[1] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། མ་གཅིག་ལས་སྐྱེས་པའི་བུད་མེད་གཉིས་ཡོད་དེ།
[3] དེ་གཉིས་པོས་ཨེ་ཅིབ་ཡུལ་ནས་ལོག་གཡེམ་བྱས་ཏེ། གཞོན་དུས་སུ་ལོག་གཡེམ་བྱས་ནས། ཡུལ་དེར་དེ་གཉིས་ཀྱི་བྲང་ཁར་མི་ཡིས་རེག་སྟེ། ཡུལ་དེར་དེ་གཉིས་ཀྱི་བུ་མོ་གཙང་མའི་ནུ་མར་མི་ཡིས་རྩེ་སྟེ་རེག་ཅིང་།
[4] དེ་གཉིས་ལས་ཨ་ཅེ་མིང་དུ་ཨོ་ཧོ་ལཱ་དང་། སྲིང་མོའི་མིང་དུ་ཨོ་ཧོ་ལི་བཱ་སྟེ། དེ་གཉིས་པོ་ང་ལ་མནའ་མར་བྱིན་ཏེ། བུ་དང་བུ་མོ་སྐྱེས་པ་དང་། དེ་གཉིས་ཀྱི་མིང་བརྗོད་ན། ཨོ་ཧོ་ལཱ་ནི་སཱ་མར་ཡ་དང་། ཨོ་ཧོ་ལི་བཱ་ནི་ཡེ་རུ་སཱ་ལེམ་ཡིན་ནོ།།
[5] ཨོ་ཧོ་ལཱ་ང་མནའ་མར་བྱུན་རྗེས་ད་དུང་ལོག་གཡེམ་སྤྱད་དེ། ཨ་སུར་པའི་དམག་ཡིན་པའི་རང་ཉིད་ཀྱི་དགའ་བའི་གྲོགས་ལ་ཆགས་པ་དང་།
[6] དེ་དག་ནི་སྤྱི་དཔོན་དང་མགོ་དཔོན་བྱེད་པའི་གོས་སྨུག་པོ་གྱོན་མཁན་ཡིན་པ་དང་། དེ་དག་ནི་བྱད་བཟང་སྙིང་སྟོབས་ཅན་གྱི་ན་གཞོན་ཡིན་ཞིང་། རྟ་ལ་ཞོན་པའི་རྟ་དམག་ཡིན།
[7] ཨོ་ཧོ་ལཱ་ནི་ཨ་སུར་པ་དེ་དག་ལས་ཆེས་བྱད་ལེགས་པའི་ན་གཞོན་དང་ལོག་གཡེམ་བྱས་ཤིང་། མོས་རང་ཉིད་ཡིད་སྨོན་སྐྱེས་སའི་མི་རེ་རེ་དང་དེ་དག་གི་སྐུ་འདྲ་རྣམས་ཀྱི་ཕྱིར་དུ་རང་ཉིད་བཙོག་པར་བཟོས་ཤིང་།
[8] ཨེ་ཅིབ་ཡུལ་གྱི་གཡེམ་སྤྱོད་དང་མོ་ཁ་མ་བྲལ་ཏེ། དུས་དེར་མོ་ལོ་ན་གཞོན་ཞིང་། མི་ནི་མོ་དང་འགྲོགས་ཏེ། བུ་མོ་གཙང་མ་ཡིན་པའི་མོའི་ནུ་མར་རྩེ་སྟེ་རེག་ཅིང་། རང་ཉིད་ཀྱི་འདོད་ཆགས་དེ་མོའི་ཐོག་ཏུ་བླུགས་སོ།།
[9] དེ་བས་ངས་མོ་ནི་མོས་ཡིད་སྨོན་བྱེད་པའི་ཨ་སུར་པ་སྟེ། མོ་དགའ་བའི་གྲོགས་ལག་ཏུ་གཏད་དེ།
[10] མི་དེ་དག་གིས་མོའི་ཁོག་སྨད་མངོན་པར་བཅུག་སྟེ། མོའི་བུ་དང་བུ་མོ་དག་བཙོན་དུ་ཁྲིད་ཅིང་། རལ་གྲིས་མོ་བསད་དེ། བུད་མེད་རྣམས་ཀྱི་ནང་དུ་མོའི་མིང་བརླགས་སོ།། གང་ལ་ཞེ་ན། དེ་དག་གིས་མོར་ཉེས་ཆད་བཅད་པའི་ཕྱིར།
