཱེ་ལ་ཕུལ་ཞིག་དང་། དེའི་ས་ཁུལ་ཡོངས་ཀྱང་དམ་པ་ཡིན།
[2] དེའི་ནང་ནས་རིང་ཚད་ལ་ཁྲུ་ཉེར་བརྒྱ་ལྔ་བཅུ་དང་། ཞེང་ལའང་ཁྲུ་ཉེར་བརྒྱ་ལྔ་བཅུ་ཡོད་པའི་ཕྱོགས་བཞི་པོ་གྲུ་བཞི་ཅན་གྱི་ས་ཞིག་གཙང་ཁང་ལས་ཕྱིར་འཇོག་དགོས་པ་དང་། དེའི་མཐའ་སྐོར་དུ་ཁྲུ་ཉེར་ལྔ་ཡོད་པའི་ས་སྟོང་ཞིག་འཇོག་དགོས།
[3] ཁྱོད་རྣམས་ཀྱིས་ཚད་པའི་དམ་པའི་གནས་ལས་རིང་ཐུང་ལ་སྤྱི་ལེ་བཅུ་གཉིས་དང་། ཞེང་ལ་སྤྱི་ལེ་ལྔ་ཡི་ས་ཞིག་ཚད་དེ། ནང་དུ་གཙང་ཁང་ཡོད་དགོས་པ་དང་། དེ་ནི་དམ་པའི་དམ་གནས་ཡིན་ནོ།།
[4] དེ་ནི་ས་ཁུལ་ཡོངས་ཀྱི་དམ་པའི་གནས་ཏེ། གཙང་ཁང་ནང་དུ་ཞབས་ཏོག་བྱ་བ་དང་། ཡ་ཝཱེ་ལ་བློ་ཉེ་ཞིང་ཞབས་ཕྱི་སྒྲུབ་པའི་མཆོད་དཔོན་རྣམས་ལ་དབང་ཞིང་། དེ་ནི་ཁོ་ཚོའི་ཁང་པའི་ས་དང་གཙང་ཁང་གི་ཕྱིར་དུ་གནས་དམ་པར་འགྱུར།
[5] ཡང་རིང་ཚད་ལ་སྤྱི་ལེ་བཅུ་གཉིས་དང་ཕྱེད་ཀ་ཡོད་པ་དང་། ཞེང་ལ་སྤྱི་ལེ་གཉིས་ཡོད་པའི་ས་གཞན་ཞིག་ཡོད་པ་དེ་ནི། གཙང་ཁང་ནང་དུ་ཞབས་ཏོག་བྱ་བའི་ལེ་ཝི་པ་ལ་དབང་ཞིང་། ཁང་པ་ཉི་ཤུ་དེའི་ས་སྐལ་དུ་འགྱུར་རོ།།
[6] ཁྱོད་རྣམས་ཀྱིས་ཞེང་ལ་སྤྱི་ལེ་གཉིས་དང་ཕྱེད་ཀ། རིང་ཚད་ལ་སྤྱི་ལེ་བཅུ་གཉིས་དང་ཕྱེད་ཀའི་ས་ཞིག་བགོས་ཏེ་གྲོང་ཁྱེར་གྱི་རྨང་གཞི་རུ་འཛུགས་དགོས་ཤིང་། དེ་ནི་ཁྱོད་ཚོས་ཕུལ་བའི་དམ་པའི་གནས་ཀྱི་འགྲམ་དུ་ཡེས་ར་ཨེལ་གྱི་ཁྱིམ་རྒྱུད་ཡོངས་ལ་དབང་ངོ་།
