[1] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། ཁྱོད་ཀྱིས་ཐཱར་གྱི་རྒྱལ་པོ་ལ་འདི་ལྟར་དུ་སྨོས་ཤིག གཙོ་བོ་ཡ་ཝཱེས་འདི་སྐད་དུ་གསུངས་ཏེ། ཁྱོད་ཀྱི་སེམས་སུ་ང་རྒྱལ་ཆེ་ཞིང་ན་རེ། དཀོན་མཆོག་ནི་ང་རང་སྟེ། ང་ནི་རྒྱ་མཚོའི་དབུས་སུ་དཀོན་མཆོག་གི་བཞུགས་ཁྲིར་བཞུགས་དོ་སྨྲས་ཤིང་། དོན་དངོས་སུ་ཁྱོད་ནི་མི་ཞིག་ཡིན་པ་ལས་དཀོན་མཆོག་མིན་པར། ཡིན་ཡང་ཁྱོད་ཀྱི་སེམས་སུ་རང་ཉིད་ནི་དཀོན་མཆོག་ཡིན་པར་འདོད་དོ།།
[3] ཁྱོད་ནི་དཱ་ནེ་ཨེལ་ལས་ཀྱང་ལྷག་པར་མཁས་པས། ཁྱོད་ལས་སྦ་ཐུབ་པའི་གསང་བའི་དོན་གང་ཡང་མེད།
[4] ཁྱོད་ཀྱིས་རང་གི་བློ་གྲོས་དང་བློ་རིག་ལ་བརྟེན་ནས། རང་གི་ཕྱིར་དུ་རྒྱུ་ནོར་ལོངས་སྤྱོད་ཐོབ་ནས། ཐོབ་པའི་གསེར་དང་དངུལ་དག་རང་གི་བང་མཛོད་དུ་བཞག་གོ །
[5] ཁྱོད་ཀྱིས་རང་ཉིད་ཀྱི་ཚོང་དོན་ཕྱོགས་ཀྱི་བློ་གྲོས་ཆེན་པོར་བརྟེན་ཏེ། ཉིད་ཀྱི་རྒྱུ་ནོར་འཕེལ་བཅུག་སྟེ། ཡང་ཉིད་ཀྱི་ནོར་ལོངས་སྤྱོད་ཀྱི་ཕྱིར་དུ་སེམས་སུ་ང་རྒྱལ་སྐྱེས་པས།
[6] གཙོ་བོ་ཡ་ཝཱེས་འདི་སྐད་དུ། ཁྱོད་ཀྱི་སེམས་སུ་རང་ཉིད་དཀོན་མཆོག་ཡིན་པར་འདོད་པས།
[7] ངས་ཕྱི་ཕྱོགས་པ་སྟེ། ཡུལ་ཁམས་ཀུན་ནས་ཆེས་དྲག་ཤུལ་ཅན་དེ་ཁྱོད་ལ་རྒོལ་དུ་འོང་འཇུག་ཅིང་། དེ་དག་གིས་རལ་གྲི་བཏོན་ཏེ། ཁྱོད་ཀྱིས་བློ་གྲོས་ངང་ཐོབ་པའི་ཡིད་དུ་འོང་བའི་དངོས་པོ་དག་ལ་རྒོལ་བར་འགྱུར་ཞིང་། ཁྱོད་ཀྱི་གཟི་བརྗིད་དེ་བཙོག་པར་འཇུག་གོ །
[8] དེ་དག་གིས་ཁྱོད་ས་དོང་དུ་དབྱུག་སྟེ། ཁྱོད་ནི་གསད་དེ། རྒྱ་མཚོའི་དབུས་སུ་འཆི་བར་འགྱུར།
[9] ཁྱོད་གསོད་མཁན་གྱི་མདུན་དུ། ཁྱོད་ཀྱིས་ད་དུང་ང་དཀོན་མཆོག་ཡིན་ཞེས་ཟེར་ནུས་སམ། ཁྱོད་གསོད་མཁན་གྱི་ལག་ཏུ། ཁྱོད་མི་ཡིན་པ་ལས་དཀོན་མཆོག་མ་ཡིན་ནོ།།
[10] མཚན་སྐྱི་མ་བཅད་པའི་མི་བཞིན་དུ། ཁྱོད་ནི་ཕྱི་ཕྱོགས་པའི་ལག་ཏུ་འཆི་བར་འགྱུར་ཞིང་། གང་ལ་ཞེ་ན། འདི་ནི་ངས་སྔོན་ན་གསུངས་པ་ལགས་ཤེས་གཙོ་བོ་ཡ་ཝཱེས་འདི་སྐད་དུ་གསུངས་སོ།།
[11] གཙོ་བོ་ཡ་ཝཱེའི་བཀའ་ནི་ཡང་བསྐྱར་ང་ལ་བྱུང་སྟེ་འདི་སྐད་དུ།