[11] མོའི་སྲིང་མོ་ཨོ་ཧོ་ལི་བཱ་ཡིས་དེ་མཐོང་ཡང་། རང་གི་འདོད་ཆགས་ཀྱི་སྟེང་ནས་ཨ་ཅེ་ལས་ཀྱང་རབ་ཏུ་དྲགས་ཤིང་། མོའི་གཡེམ་སྤྱོད་ནི་ཨ་ཅེའི་གཡེམ་སྤྱོད་ལས་ཀྱང་དྲགས་སོ།།
[12] སྤྱི་དཔོན་དང་མགོ་དཔོན་བྱེད་པའི་ཨ་སུར་པ་སྟེ། ཡིད་དུ་འོང་བའི་གོས་གྱོན་པའི་དམག་དང་། རྟ་ཞོན་པའི་རྟ་དམག་དག་ལ་མོས་ཤིན་ཏུ་ཞེན་ཆགས་ཤིང་། དེ་དག་ཐམས་ཅད་བྱད་བཟང་སྙིང་སྟོབས་ཅན་གྱི་ན་གཞོན་ཡིན་ནོ།།
[13] ངས་མོ་ནི་བཙོག་པར་བཟོས་པ་མཐོང་སྟེ། ཁོ་མོ་ལྕམ་སྲིང་གཉིས་ཀྱི་སྤྱོད་ལམ་གཅིག་མཚུངས་སོ།།
[14] ཨོ་ཧོ་ལི་བཱ་ཡིས་ལོག་གཡེམ་ལྷག་པར་བྱས་ནས། རྩིག་ངོས་སུ་བྲིས་པའི་འདྲ་པར་ཏེ། ཚོན་མདོག་ཅན་གྱིས་བྲིས་པའི་ཀལ་དི་པའི་གཟུགས་བརྙན་མོས་མཐོང་སྟེ།
[15] འདྲ་པར་དེ་ཚོའི་རྐེད་པར་སྐེད་རགས་བཅིངས་ཤིང་། མགོ་ལ་ཐུར་དུ་འཕྱང་པའི་རས་དཀྲིས་ཡོད་པ་དང་། དེ་ཚོར་བལྟས་ཚེ་མགོ་དཔོན་དང་འདྲ་ཞིང་། པཱ་པིས་ལུན་གྱི་མི་དང་མཚུངས་ཤིང་། ཀལ་དི་ཡུལ་ནི་དེ་ཚོའི་སྐྱེས་ས་ཡིན་ནོ།།
[16] ཨོ་ཧོ་ལི་བཱ་ཡི་མིག་གིས་མཐོང་མ་ཐག་ཏུ། དེ་དག་ལ་ཡིད་སྨོན་སྐྱེས་ཤིང་། མོས་ཀལ་དི་ཡུལ་དུ་དེ་ཚོར་ཐུག་ཏུ་ཕོ་ཉ་རྣམས་མངགས་པ་དང་།
[17] དེ་ནས་པཱ་པིས་ལུན་གྱི་མི་འོངས་ནས། མིའི་བརྩེ་དུང་གི་མལ་ཁྲིར་འཛེགས་ཏེ། མོ་དང་ལོག་གཡེམ་བྱས་ཏེ་མོ་བཙོག་པར་བཟོས་ཤིང་། མོ་ལ་དེ་དག་གིས་བཙོག་པར་བཟོས་རྗེས་སེམས་ནི་དེ་དག་དང་ཐག་ཇེ་རིང་དུ་སོང་སྟེ།
[18] མོའི་ཉིད་ཀྱི་གཡེམ་སྤྱོད་མངོན་པར་གྱུར་ཏེ། རང་གི་ཁོག་སྨད་ཕྱིར་མངོན་པས། སྔོན་ངའི་སེམས་མོའི་ལྕམ་དང་ཇེ་རིང་དུ་སོང་པ་བཞིན། ངའི་སེམས་ནི་མོ་དང་རིང་དུ་སོང་།
[19] དེའི་སྟེང་དུ་མོས་ཨེ་ཅིབ་ཡུལ་ན་ལོག་གཡེམ་བྱས་པའི་རང་གི་ན་གཞོན་གྱི་དུས་རྣམས་དྲན་ནས། ལྷག་པར་ལོག་གཡེམ་བྱས་སོ།།