[7] རྒྱལ་པོར་དབང་བའི་ས་ནི་ཁྱོད་ཚོས་ཕུལ་བའི་དམ་གནས་དང་གྲོང་ཁྱེར་གྱི་རྨང་གཞིའི་ས་ཡི་འགྲམ་དུ་ཡོད་དགོས་པ་དང་། གཅིག་ནི་ཁྱོད་ཚོས་ཕུལ་བའི་དམ་གནས་སུ་ཁ་གཏད་ཅིང་། ཅིག་ཤོས་ནི་གྲོང་ཁྱེར་གྱི་རྨང་གཞིའི་ས་ལ་ཁ་གཏད་དགོས་ཏེ། ནུབ་ཕྱོགས་ནས་ས་དེའི་ནུབ་ཕྱོགས་ཀྱི་ས་མཚམས་དང་། ཤར་ཕྱོགས་སུ་ས་དེའི་ཤར་ཕྱོགས་ཀྱི་ས་མཚམས་ལ་རིང་ཚད་ནི་ཕྱོགས་ཁག་རེ་རེར་བགོས་པའི་ས་དང་གཅིག་ཡིན་དགོས།
[8] ས་སྐལ་འདི་ནི་ཡེས་ར་ཨེལ་གྱི་ནང་དུ་རྒྱལ་པོ་རྣམས་ལ་དབང་ཞིང་། ངས་བསྐོས་པའི་རྒྱལ་པོ་རྣམས་ཀྱིས་ད་ཕྱིན་ཆད་ངའི་མི་སྡེ་རྣམས་ལ་གཉའ་གནོན་བྱ་མི་རུང་བར། ཕྱོགས་ཁག་བཞིན་དུ་ཡེས་ར་ཨེལ་གྱི་ཁྱིམ་རྒྱུད་རྣམས་ལ་ས་བགོ་དགོས།
[9] གཙོ་བོ་ཡ་ཝཱེས་འདི་སྐད་དུ། ཀྱེ་ཡེས་ར་ཨེལ་གྱི་རྒྱལ་པོ་རྣམས། ཁྱོད་ཚོས་སྤྱད་པ་ད་དུང་མ་ལོངས་སམ། ཁྱོད་ཚོས་བཙན་ཤུགས་དང་མེད་པར་བཟོ་བའི་དོན་རྣམས་ཚར་དུ་གཅད་དེ། དྲང་བདེན་དང་བདེན་པ་ཉིད་སྤྱོད་ཅིག ད་ཕྱིན་ཆད་ངའི་མི་སྡེའི་ནོར་སྐལ་འཕྲོག་བཅོམ་མ་བྱེད་ཅེས་གཙོ་བོ་ཡ་ཝཱེས་གསུངས་སོ།།
[10] ཁྱོད་ཚོས་དྲང་བདེན་གྱི་རྒྱ་མ་དང་། དྲང་བདེན་གྱི་འཇལ་ཆས་སྤྱོད་ཅིག་དང་།
[11] སྲ་གཟུགས་ཚད་བྱེད་ཀྱི་ཨེ་ཕཱ་དང་གཤེར་གཟུགས་ཚད་བྱེད་ཀྱི་ཆུ་བེན་ཞེས་པ་གཉིས་ནི་གཅིག་འདྲ་ཡིན་དགོས་ཤིང་། ཆུ་བེན་གཅིག་ནི་ཁལ་གྱི་བཅུ་ཆའི་གཅིག་སྟེ། ཨེ་ཕཱ་གཅིག་ཀྱང་ཁལ་གྱི་བཅུ་ཆའི་གཅིག་ཡིན་ཏེ། ཐམས་ཅད་ཁལ་གྱི་འཇལ་ཆས་ཚད་གཞི་བཞིན་ལེན་དགོས།
[12] ལྗིད་ཚད་རྩིས་གཞི་ནི་སྲང་ཞེས་པ་གཅིག་ནི་གཱེ་ར་ཉི་ཤུ་དང་། སྲང་ཉི་ཤུའི་ཁར། སྲང་ཉེར་ལྔ་དང་སྲང་བཅོ་ལྔ་བསྣན་ན་ཁྱོད་ཚོའི་མཱེ་ན་གཅིག་ཡིན།
[13] ཁྱོད་ཚོས་ཕུལ་དགོས་པའི་མཆོད་རྫས་ནི་འདི་ལྟ་སྟེ། གྲོ་ཁལ་གཅིག་ལ་ཨེ་ཕཱའི་དྲུག་ཆ་གཅིག་དང་། སོ་བ་ཁལ་གཅིག་ལའང་ཨེ་ཕཱའི་དྲུག་ཆ་གཅིག་ཕུལ་དགོས་སོ།།
