[1] དེའང་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[2] ཀྱེ་མིའི་བུ། ཁྱོད་ཀྱིས་རང་གི་མི་སྡེའི་བུ་རྒྱུད་ལ་འདི་ལྟར་དུ་སྨྲོས་ཤིག ངས་ཡུལ་ཞིག་ལ་རལ་གྲི་ཐེབས་འཇུག་དུས། ཡུལ་མི་རྣམས་ཀྱིས་རང་གི་ནང་ནས་མི་ཞིག་བདམས་ཏེ། ཁོ་ཚོའི་སོ་པར་བཞག་ནས།
[3] མི་དེས་རང་གི་ཡུལ་ནང་རལ་གྲི་སླེབ་པ་མཐོང་ཚེ། དམག་དུང་འབུད་ཅིང་མི་སྡེ་ལ་ཉེན་བརྡ་གཏང་ན།
[4] དམག་དུང་ཐོས་ཀྱང་ཉེན་བརྡ་དང་ལེན་མ་བྱ་བའི་མི་ལ། རལ་གྲི་བསླེབས་ཏེ་ཁོ་མེད་པར་བཟོས་ཀྱང་། ཁོའི་སྡིག་པ་ནི་རང་གི་མགོར་འབབ་པར་འགྱུར།
[5] ཁོས་དམག་དུང་ཐོས་ཀྱང་ཉེན་བརྡ་དང་ལེན་མ་བྱས་པས། ཁོའི་སྡིག་པ་ནི་རང་གི་མགོར་འབབ་པར་འགྱུར་ཞིང་། གལ་ཏེ་ཁོས་ཉེན་བརྡ་དེ་དང་དུ་བླངས་ན། རང་གི་སྲོག་བསྐྱབ་ཐུབ་པར་འགྱུར་རོ།།
[6] ཡིན་ཡང་གལ་ཏེ་སོ་པ་དེས་རལ་གྲི་སླེབ་པ་མཐོང་བཞིན་དུ། དམག་དུང་མ་བུད་པར། ཐ་ན་མི་སྡེ་ལ་ཉེན་བརྡ་མ་བཏང་ན། རལ་གྲི་འོངས་ཏེ་ཁོ་ཚོའི་ནང་གི་མི་གཅིག་མེད་པར་བཟོས་ན། མི་དེ་རང་གི་སྡིག་པའི་ཕྱིར་དུ་མེད་པར་བཟོས་ཀྱང་། དེ་འཆི་བའི་ཕྱིར་དུ་ངས་སོ་པ་དེ་ལ་རྩད་གཅོད་པར་བྱའོ།།
[7] ཀྱེ་མིའི་བུ། ངས་ཁྱོད་ཡེས་ར་ཨེལ་ཁྱིམ་རྒྱུད་ཀྱི་སོ་པར་བསྐོས་པས། ཁྱོད་ཀྱིས་ངའི་ཞལ་གྱི་བཀའ་ལ་ཉན་ཏེ། ངའི་ཚབ་ཏུ་དེ་དག་ལ་ཉན་བརྡ་ཐོངས་ཤིག
[8] གལ་ཏེ་ངས་སྡིག་སྤྱོད་ལ་འདི་སྐད་དུ། ཀྱེ་སྡིག་སྤྱོད་ཁྱོད་ནི་འཆི་ངེས་ཡིན་ཞེས་གསུངས་པའི་ཚེ། ཨེ་ཟེ་ཀི་ཨེལ་ཁྱོད་ཀྱིས་དེ་རང་གི་སྤྱོད་ལམ་ལས་བྲལ་དུ་ཉེན་བརྡ་མ་བཏང་ན། སྡིག་སྤྱོད་དེ་རང་གི་སྡིག་པའི་ཕྱིར་དུ་འཆི་བར་འགྱུར་ཞིང་། དེ་འཆི་བའི་ཕྱིར་དུ་ངས་ཁྱོད་ལ་རྩད་གཅོད་པར་བྱའོ།།
[9] གལ་ཏེ་ཁྱོད་ཀྱིས་སྡིག་སྤྱོད་ལ་ཉེན་བརྡ་བཏང་སྟེ། མི་དེ་རང་གི་སྤྱོད་ལམ་ལས་བྲལ་བར་གྱུར་ཡང་། དེ་ད་དུང་མི་བྲལ་ན། མི་དེ་ནི་རང་གི་སྡིག་པའི་ཕྱིར་དུ་འཆི་བར་འགྱུར་ཞིང་། ཁྱོད་ཀྱིས་རང་སྲོག་བསྐྱབ་ཏོ།།