[20] མོས་རང་གི་དགའ་བའི་གྲོགས་ལ་ཡིད་སྨོན་སྐྱེས་ཤིང་། དེ་དག་གི་ཁོག་སྨད་ནི་བོང་བུའི་ཁོག་སྨད་བཞིན་དང་། དེ་དག་གིས་ཁམས་དཀར་འབྱིན་པ་ནི་རྟ་བཞིན་ནོ།།
[21] དེ་ལྟར་ཁྱོད་ཀྱིས་རང་གི་ན་གཞོན་དུས་ལ་འདོད་གཡེམ་བྱས་པ་དེ་དྲན་ཞིང་། དུས་དེར། ཨེ་ཅིབ་པས་ཁྱོད་ཀྱི་ནུ་མར་རྩེ་སྟེ་རེག་ཅིང་། ཁྱོད་ན་གཞོན་དུས་ཀྱི་བྲང་ཁར་རྩེ་སྟེ་རེག་གོ །
[22] དེ་བས་ཀྱེ་ཨོ་ཧོ་ལི་བཱ། གཙོ་བོ་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་ཀྱི་སེམས་ཀྱིས་རིང་དུ་སོང་བའི་ཁྱོད་ཀྱི་དགའ་བའི་གྲོགས་དེའི་ཡིད་སེམས་གཡོ་བར་བཅུག་སྟེ། ཁྱོད་ལ་རྒོལ་དུ་ངས་དེ་དག་ཕྱོགས་བཞི་ནས་འཁྲིད་འོང་ཞིང་།
[23] དེ་དག་ནི་པཱ་པིས་ལུན་པ་དང་། ཀལ་དི་པ། ཕེ་ཀོད་པ་དང་། ཤོ་ཨ་པ་དང་། ཀོ་ཨ་པ་རྣམས་དང་ལྷན་ཅིག་ཏུ་ད་དུང་ཨ་སུར་པ་ཡོད་ལ། དེ་དག་ཐམས་ཅད་ནི་སྤྱི་དཔོན་དང་མགོ་དཔོན་དང་། དམག་དཔོན་དང་དམག་མི་བྱེད་པའི་བྱད་བཟང་སྙིང་སྟོབས་ཅན་གྱི་ན་གཞོན་ཡིན་ཞིང་། ཐམས་ཅད་རྟ་ལ་ཞོན་མཁན་ཡིན་ནོ།།
[24] དེ་དག་གིས་མཚོན་ཆ་བཟུང་སྟེ། ཤིང་རྟ་དང་དམག་རྟ། དམག་དཔུང་ཆེན་པོ་དང་བཅས་འོངས་ཏེ་ཁྱོད་ལ་རྒོལ་བར་འགྱུར་ཞིང་། དེ་དག་གི་ལག་ཏུ་ཕུབ་ཆེ་ཆུང་བཟུང་སྟེ། རྨོག་ཞྭ་གྱོན་ཞིང་། ཕྱོགས་བཞི་ནས་དམག་བསྒྲིགས་ཏེ་ཁྱོད་ལ་རྒོལ་ཞིང་། ཡང་ངས་ཉེས་ཆད་གཅོད་པའི་དབང་དེ་དག་ལ་སྟེར་ཞིང་། དེ་དག་གིས་རང་ཉིད་གོམས་པ་ལྟར་ཁྱོད་ལ་ཉེས་ཆད་གཅོད་པར་འགྱུར།
[25] ཡང་ངས་ཉིད་ཀྱི་ཞེ་སྡང་ཁྱོད་ཀྱི་སྟེང་དུ་གཏོར་ཞིང་། དེ་ཚོས་ཁྱོད་ལ་ཁོང་ཁྲོ་ཆེན་པོས་ལུགས་སྤྱོད་དེ། ཁྱོད་ཀྱི་སྣ་དང་རྣ་བ་གཅད་ཅིང་། ཁྱོད་ཀྱི་ལྷག་ལུས་རྣམས་ནི་རལ་གྲི་འོག་ཏུ་འགྱེལ་བར་འགྱུར་ལ། དེ་ཚོས་ཁྱོད་ཀྱི་བུ་དང་བུ་མོ་རྣམས་འཛིན་ཏེ། ཕྱི་ལུས་རྣམས་མེས་མིད་པར་འགྱུར།