[14] ཡང་སྣུམ་ནི་འདི་ལྟར་ཕུལ་དགོས་ཏེ། ཆུ་བེན་གྱིས་འཇལ་ནས་ཁལ་གཅིག་ལ་ཆུ་བེན་གྱི་བཅུ་ཆའི་གཅིག་ཕུལ་དགོས་པ་དང་། གང་ལ་ཞེ་ན། ཁལ་གཅིག་ནི་ཕཱ་ཐུ་བཅུ་དང་ཡང་ན་ཁལ་གཅིག་ཡིན་ནོ།། ཅིའི་ཕྱིར་ཞེ་ན། ཆུ་བེན་བཅུ་ནི་ཁལ་གཅིག་ཡིན་པའི་ཕྱིར།
[15] ཡེས་ར་ཨེལ་གྱི་ས་བཅུད་འཛོམས་པའི་རྩྭ་ཐང་ནས་ལུག་ཉེར་བརྒྱའི་ནང་དུ་ལུ་གུ་ཞིག་ཕུལ་དགོས་ཏེ། མཆོད་རྫས་འདི་དག་ནི་དཀར་མཆོད་དང་། སྦྱིན་སྲེག་གི་མཆོད་པ་དང་། ཞི་བདེའི་མཆོད་པར་ཕུལ་དགོས་པ་དང་། དེ་དག་གི་ཆེད་དུ་སྡིག་པ་བཤགས་པའི་ཕྱིར་ཡིན་ཞེས་གཙོ་བོ་ཡ་ཝཱེས་གསུངས་སོ།།
[16] ཡུལ་ཁམས་ནང་གི་མི་སྡེ་ཀུན་གྱིས་ཡེས་ར་ཨེལ་གྱི་རྒྱལ་པོར་འབུལ་བ་ཕུལ་དགོས་ཏེ།
[17] རྒྱལ་པོས་དུས་ཆེན་དང་། ཟླ་མཇུག་དང་། ངལ་གསོ་བའི་དུས་ཏེ་ཡེས་ར་ཨེལ་གྱི་ཁྱིམ་རྒྱུད་རྣམས་ཀྱིས་ཐག་བཅད་པའི་དུས་ཆེན་གྱི་ནང་དུ། སྦྱིན་སྲེག་གི་མཆོད་པ་དང་། དཀར་མཆོད་དང་། མཆོད་པ་འབུལ་དགོས་ལ། ཁོང་གིས་སྡིག་བཤགས་ཀྱི་མཆོད་པ་དང་། དཀར་མཆོད་དང་། སྦྱིན་སྲེག་གི་མཆོད་པ་དང་། ཞི་བདེའི་མཆོད་པ་འབུལ་ཕྱིར་གྲ་བསྒྲིགས་བྱས་ཏེ་ཡེས་ར་ཨེལ་ཁྱིམ་རྒྱུད་རྣམས་ཀྱི་ཕྱིར་དུ་སྡིག་པ་བཤགས་དགོས་སོ།།
[18] དེའང་གཙོ་བོ་ཡ་ཝཱེས་འདི་སྐད་དུ། ཟླ་དང་པོའི་ཚེས་གཅིག་གི་ཉིན་ཁྱོད་ཀྱིས་སྐྱོན་མེད་པའི་གླང་དར་མ་ཞིག་བླང་སྟེ་གནས་མཆོག་གཙང་བར་མཛོད་ཅིག
[19] མཆོད་དཔོན་གྱིས་སྡིག་པ་བཤགས་ཕྱིར་གྲ་བསྒྲིགས་བྱས་པའི་ཕྱུགས་ཟོག་གི་ཁྲག་ཅུང་ཙམ་བླངས་ཏེ། གཙང་ཁང་གི་སྒོ་ལྡང་དང་། མཆོད་ཁྲིའི་ཟུར་བཞི་དང་། ད་དུང་ནང་ཁྱམས་ཀྱི་སྒོ་ལྡང་ཐོག་ཏུ་བསྐུ་ཞིག