[12] ཀྱེ་མིའི་བུ། ཁྱོད་ཀྱིས་ཐཱར་གྱི་ཆེད་དུ་སྐྱོ་གླུ་ཞིག་རྩོམས་ཤིག་དང་། དེ་ལ་འདི་ལྟར་དུ་སྨྲོས་ཤིག གཙོ་བོ་ཡ་ཝཱེས་འདི་སྐད་དུ་གསུངས་ཏེ། ཁྱོད་ནི་ཚད་ལྡན་ཅན་དང་ཕུན་སུམ་ཚོགས་པ་ཡིན་ཞིང་། ཤེས་རབ་ལྡན་པ་དང་། གཏན་ནས་མཛེས་པ་ཡིན།
[13] ཁྱོད་སྔོན་ན་ཨེ་དེན་ལྡུམ་རར་ཡོད་དུས། པད་མ་རཱ་ག་དང་། གཡང་ཊི་སེར་པོ་དང་། རྡོ་རྗེ་ཕ་ལམ་དང་། གཡུ་འཁོར་ལོ་ཅན་དང་། མཆོང་དང་། གཡང་ཊི་སྔོན་པོ་དང་། རིན་ཆེན་སྔོན་པོ་དང་། མར་གད་དང་། རྫུལ་བཅས་རིན་པོ་ཆེ་སྣ་ཚོགས་ནི་ཁྱོད་ཀྱི་གྱོན་གོས་དང་། རིན་ཆེན་རྡོ་རིགས་ཀྱི་བཞུགས་ཁྲི་ནི་གསེར་གྱིས་གྲུབ་པ་དང་། དེ་ཐམས་ཅད་ནི་ཁྱོད་ཉིད་མཛད་པའི་ཉིན་ལ་གྲ་སྒྲིག་བྱས་ཟིན་ནོ།།
[14] ཁྱོད་ནི་བཞུགས་ཁྲི་སྲུང་མཁན་དང་། སྣུམ་གྱིས་བྱུགས་པའི་ཀེ་རུབ་ཡིན་ཞིང་། དཀོན་མཆོག་གི་རི་དམ་པར་ངས་ཁྱོད་བསྐོས་པས། ཁྱོད་ནི་འོད་ཟེར་མེ་བཞིན་འཕྲོས་པའི་རིན་པོ་ཆེའི་དབུས་སུ་མཆིས་ཤིང་།
[15] ཁྱོད་མཛད་པའི་ཉིན་མོ་ནས་ཁྱོད་ནང་དུ་སྡིག་པ་བྱུང་པའི་བར་དུ། ཁྱོད་ཀྱི་སྤྱོད་པ་ཐམས་ཅད་ལ་སྐྱོན་བརྗོད་རྒྱུ་ཅི་ཡང་མེད་དེ།
[16] ཁྱོད་ཀྱི་ཚོང་དར་ཞིང་རྒྱས་པའི་ཕྱིར། ཁྱོད་ཀྱི་ནང་དུ་བཙན་ཤུགས་ཅན་གྱི་དོན་གྱིས་བཀང་སྟེ། ཁྱོད་ཀྱིས་ཀྱང་སྡིག་པ་བྱས་པས། ངས་ཀྱང་ཁྱོད་ནི་མི་གཙང་པའི་རྫས་སུ་བརྩིས་ནས། དཀོན་མཆོག་གི་རི་བོ་ལས་ཁྱོད་བཏོན་ནོ།། ཀྱེ་བཞུགས་ཁྲི་སྲུང་མཁན་གྱི་ཀེ་རུབ་ལགས། ངས་ཁྱོད་ནི་འོད་ཟེར་མེ་བཞིན་འཕྲོས་པའི་རིན་པོ་ཆེའི་དབུས་སུ་མེད་པར་མཛད་དོ།།
[17] ཅིའི་ཕྱིར་ཞེ་ན། རང་ཉིད་བྱད་ལེགས་པས་ཁྱོད་རང་ང་རྒྱལ་སྐྱེས་ཤིང་། ཡང་ཁྱོད་ཀྱི་མཛེས་སྡུག་གིས་ཁྱོད་ཀྱི་ཤེས་རབ་བརླགས་པས། ངས་ཁྱོད་ནི་ས་གཞི་རུ་དོར་ཏེ། རྒྱལ་པོ་རྣམས་ཀྱིས་མཐོང་པའི་ཕྱིར་དུ། དེ་དག་གི་མདུན་དུ་བཞག་པ་ཡིན།
[18] ཁྱོད་ཀྱི་སྡིག་པ་ཟབ་ཅིང་། ཚོང་དོན་གྱི་ཕྱོགས་ཀྱི་སྡིག་པས་ཁྱོད་ཀྱི་དམ་པའི་གནས་བཙོག་པར་བཟོས་པས། ངས་ཁྱོད་ཀྱི་དཀྱིལ་ནས་མེ་ཞིག་བཏོན་ཏེ། མི་དེས་ཁྱོད་བསྲེག་པར་འགྱུར་ལ། ཁྱོད་ལ་ལྟད་མོ་ལྟ་མཁན་ཚང་མའི་མདུན་དུ། ངས་ཁྱོད་ས་ཐང་གི་ཐལ་དུ་བསྒྱུར་བར་བྱ།