[26] དེ་དག་གིས་ཁྱོད་ཀྱི་གོས་རྣམས་བཤུས་ཤིང་། ཁྱོད་ཀྱི་ཡིད་དུ་འོང་བའི་རྒྱན་ཆ་རྣམས་འཕྲོག་ཅིང་།
[27] དེ་ལྟར། ཁྱོད་ཀྱི་གཡེམ་སྤྱོད་དང་ཨེ་ཅིབ་ཡུལ་ནས་ཁྱོད་ལ་འགོས་པའི་གཡེམ་སྦྱོར་ནི་ངས་ཁྱོད་ལས་བྲལ་བར་མཛད་ཅིང་། དེ་ནས་ཁྱོད་ཀྱི་མིག་གིས་དེ་དག་ལ་མི་རེ་ཞིང་། ཁྱོད་ཀྱིས་ཨེ་ཅིབ་ཡུལ་ཡང་དྲན་པར་མི་འགྱུར་རོ་ཞེས་གསུངས་སོ།།
[28] གང་ལ་ཞེ་ན། གཙོ་བོ་ཡ་ཝཱེས་འདི་སྐད་དུ། ལྟོས་ཤིག ངས་ཁྱོད་ནི་རང་སེམས་རིང་དུ་སོང་པའི་མིའི་ལག་སྟེ། རང་ཉིད་སྡང་པའི་མིའི་ལག་ཏུ་གཏོད་ཅིང་།
[29] དེ་དག་གིས་ཁྱོད་ལ་ཞེ་སྡང་འཛིན་ཞིང་། ཁྱོད་ཀྱི་འབད་པས་ཐོབ་པ་རྣམས་འཕྲོག་པར་འགྱུར་ཞིང་། ཁྱོད་ནི་གཅེར་བུར་ལུས་པར་འཇུག་པ་དང་། དེ་ནས་ཁྱོད་ཀྱི་ལོག་གཡེམ་བྱས་པའི་ཁོག་སྨད་དང་། འདོད་གཡེམ་དང་གཡེམ་སྦྱོར་དག་ཕྱིར་མངོན་པར་འགྱུར་རོ།།
[30] དོན་དེ་དག་ནི་ཁྱོད་ཀྱི་ཐོག་ཏུ་འབྱུང་ཞིང་། གང་ལ་ཞེ་ན། ཁྱོད་ནི་ལོག་གཡེམ་བྱེད་དུ་ཕྱི་ཕྱོགས་པའི་རྗེས་སུ་འབྲངས་ཏེ། དེ་ཚོའི་སྐུ་འདྲས་ཁྱོད་བརླགས་པར་གྱུར་བའི་ཕྱིར།
[31] དེའང་ཁྱོད་ནི་རང་གི་ལྕམ་གྱི་ལམ་ལ་ཞུགས་པས། ངས་མོའི་ཕོར་པ་ཁྱོད་ཀྱི་ལག་ཏུ་གཏོད་པར་འགྱུར་ཞེས་གསུངས་སོ།།
[32] གཙོ་བོ་ཡ་ཝཱེས་འདི་སྐད་དུ། ཁྱོད་ཀྱིས་རང་གི་ལྕམ་གྱིས་འཐུངས་པའི་ཕོར་པ་ལས་བཏུང་བར་འགྱུར་ཞིང་། ཕོར་པ་དེ་ནི་ཆེ་ཞིང་གཏིང་ལ། མང་པོ་ཤོང་བས། ཁྱོད་ནི་འཕྱ་དགོད་དང་ཟུར་ཟའི་ཡུལ་དུ་འགྱུར་ཞིང་།
[33] ཁྱོད་ནི་ཆང་གིས་རབ་ཏུ་བཟི་ཞིང་། སྡུག་བསྔལ་གྱིས་ཁེངས་ཤིང་། དེ་ནི་འཇིགས་སྐྲག་དང་སྟོངས་པའི་ཕོར་པ་སྟེ། ཁྱོད་ཀྱི་ལྕམ་སཱ་མར་ཡའི་ཕོར་པ་ཡིན་ནོ།།