[20] གཙང་ཁང་དམ་པར་སྡིག་པ་བཤགས་པའི་ཕྱིར་དུ། ཟླ་དང་པོའི་ཚེས་བདུན་གྱི་ཉིན། གསོད་ནོར་གྱི་ཉེས་པ་སྤྱད་པ་དང་ཡང་ན་བླུན་རྨོངས་སྒོ་ནས་ཉེས་པ་སྤྱད་པའི་མི་ལ་ཁྱོད་ཀྱིས་དེ་ལྟར་བྱ་དགོས།
[21] ཟླ་དང་པོའི་ཚེས་བཅུ་བཞིའི་ཉིན་ཁྱོད་རྣམས་ཀྱིས་ཉིན་ཞག་བདུན་གྱི་རིང་ལ་པེ་སག་གི་དུས་ཆེན་བསྲུང་དགོས་ཏེ། དུས་ཆེན་ནང་དུ་ཁྱོད་ཚོས་སྐྱུར་མེད་པའི་བེག་ལེབ་ཟ་དགོས།
[22] ཉིན་དེར་རྒྱལ་པོས་རང་དང་ཡུལ་ཁམས་ནང་གི་མི་སྡེ་ཀུན་གྱི་ཕྱིར་དུ་གླང་དར་མ་ཞིག་སྡིག་པ་བཤགས་པའི་མཆོད་པར་གྲ་སྒྲིག་བྱ་དགོས་ཤིང་།
[23] དུས་ཆེན་གྱི་ཉིན་བདུན་པོར་དེ་ཡིས་ཉི་མ་རེ་རེ་བཞིན་ཡ་ཝཱེའི་ཕྱིར་དུ། སྐྱོན་མེད་པའི་གླང་དར་མ་བདུན་དང་། ལུག་ཐུག་བདུན་སྦྱིན་སྲེག་གི་མཆོད་པའི་ཆེད་དུ་གྲ་སྒྲིག་བྱེད་དགོས་ཏེ། ཡང་ཉི་མ་རེ་རེར་ར་ཐུག་ཅིག་གྲ་སྒྲིག་བྱས་ཏེ་སྡིག་པ་བཤགས་པའི་མཆོད་པར་ཕུལ་དགོས།
[24] ཡང་དེས་དཀར་མཆོད་ཀྱང་གྲ་སྒྲིག་བྱ་དགོས་ཏེ། གླང་དར་མ་གཅིག་ནི་ཕྱེ་སྤྱི་བྲེ་བཅུ་བདུན་དང་མཉམ་དུ་ཕུལ་ཞིང་། ལུག་ཐུག་གཅིག་ནི་ཕྱེ་སྤྱི་བྲེ་བཅུ་བདུན་དང་མཉམ་དུ་ཕུལ་དགོས་ཏེ། ཕྱེ་སྤྱི་བྲེ་བཅུ་བདུན་རེ་རེའི་ནང་དུ་སྣུམ་སྤྱི་བྲེ་གསུམ་བླུག་དགོས་པ་དང་།
[25] ཟླ་བདུན་པའི་ཚེས་བཅོ་ལྔ་སྟེ། དུས་ཆེན་སྲུང་བའི་དུས་སུ། དེས་ཀྱང་དེ་ལྟར་བྱ་དགོས་ཤིང་། པེ་སེག་དུས་ཆེན་གྱི་སྡིག་བཤགས་ཀྱི་མཆོད་པ་དང་། སྦྱིན་སྲེག་གི་མཆོད་པ་དང་། དཀར་མཆོད་དང་། སྣུམ་གྱི་སྲོལ་བཞིན་དུ་སྤྱོད་པར་བྱའོ་ཞེས་གསུངས་སོ།།