[10] ཀྱེ་མིའི་བུ། ཁྱོད་ཀྱིས་ཡེས་ར་ཨེལ་གྱི་ཁྱིམ་རྒྱུད་ལ་འདི་ལྟར་དུ། ཁྱོད་ཚོས་ན་རེ། ངེད་རང་གི་སྐྱོན་ཆ་དང་སྡིག་པ་ནི་ངའི་སྟེང་དུ་ཡོད་པས། དེའི་ཕྱིར་དུ་ངེད་རྣམས་ཉམ་ཐག་ཅིང་འཆི་བར་འགྱུར་བ་ལས། ཅི་ལྟར་གསོན་པར་འགྱུར་རམ་ཞེས་ཟེར་ན།
[11] ཁྱོད་ཀྱིས་ཁོ་ཚོར་འདི་ལྟར་དུ། གཙོ་བོ་ཡ་ཝཱེས་འདི་སྐད་དུ། སྡིག་སྤྱོད་ནི་རང་གི་སྤྱོད་ལམ་ལས་ལོག་ཅིང་གསོན་དུ་མ་གཏོགས་སྡིག་སྤྱོད་འཆི་བར་ང་མི་དགའོ་ཞེས་ངས་ཉིད་ཀྱི་གསོན་པ་ཉིད་དཔང་དུ་བཙུགས་ཏེ་གསུངས་པས། ཀྱེ་ཡེས་ར་ཨེལ་གྱི་ཁྱིམ་རྒྱུད། ཕྱིར་ལོག་ཅིག རང་གི་སྤྱོད་ལམ་ལས་ལོག་ཅིག ཁྱོད་ཅག་ཅི་ལ་འཆི་བར་འདོད་དམ་ཞེས་སྨྲོས་ཤིག
[12] ཀྱེ་མིའི་བུ། ཁྱོད་ཀྱིས་རང་གི་མི་སྡེའི་བུ་རྒྱུད་ལ་འདི་ལྟར་དུ་སྨྲོས་ཤིག མི་དྲང་བདེན་ཅན་གྱི་བདེན་པ་ཉིད་ཀྱིས་ཁོས་སྡིག་པ་བྱེད་པའི་དུས་སུ་དེ་སྐྱོབས་མི་ནུས་ཤིང་། སྡིག་སྤྱོད་ཀྱི་ལས་ངན་གྱིས་ཀྱང་ཁོས་རང་གི་ལས་ངན་པ་ལས་བྲལ་དུས་སུའང་ཁོ་ཉིད་འགྱེལ་བར་མི་འགྱུར། མི་དྲང་བདེན་ཅན་གྱིས་སྡིག་སྤྱོད་བྱེད་པའི་དུས་སུ་རང་གི་དྲང་བ་ཉིད་ཀྱིས་འཚོ་བར་མི་འགྱུར་རོ།།
[13] མི་དྲང་བདེན་ཅན་ལ་ངས་དེ་ངེས་བར་དུ་གསོན་འགྱུར་ཞེས་གསུངས་ཀྱང་། དེས་རང་གི་དྲང་བདེན་ལ་བློ་གཏད་དེ་ལམ་ངན་སྤྱད་ན། དེའི་དྲང་བདེན་ཡོད་ཚད་དྲན་པར་མི་འགྱུར་ཞིང་། དེ་ནི་རང་གིས་སྤྱད་པའི་སྡིག་པའི་ཕྱིར་དུ་འཆི་བར་འགྱུར་རོ།།
[14] ཇི་སྟེ་ངས་སྡིག་སྤྱོད་ལ། ཁྱོད་ནི་འཆི་ངེས་ཡིན་གསུངས་ཀྱང་། དེ་རང་གི་སྡིག་པ་ལས་ལོག་ཅིང་། དྲང་བ་ཉིད་དང་བདེན་པའི་ལས་བཞིན་དུ་སྤྱད་དེ།
[15] གཏའ་མར་བཞག་པ་ཕྱིར་སྤྲོད་པ་དང་། མི་ལས་འཕྲོགས་པའི་རྫས་རྣམས་འཇལ་བ་དང་། སྲོག་གནང་མཁན་གྱི་བཀའ་རྒྱ་བརྩིས་ཏེ། ལམ་ངན་མ་སྤྱད་ན། དེ་གསོན་པ་ལས་འཆི་བར་མི་འགྱུར་ལ།
[16] དེས་སྤྱད་པའི་སྡིག་པ་ཡོད་ཚད་ནི། དྲན་པར་མི་འགྱུར་ཞིང་། དེས་དྲང་བ་ཉིད་དང་བདེན་པའི་ལས་སྤྱད་པས་གསོན་པར་འགྱུར་རོ།།