[34] ཁྱོད་ཀྱིས་ཕོར་པ་འདི་ལས་བཏུང་ཞིང་། བཏུང་ཚར་བར་འགྱུར་ལ། དེ་ནས་ཕོར་པ་དེ་ གཅོག་པ་དང་། རང་གི་བྲང་ཁ་རྨོས་པར་འགྱུར་རོ།། གང་ལ་ཞེ་ན། དེ་ནི་ངས་སྔོན་ལ་གསུངས་ཟིན་པའོ་ཞེས་གཙོ་བོ་ཡ་ཝཱེས་འདི་སྐད་དུ་གསུངས།
[35] དེ་བས་གཙོ་བོ་ཡ་ཝཱེས་འདི་སྐད་དུ། ཁྱོད་ཀྱིས་ང་བརྗེད་དེ། ང་རང་རྒྱབ་ཏུ་དོར་བས། ཁྱོད་ཀྱིས་རང་གི་འདོད་གཡེམ་དང་གཡེམ་སྦྱོར་གྱི་མཇུག་འབྲས་ཏེ། བུད་མེད་གཉིས་ཀྱི་ལོག་གཡེམ་བྱས་པའི་མཇུག་འབྲས་ཁུར་དགོས་ཞེས་གསུངས་སོ།།
[36] ཡང་གཙོ་བོ་ཡ་ཝཱེས་ང་ལ་འདི་སྐད་དུ། ཀྱེ་མིའི་བུ་ཁྱོད་ཀྱིས་ཨོ་ཧོ་ལཱ་དང་། ཨོ་ཧོ་ལི་བཱ་ལ་ཉེས་ཆད་གཅོད་དམ། ཁྱོད་ཀྱིས་དེ་གཉིས་ལ་ཞེན་ལོག་གི་དོན་རྣམས་སྟོན་ཞིག
[37] གང་ལ་ཞེ་ན། དེ་གཉིས་ཀྱིས་ལོག་གཡེམ་བྱས་ཏེ། ལག་པར་ཁྲག་འགོས་པ་དང་། རང་གི་སྐུ་འདྲ་རྣམས་དང་མཉམ་དུ་ལོག་གཡེམ་སྤྱད་དེ། རང་གི་དོན་དུ་ང་ལས་ཆད་པའི་བུ་ཕྲུག་རྣམས་ཀྱང་མེར་རྒྱུ་ནས། སྐུ་འདྲའི་མཆོད་རྫས་སུ་ཕུལ་ཏོ།།
[38] དེ་ཀུན་གྱི་སྟེང་དུ་ཉིན་དེ་ལ། དེ་ཚོས་ངའི་དམ་པའི་གནས་བཙོག་པར་བཟོས་པའི་དོན་འདི་ཡང་ང་ལ་བྱས་ཤིང་། ངའི་ངལ་གསོ་བའི་ཉིན་ཡང་བརླགས་པར་གྱུར།
[39] དེ་དག་གིས་རང་གི་བུ་ཕྲུག་རྣམས་བསད་དེ་སྐུ་འདྲར་ཕུལ་ཏེ། ཉིན་དེར་ཡང་ངའི་དམ་པའི་གནས་སུ་ཞུགས་ཏེ། དམ་པའི་གནས་བརླགས་པ་དང་། དེ་ནི་ཁོ་ཚོས་ངའི་དམ་གནས་སུ་སྤྱད་པའི་ལས་སོ།།
[40] དེའི་ཐོག་ཏུ་ཁྱོད་ཚོས་རྒྱང་རིང་ཡུལ་ནས་སྐྱེས་པ་རྣམས་བསུ་རུ་ཕོ་ཉ་མངགས་ཏེ། ཕོ་ཉ་དེར་བསླེབས་ཚེ། སྐྱེས་པ་དེ་རྣམས་ཀྱང་འོངས་ཤིང་། ཁྱོད་ཀྱིས་དེ་ཚོའི་ཕྱིར་དུ་ཁྲུས་བྱེད་པ་དང་། མིག་ལ་རྩི་བསྐུས་ཤིང་། རྒྱན་གྱིས་སྤྲས་ནས།
[41] ཁྱོད་རྣམས་ཡིད་དུ་འོང་བའི་མལ་ཁྲི་སྟེང་དུ་བསྡད་དེ། མལ་ཁྲི་མདུན་དུ་ཅོག་ཙེ་ཞིག་བཞག་ཅིང་། ངའི་སྤོས་དང་སྣུམ་ནི་དེའི་སྟེང་དུ་བཞག་གོ །