[19] མི་རིགས་སོ་སོ་ལས་ཁྱོད་ངོ་ཤེས་མཁན་གྱིས་ཁྱོད་ཀྱི་ཕྱིར་དུ་འཇིགས་ཤིང་སྐྲག་པ་དང་། ཁྱོད་ལ་འཇིགས་རུང་གི་གནོད་འཚེ་ཐེབས་པར་འགྱུར་ཞིང་། དེ་ནས་ཁྱོད་ནི་གཏན་དུ་གནས་པར་མི་འགྱུར་རོ།།
[20] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[21] ཀྱེ་མིའི་བུ། ཚི་ཏུན་གྱི་ཕྱོགས་སུ་གདོང་སྒྱུར་ནས། དེ་ལ་རྒོལ་བའི་ལུང་སྟོན་ཞིག
[22] ཁྱོད་ཀྱིས་འདི་ལྟར་དུ་སྨྲོས་ཤིག གཙོ་བོ་ཡ་ཝཱེས་འདི་སྐད་དུ་གསུངས་ཏེ། ཀྱེ་ཚི་ཏུན། ངས་ཁྱོད་ནི་དགྲ་རུ་འཛིན་ཞིང་། ཁྱོད་ཀྱི་ནང་ནས་ང་ལ་གཟི་བརྗིད་ཐོབ་པར་འགྱུར་ལ། ངས་དེའི་སྟེང་དུ་ཞལ་ཆད་གཅོད་ཅིང་། ངའི་དམ་པ་ཉིད་མངོན་པར་འགྱུར་བའི་ཚེ་མི་ཡིས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་རོ།།
[23] ངས་ཚི་ཏུན་གྱི་ནང་དུ་རིམས་ནད་གཏོང་སྟེ། དེའི་ལམ་སྲང་རྣམས་སུ་ཁྲག་བཞུར་འཇུག་ཅིང་། རལ་གྲིས་ཕྱོགས་ཀུན་ནས་དེ་ལ་རྒོལ་ཞིང་། བསད་པར་གྱུར་བའི་མི་རྣམས་གྲོང་ཁྱེར་ནང་དུ་ལོག་པར་བཅུག་ན་མི་ཡིས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་རོ།།
[24] དེ་ནས་ཕྱོགས་བཞིའི་ཡོད་ཚད་ཀྱིས་ཡེས་ར་ཨེལ་གྱི་ཁྱིམ་རྒྱུད་ལ་སྡང་ཞིང་། དེ་ནས་ཁོ་ཚོའི་ཕྱོགས་སུ་མི་ལ་འཛེར་བའི་ཚེར་མ་དང་། མི་སྡུག་པར་མཛད་པའི་གཟེ་མ་ར་མགོ་རུ་མི་བྱའོ།། དེ་ནས་མི་ཡིས་ང་ནི་གཙོ་བོ་ཡ་ཝཱེ་ལགས་ཡིན་པ་རྟོགས་པར་འགྱུར་རོ།།
[25] གཙོ་བོ་ཡ་ཝཱེས་འདི་སྐད་དུ་གསུངས་པ་དང་། ངས་ཡེས་ར་ཨེལ་གྱི་ཁྱིམ་རྒྱུད་ནི་མི་རིགས་སོ་སོའི་ནང་སྟེ། དེ་རྣམས་གང་ས་གང་དུ་ཁ་ཐོར་དུ་སོང་བ་ལས་བསྡུ་བའི་ཚེ་ན། ངས་དེ་དག་གི་ནང་དང་། མི་རྒྱུད་ཀུན་གྱི་མིག་མདུན་དུ་ཉིད་ཀྱི་དམ་པ་ཉིད་མངོན་པར་འགྱུར་ལ། ཡེས་ར་ཨེལ་གྱི་ཁྱིམ་རྒྱུད་ནི་རང་ཡུལ་ཏེ། ངས་རང་གི་བྲན་པོ་ཡ་ཀོབ་ལ་བྱིན་པའི་ཡུལ་ཁམས་སུ་གནས་བར་འགྱུར།
[26] ངས་དེ་དག་ལ་སྡང་པའི་ཕྱོགས་བཞིའི་མི་སྡེ་ཀུན་ལ་ཉེས་ཆད་བཅད་རྗེས། དེ་དག་བདེ་བླག་ངང་གནས་ཤིང་། ཁྱིམ་གཞི་འཛུགས་ཤིང་། རྒུན་འབྲུམ་ར་བ་བཙུགས་ནས། དེ་དག་བདེ་བླག་ངང་གནས་བར་གྱུར་ན། མི་ཡིས་ང་ནི་ཡ་ཝཱེ་སྟེ་ཁོ་ཚོའི་དཀོན་མཆོག་ལགས་ཡིན་པ་རྟོགས་པར་འགྱུར་རོ།།