[17] ཡང་ཁྱོད་ཀྱི་མི་སྡེས་ན་རེ། གཙོ་བོས་མཛད་པ་དྲང་བདེན་མིན་ཟེར་ཞིང་། དོན་དངོས་སུ་ཁོ་ཚོས་སྤྱད་པ་དྲང་བདེན་མ་ཡིན་ནོ།།
[18] མི་དྲང་བདེན་ཅན་ནི་རང་གི་བདེན་པ་ལས་བྲལ་ཏེ་ལམ་ངན་སྤྱད་ན། མི་དེ་ནི་ངན་སྤྱོད་ཀྱི་ཕྱིར་དུ་འཆི་བར་འགྱུར།
[19] འོན་ཀྱང་སྡིག་སྤྱོད་རང་གི་སྡིག་པ་ལས་བྲལ་ཏེ། བདེན་པ་ཉིད་དང་དྲང་པའི་ལས་བཞིན་དུ་སྤྱད་ན། ཁོ་ནི་ལས་དེ་ཕྱིར་དུ་གསོན་པར་འགྱུར་རོ།།
[20] ཁྱོད་ཚོས་ད་དུང་གཙོ་བོས་མཛད་པ་དྲང་བདེན་མིན་ཟེར་རམ། ཀྱེ་ཡེས་ར་ཨེལ་གྱི་ཁྱིམ་རྒྱུད་རྣམས། ངས་ཁྱོད་ཚོ་མི་རེ་རེས་སྤྱད་པའི་ལས་བཞིན་དུ་ཁྱོད་ལ་ཉེས་ཆད་གཅོད་དོ།།
[21] ངེད་ཅག་བཙོན་དུ་ཁྲིད་པའི་ལོ་བཅུ་གཉིས་པའི་ཟླ་བཅུའི་ཚེས་ལྔ་པར། མི་ཞིག་ཡེ་རུ་སཱ་ལེམ་ནས་ངའི་དྲུང་དུ་བྲོས་འོངས་ནས་ན་རེ། གྲོང་ཁྱེར་དགྲ་ལག་ཏུ་ཤོར་སོང་ཞེས་སྨྲས་བྱུང་།
[22] མི་དེ་མ་འོངས་པའི་སྔོན་དགོང་མོར་གཙོ་བོ་ཡ་ཝཱེའི་ཕྱག་ནི་ངའི་ཐོག་ཏུ་བཞག་སྟེ། ངའི་ཁ་འབྱེད་དུ་མཛད་པ་དང་། ཞོགས་པ་བསླེབས་ཏེ་མི་དེ་ངའི་དྲུང་དུ་འོངས་པ་ན། ངའི་ཁ་གྲགས་ཐུབ་པར་གྱུར་ནས་ལྐུགས་པར་མ་ལུས་སོ།།
[23] དེ་ནས་གཙོ་བོ་ཡ་ཝཱེའི་བཀའ་ནི་ང་ལ་བྱུང་སྟེ་འདི་སྐད་དུ།
[24] ཀྱེ་མིའི་བུ། ཡེས་ར་ཨེལ་ཡུལ་གྱི་གྱང་རོ་ནང་དུ་སྡོད་པའི་མི་དེ་རྣམས་ཀྱིས་རྒྱུན་དུ་ན་རེ། ཨབ་ར་ཧམ་གཅིག་པོར་ཡུལ་འདི་ནོར་སྐལ་དུ་ཐོབ་པ་དང་། ངེད་རྣམས་མི་གྲངས་མང་པས་ཡུལ་འདི་ནི་ངེད་རྣམས་ལ་ནོར་སྐལ་དུ་གནང་མི་འོས་སམ་ཟེར་བས།
[25] ཁྱོད་ཀྱིས་མི་དེ་དག་ལ་འདི་ལྟར་དུ། གཙོ་བོ་ཡ་ཝཱེས་འདི་སྐད་དུ་གསུངས་ཏེ། ཁྱོད་ཚོས་ཁྲག་ཡོད་པའི་མཆོད་རྫས་ཟ་ཞིང་། མིག་ཡར་བཏེགས་ནས་རང་གི་སྐུ་འདྲར་བལྟ་བ་དང་། ཡང་མིའི་ཁྲག་བཞུར་དུ་བཅུག་པས། ཁྱོད་ཚོར་ད་དུང་ཡུལ་འདི་ནོར་སྐལ་དུ་ཐོབ་འོས་སམ།