[42] དེར་མི་ཚོགས་ཀྱིས་བདེ་ཞིང་སྐྱིད་པའི་ཅ་ཅོ་སྒྲོག་པའི་སྐད་དང་། མི་དཀྱུས་མ་དང་ཆང་པ་རྣམས་དབེན་སྟོང་དུ་འོངས་ནས། དེ་དག་གིས་བུད་མེད་གཉིས་ཀྱི་ལག་པར་གདུབ་བུ་དང་། མཛེས་པའི་ཅོད་པན་མགོ་ལ་བསྐོན་ནོ་ཞེས་གསུངས་སོ།།
[43] ཡང་ལོག་གཡེམ་བྱས་ནས་ཉམས་སུ་གྱུར་པའི་བུད་མེད་འདིའི་སྐོར་ལ་ངས་འདི་སྐད་དུ། ད་ལྟ་མི་གཞན་རྣམས་དེ་དང་ལོག་གཡེམ་བྱེད་དུ་ཆུགས་ཤིག གང་ལ་ཞེ་ན། མོ་ནི་མ་གཞི་གཡེམ་མ་ཞིག་ཡིན་པའི་ཕྱིར།
[44] མི་ནི་མོ་དང་འགྲོགས་ཤིང་། མི་ནི་ཅི་ལྟར་སྨད་འཚོང་མ་དང་འགྲོགས་པ་བཞིན་དུ། འདོད་གཡེམ་ཅན་གྱི་བུད་མེད་ཨོ་ཧོ་ལཱ་དང་ཨོ་ཧོ་ལི་བཱ་གཉིས་པོ་དང་ཡང་དེ་བཞིན་དུ་འགྲོགས་སོ།།
[45] ཡིན་ཡང་དྲང་བདེན་ཅན་གྱིས་གཡེམ་མ་དང་མི་ལ་ཁྲག་བཞུར་དུ་བཅུག་པའི་བུད་མེད་ཀྱི་ཉེས་ཆད་བཞིན་དེ་གཉིས་ལའང་ཉེས་ཆད་གཅད་པར་འགྱུར་ཏེ། གང་ལ་ཞེ་ན། ཁོ་ཚོ་ནི་གཡེམ་མ་ཡིན་ཞིང་། ལག་པར་ཁྲག་འགོས་ཡོད་པའི་ཕྱིར།
[46] ཅིའི་ཕྱིར་ཞེ་ན། གཙོ་བོ་ཡ་ཝཱེས་འདི་སྐད་དུ། ངས་མི་མང་པོ་ཞིག་དེ་གཉིས་པོར་རྒོལ་དུ་འོང་བར་བཅུག་སྟེ། དེ་གཉིས་སྐྲག་པར་འགྱུར་ཞིང་། མི་ཡིས་འཕྲོག་པར་འགྱུར་ཞིང་།
[47] མི་དེ་དག་གིས་དེ་གཉིས་རྡོ་རུབ་ལ་གཏོང་ཞིང་། རལ་གྲིས་གསོད་ཅིང་། ཡང་དེ་གཉིས་ཀྱི་བུ་དང་བུ་མོ་རྣམས་གསོད་ཅིང་། དེ་ཚོའི་ཁང་པ་རྣམས་མེས་བསྲེག་པར་འགྱུར།
[48] དེ་བཞིན་དུ། བུད་མེད་ཚང་མར་དྲན་སྐུལ་ཐོབ་ནས། ཁྱོད་ཀྱི་འདོད་གཡེམ་བཞིན་དུ་མི་སྤྱོད་པའི་ཕྱིར་དུ། ངས་འདོད་གཡེམ་དེ་ཡུལ་འདི་ལས་བར་དུ་གཅད་དོ་ཅེས་གསུངས་སོ།།
[49] མི་ཡིས་ཁྱོད་ཀྱི་ལོག་གཡེམ་བྱས་པའི་འབྲས་བུ་དེ་ལ་ཁྱོད་ཀྱི་ཐོག་ཏུ་ལན་འཇལ་ཞིང་། ཁྱོད་ཀྱིས་རང་ཉིད་ཀྱིས་སྐུ་འདྲར་དད་པའི་སྡིག་པ་ཁུར་དགོས་ལ། དེ་ནས་ཁྱོད་ཚོས་ང་ནི་གཙོ་བོ་ཡ་ཝཱེ་ལགས་ཡིན་པ་རྟོགས་པར་འགྱུར་རོ།།