[26] ཁྱོད་ཚོས་རང་གི་རལ་གྲིར་བརྟེན་ནས་ཞེན་ལོག་གི་ལས་སྤྱད་དེ། མི་རེ་རེས་ཁྱིམ་མཚེས་ཀྱི་ཆུང་མར་བརླགས་པས། ཁྱོད་ཚོར་ད་དུང་ཡུལ་འདི་ནོར་སྐལ་དུ་ཐོབ་འོས་སམ་ཞེས་སྨྲོས་ཤིག
[27] ཁྱོད་ཀྱིས་དེ་དག་ལ་འདི་ལྟར་དུ། གཙོ་བོ་ཡ་ཝཱེས་འདི་སྐད་དུ། གྱང་རོ་ནང་དུ་ཡོད་པ་དག་རལ་གྲི་འོག་ཏུ་འགྱེལ་བར་འགྱུར། ཐང་ན་ཡོད་པ་དག་ངས་གཅན་གཟན་ལ་གཏད་དེ་བཟའ་བར་འགྱུར། རྫོང་དང་བྲག་ཕུག་ནང་ཡོད་པ་དག་རིམས་ནད་ཀྱིས་འཆི་བར་འགྱུར་ཞེས་ངས་ཉིད་ཀྱི་གསོན་པ་ཉིད་དཔང་དུ་བཙུགས་ཏེ་གསུངས་པ་ཡིན།
[28] ཅིའི་ཕྱིར་ཞེ་ན། ངས་ཡུལ་འདི་རབ་ཏུ་སྟོང་བར་བྱ་སྟེ། དེའི་སྟོབས་ཤུགས་ཀྱི་ཕྱིར་དུ་ཡོད་པའི་ང་རྒྱལ་རྣམས་ཉམས་པར་འགྱུར་ཞིང་། ཡེས་ར་ཨེལ་གྱི་རི་རྣམས་སྟོངས་ཤིང་། དེར་རྒྱུ་མཁན་སུའང་མེད་དོ།།
[29] ངས་དེ་དག་གིས་བྱས་པའི་ཞེན་ལོག་གི་དོན་རྣམས་ཀྱི་ཕྱིར་དུ། ཡུལ་འདི་རབ་ཏུ་སྟོང་བར་བྱས་ན། ཁོ་ཚོས་ང་ནི་ཡ་ཝཱེ་ལགས་ཡིན་པ་རྟོགས་པར་འགྱུར་རོ་ཞེས་སྨྲོས་ཤིག
[30] ཀྱེ་མིའི་བུ། ཁྱོད་ཀྱི་མི་སྡེས་མཁར་འགྲམ་དང་རང་ཁྱིམ་གྱི་ཁང་པའི་སྒོ་ཁར་ཁྱོད་གླེང་སྟེ། སྤུན་ཟླས་སྤུན་ཟླར་ཕན་ཚུན་ན་རེ། ཤོག་དང་། གཙོ་བོ་ཡ་ཝཱེ་ལས་འབྱུང་བའི་གསུངས་ལ་མཉན་ཞིག་ཟེར་ཞིང་།
[31] ངའི་མི་སྡེ་བཞིན་དུ། དེ་དག་ཚོ་དང་ཚོ་ཁྱོད་ཀྱི་དྲུང་དུ་འོངས་ཏེ། ཁྱོད་ཀྱི་མདུན་དུ་བསྡད་དོ།། དོན་དངོས་སུ་དེ་དག་གིས་ཁྱོད་ཀྱི་གཏམ་ལ་ཉན་རུང་དེ་བཞིན་མ་སྤྱད་དེ། ཅིའི་ཕྱིར་ཞེ་ན། ཁོ་ཚོས་རང་གི་ཁ་ནས་ཡིད་སྨོན་བྱེད་པར་སྟོན་ཞིང་། སེམས་ནི་མི་འོས་པའི་ཐོབ་ནོར་གྱི་རྗེས་སུ་འབྲངས་སོ།།
[32] ཁྱོད་ནི་དེ་ཚོའི་མིག་མདུན་དུ་སྙན་པའི་གླུ་ཞིག་དང་འདྲ་སྟེ། གླུ་སྐད་ཡག་ཅིང་། སྒྲ་སྙན་གཏོང་བ་སྙན་པ་ཙམ་ཡིན་ཏེ། གང་ལ་ཞེ་ན། དེ་ཚོས་ཁྱོད་ཀྱི་གཏམ་ལ་ཉན་རུང་དེ་བཞིན་དུ་མི་སྤྱོད་དོ།།
[33] ལྟོས་ཤིག དོན་འདི་འགྲུབ་པར་འགྱུར་ཞིང་། དུས་དེར་བསླེབ་ཚེ་ཁོ་ཚོས་རང་གི་ནང་དུ་ལུང་སྟོན་པ་ཞིག་ཡོད་པ་རྟོགས་པར་འགྱུར་རོ།།